1. Zaitea lokank kamam vixim kitem dista?

TUMI ravtat tea zagear choddxea zannank kamam vixim koxem dista? Zaitea desamnim, aiz lok chodd koxtti vavr ani chodd voram kam kortat. Chodd korun, oslea lokank visov gheunk, aplea famili sangata vell sarunk, vo Deva vixim xikonk vell mellona. (Up. 2:23) Dusrea vatten, thoddea lokank kam korunkuch borem lagona ani apunn kam korinastana ravonk zaitim karonnam ditat.—Mho. 26:13, 14.

2-3. Jehovan ani Jezun kama vixim kosli dekh dovorlea?

² Sonvsarantle zaite lok, chodduch kam kortat vo korunk zai titlem kam korinant. Punn kamam vixim Jehovak ani Jezuk koxem dista tem polloum-ia. Jehovak kam korunk avoddtta mhunn ami zannant. Jezun hea vixim spoxtt sanglem. Tannem mhunnttlem: “Mhozo Bap ozun poriant vavr korit asa, toso hanv vavr korit asam.” (Juanv 5:17) Zaitea devdutank ani ho vhodd vixv rochunk Dev kitlo vavurlo astolo tem chintat. Hea sobit prithumer pasun Jehovachi zaiti rochnna amkam dison ieta. Stotrkaran tachea vixim sarkem sanglem: “Kitlim vichitr tujim kortutvam, Sorvespora! Kelai tem sogllem zannvaien kelai. Tujea rochnnamnim prithum upott bhorlea.”—St. 104:24.

³ Jezun aplea Bapachi dekh ghetli. Devan “ontrall tharailem vo rochlem” tednam, Putan tachi modot keli. Tannem Jehova sangata ek ‘huxar vavraddea’ sarkem kam kelem. (Mho. 8:27-31) Zaitea tempa uprant, prithumer ailo tednam tannem khub borim kamam keli. Tim kamam taka jevnnam sarkim aslim, ani tannem kelolea soglea kamam vorvim Devan taka dhaddlolo mhunn kollon ietalem.—Juanv 4:34; 5:36; 14:10.

4. Visov gheunchea vixim Jehova ani Jezu thaun ami kitem xikonk zata?

⁴ Jehovan ani Jezun koxtti vavr korun bori dekh dovorlea. Punn hacho orth ami visov ghevopuch nhoi kai? Toxem  na. Jehova kednanch thokona, tor taka visovachi goroz na. Punn Bible sangta, Jehovan sorg ani prithum rochlea uprant ‘tannem visov ghetlo ani to xitoll zalo.’ (Sutt. 31:17) Hacho orth, tannem aplem kam thamboilem ani apnnem kitem kel’lem tem polloun khuxal zaunk vell ghetlo. Jezu prithumer ail’lo tednam tannem koxtti vavr kelo tem khorem, tori punn visov gheunk ani aplea ixttam sangata khaunk-piunk tannem vell sarlo.—Mt. 14:13; Lukas 7:34.

5. Zaitea zannank kitem korunk kotthin zata?

⁵ Kam korunk Devachea lokamnim khuxal asonk zai mhunn Bible sangta. Tache sevok allxi nhoi, punn kam korpi asonk zai. (Mho. 15:19) Tumchea familicho samball korunk tumi ghoddie sirvis kortat astolim. Ani Kristachea dor eka xisak bori khobor porgott korchi ek zobabdari asa. Tori astana, tumi visov ghevop gorjechem. Tumchi sirvis, porgottnni ani visov tea-tea zagear dovrunk tumkam thodde pavtti kotthin zata kai? Kitlem kam korop ani kitlo visov ghevop hem amkam koxem kollttolem?

