1. 1 Tesalonikekarank 5:11 pormonnem ami soglim koslem kam kortat?

 TUMI tumchem Raj-ghor bandunk vo tem sarkem korunk modot kelea kai? Toxem zalear, tem toiar zalea uprant tumi thoim poilech pavtti mittingek gelim tednam tumi kitlim khuxal aslim tem tumkam ugddas asa astolo. Tumi Jehova Devache khub upkar attoile astole. Ani tumi survatechem git gailem tednam tumchem kalliz bhoron ailem astolem. Khorench, amchim bore toren bandlolim sobit Raj-ghoram Jehova Devak khub vakhannʼnni haddttat. Punn hea bandkama poros, anik ek torechem bandkam chodd moladik asa. Tem bandkam koslem? Tea bhoktechea zageancher ektthaim zaupi amchea bhav-bhoinnancho bhavarth ami bandun haddttat tednam, Jehova Devak ami anikui vakhannʼnni diunk xoktat. Ani apostl Paulun hea lekhantlem mukhel vers, tem mhunnttlear, 1 Tesalonikekarank 5:11-ntlim utram mhunnttlim tednam to pasun hench sangonk sodhtalo.—Vachat.

2. Hea lekhant ami kitem polloitolim?

² Ami amchea bhav-bhoinnank koxi urba diunk zai tea vixim apostl Paulun amkam ek ekdom borem udharonn dovorlem. Karonn tannem aplea bhav-bhoinnanchi poristhiti bore toren somzon ghetli. Tor hea lekhant, apostl Paulun aplea bhav-bhoinnank, (1) trasancho fuddo korunk, (2) eka-meka sangata xanti samballunk, ani (3) Jehovacher tancho bhavarth ghott korunk, koxi modot keli tem ami polloum-ia. Toxench, apostl Pauluchi dekh gheun aiz ami amchea bhav-bhoinnank koxi urba diunk zata tem pasun ami polloum-ia.—1 Kor. 11:1.

3. Paulun bhav-bhoinnank ek borem udharonn koxem dovorlem?

³ Pauluk svota zaun zaitea trasancho fuddo korunk poddlo. Tea pasot, bhav-bhoinnank trasancho fuddo korunk poddlo tednam to tanchi poristhiti somzon gheunk pavlo ani tankam doia-maia dakhounk pavlo. Ek pavtti, Pauluk poixeanchi oddchonn aili. Tednam  tacheo ani tachea sangata asloleancheo gorzo purnn korunk taka kam sodhunk poddlem. (Itihas 20:34) To tombu bandpachem kam kortalo. Tor to Korintant gelo tednam, tannem poilim Akuila ani Prisila, jim tombu bandpachem kam kortalim, tanchea sangata hem kam kelem. Punn “Dor Sonvara” to Judev ani Grik lokank porgott kortalo. Uprant, Silas ani Timot thoim aile tednam Paulu ‘soglo vell Devachem utor porgottit ravlo.’ (Itihas 18:2-5) Aplea jivitant Jehovachi seva korop sogleam-von chodd mhotvachem mhunn Paulu kednanch visronk na. Tannem porgottnnechea kamant khub vavr korun ani apleo svotacheo gorzo purnn korun ek bori dekh dovorli dekhun, to bhav-bhoinnank urba diunk pavlo. To bhav-bhoinnancho khub mog kortalo. Tea pasot, jivitachea uskeank lagon vo familicheo gorzo purnn korunk kotthin zatalem zalear pasun ‘odik boreo vo odik mhotvacheo vostu,’ tem mhunnttlear, Jehovache bhokte sombondit asloleo sogleo vostu korop chodd mhotvachem mhunn Paulun tanchea ugddasak haddlem.—Filp. 1:10.

