1. Ami nirax zatat tednam amcher koslo porinnam zata?

DOR disa amkam veg-vegllea torechea oddchonneancho fuddo korcho poddtta, ani tem sosunk ami amchean zata tem soglem kortat. Punn ami nirax zatat tednam tancho fuddo korunk amkam kotthin zata, oxem tumkam disona? Tor, ami nirax astat tednam ami valorachim nhoi mhunn amkam disonk puro ani amchi khuxalkai ami hogddaunk xoktat. Mhonn’nneo 24:10 mhunntta: “Vaitt dis, ietat tea vellar tunvem dhir soddlear, tujea bollacho kosloch faido zanvcho na.” Tor ami nirax astat tednam ami osokt asat oxem amkam disonk puro ani amchea oddchonneancho fuddo korunk amkam anikui kotthin zaunk xokta.

2. Ami kiteak lagon nirax zaunk xoktat, ani hea lekhant ami kitem xiktolim?

² Ami zaitea karonnank lagon nirax zaunk xoktat. Udharonnak, amchea opurnntaiek lagon, oskotkaiek lagon, vo duensak lagon ami nirax zaunk xoktat. Tea bhair, Jehovachea sevent amkam zai aslolem ek kam korunk mellona tednam vo lok amcho sondex aikonant toslea vattarant amkam seva korchi poddtta tednam pasun ami nirax zaunk xoktat. Oslea vellar ami niraxiponn koxem pois korunk xoktat, tea vixim ami hea lekhant xiktolim.

3. Amchea chukim vixim ani amchea vixim amkam vaitt dista tednam amkam kitem modot korunk xokta?

³ Ami opurnn asat dekhun amchea chukim vixim ani amchea vixim amkam vaitt disonk xokta. Tor amchea chukink lagon ami novea sonvasarant gel’lim Jehovak naka, oxem amkam disonk puro. Oslem chintop amkam trasant ghalunk xokta. Tor amchea chukim vixim amkam koxem disonk zai? Jezu xivai ami soglim “patki” mhunn Bible-ant sanglam. (Rom. 3:23) Punn Jehova amchea chukincheruch dhean dina vo ami poripurnn aslolea  porim vagonk zai mhunn axena. Punn to amcho mogall Bapui zalolean to amkam modot korunk sodhta. To amchea thaim pasiensan vagta. Amchim unnemponnam pois korunk ami kitlim vavurtat ani tea vixim amkam kitlem vaitt dista tem to zannam, ani to amkam modot korunk sodanch toiar asa.—Rom. 7:18, 19.

4-5. Don bhoinnank aplem niraxiponn pois korunk 1 Juanv 3:19, 20-ant sanglam tantuntlean koxi modot zali?

⁴ Ami Deborah ani Maria vixim polloum-ia. * Deborah lhan astana tachea familintlim tachea lagim vaitt toren vagtalim. Tichi konnuch toknnai korinaslim. Ti vhoddli zali tednam apunn kainch borem korina, oxem chintpak lagli. Ti lhan thaun chuki korta tednam pasun apunn kiteakuch upkarona oxem tika disonk laglem. Maria-kui oxench distalem. Tichim soirim tichea thaim vaitt toren vagtalim. Taka lagon tika apunn kainch valorachi na oxem disonk laglem. Tinnem bautizm ghetlea uprant pasun ti Jehovachi Sakxi zaunk favo na oxem tika dislem!

⁵ Tori astana, tea donui bhoinnamnim Jehovachi seva korop bond korunk na. Kiteak? Ek karonn mhunnttlear, apleak koxem bhogta tem tannim Jehova Devak magnneant sanglem. (St. 55:22) Amkam vaitt ghoddtta tednam, ami amcheach vixim vaitt chintunk lagtat mhunn amcho sorgincho Bap zannam hem tankam kollon ailem. Punn, amkam koslech bore gunn na, oxem dislear pasun Jehova Dev amche bore gunn polloita.—1 Juanv 3:19, 20 vachat.

6. Poilim keloleo chuko porot korta zalear eklean kitem korunk zai?

⁶ Apli chuk portun korina zaunk eklo khub proitn korta astolo. Punn to ti chuk portun-portun korta tednam to nirax zaunk puro. Ami patok adartat tednam ami guneavkari mhunn amkam bhogta hem khorem. (2 Kor. 7:10) Tea vellar, ‘Hanv kiteakuch upkarona. Jehova mhaka kednach bhogxicho na,’ oxem chintun ami amkam guneavkari mhunn tharaunchem nhoi. Oslem chintop chukichem asa, ani ami oxem chintlear Jehovachi seva korop ami bond korunk xoktat. Mhonn’nneo 24:10-ant ami kitem vachlam tem ami ugddasak haddunk zata. Ami nirax zatat tednam amchem boll unnem zata. Tachea bodlek, ami Jehova Deva lagim magnneant “uloun” tachea lagim bhogsonnem magunk zai. (Iz. 1:18) Tumi kallzant thaun poschatap kortat tednam Jehova Dev tumkam bhogsunk toiar astolo. Tea bhair, vhoddilanchi modot gheiat. Jehova Deva lagim tumchi ixttagot porot ghott korunk te tumkam pasiensan modot kortole.—Jak. 5:14, 15.

