OBHEASACHO LEKH 4
Ugddas Disak Hajir Zaunk Ami Kortat Tea Vavracher Jehova Besanv Ghalta
“Mhozo ugddas korun oxench korit ravat.”—LUKAS 22:19.
GIT 19 The Lordʼs Evening Meal
KITEM XIKTOLIM a
1-2. Ami dor vorsa Ugddas Disak kiteak hajir zatat?
SUMAR 2,000 vorsam poilim, Jezun amchea pasot aplo jiv bolidan korun amkam sasnachem jivit jieunk vatt ukti keli. Morchea adlea rati, Jezun aplea xisank ek adnea dili. Ti mhunnttlear, aplea bolidanacho ugddas korunk, unddo ani drakxancho soro uzar korun ek sadhi kariavoll suru korunk laili.—1 Kor. 11:23-26.
2 Ami Jezucho khub mog kortat dekhun ami tachi adnea pallttat. (Ju. 14:15) Dor vorsa, Ugddas Disachea poilim ani uprantchea sumanamnim, Jezuchea bolidana udexim amkam koso faido zata tea vixim magnnem korun, niall korunk ami vell kaddttat. Oxe toren ami amchem upkariponn dakhoitat. Tea bhair, ami porgottnnechea kamant choddan-chodd bhag gheun, zata titlea lokank Ugddas Disak hajir zaunk amontronn ditat. Tea bhair, kosli-i oddchonn ieum, Ugddas Disak hajir zaunk ami nichov kortat.
3. Hea lekhant ami kitem polloitolim?
3 Hea lekhant, Jezuchea mornnacho ugddas korunk Jehovachim sevokam khoinchea tin vattamnim apleachean zata tem soglem kortat tem ami polloitolim. Tem mhunnttlear: (1) Jezun xikoilʼlem teach toren tim Ugddas Dis kortat, (2) tim Ugddas Disak dusreankui amontronn ditat, ani (3) kotthin poristhitimnim pasun tim Ugddas Dis kortat.
JEZUN XIKOILʼLEM TEACH TOREN AMI UGDDAS DIS KORTAT
4. Dor vorsa Ugddas Disak, amkam khoinchea prosnanche zobab mellttat, ani tanche zobab zannam zavop amkam kiteak khas asonk zai? (Lukas 22:19, 20)
4 Dor vorsa Ugddas Disak, Bible-acher adarit ek bhaxonn asta. Tantunt amkam zaitea prosnanche spoxtt toren zobab mellttat. Zoxem, munxakullak soddvonnechi goroz kiteak asa, ani eka munxachea mornna thaun zaiteanchim patkam koxim bhogsotat tem ami xiktat. Toxench, unddo ani drakxancho soro kitem suchit korta ani tantunt konnem bhag gheunk zata tem amchea ugddasak haddttat. (Lukas 22:19, 20 vachat.) Tea bhair, hea prithumer sasnak jieuncho bhorvonso asa tankam fuddarak koslim besanvam mellttolim tacherui ami niall kortat. (Iz. 35:5, 6; 65:17, 21-23) Ami hea sotam pasot khub upkari asonk zai. Punn Jezuchem bolidan kitlem moladik asa tem koroddamnim lokank khobor na. Tea bhair, Jezun jea toren aplo mornnacho dis korunk lailʼlo tea toren tim korinant. Oxem kiteak?
5. Jezuche choddxe xis melea uprant lok koxe toren Jezuchea mornnacho ugddas korunk laglo?
5 Jezuche choddxe xis melea uprant, Kristi sobhent rokddinch khottim Kristanvam bhitor sorlim. (Mt. 13:24-27, 37-39) Tim khottim Kristanvam “apnnam fattlean xisank oddun vhorche pasot, khotti xikovnn diunk” laglim. (D.I. 20:29, 30) Tannim xikoilʼli ek “khotti xikovnn” mhunnttlear, amchea patkanchem bhogsonnem mellonk Kristan porot-porot bolidan diunk zai aslem. Punn khorem mhunnttlear, “somestanchim patkam kaddun uddounk Kristan ekech pavtti Apnnakuch somorpun dilo” mhunn Bible-ant sanglam. (Heb. 9:27, 28) Punn aiz zaite khaltea kallzache lok, Bible-ant sanglam tem soddun ti khotti xikounn sot mhunn mantat. Thoddim zannam dor sumanak, ani thodde pavtti dor disak, “Kumneav” gheunk igorjemnim misak voitat. b Toxench, Kristi dhormanchea thoddea zomeamnim Jezuchea mornnacho ugddas korunk lok title pavtti ektthaim zainant. Punn tanchea modlea choddxea zannank, Jezun aplo jiv kiteak bolidan kelo tachi sarki somzonni na. Itlench nhoi, Jezuchea bolidana vorvim amkam khorench amchea patkanchem bhogsonnem melltta kai na mhunn thoddim dubhavtat. Tanchem aikon, her zannam oxem mhunnttat: ‘Jezuchea bolidana vorvim amkam khorench patkanchem bhogsonnem mellttolem?’ Punn Jezuchim khorim pattlavdaram hea vixim kitem chintʼtat?
