OBHEASACHO LEKH 4
‘Povitr Xokti Apunnuch Govai Dita’
“Ami Devachim bhurgim mhonn povitr atmo, amchea otmea borabor, apunnuch govai dita.”—ROM. 8:16.
GIT 25 Ek Kherit Aspot
KITEM XIKTOLIM *
Pon’nasavea disa 120 Kristanvanchea eka zomeacher eka ojapachea toren Jehovan apli povitr xokti votoili (Peregraf 1-2 polloiat)
1-2. 33 K.X.-achea Pon’nasavea Disa kosli ojapachi ghoddnni ghoddli?
AITARA sokallim 33 K.X.-achea Pon’nasavea Disa, Jerusalemant 120 xisancho ek zomo eka ghorachea unchlea kuddant mellon ailo. (Itihas 1:13-15; 2:1) Tankam ek khas dennem mellchem asa dekhun, Jerusalemantuch ravonk Jezun tankam thoddea disa poilim sanglolem. (Itihas 1:4, 5) Fuddem kitem ghoddtta?
2 “Ovchituch zonnzonnit varea sarko sorga velo ek avaz aikunk ailo.” Ak’khea ghorant to avaz aikonk ietalo. Uprant, xisanchea toklecher “ujeacheo koxeo jibo” tankam dixtti poddleo, ani tim soglim “povitr atmean bhorlim.” (Itihas 2:2-4) Tea zomeacher Jehovan apli povitr xokti hea ojapachea toren votoili. (Itihas 1:8) Ho poilo zomo aslo, zo povitr xokte udexim obhixikt zalo * ani tankam sorgar Jezu sangata razvottki cholouncho bhorvonso mell’llo.
EKLO OBHIXIKT ZATA TEDNAM KITEM GHODDTTA?
3. Pon’nasavea Disa obhixikt zal’leank apunn obhixikt zaleant mhunn kiteak dubhav naslo?
3 Tea voilea kuddant ektthaim zal’lea xisam modem tum-ui ek xis aslo zalear to dis tum kednanch visorcho naslo. Karonn tujea tokler, ujeachi jib koxi kitem tori ieun bosli ani tum veg-vegllea bhasamnim ulounk laglo! (Itihas 2:5-12) Tea vellar tum povitr xokten obhixikt zalo mhunn dubhavchoch na. Punn povitr xokten obhixikt zal’lim soglim osleach ojapachea ritin obhixikt zalim kai? Vo tim soglim ekach vellar obhixikt zalim kai? Na. Hem ami koxi zannant?
4. Poilea xekddeantle obhixikt sogle ekach vellar obhixikt zale kai? Somzaiat.
4 Atam, eklo kednam obhixikt zata tem polloum-ia. 33 K.X.-achea Pon’nasavea Disa fokot 120 zannancho zomoch povitr xokten obhixikt zaunk na. Punn uprant, teach disa sumar 3,000 zannank bhasail’le povitr xoktechem dennem mell’llem. Tancho bautizm zalo tednam tim obhixikt zalim. (Itihas 2:37, 38, 41) Punn fuddlea vorsamnim soglea obhixikt Kristanvank aplea bautizma vellaruch hem dennem mellonk na. Zoxe Samariekar, bautizm ghetlea uprant thoddea tempan obhixikt zale. (Itihas 8:14-17) Ani ek vegllich ghoddnni mhunnttlear, Kornel ani tacho ghorabo tancho bautizm zaunchea poilinch obhixikt zalo.—Itihas 10:44-48.
5. 2 Korintkarank 1:21, 22 pormonnem, eklo povitr xokten obhixikt zata tednam kitem ghoddtta?
5 Atam, eklo Povitr xokten obhixikt zata tednam kitem ghoddtta tem pasun polloum-ia. Obhixikt zal’lea thoddeank Jehovan apleak vinchun kaddla mhunn manun gheunk ghoddie kotthin zaunk puro. ‘Devan mhaka kiteak vinchun kaddla kai?’ mhunn tim chintunk puro. Punn anik thoddeank ghoddie toxem dischem na. Tankam koxem-i disum, obhixikt zata tednam tankam kitem ghoddtta tem apostl Paulu somzaita. ‘Bhavarth dhorun manun ghetlea uprant, Devan Bhasailolo Povitr Atmo tumcher dhaddun xik’ko * marla. Amkam dovril’lea daizacho khud povitr atmo isaro.’ (Ef. 1:13, 14) Tor, hea Kristanvank apnnem vinchun kaddlam mhunn Jehova aplea povitr xokte udexim sarkem kolloita. Hea toren fuddarak tim prithumer nhoi, punn sorgar sasnank jietolim mhunn khatri diunk povitr xokti ek “isaro [bhas]” zaun asa.—2 Korintkarank 1:21, 22 vachat.