7. Amkam ek chuk pois korunk kotthin zata zalear ami kiteak nirax zaunchem nhoi?

⁷ Ek chuk porot korina zaunk proitn kortat tankam Jean-Luc nanvacho, France-antlo ek vhoddil oxem sangta: “Jehovachea nodren ek  nitivont munis mhunnttlear patokuch korina toslo nhoi, punn oslo munis zo aplea chukik lagon poschatap korta ani apli vatt bodlunk khub proitn korta.” (Rom. 7:21-25) Tor tumkam ek patok pois korunk kotthin zata zalear, tumi valorachim nhoi mhunn chintinakat. Ami soglim chuki kortat dekhun amkam sogleank Jehovachea favo naslolea doiechi goroz asa, ji amkam soddvonne udexim melltta.—Ef. 1:7; 1 Juanv 4:10.

8. Amkam niraxiponn bhogta tednam konna lagim vochun modot magonk zata?

⁸ Tumchea sobhentlea bhav-bhoinnanchi modot gheiat! Ami uloitat tednam tim amchem aikonk xoktat ani amkam urbechim utram sangonk xoktat. (Mho. 12:25; 1 Tes. 5:14) Joy nanvachea Nigeria-ntlea eka bhoinnik niraxiponnacho fuddo korcho poddlo. Ti mhunntta: “Bhav-bhoinnanchi modot nasli zalear hanv hem soglem sosunk xokchi nasli. Tannim dilolea urbe udexim Jehovan mhojea magnneancho zobab dilo mhunn mhaka khatri mell’lli. Tanchea thaun hanv niraxi zaloleank urba diunk xikli.” Punn ami hem ugddas dovrunk zai. Amkam kednam urba zai hem bhav-bhoinnank sodanch khobor asona. Taka lagon, amkam goroz asta tednam sotant ghott aslolea bhava vo bhoinni lagim vochon ami modot magonk zai.

9. Stotr 41:3 ani 94:19 amkam koxi urba dita?

⁹ Jehovachi modot gheiat. Amchi bolaiki bori na tednam ani amchem duens chodd temp urta tednam, amkam borem chintop dovrunk kotthin zaun xokta. Jehova amkam vizmit korun bore korina hem khorem. Punn to amkam buzvonn dita ani sosunk goroz ti xokti dita. (Stotr 41:3; 94:19 vachat.) Udharonnak, oslea vellar to ghoddie amchea ghorantlem kam korunk vo bazarantlean kitem-i haddunk modot zai zalear amchea bhav-bhoinnank uzar korunk xokta. To amchea bhavank amchea sangata magnnem korunk urba diunk xokta. Vo Bible-ant aslolim buzvonnechim utram amchea ugddasak haddun modot korunk xokta. Zoxem, novea sonvsarant duens ani dukh naslolea poripurnn jivita vixim aslolim versam to amchea ugddasak haddunk xokta.—Rom. 15:4.

10. Opghata uprant Isang niraxiponnam thaum koso bhair soronk pavlo?

¹⁰ Nigeria-nt ravpi Isang-ak opghat zalo. Dotoran taka sanglem ki to kednanch cholonk xokcho na. Isang mhunntta: “Hanv samko dukhi ani nirax zal’lom.” Punn taka aplea niraxiponnam thaun bhair soronk koxi modot zali? To fuddem mhunntta, “Mhojea bailen ani hanvem Jehova lagim magnnem korop ani tachea Utracho obheas korop kednanch soddunk na. Tea bhair, atam amchea jivitant jem kitem borem zalam, ani novea sonvsarant jieuncho amkam zo bhorvonso asa tachea pasot upkariponn dakhounk ami nichov kela.”

