1-2. (a) Jezuchea tin apostlank Devan kitem kor mhunn sanglem, ani tannim kitem kelem? (b) Hea lekhant ami kitem xiktolim?

32 K.X.-ACHEA Paska uprant, Pedru, Jakob, ani Juanv ghoddie Hermonachea Dongrar asle tednam Jezuchem akʼkhem rup bodolʼlem. “Tachem mukhamoll suria porim loklokit zalem ani Tachim vostram uzvadda porim dhovim-ful zalim.” (Mt. 17:1-4) Ani tea dorxona vellar, hea apostlamnim Devacho tallo aikolo. Tannem oxem sanglem: “Ho Mhozo Put, kherit opurbaiecho; Tacher asa Mhojem dhadosponn. Tachem tumi aikat.” (Mt. 17:5) Ani hea tin apostlamnim Jezuchem aikolʼlem mhunn tannim aplea jivitantlean dakhoun dilem, ani ami pasun tanchi dekh gheunk zai.

² Fattlea lekhant, Jezuchem aikop mhunnttlear ami khoincheo tin vostu korop bond korunk zai tea vixim ami xiklolim. Ani hea lekhant, Jezun sangloleo khoincheo don vostu ami korunk zai tem ami xiktolim.

3. Matev 7:13, 14-nt Jezun sanglolea utrantlean, ami kitem korunk zai mhunn amkam kollon ieta?

³ Matev 7:13, 14 vachat. Jezun hanga don darvontteam vixim sanglem, je don veg-vegllea rosteancher pavoitat. Ek zaun asa “oxir” rosto ani dusro “rund” rosto. Tor hea donui  rosteam modem ami khoinchea rostean voitolim tem ami vinchun kaddunk zai, karonn ek tisro rosto na. Ani ami ghetat to nirnnoi khub mhotvacho zaun asa. Karonn amkam sasnachem jivit mellttolem kai na tem tacher adarit asa.

4. “Rund” rostea vixim amkam kitem sanglolem asa?

⁴ Hea don rosteam modem aslolo ontor ami ugddas dovrunk zai. “Rund” rosteacher vochop sompem asa dekhun zaitim zannam ho rosto vinchun kaddttat. Ani tankam polloun khub zannam apunnui tea rosteacher vochonk sodhtat. Punn dukhachem mhunnttlear, Soitan tankam hea rosteacher vhorta ani to rosto nisonttonak pavoita mhunn tim vollkhonk visortat.—1 Kor. 6:9, 10; 1 Juanv 5:19.

5. “Oxir” rosto sodhun tacher cholonk thoddeamnim koslo vavr kela?

⁵ Punn Jezun sanglem toxem, ho dusro rosto “oxir” asa ani thoddeach zannank to melltta. Hachem karonn to amkam fuddlea versant sangta. To aplea xisank khottea provadeam vixim xittkaita. (Mt. 7:15) Aiz sonvsarbhor zaite dhorm asat. Ani tantuntle choddxe zann apunn sot xikoitat mhunn lokank sangtat. Ani hea karonnak lagon zaite lok niraxi zaleat vo guspolʼle asat. Ani jivitak pavoita to rosto te pollounk pasun sodhinant. Toxem zalear, ho rosto mellonk kotthin asa kai? Na. Karonn Jezun sanglem: “Tumi Mhojem utor tumche bhitor rigun dovorxat zalear, tumi khoreponnim Mhoje xis zatoleat. Ani tumkam sot kollon ietolem ani sot tumkam svotontr kortolem.” (Juanv 8:31, 32) Punn tumi, oxir rostear cholonk vinchun kaddun ek boro nirnnoi kela. Tumi sot sodhunk khub proitn kela. Devak kitem manvota tem zannam zaunk tumi kholaien Bible-acho obheas kela. Ani Jezucheo xikounneo tumi tumchea jivitant apnnaileat. Toxench, Jehovak manvonant teo khottea dhormacheo xikounneo tumi nakarleat. Ani khottea dhorma sombondit festam-porbo monovop tumi bond kelam. (Mt. 10:34-36) Hem soglem korop titlem sompem naslem. Tori astana, tumi proitn korit ravon he sogle bodlav keleat, karonn tumi Jehova Devacho mog kortat ani taka manvota tem tumi korunk sodhtat. Ani tumi kela to soglo vavr polloun Jehova khub khuxal zala astolo!—Mho. 27:11.