6. Sorgincho inam mellttolo zalear eka obhixikt Kristanvan kitem korunk zai?
6 Ek Kristanv obhixikt zala dekhun taka sorgincho inam mellttoloch kai? Na. Taka sorgar vochonk vinchun kaddla mhunn khatri asa. Punn tannem hem ugddasak dovrunk zai: “Bhavam-bhoinnimno, Devan tumkam apoileant ani vinchun kaddleant: hea apovnneachi ani venchnnukechi khatri thir samballunk umedin vavrat. Oxem korxat zalear, tumi koddsorun vexat mhonn bhirantuch na.” (2 Ped. 1:10) Tor eka obhixikt Kristanvak sorgar vochonk vinchla vo apounnem dilam astolem. Punn to xevott poriant visvaxi ravlearuch taka sorgincho inam favo zatolo.—Filp. 3:12-14; Heb. 3:1; Prok. 2:10.
APUNN OBHIXIKT MHUNN EKLEAK KOXEM KOLLTTA?
7. Obhixiktank sorgar voichem apounnem asa mhunn koxem kolltta?
7 Eka dadleak vo bailek sorgar vochonk apounnem asa mhunn koxem kolltta? Hacho zobab amkam Romant asloleank Paulun sanglolea utramnim spoxtt dison ieta. Tannem tankam “povitr porza zaunk apoilolim” mhunnttlem. To fuddem tankam sangta: “Tumkam anink ek pavtt bhirantin bhorta toslo gulamponnacho atmo tumi gheunk na; khorem mhollear, tumkam Devachim apnnailolim bhurgim korta to Atmo ki tumi ghetla; Tachea bollan Abba! mhonnge Bapa, oso ami ulo martanv.” (Rom. 1:7; 8:15, 16) Tor sorgar voichem apounnem asa mhunn Dev aplea povitr xokte udexim tankam spoxttponnim kolloun dita.—1 Tes. 2:12.
8. Obhixikt Kristanvank tim obhixikt asat mhunn heramnim khatri diunchi goroz na hem 1 Juanv 2:20, 27-ant koxem dakhoilam?
8 Tor apnnak sorgar vochonk Jehovan apoila mhunn tanchea monant ani kallzant kainch dubhav asona. (1 Juanv 2:20, 27 vachat.) Her Kristanvam sarkim, obhixikt Kristavamnim sobhe vorvim Jehova thaun xikchi goroz asa hem khorem. Punn, tim obhixikt asat mhunn heramnim tankam khatri diunchi goroz na. Karonn Jehovan tankam vixvantli sogleant bollixtt xokti, mhunnche aplea povitr xokte udexim tim obhixikt asat mhunn spoxttponnim kolloilam.
TIM ‘NOVEAN ZOLMOLEANT’
9. Efezkarank 1:18 pormonnem, eklo obhixikt zata tednam tachea chintpant kitem bodlav zata?
9 Dev ekleak obhixikt korta tednam taka kitem ghoddtta tem somzonk aiz choddxea Devachea sevokank kotthin zaunk puro. Kiteak? Karonn tim obhixikt nant. Devan munxank prithumer sasnank jieunk rochleant, sorgar nhoi. (Ut. 1:28; St. 37:29) Tori punn Jehovan thoddeank sorgar jieunk vinchun kaddleant. Tor to tankam obhixikt korta tednam tancho bhorvonso ani tanchem chintop sarkem bodolta.—Efezkarank 1:18 vachat.
10. ‘Novean zolmop’ mhunnttlear kitem? (Futtnott pasun polloiat.)
10 Kristanv povitr xokte udexim obhixikt zatat tednam tim ‘novean zolmotat’ vo tim ‘sorgar thaun zolmotat.’ * Ani ‘novean zolmotat’ vo ‘otmean zolmotat’ tankam koxem bhogta tem obhixikt naslolea eka munxak purnn toren somzaunk zaunchench na mhunn Jezun dakhoun dilem.—Juanv 3:3-8.