6. 1872 meren Bible vidʼdheartheanchea eka zomeak kitem kollon ailem?
6 1870-ant, Charles Taze Russell fuddakar ghetalo tea Bible vidʼdheartheancho ek zomo bariksannen Bible-acho obheas korunk laglo. Tankam Jezuchem bolidan kitlem mhotvachem, toxench tachea mornnacho dis koso ugddas korcho tem zannam zaunk zai aslem. 1872 meren, tankam Jezun soglea munxakulla pasot aplo jiv dilʼlo mhunn kollon ailem. Tannim hi khobor aplea laginch dovrunk na. Punn pustokam, masikam ani newspaper-am udexim sogleank kolloili. Ani uprant rokddench poilea xekddentlea Kristanvam bhaxen, tim vorsak ekuch pavtti Ugddas Dis korunk laglim.
7. Zaitim vorsam adim Bible vidʼdheartheamnim sodh kelʼlo dekhun aiz amkam koso faido zata?
7 Tea Bible vidʼdheartheamnim zaitim vorsam adim sodh kelʼlo mhunn amkam aiz pasun tantuntlean faido zata. Koso? Jehovachea axirvadan Jezuchea bolidanachem sot amkam kollon ailem. Ani tea bolidana udexim munxakullak koso faido zata tem ami somzolim. (1 Ju. 2:1, 2) Toxench, Devak manvota tem kortat tankam Bible-ant don toreche bhorvonxe asat, tem mhunnttlear, thoddim zannam sorgar omor jivit jietolim ani lakʼkhamnim lokank hea prithumer sasnak jieunchi sondhi asa mhunn ami xikonk pavlim. Tor Jehova amcho kitlo mog korta, ani Jezuchea bolidana udexim amkam dor ekleak koso faido zata tem zannam zalolean, Jehova sangata amchi ixttagot anikui ghott zata. (1 Ped. 3:18; 1 Ju. 4:9) Tor adlea kalla voilea visvaxi bhavam bhaxen, ami pasun Jezun aplea xisank xikoilʼlem teach toren Ugddas Dis korunk herank amontronn ditat.
UGDDAS DISAK HAJIR ZAUNK AMI DUSREANKUI AMONTRONN DITAT
Ugddas Disachea khas porgottnnent purnn toren bhag gheunk ami kitem korunk zata? (Peregraf 8-10 polloiat) e
8. Ugddas Disa pasot dusreank amontronn diunk Jehovachea sevokamnim kitem kelam? (Chitr polloiat.)
8 Jehovachim sevokam zaitea vorsam thaun lokank Ugddas Disak hajir zaunk amontronn ditat. 1881-ant, United States-antlea bhav-bhoinnamnim Ugddas Disak, Allegheny, Pennsylvania-nt ravpi eka bhavachea ghorant ektthaim mellon ieunchem mhunn Pahrogopur-ant kollounni kelʼli. Tea uprant, bhav-bhoinnam ap-aplea sobhent Ugddas Disak hajir zaunk laglim. Magir Mars 1940-ant, aikonk umed dakhoitat tea munxank, porgottnnaramnim Ugddas Disak amontronn diunk zata mhunn sanglem. Ani 1960-ant, Bethel-ant poile pavtti, soglea sobhank Ugddas Disa pasot chhaplolim amontronnam dhaddlim. Tednam thaun ami Ugddas Disa pasot lokank koroddamnim amontronnam dileant. Tor ami Ugddas Disa pasot amontronnam diunk itlo vavr kiteak kortat?
9-10. Ami Ugddas Disa pasot amontronnam diunk kortat tea vavra thaun konna-konnank faido zata? (Juanv 3:16)
9 Ek karonn mhunnttlear, Jehovan ani Jezun amchea pasot kitem-kitem kelam, tem Ugddas Disak poilech pavtti hajir zatat tannim zannam zalʼlem amkam zai. (Juanv 3:16 vachat.) Tea kariavollint tim jem kitem polloitat ani aikotat, tea vorvim Jehova vixim anik xikonk ani tachim sevokam zaunk tankam urba mellttoli mhunn ami axetat. Punn ami heach borabor anik konnank apoitat?
