TUMKAM kednam-i tumchea jivitantlea oddchonneancho ekttoch fuddo korunk poddtta oxem dislam kai? Ami ‘trasan bhorlolea vellar jietat zacho fuddo korunk khub kotthin zaun asa.’ (2 Tim. 3:1) Tor amchea jivitantlea oddchonneancho fuddo korunk amkam koxi modot zatoli? Ek khoro ixtt ‘oddchonneanchea vellar’ amkam modot kortolo mhunn Bible sangta.—Mho. 17:17.

Apostl Paulu mixinori seva kortana taka zaitim ixttam mellʼllim, zannim taka veg-vegllea vattamnim modot keli. (Kol. 4:7-11) To Romant bondkhonnint aslo tednam, to sompeponnim korunk xokonaslo tim kamam tannim tachea pasot kelim. Udharonnak, Filipintlea bhav-bhoinnamnim dhaddloleo vostu Epafroditusan Pauluk pavoileo. (Filp. 4:18) Toxench Tikikusan Paulucheo chitteo veg-vegllea sobhank pavoileo. (Kol. 4:7; study note polloiat.) Paulu ghorant koidi ani uprant bondkhonnint asonui aplea ixttanchea modotin bhav-bhoinnank urba di-it ravonk pavlo. Tor tumi pasun khorim ixttam koxim zaunk xoktat?

Aiz pasun amchim bhav-bhoinnam amchim khorim ixttam zalʼlean amkam veg-veglle toren modot kortat. Hea vixim Spain-ant niemit pioneer mhunn seva korpi bhoinn Elisabet-achem udharonn asa. Tiche avoik cancer zala mhunn kollʼllea uprant, eke bhoinnin tika Bible versanchea adarit zaiteo message-o dhaddun urba dili. Elisabet sangta: “Hea message-im vorvim dor disacho fuddo korunk mhaka ghottai mellʼlli.”—Mho. 18:24.

Ami bhav-bhoinnank porgottnnent vo mittingek vochonk modot kortat tednam, tanchea sangata amchi ixttagot ghott zaunk pavtoli. Udharonnak, tumi eka zannttea bhavak vo bhoinnik mittingek vo porgottnnek vochonk lift diunk zata kai? Oxem kelear tumi eka-mekak urba diunk pavtolim. (Rom. 1:12) Punn thoddim bhav-bhoinnam tanchea ghora thaun bhair vochonk xokonant. Tor tumi tankam koxi modot korunk xoktat?

Thoddim bhav-bhoinnam gombhir duensak lagon vo her poristhitink lagon Raj-ghorant mittingek hajir zaunk xokonant. Hea vixim bhav David-achem udharonn asa. Sov mhoine maiz cancer-ak lagon tacho treatment choltalo. Tor hea vellar, to ani tachi bail Lidia mittingek online hajir zatalim.

Sobhentlea bhav-bhoinnamnim tankam koxi modot keli? Dor eke mittinge uprant, Raj-ghorant astanach tim David ani Lidia lagim video-conferencing-a udexim uloitalim. Toxench, tanchea zobabam vorvim tankam urba mellʼlli mhunn sangonk bhav-bhoinnam tankam message-o dhaddttalim. Hea vorvim David-ak ani Lidia-k eksurponn pois korunk modot zali.

 Ghorantlean bhair soronk xokonant tea bhav-bhoinnam sangata porgottnni korunk ami thoddo bodol korunk zata kai? Oxem kelʼlean, ami tankam visronk nant mhunn tankam kollttolem. (Mho. 3:27) Ami tanchea sangata chitti vo fona udexim pasun porgottnni korunk zata. Toxench porgottnne mittingek hajir zaunk, vhoddilamnim videoconference-achi manddavoll korunk zata. David ani Lidia-k hi manddavoll khub avoddli. David sangta: “Porgottnne mittingek ani magnneak hajir zalʼlean amkam khub urba mellʼlli.” Itlench nhoi, tumchea eka Bible vidʼdheartheak tumi ghorantlean bhair soronk xokonant tea bhav-bhoinnanger vhoron Bible obheas korunk zata. Punn oxem korchea poilim tea bhav vo bhoinnik vicharat.

Ghora thaun bhair vochonk xokonant tea bhav-bhoinnam sangata ami vell sartat tednam, amkam tanche bore gunn dison ietat ani ami tanchea anik lagim soronk pavtat. Udharonnak, tim Bible uzar korun aiknnareak Jehovachim ixttam zaunk modot kortat tem polloun, tanchea pasot amcho mog anikui vaddtta. Ani oslea bhav-bhoinnank ami porgottnni korunk ani mittingek ieunk modot kortat tednam ami novim ixttam korunk pavtat.—2 Kor. 6:13.

Paulu trasancho fuddo kortalo tednam, Tit taka mellonk gelo ani haka lagon Pauluk khub urba mellʼlli. (2 Kor. 7:5-7) Ami bhav-bhoinnank amchea utramnim urba diunk zata. Itlench nhoi, tanchea sangata vell sarlolean ani amchean zata tea bhaxen tankam modot kelolean tankam khub bhuzvonn melltta mhunn Titachea udharonnantlean kollon ieta.—1 Ju. 3:18.

Ami eka-mekak koso tenko diunk zata tea vixim Russia-ntlea bhav-bhoinnamnim ekdom borem udharonn dovorlam. Zoxem, bhav Sergey ani tachi bail Tatyana-cho onnbhov asa. Pulis sodh korunk tanchea ghorant gusle ani uprant prosn vicharunk tankam pulis station-ar gheun gele. Punn bhoinn Tatyana-k poilim ghora dhaddli. Hea vixim bhav Sergey sangta: “[Tatyana] ghora pavtanch, ek bhoinn tika mellonk aili. Tinnem khub dhir dakhoilo. Tea uprant, rokddinch anikui bhav-bhoinnam amchea ghora ailim ani sogleo vostu zagear ghalunk amkam modot keli.”

Sergey fuddem mhunntta: “Dhumallea vellar mhaka mhojea ixttanchi khub goroz asli. Ani Mhonnʼnneo 17:17-antlim utram mhojea jivitant khorim zalim tem hanvem polloilem, zoim mhunntta: ‘Ixtt sogllea vellar mog korta, Punn, oddchonniche gorje khatir bhav zolmota.’ Khorench, Jehovan mhaka oslim dhirvont ixttam dileant zannim mhaka khub modot kelea.”

Hea kotthin poristhitint amkam bhav-bhoinnanchi khub goroz asa. Ani vhodd sonkoxttachea vellar amkam tanchi anikui goroz poddttoli. Tor ami atam bhav-bhoinnam sangata amchi ixttagot ghott korunk zata titlo vavr korum-ia!—1 Ped. 4:7, 8.