6. Jezun kamak ani visovak tea-tea zagear dovorlem mhunn Marku 6:30-34-antlean koxem kolltta?

⁶ Kamak tachea zagear dovorop gorjechem. Solomon Razan Devachea preronnan oxem boroilem: “Dor-eke vostuk ek vell asa.” Tannem rovunk, bandunk, roddunk, hansunk, nachunk ani her kamam korunk ek vell asa mhunn sanglem. (Up. 3:1-8) Tor kam korop ani visov ghevop, heo don vostu jivitant gorjecheo mhunn sarkem kollon ieta. Jezun kamak ani visovak tea-tea zagear dovorlem. Ek pavtt apostl khub porgottnni korun porot ietat. Te itle vavurle ki tankam jevunk legun fursot nasli. Jezun mhunnttlem: “Eke eksure svater tumi ekvodde ieiat ani matso visov gheiat.” (Marku 6:30-34 vachat.) Jezuk ani tachea xisank soglech pavtt zai titlo visov mellonk na, tori astana, tankam sogleank visovachi goroz asa mhunn Jezu zannam aslo.

7. Sabat disachea kaidea vixim zannam zalolean amkam koxi modot zata?

⁷ Amkam sogleank thodde pavtti visovachi goroz asta, vo amchea sodanchea kamam thaun kitem tori vegllem korchi goroz poddtta. Hem amkam Devan aplea adlea lokam pasot kelolea eka manddavolli thaun kollon ieta. Ti manddavoll mhunnttlear dor sumanak Sabat dis pallop. Aiz ami Moizesachea Somurti khala nant. Tori astana Sabata vixim zannam zalolean amkam faido zata ani kamak ani visovak to-to zago diunk modot zata.

8. Suttka 31:12-15 pormonnem, Sabat dis kiteak lagon aslo?

⁸ Devan sov ‘dis’ prithumer veg-veglleo vostu rochleo, ani uprant prithumer roch’chhem tannem bond kelem. (Ut. 2:2) Tori astana, Jehovak kam korunk borem dista, ani eke toren to “ozun porian vavr korit asa.” (Juanv 5:17) Utpoti pustokant sanglolea pormonnem, Jehovan sov dis kam korun satvea disak visov ghetlo. Teach toren tannem Israelitkarank dor satvea disak visov gheunk sanglem. Sabat dis aplea ani Israelitkaram modem aslolea korarachi ek khunna koxi asli mhunn Jehovan sanglem. To ‘visovacho dis’ aslo ani Jehovak ‘to povitr’ aslo. (Suttka 31:12-15 vachat.) Hea disak konnech zoxem bhurgeamnim, chakramnim, ani toxench poslolea zonvaramnim pasun kam korunk zaina aslem. (Sutt. 20:10) Hea toren lokank aplem chodd dhean Devachea bhoktent ghalunk mellttalem.

9. Sabat disa vixim Jezuchea disamnim koslem chukichem chintop aslem?

 ⁹ Sabat dis lokanchea boreak lagon aslo. Punn Jezuchea disamnim, zaitea dhormik fuddareamnim to dis koso pallcho tea vixim ekdom koddok kaide kel’le. Sabat disak thoddim konnsam toddop vo ek duent munxak boro korop pasun chukichem mhunn te sangtale. (Marku 2:23-27; 3:2-5) Osle kaide Devak avoddna mhunn Jezun aplea aikotoleank spoxtt sanglem.