4. Paulun ani Timotan, Tesalonikentlea bhav-bhoinnank dhumalleacho fuddo korunk koxi modot keli?

⁴ Tesalonikent novich sobha stapon zalea uprant thoinchea Kristanvank khub dhumallo sosunk poddlo. Tea vellar, virodheancho ek zomo, Pauluk ani Silasak sodhunk aile. Punn te tankam mellonk nant dekhun tannim “thoddea . . . bhavank nograchea monsubidaram-xim haddle” ani oxi bob marunk lagle: “Somrazache soglle kaide te moddtat.” (Itihas 17:6, 7) Tea vellar, halinch Kristanvam zalolim bhav-bhoinnam kitlim bhielim astolim. Ani Jehovache sevent tanchi urba unni zaunk xoktali. Punn toxem zalʼlem apostl Pauluk naka aslem. Apostl Pauluk ani Silasak thoinchean bhair soronk poddlem tem khorem. Punn he nove sobhechi kallji gheunk tannem ek bori manddavoll keli. Ti manddavoll kitem zaun asli? Tem amkam apostl Paulun Tesalonikekarank mhunnttlolea utrantlean kollon ieta. Tannem tankam oxem mhunnttlem: “Ami Timotak tumche-xim dhaddlo: to amcho bhav . . . tumkam ghottai diunche khatir ani tumcho bhavarth thiraunche pasot ani tumi bhogtat tea koxttam-dogdam modem konnuch halona zaunk ami taka tumche-xim patthoilo.” (1 Tes. 3:2, 3) Timotak pasun Listrant, aplea ganv-ghora astana chodd korun dhumallo sosunk poddlo. Tea vellar Paulun thoinchea bhav-bhoinnank koxi urba dili ani Jehovan tankam koxi modot keli tem Timotan polloilem. Ani hea pasot Tesalonikentlea bhav-bhoinnank pasun Jehova modot kortolo ani soglem tharear ghaltolo mhunn to tankam khatri diunk xoklo.—Itihas 14:8, 19-22; Heb. 12:2.

5. Eka vhoddilachea modoti thaun Bryant-ak koxi modot zali?

⁵ Paulun aplea bhavank anik khoinche vatten ghottai dili? Paulu ani Barnabas porot Listra, Ikonium, ani Antiokent aile tednam “dor-eke Povitr-Sobhek tannim zannte nemle.” (Itihas 14:21-23) Hea zanntteamnim vo vhoddilamnim sobhenk bhuzvonn dili mhunn kainch dubhav na. Aiz pasun vhoddil oxench kortat. Bryant nanvachea eka bhavak, vhoddilamnim koxi bhuzvonn dili tem polloum-ia. Bryant mhunntta: “Hanv 15 vorsancho zalo tednam mhozo bapui ghor soddun gelo ani avoik sobhentlean bhair kaddli. Tednam hanv khub nirax zalo ani mhojea adarak konnuch na oxem mhaka dislem. Tea vellar, Tony nanvacho ek vhoddil, mhoje lagim mittingek ani her vellar uloitalo. Kotthin poristhitincho khuxalkaien fuddo kelo toslea lokam vixim to mhaka sangtalo. Tannem mhaka Stotr 27:10 dakhoilem ani zaite pavtti to mhaka Hezekiachea udharonna vixim sangtalo. Tachea bapain ek bori dekh dovrunk na, punn Hezekian visvaxiponnan Jehovachi seva keli mhunn tannem mhojea ugddasak haddlem. Hea toren Tony-n mhaka urba dili mhunn hanv purnn vellachi seva korunk pavlo.” Tor vhoddilamno, tumi ‘doiall utram’ uloun konnank urba diunk zata?—Mho. 12:25.

6. Adlea visvaxi sevokanchim udharonnam uzar korun Paulun bhav-bhoinnank koxi urba dili?

⁶ Paulun aplea bhav-bhoinnank, ‘eka vhodda porzollit kupa vorim aslolea sakxidaranche urponje’ vixim sanglem. (Heb. 12:1) Adlea  kallar jielolea Jehovachea hea sevokank khub tras sosunk poddle. Tori astana Jehovache modotin tim hem soglem sosunk pavlim mhunn Paulun bhav-bhoinnanchea ugddasak haddlem. Tanchea udharonnantlean, hea bhav-bhoinnank pasun dhiran tanchea trasancho fuddo korunk ani ‘jivea Devachea xaracher’ tanchi nodor dovrunk modot zatoli mhunn Paulu zannam aslo. (Heb. 12:22) Tor aiz, Gideon, Barak, David, Samuel, ani adlea kallar jielolea Jehovachea her visvaxi sevokam vixim ami vachtat tednam amkam pasun dhir melltta nhoi! (Heb. 11:32-35) Toxench, aichea kallar jietolea bhav-bhoinnanchea udharonnantlean pasun amkam urba melltta. Ani heach pasot, ek bhav vo bhoinnichi jivitachi kanni vachun apleak koxi urba mellʼlli, tea vixim bhav-bhoinnam zaite pavtti mukhel ofisak chitteo dhaddttat.

