BIBLE boroupeamnim thodde pavtti tinch-tinch utram porot-porot boroileant. Oxem tannim kiteak kelem tem zannam zaunk ami tin mudʼdeancher dhean dium-ia:

Tem kednam boroilʼlem? Adlea kallar, Izraelitkaram modlea choddxea zannam lagim svota pasot Kaideanchi kopi asonasli. Tor akʼkhi porza tombu lagim, toxench Devmondira lagim ektthaim zatali tednam, Kaide vachtale tem tim aikotalim. (D.S. 31:10-12) Tea vellar, te gordent tim voranchim-voram ubim ravon tem aikotalim mhunnttoch, tanchem dhean haltalem mhunn kainch dubhav na. (Ne. 8:2, 3, 7, NW) Oslea vellar, mhotvache mudʼde porot-porot sanglolean, Kaideant kitem asa tem ugddas dovrunk ani tem apnnaunk tankam sompem zatalem. Toxench umkinch utram porot-porot sanglolean, Jehovan dilʼlea kaideamnim asloleo barik-barik vostu ugddas dovrunk tankam modot zatali.—Lev. 18:4-22; D.S. 5:1.

Tem koxem boroilʼlem? Bible-antlim thoddim pustokam, zoxem Stotram, Gitantlem Git ani Vilap, hantunt gitam asat. Ani hea gitamnim thoddim utram porot-porot boroilʼlim asat. Hea vorvim, tea gitancho vixoi kitem asa tem kollttalem ani aiknnareank tim utram ugddas dovrunk modot zatali. Udharonnak, Stotr 115:9-11-nt oxem boroilam: “Israelachea putam-dhuvamno, Sorvesporacher visvas tthevat: To amcho Adar, To amcho Rakhnnar! Aaronacheam putamno, Sorvesporacher visvas tthevat: To amcho Adar, To amcho Rakhnnar! Sorvesporachi bhokti kortoleamno, Sorvesporacher visvas tthevat: To amcho Adar, To amcho Rakhnnar!” Tor gavpi him gitam gaitale ani porot-porot tim utram mhunnttale tednam, tim tanchea monant ani kallzant rigtalim.

Tem kiteak boroilʼlem? Bible boroupeamnim thodde pavtti mhotvacheo vostu porot-porot boroileo. Udharonnak, Jehovan Izraelitkarank rogot khaunchem nhoi mhunn adnea dilʼli. Ani tannim oxem kiteak korchem nhoi, hachem karonn tannem Moizesak tankam porot-porot sangonk lailem. Kiteak? Rogtant jiv asa vo rogot jivitak suchit korta, hem tannim ugddas dovorlolem Jehovak zai aslem. (Lev. 17:11, 14) Uprant, Jeruzalemantlea vhoddilamnim ani apostlamnim, Kristanvamnim Devak manvota tem korunk kitea thaun pois ravonk zai tea vixim boroilem tednam, tannim rogta thaun pois ravchem mhunn porot tanchea ugddasak haddlem.—D.I. 15:20, 29.

Bible-ant, thodde pavtti tinch-tinch utram, porot-porot boroileant tem khorem. Punn hacho orth, ami porot-porot tench-tench mhunnttlolem Jehovak zai, oxem nhoi. Karonn Jezun pasun oxem sanglem: “Magnnem kortana . . . tinch-tinch utram porot-porot mhunno nakat.” (Mt. 6:7) Uprant, Jehovak manvota toslea khoinchea vixoi-ancher ami magnnem korunk zata tem tannem sanglem. (Mt. 6:9-13) Tor ami magnneant, tinch-tinch utram porot-porot mhunno nant tem khorem. Punn ami ekuch vixoi-acher Jehova lagim zaite pavtti magnnem korunk zata.—Mt. 7:7-11.

Tor Bible-ant tinch-tinch utram porot-porot kiteak mhunnttleant, tachim thoddim karonnam ami polloilim. Khorem mhunnttlear amkam koso faido zaunk xokta, tea vixim amcho Vhodd Xikoupi amkam xikoita tantuntli hi ek bori vatt zaun asa.—Iz. 48:17, 18.