ISRAELITKAR Bhasailʼlea Desant asle tednam te zomin kostale ani bim vomptale tea vellar tanchem voros suru zatalem. Aiz to vell, Setembr vo Otumbr mhoineamnim poddtta.

Ek mhoino kitlo lamb asonk zai, tem adim lok chondrim polloun tharaitale. Ani ho mhoino, 29 te 30 disancho astalo. Ani ek voros kitlem lamb asonk zai, tem lok suria polloun tharaitale. Punn suria polloun mezlolem voros, chondrim polloun mezlolea vorsa poros lamb astalem. Tor ho ontor zatalo dekhun, te ghoddie dusrem voros suru zaunchea poilim tantunt thodde dis vo ek mhoino vaddoitale. Oxem kelolean tancho rovpacho ani lunvnnecho vell tanchea calendar-a pormonnem sarkea vellar ietalo.

Punn Moizesachea kallar, Jehovan aplea lokank sanglem ki tanchem voros Abib vo Nisan mhoineant suru zatolem. Ho mhoino aiz Mars vo Abril mhoineamnim poddtta. (Sutt. 12:2; 13:4) Tea kallar, hea mhoineant ek fest vo porob zatali ani tantunt zovachi lunvnni mellon asli.—Sutt. 23:15, 16.

The History of the Jewish People in the Age of Jesus Christ, (175 B.C.–A.D. 135) hea pustokant, Emil Schürer nanvachea eka zannaran oxem boroilem: “Eka vorsant ek mhoino kednam vaddouncho tem tharaunk khub sompem aslem.” Tannem oxem-i mhunnttlem ki Paskanchi porob, Nisan mhoineant akʼkho chondrim dixtti poddtta tednam monoitale. Toxench, hi porob monoitana te eke khas vostucher dhean ditale. Ti mhunnttlear, eka umkeach disa, disui bara vorancho astalo ani ratui bara voranchi astali. Tea disak ‘equinox’ mhunnttat. Tor Paskanchi porob, equinox-a [vo vosont kallachea] uprant poddonk zai asli. Ani hi porob equinox-a poilim ieta mhunn tankam kollʼllem zalear, Nisan mhoinea poilim, Judev lok anik ek mhoino vaddoitale.

Somiachem Rat Jevonn khoinchea tarker poddtta tea vixim tharaitana Jehovache Sakxi pasun hacheruch dhean ditat. Tem mhunnttlear, ti tarik vosont kallant ani Israelitkaranchea calendar-a pormonnem, Nisan 14 tarker poddonk zai. Ani hi tarik kednam poddtta tem sonvsarbhor aslolea sobhank adim-fuddench kolloitat. *

Atanchea tempar, vonttir aslolo calendar polloilear vo amchea fon-ar aslolo calendar app polloilear amkam tarik rokddich kollon ieta. Punn Bible-achea kallar hem itlem sompem naslem. Tor Israelitkarank, ek mhoino kednam suru zata vo kednam sompta tem koxem kollon ietalem?

Noahchea kallar, dor ek mhoino 30 disancho mhunn mantale. (Ut. 7:11, 24; 8:3, 4) Punn uprant, Israelitkaranchea calendar-a pormonnem, chondrim poiloch dixtti poddonk lagtalo tednam tancho mhoino suru zatalo dekhun tanchea mhoineak 29 vo 30 dis astale.

Ek pavtt David ani Jonathan eka-meka lagim uloitale tednam tannim oxem mhunnttlem: “Faliam omas.” (1 Sam. 20:5, 18, NW) Tor hantuntlean tanchea disamnim, ek novo mhoino kednam suru zata tem ghoddie tankam poilinch khobor astalem mhunn kollon ieta. Punn eka Israelitkarak hem koxem kollon ietalem? Hea vixim Judevamnim svota kelʼle kaide ani chali-ritim vixim boroilʼlea Mishnah nanvachea pustokant amkam thoddi mahiti melltta. Tea pustokantlean kollon ieta ki Babilonant koidi aslole Judev porot ailea uprant, Mha-Dhorm Sobha (Judevancho sogleam-von vhoddlo kortt) mhoino kednam suru zatalo tem tharaitali. Hi Mha-Dhorm Sobha, vorsantlea sat mhoineamnim, mhoineachea 30-avea disa mellon ieun, fuddlo mhoino kednam suru zata tem tharaitali. Koxi?

Jerusalem-a bhonvtonnim aslolea dongrancher thoddea munxank dovortale. Ani chondrim poiloch dixtti poddonk lagtalo tednam te rokddech vochon Mha-Dhorm Sobhek sangtale. Ani Mha-Dhorm Sobhek favo title purave mellʼllea uprant, novo mhoino suru zalo mhunn te sogleank kolloitale. Punn kednam-kednam kupank vo dhovak lagon dongrar aslolea hea munxank chondrim disonaslo zalear, cholta to mhoino 30 disancho ani tachea uprant  novo mhoino suru zatolo mhunn Mha-Dhorm Sobha tharaitali.

Mishnah pustokant sanglam ki ek novo mhoino suru zalo hi khobor soglea lokank kollounk, te Jerusalem-achea lagim aslolea Zoitunanchea Dongracher eka umkeach zagear, toxench Israelant aslolea her unch zageancher eke umkech kodden uzo pettoitale. Ani vorsam gelim toxim, hi khobor sangonk te sondex diupi munxank dhaddttale. Hea toren, Jerusalem-ant aslolea Judevank ani her vattarantlea soglea lokank novo mhoino kednam suru zata hi khobor pavtali. Oxem kelolean, tankam sogleank ekuch vellar porbo monounk modot zatali.

Israelitkaranchea tempar eka vorsant aslole mhoine, porbo ani veg-veglle kall somzonk sokol dilolem chart tumkam modot kortolem.