7. Romkarank 14:19-21-ant Paulun sanglolea utrantlean ami kitem xikonk zata?

⁷ Ami amchea utramnim ani kornneamnim sobhent xanti samballunk modot kortat tednam ami amchea bhav-bhoinnank urba diunk pavtat. Eka vixoi-acher amchea bhav-bhoinnanchem chintop amche poros vegllem asonk puro. Punn tem Bible-achea totvam add vochona zalear, ami amkam zai tench korunk sodhinant. Oxem korun ami xanti samballunk pavtat. Romant aslole sobhent, Judev ani Judev naslolea Kristanvam modem kitem zalem tea vixim chintat. Moizesachea Kaidea khala tannim umkech torechem jevonn jevunk zainaslem. Punn Moizesacho Kaido kaddlea uprant, tannim sogle torechem jevonn jevunk zatalem. (Marku 7:19) Tor tednam thaun, thoddim Judev Kristanvam sogle torechem jevonn jevop sarkem mhunn chintʼtalim. Punn dusre vatten, her Judev Kristanvank oxem korop sarkem nhoi mhunn distalem. Hea karonnak lagon, sobhechi xanti piddʼddear zaunk lagli. Punn xanti samballop kitlem gorjechem tem Paulu zannam aslo. Ani osle vixoi, amche modem ani sobhent asloli xanti piddʼddear korunk xoktat mhunn Pauluk khobor asli. Hea pasot, tannem tankam oxem sanglem: “Mas khainastana, vo soro pienastana, vo tujea bhavak vo bhoinnik patkant ghalta tem korinastana ravlear odik borem.” (Romkarank 14:19-21 vachat.) Titlench nhoi, punn bhav-bhoinnank addkholl korina zaunk Paulu svota pasun bodlav korunk toiar aslo. (1 Kor. 9:19-22) Tor amchea bhav-bhoinnanchem chintop amche poros vegllem asta tea vellar, ami amkam zai toxench korunk sodhinant tednam ami tankam urba diunk pavtolim ani xanti samballunk pavtolim.

8. Ek mhotvacho vixoi suttavo korun sobhent xanti samballunk Paulun kitem kelem?

⁸ Mhotvachea vixoi-am vixim dusreanchem chintop vegllem aslem tednam pasun Paulun sobhent xanti koxi samballunk zai tea vixim ek borem udharonn dovorlem. Poilea xekddeantle sobhent Judev naslolea Kristanvancher, thoddea Kristanvamnim sunot korunk dobhav ghatlo. Sunot korina zalear bhaile lok tanchi chuk kaddttolim, oxem tankam distalem. (Gal. 6:12) Punn tankam sunot korchi goroz nasli oxem Pauluk distalem. Tori astana apnnak dista toxench korunk zai, oxem Paulun mhunnonk na. Punn khaltikaien ho vixoi Jerusalem-ant aslolea vhoddilank ani apostlank tannem kolloilʼlem. (Itihas 15:1, 2) Tor Paulun ho mhotvacho vixoi hea toren suttavo kelo mhunn sobhent khuxalkai ani xanti uronk pavli.—Itihas 15:30, 31.

9. Ami apostl Pauluchi dekh koxi gheunk zata?

⁹ Tor thodde pavtti, eka mhotvachea vixoi-a vixim bhav-bhoinnanchem chintop amchea poros vegllem asa zalear xanti samballunk ami kitem korunk zata? Sobhechi kallji gheunk Jehovan nemleat tanchem margdorxon ami apnnaunk zai. Zaite pavtti hem margdorxon amkam Bible-acher adarit prokaxonamnim vo sobhe udexim ieta tea margdorxona thaun melltta. Tor amkam kitem zai tacher chodd dhean dinastana, songottnne thaun ieta tem margdorxon ami pallttat tednam ami sobhent xanti samballunk pavtolim.

10. Sobhent xanti samballunk Paulun anik kitem kelem?

 ¹⁰ Sobhent xanti samballunk Paulun anik kitem kelem? Paulun bhav-bhoinnanchea chukincher nhoi, punn borea gunnancher dhean dilem. Udharonnak, tannem Romkarank chitt boroili tednam tea chittichea xevottak tannem zaitea bhav-bhoinnanchim nanvam boroilim ani tankam aslolea khas gunnam vixim boroilem. Tor ami Pauluchi dekh koxi gheunk zata? Ami amchea bhav-bhoinnanchea borea gunnam vixim ulounk zai. Ami oxem kortat tednam, sobhentlea bhav-bhoinnam sangata amchi ixttagot anik ghott zatoli ani oxe toren sobhent mog vaddttolo.