11. Cindy duent asli tednam pasun ti koxi khuxal ravonk xokli?

¹¹ Mexico-nt ravpi Cindy-k ek oxem duens zal’lem, zaka lagon tem moronk pasun xoktalem. Tinnem hea poristhiticho koso fuddo kelo? Ti hospital-ant asli tednam dor disa ekleak tori porgott korcho tinnem dhei dovorlo. Tinnem boroilem: “Oxem kel’lean, hanv mhojea operation-acher, mhojea dukhicher, ani mhaka kitle tras zata hacher dhean diunchea poros, dusreanchea gorzancher dhean diunk pavli. Hanv oxem kortali, dotor vo nursi lagim uloitana tanchi famil koxi asa mhunn hanv vichartali. Magir hanv tankam tannim hem kotthin kam korunk kiteak vinchlem mhunn vichartali. Tea uprant, tankam khoinchea vixoi-ancher ulounk avoddttolem tem zannam zaunk sompem zatalem. Hanv tankam, ‘tumi koxim asat?’ mhunn vicharta tednam tim ojap zatalim. Karonn duent asat tim oxem dotorak vicharinant. Hanv tanchi porva korta mhunn tim mhoje upkar attoitalim. Thoddeamnim  mhaka aplo pot’to vo fon number pasun dilo. Hea kotthin vellar, Jehova mhaka adar kortolo mhunn hanv zannam asli. Punn to mhaka itli khuxalkai ditolo mhunn hanvem chintunkuch na!”—Mho. 15:15.

12-13. Duensak lagon vo cholonk zaina dekhun ghora vo hospital-ant aslolea bhav-bhoinnamnim porgottnni koxi kelea, ani hacho porinnam kitem zala?

¹² Duent vo osokt asat tim porgottnnechea kamant zai titli seva korunk zaina mhunn nirax zaunk xoktat. Tori astana, zaitim zannam porgott korunk veg-veglleo vatto sodhun kaddttat. United States-ant Laurel nanvachea eke bhoinnik svas gheunk kotthin zatalem dekhun tika 37 vorsam eka machine-a bhitor ravchem poddlem. Tea bhair tika cancer ani katichim duensam aslim. Ani tichi vhoddlim operation-am pasun zal’lim. Tori astana, tinnem kednach porgottnni korop soddun diunk na. Tika modot korunk, tichea ghora hospital-a thaun ietolea nurse-ink ani herank ti sakx ditali. Hacho porinnam kitem zalo? Jehova vixim zannam zaunk tinnem sumar 17 lokank modot keli! *

¹³ Duensak lagon, vo cholunk zaina dekhun ghora vo hospital-ant aslolea bhav-bhoinnamnim kitem korunk zata tea vixim France-antlo Richard nanvacho ek vhoddil oxem sangta: “Tim asat tea zagear lokank dixtti poddtta toxem tannim thoddim pustokam ani masikam dovrunk zata. Oxem kelolean, lok tem polloitat tednam tem kitem, mhunn vicharunk xoktat. Ani hea toren tim tanchea lagim ulovop suru korunk xoktat. Tor ghor-ghoramnim porgott korunk xokonant toslea bhav-bhoinnank hea toren porgottnnent bhag ghetlolean urba melltta.” Oslim bhav-bhoinnam chitti boroun ani fon korun pasun sakx diunk xoktat.

14. Raza Davidan koslem borem udharonn dovorlam?

¹⁴ Zaitea karonnank lagon Jehovachea sevent amkam zai to sueog ghoddie mellona. Udharonnak, zantteponnak lagon, amchi bolaiki bori na dekhun, ani her karonnank lagon pasun asonk xoktat. Amkam zai to sueog mellona zalear, ami David Raza thaun xikonk zata. Raza Davidak Dev-mondir bandunk khub itsa asli. Punn tem kam korunk taka vichun kaddunk na mhunn taka koll’llem tednam, Devan jea konnak vinchun kaddlo taka tannem zata titlo tenko dilo. Tannem Dev-mondir bandunk zaitem bhangar ani chandi dan keli. Davidan khorench amkam ekdom borem udharonn dovorlam!—2 Sam. 7:12, 13; 1 It. 29:1, 3-5.

15. Hugues niraxiponn koso pois korunk pavlo?

¹⁵ France-ant Hugues nanvachea eka bhavak aplea duensak lagon vhoddil mhunn seva korcho sueog soddun diuncho poddlo. Taka ghorantlim dakhttim kamam korunk pasun  kotthin zaunk laglem. To oso boroita: “Survatek hanv kainch valoracho nhoi mhunn chintun khub nirax zalom. Punn mhojean kitem korunk zaina tea vixim chintun dukhi zavop bond korunk zai mhunn mhaka uprant kollon ailem. Hanv toso korunk laglom tednam, Jehovachea sevent hanv kitem korunk xoktalom tantunt mhaka khuxalkai mellonk lagli. Gideon ani tache tinxim munis thoklole. Tori astana, tannim tanchea dusmananchi fatt soddun diunk na. Tanchea bhaxen hanv soddun diuncho na mhunn hanvem nichov kela!”—Fudd. 8:4.