10 Jehovachi seva korop bond kelea tankam pasun ami Ugddas Disak amontronn ditat. Karonn Jehova azun porian tancho mog korta mhunn ami tanchea ugddasak haddunk sodhtat. Hantuntlim zaitim zannam amontronn ghetat ani Ugddas Disak hajir zatat tednam tankam polloun ami khub khuxal zatat. Tim tea kariavollik hajir zatat tednam adim Jehovachi seva korun tim kitlim khuxal aslim tem tanchea ugddasak ieta. Oxench Monica-k ghoddlem. c Tannem Jehovachi seva korop bond kelʼli. Punn COVID-19 pidde vellar tem porot ek porgottnnar zalem. 2021-achea Ugddas Disak hajir zalea uprant tannem oxem mhunnttlem: “Ho Ugddas Dis mhaka ekdom khas zaun asa. 20 vorsam uprant poile pavtti hanvem porgottnni keli, ani lokank Ugddas Disa pasot amontronnam dilim. Oxem korunk hanvem mhojean zata tem soglem kelem. Karonn Jehovan ani Jezun mhojea pasot jem kitem kelam tea pasot hanv khub upkari asam.” (St. 103:1-4) Tor Ugddas Disa pasot lokank amontronn ditat tednam lok amchem aikom vo na, ami kortat to vavr Jehova polloita mhunn ugddas dovrun ami dusreank Ugddas Disachim amontronnam diunk amchean zata tem soglem korum-ia.
11. Lokank Ugddas Disa pasot amontronnam diunk ami kelʼlea vavracher Jehovan aplem besanv koxem ghatlem? (Haggai 2:7)
11 Lokank Ugddas Disa pasot amontronnam diunk ami kelʼlea vavracher Jehovan aplem besanv ghatlem. 2021-ant, COVID-19 piddek lagon zaiteo oddchonneo asleo. Tori astana, tea vorsa 2,13,67,603 lok hajir zale. Hache poilim itlo lok kednanch hajir zaunk na! Ho ankddo, sonvsarbhor jitlim Jehovachim Sakxi asat, tache poros oddez pavtti chodd aslo. Hem mat khorem, ki kitlo lok hajir zata fokot tench Jehovak mhotvachem nhoi, punn thoim hajir zalʼlo dor ek munis taka mhotvacho. (Luk. 15:7; 1 Tim. 2:3, 4) Tor Ugddas Disa pasot lokank amontronnam ditat tednam khaltea kallzache lok mellonk Jehova amkam modot kortolo mhunn ami khatri dovrunk zata.—Haggai 2:7 vachat.
KOTTHIN PORISTHITIMNIM PASUN JEHOVACHE LOK UGDDAS DIS KORTAT
Ugddas Disak hajir zaunk ami kortat tea vavracher Jehova besanv ghalta (Peregraf 12 polloiat) f
12. Ugddas Disak hajir zaunk amkam kiteak kotthin zaunk xokta? (Chitr polloiat.)
12 Nimannea disamnim amkam zaitea kotthin poristhitincho fuddo korunk poddttolo mhunn Jezun sanglolem. Zoxem, famili thaun virodh, dhumallo, zhuzam ani pidda. (Mt. 10:36; Mk. 13:9; Luk. 21:10, 11) Thodde pavtti, oslea poristhitink lagon Ugddas Disak hajir zaunk amkam kotthin zata. Punn amchea bhav-bhoinnamnim oslea poristhitincho fuddo koso kelo, ani Jehovan tankam koxi modot keli?
13. Bhav Artem-an dhiran, bondkhonnint astana pasun Ugddas Dis korunk nichov kelo dekhun Jehovan tacher koxem besanv ghatlem?
13 Bondkhonnint astana. Aplea bhavarthak lagon amchea thoddea bhav-bhoinnank bondkhonnint ghatleant. Tori astana, tim Ugddas Dis korunk apleachean zata tem soglem kortat. Oxench bhav Artem-an kelem. 2020-ant Ugddas Disachea vellar to bondkhonnint aslo. To aslo ti bondkhonn ekdom lhan asli. Ani thoim eka vellar sumar char te panch koidi astale. Bondkhonnint astana pasun, Ugddas Disa pasot goroz asat teo vostu ektthaim korunk ani apleach pasot Ugddas Disachem bhaxonn diunk bhavan tharailem. Punn tachea borabor aslole koidi sigrett voddttale ani gallio martale. Tor bhavan kitem kelem? Bhavan tanchea lagim fokot ekuch vorak lagon sigrett voddinakat ani gallio marinakat mhunn vinoti keli. Ani ojapachem mhunnttlear te tachem aikonk toiar zale. Bhav Artem sangta, “Tankam Ugddas Disa vixim zannam zaunk zai kai mhunn hanvem tankam vicharlem.” Te tea vixim kainch zannam zaunk sodhinasle mhunn tannim sanglem tem khorem. Punn bhavan Ugddas Dis kelo tem polloilea uprant, ani tannem dilʼlem bhaxonn aikolea uprant, te apunnuch zaun tea vixim vicharunk lagle.
