Tumi hea vorsachim Pahrogopur masikam dhean diun vachleant kai? Toxem zalear hea prosnanche zobab tumi diunk xoktat kai tem polloiat:

Jakob 5:11-nt sanglolea pormonnem Jehova “konnvallo” ani “maiemogacho” dekhun, amkam kosli khatri melltta?

Jehovak doia vo konnvollai asa dekhun to amcheo chuki bhogxita. Toxench, ami trasant astat tednam to amkam modot korta mhunn Jakob 5:11-ntlean amkam khatri melltta. Ani ami pasun tachi dekh gheunk zai—w21.01, p. 21.

Jehovan odhikarachi manddavoll kiteak kelea?

Jehova aplea familicho mog korta dekhun tannem odhikarachi manddavoll kelea. Hea manddavollek lagon, Jehovache familint soglem xantin ani manddavollin cholonk xokta. Ani haka lagon familint konnem nirnnoi gheunk zai ani tea nirnnoi-a pormonnem korunk konnem fuddakar gheunk zai tem amkam kolltta.—w21.02, p. 3.

Electronic message-o dhaddchea vixim Kristanvamnim kiteak zagrut ravonk zai?

Ek munis electronic grup message-o dhaddtta zalear, aple ixtt vinchun kaddtta tednam tannem chotrai dovrunk zai. Punn xemboramnim vo hozaramnim bhav-bhoinnam astat toslea eka vhodd grupant oxem korop sompem na. (1 Tim. 5:13) Toxench, oslea grupant khori nasloli vo fottkiri mahiti sangonk xoktat. Ani thodde grup veapara sombondit asat dekhun he uzar korun amchea bhav-bhoinnam koddlean poixe zoddunk uzar korunk xoktat. Tor ami chotrai dovrinant zalear ami trasant poddonk xoktat.—w21.03, p. 31.

Jehovan Jezuk dukh sosun moronk dilem. Oxem korunk kitem karonnam aslim?

Ek karonn mhunnttlear, Judevank eka khas xirapa thaun soddounk Jezuk khambear morchem poddlem. (Gal. 3:10, 13) Dusrem, Jehova Dev taka fuddaracho Porom Iadnik zaunk proxikxonn ditalo. Ani tisrem, eka munxak ekdom kotthin tras ailear pasun to Devak visvaxi ravonk xokta mhunn Jezun dakhoun dilem. (Job 1:9-11)—w21.04, p. 16-17.

Porgottnni kortana tumkam lok mellonk kotthin zata tednam tumi kitem korunk zata?

Lok chodd korun ghora astat tea vellar tumi porgottnni korunk zata. Toxench, tumi veg-vegllea zagear porgottnni suru korunk zata. Ani vegllea toren porgottnni korunk proitn korunk zata, zoxem chitti boroun.—w21.05, p. 15-16.

“Khud Somurti vorvim hanv tika melom” hea utramnim Paulu kitem sangonk sodhtalo? (Gal. 2:19)

Somurti udexim tea lokank kollʼllem ki tim patkim asat, tannim Somurt purnn ritin pallunk zaina ani jednam tim Jezu Kristacher bhavarth dovortat, tednam tim Deva mukhar manvololim zatat. (Gal. 3:19, 24) Tor Paulun, Jezuchea soddvonnecher bhavarth dovorlo dekhun to Somurti pormonnem melo koso zalo. Toxench, Somurticho probhav tachea jivitacher anik uronk na.—w21.06, p. 31.

Sosnikai dakhoun Jehovan amkam dekh koxi dovorlea?

Soitanan aplea nanvacher haddlolo opman, aple razvottkecher haddlolo virodh, tachim bhurgim tachea add vochop, Devchar ghalta te khotte arop, aplea sevokanche dukh-tras, aplea ixttank mornnant sanddlam tem dukh, noxttea lokank lagon munxank zatat te tras, lok kortat tim onoitik kamam ani aple rochnnecho zata to ibadd Jehova aiz meren sosta.—w21.07, p. 9-12.

Pasiens dakhoupa vixim Juze thaun ami kitem xiktat?

Tachea svotachea bhavamnim tacher onʼneai kelʼlo. Ani Ejiptant astana eka khottea aropak lagon tannem zaitim vorsam bondkhonnint sarlim.—w21.08, p. 12.

Haggai 2:6-9, 20-22-ant thorthoravop vo haloxem korop, hachea vixim Haggai provadian kitem boroun dovorlam?

Aiz choddxim raxttram Devachea Rajeachi bori khobor nakartat. Punn zaito lok Jehovachi seva korunk fuddem sorleant. Ani rokddench xevottachem foddfoddavop vo thorthoravop zaunchem asa. Tea vellar, Jehovachea razvottkek tenko dinant toslea raxttrancho Jehova sasnak nas kortolo.—w21.09, p. 15-19.

Ami amchi porgottnni kiteak korit ravonk zai?

Ami khub vavurtat tem Jehova polloita, amchi porgottnni Jehovak manvota, ani ami porgottnechem kam korit ravlear amkam sasnachem jivit mellttolem.—w21.10, p. 25-26.

“Soglle tumche chalint povitr zaiat,” ho solʼlo apnnaunk Levi-Xastr odheai 19 amkam koso modot korta? (1 Ped. 1:15)

Hem vers ghoddie Levi-Xastr 19:2-antlean ghetlam. Odheai 19-ant oslim zaitim udharonnam dilʼlim asat, jim 1 Pedru 1:15-nt dilʼlo solʼlo amchea sodanchea jivitant apnnaunk amkam modot korta.—w21.12, p. 3-4.