16. Ami ainzanchea udharonnantlean kitem xikonk xoktat?

¹⁶ Visvaxi ainzanchem amkam borem udharonn asa. Ek pavtt, noxtto Raza Ahabak koxem fottouchem mhunn Jehovan ainzank vincharlem. Apnnak koxem dista tem thoddea ainzamnim sanglem. Punn ekach ainzan sanglolem tem faideak poddttolem mhunn Jehovan sanglem. (1 Raz. 22:19-22) ‘Hanvem ani mhojem chintop kiteak sanglem?’ oxem chintun urlole ainz niraxi zale kai? Na, ainz khorech khalti asat ani te sogli mhoima Jehovak diunk axetat.—Fudd. 13:16-18; Prok. 19:10.

17. Jehovachea sevent thodde sueog mellona mhunn ami niraxi zatat tednam ami kitem korunk zai?

¹⁷ Ek Jehovacho Sakxi zaun tachea Rajea vixim porgottcho amkam ek vhodd sueog asa mhunn ugddas dovrat. Jehovachea sevent amkam sueog asum vo nasum, tachea adarit ami Jehovachea nhodren moladik zainant. Bodlek, ami khaltim asat zalear, Jehova ani amchim bhav-bhoinnam amkam moladik mhunn lekhtolim. Tor, sodanch khaltim asonk modot kor mhunn Jehova lagim magat. Bible-ant aslolea Jehovachea khaltea sevokanchea udharonnancher niall korat. Ap-khuxen tumchean zata titli tumchea bhav-bhoinnanchi seva korat.—St. 138:6; 1 Ped. 5:5.

18-19. Tumchea vattarant lok bore khobrek kan dinant zalear pasun tumi tumchi porgottnni khuxalkaien koxi korunk zata?

¹⁸ Tumchea vattarant lok bore khobrek kan dinant mhunn vo choddxe pavtti te ghora mellonant mhunn tumi kednam tori nirax zaleant kai? Oslea vellar, tumi khuxal ravonk ani tumchi khuxalkai vaddounk kitem korunk zata? “ Tumchea Porgottnnent Khuxalkai Mellonk Thoddeo Vatto” hea boksant dil’leo suchounneo tumi pollounk zata. Tea bhair, porgottnne vixim amchem chintop sarkem dovrop gorjechem. Hem ami koxem korunk zata?

¹⁹ Porgott korcho amcho mukhel dhei mhunnttlear Devachem nanv ani tachea Rajea  vixim lokank sangop mhunn ugddas dovrat. Thoddech lok aple pattlavdar zatole mhunn Jezun spoxtt sanglolem. (Mt. 7:13, 14) Ami porgott’ttat tednam, Jehova, Jezu, ani ainzam sangata kam korcho amkam man melltta. (Mt. 28:19, 20; 1 Kor. 3:9; Prok. 14:6, 7) Apli seva korunk sodhtolea lokank Jehova sodhit asa. (Juanv 6:44) Tor ek munis amcho sondex ek pavtti aikona zalear, ghoddie dusre pavtti aikotolo.

20. Jeremias 20:8, 9-a thaun ami niraxiponn pois korchea vixim kitem xiktat?

²⁰ Amkam Jeremiasa thaun zaitem xikonk melltta. To porgott kortalo tea vattarantle lok tachea sondexak kan dinasle. “Dis-bhor” lokamnim tacho opman ani fokannam kelim. (Jeremias 20:8, 9 vachat.) To itlo nirax zalo ki taka tachem porgottnnechem kam bond korum-xem dislem. Punn tannem kiteak bond korunk na? Jehovachim “utram” eka ujea sarkim Jeremiasachea kallzant aslim. Ani to tim domaun dovrunk xoklo na! Teach bhaxen, ami pasun dor disa Bible obheas korun tacher niall kortat tednam amkam-i Jeremiasa sarkem distolem. Porgottnnent amchi khuxalkai vaddttoli, ani ghoddie lok amchea sondexak kan diunk xoktole.—Jer. 15:16.

21. Tumi koslea-i karonnak lagon nirax zaleant zalear pasun, tumi tem koxem pois korunk xoktat?

²¹ Deborah, zichea vixim ami poilim uloilolim, ti mhunntta: “Soitan niraxiponn eka hot’teara sarkem amchea add uzar korta.” Punn Soitana poros ani tachea hot’tearam poros Jehova Dev khub bollixtt asa. Tor tumi nirax zatat tednam Jehova lagim kallzant thaun modot magat. Amchea opurnntaiek lagon ami chuki kortat tednam tancho fuddo korunk to amkam modot kortolo. Amchea duensacho fuddo korunk to amkam modot kortolo. Jehovachea sevent aslolea sueoga vixim sarkem chintop dovrunk to amkam adar kortolo. Teach bhaxen, porgottnne vixim sarkem chintop dovrunk to amkam modot kortolo. Tor, tumchea kallzantle sogle uske tumi tumchea sorginchea Bapak sangat. Ani tachea adaran tumi niraxiponn pois korunk xoktolim.