6. Stotr 119:9, 10, 45, 133-a pormonnem, oxir rosteacher cholot ravonk amkam kitem modot korta?

⁶ Oxir rostear cholot ravonk amkam kitem modot kortolem tem somzonk ami ek udharonn polloum-ia. Ghattavoilea rostea degek ek railing vo addo asta, je gaddient provas kortoleank rosteachea deger pavona zaunk ani tancho jiv dhokeant poddona zaunk tanchi rakhonn korta. Punn ek gaddi choloupi hem railing taka addkholl korta mhunn kednanch sangchona. Tor, Bible-ant aslole Jehovache dorje hea railing-a bhaxen zaun asat, je amkam hea oxir rostear cholot ravonk modot kortat.—Stotr 119:9, 10, 45, 133 vachat.

7. Oxir rostea vixim tornnatteamnim kitem ugddas dovrunk zai?

⁷ Tornnatteamno, Jehovache dorje tumchem jivit tumkam zai toxem jieunk addkholl kortat oxem tumkam dista kai? Tumi oxench chintlolem Soitanak zai. Ani rund rostear choltat te lok kitle khuxal asat, tacher tumi dhean dilolem Soitanak zai. Oxem korunk, Soitan tumchea iskolachea vangddeank vo tumi internet-acher polloitat  tea lokank uzar korta. * Punn ugddas dovrat, rund rostear cholta to lok xevottak khoim pavtolo tem tim zannam zalolim Soitanak naka. Punn oxir rostear choltat tea lokank, xevottak sasnachem jivit mellttolem mhunn Jehovan adim fuddench spoxtt ritin kolloilam.—St. 37:29; Iz. 35:5, 6; 65:21-23.

8. Olaf-achea udharonnantlean tornnatteamnim kitem xikonk zata?

⁸ Atam ami ek tornnatto bhav Olaf-achem udharonn polloum-ia. * Tachea iskolant aslolea cheddvamnim sex korunk tacher khub dobhav ghatlo. Punn apunn ek Jehovacho Sakxi ani Devachea dorjeam pormonnem jieta mhunn tannem tankam sanglem. Tori punn thoddea cheddvamnim tacher khub dobhav ghatlo. Punn Olaf-an xevottak sarkem tench kelem. Taka anik ek  oddchonnecho fuddo korcho poddlo. Olaf mhunntta: “Mhojea tticherinim fuddem anik xikonk mhojer dobhav ghatlo. Ani university-k gelear mhaka lokancho khub man mellttolo, ek borem kam mellttolem, ani sodanch mhaka ek khuxalbhorit jivit astolem oxem-i tannim mhaka sanglem.” Olaf-ak hea soglea dobhavancho fuddo korunk koxi modot zali? To mhunntta: “Sobhechea bhav-bhoinnam sangata hanvem bori ixttagot zoddli. Ani tim mhoji famil koxi zalim. Ani hanv kholaien Bible-acho obheas korunk laglo. Jitlo hanv Bible xikonk laglo, titlench hem sot mhunn mhoji khatri vaddli. Taka lagon hanv Jehovachich seva kortolo mhunn ghott nichov korunk pavlo.”

9. Ami oxir rostear cholot ravtolim zalear kitem korunk zai?

⁹ Jivitachea rosteacher cholchem soddun “ghorttannak pavoita” tea rund rostear ami cholʼlolim Soitanak zai. (Mt. 7:13) Punn, ami Jezuchem aikot ravlim zalear ani to oxir rosto amkam rakhonn dita mhunn ami ugddas dovorlo zalear, ami oxir rostear cholot ravonk pavtolim. Tor atam, Jezun amkam kor mhunn sangloli dusri vost khoinchi tem ami polloum-ia.