11. Eklo obhixikt zata tednam tanchea chintpant koslo bodol zata?
11 Kristanv obhixikt zata tednam tanchea chintpant koslo bodol zata? Hea Kristanvank obhixikt korchea poilim tankam prithumecher jieuncho bhorvonso aslo. Tim oslea eka vellachi vatt polloitalim jednam Jehova prithume vele noxttemponn kaddun ek sobit bag kortolo. Ghoddie punorjivontponna vellar moron gel’lea aplea eka familichea sodosiachi vo eka ixttachi tim vatt polloitalim. Punn tim obhixikt zalea uprant tanchem chintop bodol’lem. Kiteak? Prithumer sasnak jievop titlem borem aschem na mhunn tannim chintunk na, tim niraxiponnant buddlim vo tras sosche poddle dekhun tannim apli itsa bodlonk na. Prithumer sasnank jieunk bejar ietolo mhunn okosmat tankam disonk na. Bodlek, Jehovan apli povitr xokti uzar korun tanchem chintop ani bhorvonso bodol’lo.
12. 1 Pedru 1:3, 4 pormonnem, obhixikt Kristanvank apleak aslolea bhorvonxea vixim koxem bhogta?
12 Obhixikt zala taka ho moladik sueog apleak favo nhoi oxem disot. Punn Jehovan apleak vinchun kaddla mhunn to kednanch dubhavcho na. Bodlek, sorgar jieunchea bhorvonxea vixim chintun to khub khuxal astolo ani upkari astolo.—1 Pedru 1:3, 4 vachat.
13. Obhixikt Kristanvank hea prithumer aslolem jivit jieunk koxem bhogta?
13 Hacho orth obhixikt Kristanv moronk axetat kai? Apostl Paulu hea prosnacho zobab dita. Tannem munxachea kuddik eka tombuk sor kelem ani mhunnttlem: “Kiteak hea tombuchi, mhonnge he kuddichi, nhesonn kaddun uddounk amchi khuxi nhoi, punn hech nhesnnancher dusri nhesonn gheunk amchi khuxi; dekhun hea tombunt, mhonnge amche kuddint, jietana, eka bhara khal chepon aslole bhaxen ami pinrgotanv; oxem jem kitem amche bhitor vinaxi asa, tacho bhosm zatolo: hem ovinaxi jivitachem zoit!” (2 Kor. 5:4) Him Kristanvam prithumer jieunk bejar aila mhunn beginuch moronk axenant. Tachea bodlek tim khuxal astat ani dor disa aplea famili ani ixttam sangata Jehovachi seva korunk axetat. Hem ani her soglem kortana, tim apnnank fuddarak mellcho asa to bhorvonso sodanch monant dovortat.—1 Kor. 15:53; 2 Ped. 1:4; 1 Juanv 3:2, 3; Prok. 20:6.
JEHOVAN TUKA OBHIXIKT KELA KAI?
14. Ek munis kitem korta dekhun taka povitr xokte udexim obhixikt kela mhunn sangonk zaina?
14 Apunn povitr xokte udexim obhixikt zala kai mhunn tum ghoddie chintit. Oxem chinta zalear, hea mhotvachea prosnam vixim chint: Jehovachi seva korunk tuka ekdom chodd urba asa kai? Porgottnnechea kamant sarkich chodd urba asa oxem tuka dista kai? ‘Devachea kholaiechea vostu’ vixim zannam zaunk sodhta toslo tum ek boro videarthi zaun asa kai? (1 Kor. 2:10, Povitr Pustok – Novo Korar) Jehovan tuka porgottnnechea kamant borim besanvam dileant oxem tuka dista kai? Jehova vixim dusreank xikounk ek vhodd zobabdari asa mhunn tuka dista kai? Tujea jivitant Jehovan zaitea vattamnim modot kelea mhunn tuka dista kai? Hea soglea prosnanche zobab tum hoi mhunn dita zalear hacho orth tuka sorgar voichem apounnem mell’llam kai? Na. Kiteak? Karonn eklo obhixikt asum vo na, Devachea soglea sevokank oxench bhogonk xokta. Devachea sevokancho bhorvonso kitem-i asum, Jehova tich xokti uzar korunk konnakui hem soglem korunk modot korunk xokta. Khorem mhunnttlear, tum povitr xokte udexim obhixikt zala vo na mhunn dubhavta zalear hacho orth tum obhixikt zaunk na. Jehova jea konnank apounnem dita, tankam obhixikt kela vo na mhunn dubhav asona. Tim zannam astat.
