‘Daiz porot viktem gheunk hokʼk aslolea munxan,’ to Rutha lagim kazar zalo zalear tachea daizak “mar bostolo,” oxem kiteak mhunnttlem? (Ruth 4:1, 6)

Adlea kallar, ek kazari munis bhurgim nastana melo zalear, tachea daizachem kitem zatalem? Toxench, tachea familichea nanvachem kitem zatalem? Moizesa udexim dilʼlea Kaideantlean, amkam hea prosnancho zobab kollon ieta.

Ek munis melo zalear, vo goribik lagon tannem apli zomin vikli zalear, tachea bhavan vo lagxilʼlea soirean ti porot vikti gheunk zatali. Oxem kelolean, tem daiz familintuch urtalem.—Lev. 25:23-28; Lok. 27:8-11.

Punn ek munis melea uprant tachea familichem nanv koxem urtolem aslem? Melʼlea munxachea bhavan tea vidve lagim kazar zaunk zai aslem. Ani tankam zolmota tea poilea bhurgeak, tichea poilinchea ghovachem nanv ani daiz mellttalem. Hea vorvim, tachea familichem nanv urtalem. Ruthache poristhitint pasun oxench zalem. Toxench, hea manddavolli udexim tea vidvechi kallji pasun gheunk pavtale.—D.S. 25:5-7; Mt. 22:23-28.

Ami Naomichea poristhiticher dhean diunk zata. Ti Elimeleka lagim kazar zalʼli. Punn uprant, Elimelek ani tiche dogui put bhair poddle. Tor tanchi kallji gheunk familint konnuch dadlo munis naslo. (Ruth 1:1-5) Uprant Naomi, apli sun Rutha sangata, Judant porot aili tednam, tinnem Ruthak, Boaz nanvachea eka munxak, tanchem daiz porot viktem gheunk sangonk lailem. Boaz Elimelekacho lagxilʼlo soiro aslo. (Ruth 2:1, 19, 20; 3:1-4) Punn daiz porot viktem gheunk, tache poros chodd lagxilʼlo ek soiro aslo mhunn Boazak khobor asli. Ani Bible-ant tea soireak, ‘suttka diunk vo daiz porot viktem gheunk hokʼk aslolo munis’ oxem mhunnttlam. Tor daiz porot viktem gheunk, tea munxak poilo hokʼk aslo.—Ruth 3:9, 12, 13.

Survatek, ‘to munis’ tankam modot korunk toiar aslo. (Ruth 4:1-4) Tem daiz viktem gheunk taka thoddo khorch korcho poddttolo mhunn to zannam aslo. Punn Naomi zanntti zalolean, tika bhurgim zolmochim naslim, hem-ui taka khobor aslem. Tor Elimelekachem soglem daiz takach mellttolem, ani taka khub faido zatolo oxem tannem chintlem.

Punn apleak Rutha lagim kazar zaunk poddttolem mhunn taka kollon ailem tednam to fatti sorlo. To oxem mhunnonk laglo: “Mhojean suttka diunk zaina. Oxem kelear mhojea daizak mar bostolo.” (Ruth 4:5, 6) Tor tannem aplem mon kiteak bodolʼlem?

To munis, vo anik konnui Rutha lagim kazar zalʼlo, ani Ruthak ek put zolmolʼlo zalear, Elimelekachem soglem daiz tachea putachem zatolem aslem. Punn oxem zalʼlem zalear, daiz porot viktem gheunk hokʼk aslolea munxachea ‘daizak mar koso bostolo’ aslo? Bible-ant tea vixim sangonk na. Punn him ghoddie tachim thoddim karonnam zaunk xoktat.

• Poilem mhunnttlear, Elimelekachem daiz, tem porot viktem ghetlolea munxachem nhoi, punn Ruthachea putachem zatolem aslem. Tor tem daiz viktem gheunk poixe khorch korun pasun, taka kosloch faido zauncho naslo.

• Dusrem mhunnttlear, taka Ruth, toxench Naomichi kallji gheunk poddttoli asli.

• Tisrem mhunnttlear, tea munxak poilim anikui bhurgim asat, ani Rutha lagim kazar zalea uprant tankam bhurgim zolmotat zalear, tachem daiz soglea bhurgeam modem vantton voitolem aslem.

• Chovtem mhunnttlear, tea munxak adim bhurgim nant ani Rutha lagim kazar zalea uprant taka ek put zolmolo zalear, tea putak Elimelekachem, toxench hea munxachem daiz mellttolem aslem. Ho munis melea uprant, tachem soglem daiz, Elimelekachem nanv aslolea putachem zatolem aslem. Tor to munis aplem daiz hogddaunk sodhinaslo dekhun, tannem Boazak tem daiz porot viktem gheunk sanglem. Ani Boaz oxem korunk toiar zalo. Karonn melʼlea munxachem nanv ‘sasvot korcheak vo sodanch uronk zai’ mhunn Boazak zai aslem.—Ruth 4:10.

Daiz porot viktem gheunk hokʼk aslolo munis, apleach nanva ani daiza vixim ekdom chodd chintʼtalo oxem dista. Tor to khub svarthi aslo mhunn kollon ieta. Tannem aplem nanv samballunk itlo proitn kelo. Tori astana, aiz tachem nanv konnakuch khobor na. Toxench, tannem ek khas sueog hogddailo, zo Boazak mellʼllo. Tem mhunnttlear, Boaz Jezu Kristacho purvoz zaunk pavlo. Tor svarthak lagon to munis, gorjek sampoddloleank modot korunk fatti sorlo dekhun, tacho porinnam kitlo vaitt zalo nhoi!—Mt. 1:5; Luk. 3:23, 32.