10. Matev 5:23, 24-ant, Jezun kitem korunk sanglem?

¹⁰ Matev 5:23, 24 vachat. Jezu hanga ek Israelitkar bhettounni korunk voitalo tea vixim sangtalo. Hem ek Israelitkarachea jivitant ekdom mhotvachem kam aslem. Punn hachea poros anik chodd mhotvachem kitem aslem? Ek Israelitkar vedi-xim aplem dan bhettounk voita tea vellar, aplea pelea add kitem-i asa mhunn taka ugddas ailear, tannem tem dan thoinch soddun ‘poilim vochon aplea bhava sangata xanti korunk zai asli.’

11. Esau-a sangata xanti korunk Jakoban kitem kelem?

¹¹ Xanti korchea vixim amkam Jakobachea udharonnantlean pasun xikonk melltta. 20 vorsam porian to aplea ganv-ghora thaun pois aslo. Punn eka ainza udexim Jehova Devan taka porot aplea ganv-ghora vochonk sanglem. (Ut. 31:11, 13, 38) Punn ek oddchonn asli. Ti mhunnttlear, Jakobacho vhoddlo bhav, Esau tacher ragar aslo ani taka jivexim marunk sodhtalo. (Ut. 27:41) Tor to azunui aplo rag gheun bosla kai mhunn Jakob “samko bhielo ani kachabul zalo.” (Ut. 32:7) Tor Jakoban xanti korunk kitem kelem? Poilim, hea vixim tannem Jehova lagim magnnem kelem. Dusrem, tannem udar kallzan Esau-ak zaitim dennim dhaddlim. (Ut. 32:9-15) Ani xevottak, tannem Esau-ak polloilo tednam ek ani don pavtti nhoi, punn sat pavtti to tachea fuddem sorpottlo. Hea toren, Esau-a mukhar khalto zaun ani taka resped diun xanti korunk Jakoban poilem pavl ghetlem.—Ut. 33:3, 4.

12. Jakoba thaun ami kitem xiktat?

¹² Tor Jakoban, aplo bhav Esau-a sangata xanti korunk khoinchim pavlam ghetlim tem ami polloilem. Poilem, tannem khaltikaien Jehova lagim magnneant modot magli. Dusrem, aplea magnneam pormonnem kam korun xanti korunk tannem apleachean zata tem soglem kelem. Ani tisrem, to Esau-ak mellʼllo tednam konn chukla tacher dhean diunchea bodlek to xanti korunk fuddem sorlo. Tor ami Jakobachi dekh koxi gheunk zata?

13-14. Ami eka bhavak vo bhoinnik dukhoilam mhunn amkam kollon ailem zalear, ami kitem korunk zai?

¹³ Amkam jivitachea rostear cholot ravonk zai zalear, ami amchea bhav-bhoinnam sangata xanti korop gorjechem. (Rom. 12:18)  Tor ami konnank tori dukhoilam mhunn amkam kollon ailem zalear, poilem zaun Jakoba bhaxen tea bhava vo bhoinni sangata xanti korunk modot kor mhunn ami Jehova lagim khaltikaien magonk zai.

¹⁴ Dusrem mhunnttlear, ami amkanch he don prosn vicharunk zai: ‘Gorv pois korun, khaltikaien hanv chuklam mhunn sangon, xanti korunk hanv toiar asa kai? Mhojea bhav-bhoinnam sangata xanti korunk hanv poilem pavl ghetam zalear Jehovak ani Jezuk koxem distolem?’ Hea prosnancher niall kelolean Jezu sangta tem aikon bhav-bhoinnam sangata xanti korunk ami khaltikaien fuddem sortolim. Ani hea vixim amkam Jakobachem borem udharonn asa.