14. COVID-19 pidde vellar Jehovachea sevokamnim Ugddas Dis korunk kitem kelem?
14 COVID-19 pidde vellar. COVID piddek lagon, Jehovachea sevokank holamnim vo her zageancher sangata mellon Ugddas Dis korunk mellonk na. Punn hea pasot tim Ugddas Dis korinastana ravlim kai? Na. d Jea sobhamnim internet-achi manddavoll asli tankam videoconference-a udexim Ugddas Dis korunk mellʼllo. Punn lakʼkhamnim lokank internet-achi manddavoll nasli. Tannim kitem kelem? Thoddea desamnim, xakha ofisamnim T.V. ani radio udexim, Ugddas Disachem bhaxonn broadcast korunk manddavoll keli. Tea bhair, kheddea ganvamnim aslolea bhav-bhoinnank pasun Ugddas Dis korunk xakha ofisamnim hem bhaxonn 500 poros chodd bhasamnim rekordd kelem. Ani bhavamnim him rekorddingam goroz asa tankam pavounk manddavoll keli.
15. Sue nanvachea eka Bible vidʼdheartheachea onubhova thaun tumi kitem xiklim?
15 Famili thaun virodh ieta tednam. Thoddea zannank, Ugddas Dis korunk ieta ti sogleam-von vhoddli oddchonn mhunnttlear, famili thaun virodh. Hea vixim, ami Sue nanvachea eka Bible vidʼdheartheacho onubhov polloum-ia. 2021-ant, familichea virodhak lagon apunn Ugddas Disak hajir zaunk pavchem na, mhunn Sue-an ek dis poilinch aplea Bible xikoupeak sanglem. Tednam tachea Bible xikoupean taka Lukas 22:44 vachun dakhoilem, ani amkam kotthin poristhitincho fuddo korunk poddtta tednam ami Jezu bhaxen Jehovak magnnem korunk zai, ani purnn toren tacher visvas dovrunk zai mhunn somzailem. Dusrea disa, Sue-an unddo ani drakxanchea soreachi manddavoll keli, ani jw.org-cher Ugddas Disachi Sokallchi Bhokti polloili. Sanjechea vellar, Sue tachea room-ant eklench aslem tednam tem fon-a udexim Ugddas Disak hajir zalem. Uprant, Sue-an aplea Bible xikoupeak oxem boroilem: “Kal tunvem mhaka khub urba dili. Ugddas Disak hajir zaunk hanvem mhojean zata tem soglem kelem ani urlolem Jehovacher soddlem. Ani Jehovan mhaka khorench modot keli. Hanv kitlem khuxal asa ani Jehovak kitlem upkari asa tem mhojean utramnim sangonk zaina!” Tumkam pasun oslea poristhitincho fuddo korunk poddlo zalear, Jehova tumkam modot kortolo mhunn tumkam khatri asa kai?
16. Ugddas Disak hajir zaunk ami kortat tea vavracher Jehova besanv ghaltolo mhunn amkam kiteak khatri asa? (Romkarank 8:31, 32)
16 Tor Ugddas Disak hajir zaunk ami kortat tea vavracho Jehova khub valor korta. Ani Jehovan amchea pasot jem kitem kelam taka lagon ami upkari astat tednam, Jehova amkam besanvam ditolo mhunn ami khatri dovrunk zata. (Romkarank 8:31, 32 vachat.) Tor hea vorsachea Ugddas Disak hajir zaunk, toxench Ugddas Disachea poilim ani uprantchea sumanamnim porgottnnechea kamant amchean zata tem soglem korunk ami nichov korum-ia!
GIT 18 Soddvonne Pasot Upkari
a Abril 4, 2023 hea Mongllara disa, sonvsarbhor lakʼkhamnim lok Jezuchea mornnachea Ugddas Disak hajir zatolim. Hantuntlim zaitim zannam hea kariavollik poilech pavtti hajir astolim. Toxench, Jehovachi seva korop bond kelʼli, ani khub vorsam porian Ugddas Disak hajir zaunk nant tim pasun thoim hajir astolim. Toxench, thoddeank hea kariavollik hajir zaunk zaitea oddchonneancho fuddo korunk poddttolo. Tori astana, tim thoim hajir astolim. Tor ami kosle-i poristhitint asum, Ugddas Disak hajir zaunk ami kortat to vavr polloun, Jehova khub khuxal zata mhunn ami khatri dovrunk zata.
b Lok misak vochon kumneav ghetat tednam unddo ani drakxancho soro, khoreponnim Jezuchi kudd ani rogtant bodolta mhunn tim mantat. Ani kumneav ghetat tednam dor ek pavtti Jezu apli kudd ani rogot bolidan korta oxem tankam dista.
c Thoddim nanvam bodolʼleant.
d jw.org-cher, “2021 Memorial Commemoration,” hea vixoi-acher aslole lekh pasun polloiat.