10. Sabatachea disa vixim Jezuk koxem dislem tea vixim amkam Matev 12:9-12-ant kitem xikonk mellta?

¹⁰ Jezu ani tache Judev pattlavdar Moizesachea Somurti khala asle dekhun tannim Sabat dis pall’llo. * Punn tea disa Jezun dusreank modot korchi zaitim kamam kelim. Hea toren, Sabat disak oslim kamam korop chukichem nhoi mhunn tannem utramnim ani korneamnim dakhoun dilem. Jezun spoxtt sanglem: “Sonvara disa vo Sabat disa borem korum-ieta.” (Matev 12:9-12 vachat.) Tea disa dusreank doia dakhovop ani modot korop chukichem nhoi mhunn to lekhtalo. Hea ritin Jezun aplea korneamnim Sabat dis pallchem mukhel karonn kitem aslem tem dakhoun dilem. Devache lok aplea sodanchea kamam thaun tea disa visov ghetale dekhun Devachi bhokti korunk te dhean diunk xoktale. Jezu oslea eka familint vaddlo jim Sabat dis Devachi bhokti korunk uzar kortalim. Jezu aplo ganv Nazaretak gelo tednam tannem kitem kel’lem tantuntlean amkam kollon ieta. Thoim mhunntta: “Aple sonvoie pormonnem Sonvara disa vo Sabata  disa [Jezu] devsthanant gelo ani vachunk ubo ravlo.”—Lukas 4:15-19.

11. Jezun kamam vixim kosli bori dekh dovorlea?

¹¹ Kamam vixim Devak koxem dista tem Juzen Jezuk thovoi-achem kam xikoitana, xikoilem astolem. (Mt. 13:55, 56) Ani Juze apli vhodd famil samballunk dor disa kitlo koxtti vavr kortalo tem Jezun polloilem astolem. Tor Jezun uprant aplea xisank sanglem: “Vavraddiak aplo muxaro favo.” (Lukas 10:7) Tor, koxtti vavr korchea vixim Jezuk sarki khobor asli.

12. Koxtti vavra vixim Bible kitem mhunntta tem zannam zaunk amkam khoinchim versam modot kortat?

¹² Koxtti vavra vixim apostl Pauluk pasun khobor asli. Ani Jezun kitem xikoilem tea vixim herank sangchem tachem mukhel kam aslem. Tori astana, aplo khorch bhagounk Paulun kam kelem. “Konnakuch zodd zaina zaunk, koxtt korun ani harpit zaun” Paulu “dis-rat” kam kortalo tea vixim Tesalonikekarank khobor asli. (2 Tes. 3:8; Itihas 20:34, 35) Paulun aplea vavra vixim boroilem tednam to ghoddie aplea tombu bandpachea kamam vixim sangtalo astolo. Paulu Korintant astana, Akuila ani Prisila-chea ghorant ravtalo ani tanchea borabor vavr kortalo, karonn tim tachea bhaxen tombu korpi aslim. Paulu dis-rat vavurtalo hacho orth to dis ani rat tech korit ravlo oxem na. To thodde dis, zoxem Sabat disa tombu bandpachem kam korinaslo. Tea disa, taka Judevank sakx diunk sondhi mellttali, karonn tea disa te pasun kam korinasle.—Itihas 13:14-16, 42-44; 16:13; 18:1-4.

13. Pauluchea udharonnantlean ami kitem xikonk zata?

¹³ Apostl Paulun ek borem udharonn dovorlem. Aplem pott bhorunk taka kam korchem poddlem tori astana, ‘xubhvortoman porgottchem muniarponnan’ to sodanch bhag ghetalo. (Rom. 15:16; 2 Kor. 11:23) Ani dusreank tantunt sodanch bhag gheunk tannem urba dili. Oxem toren, Akuila ani Prisila ‘Jezu Kristachea sevent tachim bhagidaram’ zaunk pavlim. (Rom. 12:11; 16:3) Paulun Korintkarank ‘Somiachi seva korit ravonk’ urba dili. (1 Kor. 15:58; 2 Kor. 9:8) Jehovan apostl Pauluk pasun oxem borounk prerit kelem: “Konnank vavr korchi khuxi na tor, tannim jevchem-i nhoi.”—2 Tes. 3:10.