15. Amchea bhav-bhoinnam sangata xanti korunk Efezkarank 4:2, 3-ant sanglolem totv ami koxem apnnaunk zata?

¹⁵ Punn Jakob Esau-ak mellonk gelo tednam to tachea sangata gorvan vaglolo zalear kitem zata aslem? To xanti korunk pavcho naslo. Tor, ami amchea bhava vo bhoinni sangata xanti korunk voitat tednam ek khalto sobhav asop gorjecho. (Efezkarank 4:2, 3 vachat.) Karonn Mhonnʼnneo 18:19, NW, oxem sangta: “Ragar zalʼlea eka bhava sangata xanti korop eka surokxit xaracher zoit vhorchea poros kotthin. Ani kestanvam eka kilʼleachea ghott khambea sarkim.” Tor xanti korunk kotthin zaunk puro, punn ami khaltikaien amchi chuk manun ghetat zalear ami toxem korunk pavtolim.

16. Xanti korunk voitat tednam ami kitem korunk zai, ani kiteak?

¹⁶ Tea bhair ami xanti korunk voichea poilim ami tea bhava vo bhoinni lagim kitem uloitolim ani koxim uloitolim tem ami borea bhaxen chintunk zai. Ani ami xanti korunk voitat tednam survatek tim amkam ragan kitem-i mhunnonk puro. Tor tea vellar, ami ghoddie ragar zaunk vo konn chukla tacher dhean diunk puro. Punn hachea poros xanti korop chodd gorjechem mhunn ami ugddas dovrunk zai. Tor ami borea toren tea bhav vo bhoinni lagim ulounk zai ani tanchea sangata porot xanti korunk proitn korunk zai.—1 Kor. 6:7.

17. Bhav Gilbert-achea udharonnantlean tumi kitem xiktat?

¹⁷ Hea vixim amkam Gilbert nanvachea eka bhavachem udharonn asa. To xanti korunk  khub vavurlo. To sangta: “Don vorsam porian mhojea dhuve sangata xanti korunk hanvem khub proitn kelo. Ani hem korunk hanv tachea sangata pasiensan uloitalo.” Gilbert-an anik kitem kelem tea vixim to fuddem sangta: “Mhojea dhuve sangata ulounchea poilim hanv magnnem kortalo. Ani tannem mhaka kitem-i vaitt mhunttlem zalear hanv ragar zauncho na, punn taka bhogxitolo mhunn nichov kortalo. Ani hantuntlean hanv sarko mhunn dakhounchea bodlek xanti korop chodd mhotvachem mhunn hanv xiklo.” Hacho porinnam kitem zalo? Gilbert sangta: “Aiz, mhojea soglea familichea sodoxiam vangdda mhozo sombond boro asa mhunn mhaka monachi xanti asa.”

18-19. Tumi konnakui dukhoilam zalear kitem korcho nichov korunk zai, ani kiteak?

¹⁸ Tor ami eka bhavak vo bhoinnik dukhoilam zalear kitem kortolim? Xanti korunk, Jezun amkam kitem sanglam tem ami pallttolim. Xanti korunk modot kor mhunn Jehovachi modot magtolim. Tednam Jehova apli povitr xokti diun amkam modot kortolo. Ami oxem kortat tednam ami khuxal astolim ani Jezuchea utrak ami pallo ditat mhunn dakhoitolim.—Mt. 5:9.

¹⁹ Povitr “Sobhechem Mostok,” Jezu Krista udexim Jehova amkam hea toren mogan solʼlo dita dekhun ami tache kitle upkari asat. (Ef. 1:22) Tor apostl Pedru, Jakob, ani Juanva bhaxen, ‘Jezuchem aikonk’ ghott nichov korum-ia. (Mt. 17:5) Ani amchea bhav-bhoinnank ami dukhoitat tednam tanchea sangata xanti korum-ia. Ami oxem kortat zalear, jivitak pavoita tea oxir rosteacher ami cholot ravonk pavtolim. Toxench, aiz amkam zaitim besanvam mellttolim ani fuddarak ami sasnak khuxalkaien jietolim.