Jehovan Abraham, Sarah, David, ani Juanv Batistak ojapachim kamam korunk apli povitr xokti dili. Punn tannem ti xokti tankam sorgar jieuncho bhorvonso diunk uzar korunk na (Peregraf 15-16 polloiat) *
15. Devachi xokti mell’llolea sogleank sorgar vinchun kaddlam mhunn ami kiteak mhunnonk zaina?
15 Bible-ant ami zaitea bhavarth aslolea dadleam vixim vachtat zankam Devachi povitr xokti mell’lli. Punn tankam sorgar jieuncho bhorvonso naslo. Udharonnak, Davidak povitr xokte udexim margdorxon mell’llem. (1 Sam. 16:13) Devachea kholaiecheo vostu somzonk ani Bible-ache thodde bhag borounk povitr xokten taka modot keli. (Marku 12:36) Tori astana, David “sorgar choddunk na” mhunn Apostl Pedrun sanglem. (Itihas 2:34) Juanv Batist ‘povitr atmean bhorlo.’ (Lukas 1:13-16) Tea bhair, tachea poros vhodd dusro konn na mhunn Jezun sanglem. Tori punn, to sorginchea Rajeant voicho na mhunn Jezun mhunnttlem. (Mt. 11:10, 11) Jehovan apli povitr xokti uzar korun hea munxank ojapachim kamam korunk modot keli. Punn hich xokti uzar korun tannem tankam sorgar jieunk vinchunk na. Hacho orth sorgar razvottki cholounk vinchloleam poros tancho bhavarth unno aslo kai? Na. Punn Jehova tankam prithumer zatolea Sobit Bagent porot jivont kortolo.—Juanv 5:28, 29; Itihas 24:15.
16. Aiz zaite Devache sevok koslea inamachi vatt polloitat?
16 Aiz prithumer aslolea zaitea Jehovachea sevokank sorgar jieuncho bhorvonso na. Abraham, Sarah, David, Juanv Batist ani Bible kalla voilea zaitea dadlea ani bailam sarkim tim-ui Devachea Razvottke khala prithumer jieunk axetat.—Heb. 11:10.
17. Fuddlea lekhant ami khoinchea prosnanche zobab polloitolim?
17 Aiz amche modem thoddech obhixikt lok asat dekhun amchea monant thodde prosn ieunk xoktat. (Prok. 12:17) Udharonnak, thodde obhixikt asloleamnim svotak koxem lekhunk zai? Tumchea sobhent Ugddas Disak eklo dakhancho soro ani unddo gheunk suru korta zalear, tumi tachea sangata koxem vagonk zai? Ani osleancho ankddo vaddttat tem polloitat tednam tumi uskeunchi goroz asa kai? Hea prosnanche zobab ami fuddlea lekhant polloitolim.
^ per. 5 33 K.X.-achea Pon’nasavea Disa thaun, aiz meren Jehovan aplea Puta sangata sorgar raz cholounk thoddea Kristanvank vinchun kaddleant. Ho tancho ek khas bhorvonso zaun asa. Hea kherit sueoga pasot apnnank vinchun kaddleant mhunn hea Kristanvank koxem kolltta? Hea sueoga pasot ekleak Jehova apounnem dita tednam kitem ghoddtta? Hea lekhant hea prosnanche zobab mellttole. Ho lekh Janer 2016 Watchtower masikent aslolea mahiticher adarit asa.
^ per. 2 UTRANCHI SOMZONNI: Povitr xokten obhixikt zavop: Jehova, apli povitr xokti uzar korun eka munxak Jezu sangata raj cholounk vinchun kaddtta. Aplea xokte udexim, Dev fuddara vixim tea munxak adim fuddench ek bhorvonso dita vo adim fuddench ek “isaro” dita.” (Ef. 1:13, 14) Tor povitr xokti hea Kristanvank sorgar inam asa mhunn “govai dita,” vo spoxttponnim kolloita mhunn he Kristanv sangonk xoktat.—Rom. 8:16.
^ per. 5 UTRACHI SOMZONNIM: Xik’ko. Obhixikt Kristanv visvaxi ravon morchea thoddea vella poilim vo vhodd sontap suru zaunchea thoddea vella poilim, Dev tancher sodanch urta toslo xik’ko martolo. Hachea poilim sodanch urta toslo xik’ko tankam mellchona.—Ef. 4:30; Prok. 7:2-4; Abril 2016 Watchtower masikentlo “Questions From Readers” ho lekh polloiat.
^ per. 10 ‘Novean zolmop’ hacho orth kitem, hachi anik mahiti mellonk Abril 1, 2009 The Watchtower masikechem pan 3-12 polloiat.
GIT 27 The Revealing of God’s Sons
^ per. 57 CHINTRACHI MAHITI: Amchea bhavarthak lagon ami bondkhonnint asonk puro vo sot porgottunk vo xikounk amkam svotontrtai asonk puro. Punn ami Devachem Raj prithumer razvottki choloitana tantunt jieunk axeun ravonk zata.