11. Sobhentlea her bhav-bhoinnam poros amchem chintop vegllem asa zalear ami kitem korunk zai?

¹¹ Thodde pavtti onubhov aslolea Kristanvam modem pasun vad-vivad zaunk xokta vo eka vixoi-a vixim tanchem chintop vegllem asonk xokta. Oxench Paulu ani tacho lagxilʼlo ixtt, Barnabasak ghoddlem. Barnabas Markuk tanchea sangata mixinori bhonvddek vhoronk sodhtalo. Punn Pauluk toxem naka aslem. Hea pasot, tanche bhitor ‘huzot zali vo tanche modem rag pettlo’ ani te sangata mellon bhonvddi korche nant mhunn tannim tharav ghetlo. (Itihas 15:37-39) Punn Pauluk, Barnabasak ani Markuk sobhechi ekvottai ani xanti ekdom mhotvachi asli. Hea pasot, magir tannim eka-meka sangata xanti keli. Ani tea uprant Barnabas ani Marku vixim uloitana Paulu tanche vixim borem uloilo. (1 Kor. 9:6; Kol. 4:10) Tor sobhent, her bhav-bhoinnam poros amchem chintop vegllem asa zalear, vad-vivad korche bodlek ami te suttave korunk zai ani bhav-bhoinnanchea borea gunnancher dhean diunk zai. Oxem kelear ami sobhent xanti ani ekvott samballunk pavtolim.—Ef. 4:3.

12. Amchea thoddea bhav-bhoinnank koslea poristhitincho fuddo korcho poddtta?

¹² Amchea bhav-bhoinnank urba diunk anik ek vatt mhunnttlear, Jehovacher tancho bhavarth ghott korunk tankam modot korop. Thoddea bhav-bhoinnanchim sotant naslolim familichim sodoxio, vo tanchea sangata kam kortat vo iskolant xiktat tim, tanchim fokannam kortat astolim. Vo thoddea bhav-bhoinnank ek gombhir duens zalam astolem vo tankam konnem tori dukhoilam astolem. Toxench, thoddeamnim bautizm gheun zaitim vorsam zaleant astolim ani khub vorsam porian tim ghoddie Devachea Rajeachi vatt polloitat astolim. Tor oslea poristhitimnim eka Kristanvachea bhavarthachi porikxa zaunk xokta. Poilea xekddeantlea Kristi sobhechea bhav-bhoinnank pasun osleach poristhitincho fuddo korcho poddlo. Tednam Paulun tankam koxi urba dili?

13. Tanche patiennek lagon dusrim fokannam kortalim tea Kristanvank apostl Paulun koxi modot keli?

¹³ Aplea bhav-bhoinnancho bhavarth ghott korunk Paulun Devachem Utor uzar kelem. Udharonnak, Judev lok Kristanv zalim tednam sotant naslolim tanchim familintlim sodoxio tancheo chuki kaddunk laglim astolim, ani Judevancho dhorm Kristanv dhorma poros vorto mhunn tankam sangonk laglim astolim. Tea vellar, tankam zobab diunk Judev Kristanvank ghoddie kotthin zalem astolem. Punn apostl Paulun Hebrevank boroilʼlea chittintlean tankam modot mellʼlli mhunn dubhav na. (Heb. 1:5, 6; 2:2, 3; 9:24, 25) Ani apostl Paulun tankam somzailem teach toren, tim tanchea soireank somzaunk pavlim astolim. Aiz pasun, thoddo lok amchea bhav-bhoinnanchim fokannam kortat vo tim kitem patietat tea vixim chuki kaddttat. Tor Paulu bhaxen, ami pasun hea bhav-bhoinnank Bible-acher adarit aslolim prokaxonam uzar korun, oslea munxank zobab diunk modot korunk zata. Zoxem, amchim bhurgim Rochnnar asa mhunn patietat dekhun iskolant ghoddie tanchim fokannam kortat astolim. Tor ami tankam koxi modot korunk zata? Was Life Created? ani The Origin of Life—Five Questions Worth Asking, hea pustikamnim asloli mahiti uzar korun, ek Rochnnar asa mhunn tim kiteak patietat tea vixim  dusreank somzaunk ami tankam modot korunk zata.

14. Porgottnnechea ani xikoupachea kamant bizi asonui Paulun kitem korunk vell kaddlo?

¹⁴ “Boreo kornnio” korun dusreank mog dakhounk Paulun bhav-bhoinnank urba dili. (Heb. 10:24) Paulun fokot utramninch nhoi punn kornneamnim pasun bhav-bhoinnank modot keli. Udharonnak, Judeiant bhuk poddli tednam thoinchea bhav-bhoinnank thoddeo gorjecheo vostu pavounk Paulun modot keli. (Itihas 11:27-30) Paulu sodanch porgottnnechea ani xikoupachea kamant bizi astalo. Punn aplea bhavank gorjecheo vostu mellonk modot korunk tannem veg-veglleo vatto sodhleo. (Gal. 2:10) Oxem korun, Jehova tanchi sodanch kallji ghetolo mhunn to aplea bhav-bhoinnank khatri diunk xoklo. Tor aiz ami amchea bhav-bhoinnancho bhavarth ghott korunk kitem korunk zata? Ek vatt mhunnttlear, odruxttank sampoddloleank modot korunk ami amcho vell, kola ani takot uzar korunk zata. Toxench, sonvsarbhor choltolea kamak ami denngim diunk zatat. Ami oxem kortat tednam Jehova amchea bhav-bhoinnank kednanch soddchona mhunn visvas dovrunk ami tankam modot kortat.