14. Juanv 14:12-ant, Jezun sanglolea utrantlean to kitem mhunnonk sodhtalo?

¹⁴ Hea nimannea disamnim sogleant mhotvachem kam mhunnttlear porgott korop ani xis korop. Khorem mhunnttlear, fuddarak aple xis aplea poros xrextt kam kortole mhunn Jezun sanglolem! (Juanv 14:12 vachat.) Oxem mhunnon aple xis apunn kel’lim toslim vizmitam te pasun kortole mhunn to sangunk sodhinaslo. Tachea bodlek, aple xis aplea poros anik vhoddlea vattaramnim vochon, anik chodd lokam lagim, anik chodd vell porgott’ttole ani xikoitole mhunn tannem sanglem.

15. Ami amkach kosle prosn vicharunk zai, ani kiteak?

¹⁵ Tumi ek sirvis kortat zalear, tumkanch he prosn vicharat: ‘Mhojea kamachea zagear lok mhaka koxtti vavr korpi munis mhunn vollkhotat kai? Hanv mhojem kam mhojean zata titlea borea toren korun tem vellar sompoitam kai?’ Hea prosnank tum hoi mhunn zobab diunk xokta zalear, tuzo patranv tujer bhorvonso dovrunk pavtolo. Ani tum kam korta tea zagea voile lok tum sangta ti Rajeachi bori khobor aikonk toiar astole. Porgottnne vixim ani xikounchea kamam vixim tujean tuka he prosn vicharunk zata: ‘Porgottnnent hanv khub vavurpi mhunn dusrim mhaka vollkhotat kai? Sevent lokam  lagim ulounk hanv bori toiari kortam kai? Umed dakhoita tea lokank hanv rokddich porot bhett kortam kai? Porgottnni korchi veg-veglli vatt hanv uzar kortam kai?’ Hea prosnanche zobab tum hoi mhunn dita zalear, tuka tujea kamant khuxalkai mellttoli.

16. Visova vixim Jezuk ani apostlank koxem dislem ani aiz zaiteank koxem dista tachea modem kitem ontor asa?

¹⁶ Apnnank ani aplea apostlank thodde pavtti visov gheunchi goroz asa mhunn Jezu zannam aslo. Punn, Jezuchea kallachea ani aichea kallavoilea zaitea lokank Jezuchea vopareant aslolea girest munxa sangata sor korunk zata. Tea munxan apnnakuch oxem mhunnttlem: “Visov ghe, kha-pie, ani mouz mar.” (Lukas 12:19; 2 Tim. 3:4) Jivitant chodd mhotvachem mhunnttlear visov ghevop ani moja marop mhunn taka dislem. Punn Jezun ani tachea apostlamnim, aplem jivit fokot visov gheunk ani moja marunkuch uzar korunk na.

17. Amkam kam asona to vell ami koso uzar kortat?

¹⁷ Aiz ami Jezuchi dekh koxi gheunk zata? Amkam kam asona tednam ami to vell fokot visov gheunkuch nhoi, punn porgottnnent vochonk ani sobhamnim mellon ieunk uzar kortat. Khorem mhunnttlear, xis korop ani mittingek hajir zavop, hankam ami itlo valor ditat ki hantunt zata titlo bhag gheunk ami proitn kortat. (Heb. 10:24, 25) Ami sutti gheun bhovonk voitat tednam pasun, ami mittingek hajir zaunk chukoinant, ani toxench ami mellttat tea lokam sangata bori khobor porgottunk sondhi sodhit astat.—2 Tim. 4:2.

18. Amchea Raza, Jezu Kristak, ami kitem kel’lem zai?

¹⁸ Amcho Raza, Jezu Krist, amchea lagim kitem korunk zaina tem korunk to opekxa korina, ani kamak ani visovak tea-tea zagear dovrunk to amkam modot korta! Hea pasot ami tache khub upkari asat. (Heb. 4:15) Ami goroz titlo visov ghetlolo taka zai. Punn tachea sangata, ami amcheo kuddicheo gorzo purnn korunk ani khuxalkai haddtta toslea xis korchea kamant koxtti vavr kel’lo pasun taka zai. Eke torechea krur gulamponnam thaun Jezu koso soddoita, tem ami fuddlea lekhant bhasabhas kortolim.