15-16. Bhavarth oskot zalʼlea Kristanvank ami koxi modot korunk zata?

¹⁵ Bhavarth oskot zalʼlea bhav-bhoinnank Paulun soddun diunk nant. Oxem korunk, apostl Paulun tankam doia-maia dakhoili ani mogall toren tanche lagim uloilo. (Heb. 6:9; 10:39) Udharonnak, tannem Hebrevank chitt boroili tednam tannem zaite pavtti “amkam” ani “ami” him utram uzar kelim. Oxem kelolean to solʼlo fokot teach Kristanvank nhoi, punn apnnakui lagu zata mhunn Paulun manun ghetlem. (Heb. 2:1, 3) Tor apostl Paulu bhaxen, ami pasun bhavarth oskot zalʼlea Kristanvank soddun dinant. Amkam tanchi khorench kallji asa mhunn ami dakhoitat. Toxench, ami tanchea sangata kitem uloitat tacheruch nhoi, punn koxe toren uloitat tacher ami dhean ditat. Oxem kelolean, ami tancho khorench mog kortat mhunn tankam dison ietolem ani tankam urba mellttoli.

 ¹⁶ Toxench, tim kortat tim borim kamam Jehova polloita mhunn Paulun bhav-bhoinnank khatri dili. (Heb. 10:32-34) Tor ami Pauluchi dekh koxi gheunk zata? Bhavarth oskot zalʼlea bhav-bhoinnank ami modot korunk zata. Hem korunk ami, tankam sot koxem mellʼllem tem vicharunk zata vo Jehovan tankam adim koxi modot keli tea vixim chintunk tankam urba diunk zata. Ani hea toren, tannim adim Jehovak aplo mog koso dakhoilo tem Jehova visronk na, ani fuddarakui to tankam kednanch soddchona mhunn tankam khatri diunk ami hi sondhi uzar korunk zata. (Heb. 6:10; 13:5, 6) Tor ami oxe toren tanche lagim uloitat tednam Jehovachi seva korit ravonk amchea mogall bhav-bhoinnanchi itsa anik vaddttoli.

17. Ami kosleo kola vaddoit ravonk zatat?

¹⁷ Zoso ek kamdar bandkam korit ravta tednam tachi kola vaddot voita, teach bhaxen, ami amchea bhav-bhoinnank urba diunk vavr korit ravtat tednam amchi kola pasun vaddot voitoli. Tor amchim bhav-bhoinnam trasancho fuddo kortat tednam ami tankam adlea kallar visvaxi ravon tras sosle tanchim udharonnam sangon modot korunk zata. Toxench, bhav-bhoinnam sangata xanti samballunk, ami tanchea borea gunnancher dhean diunk zata. Tanchem chintop amchea chintpa poros vegllem asa zalear vad-vivad korchea bodlek vo amchem tench khorem korche bodlek, ami xanti samballunk proitn korunk zai. Tea bhair, bhav-bhoinnancho bhavarth ghott korunk, ami tanchea sangata Bible-achea mhotvachea sotam vixim ulounk zata, tankam goroz asa tednam modot korunk zata, ani tancho bhavarth oskot zala zalear tankam urba diunk zata.

18. Tumi kitem korunk nichov kela?

¹⁸ Songottnnechea bandkamant bhag ghetat tim bhav-bhoinnam khorench khuxal ani dhadoxi zaunk pavtat. Ami pasun amchea bhav-bhoinnancho bhavarth bandun haddunk vavr kortat tednam amkam khuxalkai ani dhadosponn melltta. Aiz ami bandtat teo bilddingo sodankal togcheo nant mhunn ami ugddas dovrunk zai. Punn ami amcho bhav-bhoinnancho bhavarth ghott korunk vavurtat tednam tacho faido sasnak zatolo. Tor ‘eka-mekak dhir diunk ani eka-mekacho bhavarth ghott korunk vavr korit ravonk’ ami nichov korum-ia.—1 Tes. 5:11.