1. Matev 28:18-20-ant sanglolea pormonnem, Jezun aplea xisank kosli adnea dili?

JEZUCHEM punorjivontponn zalea uprant Galileant ekttovlolea aplea xisank to dixtti poddlo. Tankam to kitem tori mhotvachem sangonk sodhtalo. Tem kitem zaun aslem? Amkam tem Matev 28:18-20-ant (vachat) vachunk melltta.

2. Ami hea lekhant khoinchea prosnanche zobab polloitolim?

² Jezun dil’li xis korchi adnea Devachea dor eka sevokak aiz pasun lagu zata. Hea adneak sombondit aslole tin prosn ami polloum-ia. Poilo, novea xisank Devache dorje xikounchea bhair ami anik kitem korunk zai? Dusro, Bible videartheamnim vaddavoll korunk sobhentlea soglea bhav-bhoinnamnim tankam koxi modot korunk zata? Tisro, seva bond kelolea bhav-bhoinnank xis korchea kamant porot vantto gheunk ami tankam koxi modot korunk zata?

3. Jezun dil’lea adneant khoincheo khas suchounneo asleo?

³ Jezucheo suchounneo spoxtt asat. Tannem xikoilam tem ami dusreank xikounk zai. Punn ami ek mhotvacho vixoi ugddas dovorchi goroz asa. Jezun, ‘Hanvem tumkam dileat teo soglleo adnia tankam xikoiat’ mhunn sangonk na. Tachea bodlek tannem, “Hanvem tumkam dileat teo soglleo adnia pallunk tankam xikoiat” mhunn sanglem. Hacho orth, ami amchea Bible videartheank xikoitat tednam tankam fokot kitem korunk zai tem sangonant, punn tem koxem korunk zai tem ami tankam dakhoitat. (Itihas 8:31) Oxem korop kiteak gorjechem?

4. Ek adnea pallop mhunnche kitem? Ek udharonn diat.

 ⁴ Ek adnea ‘pallop,’ mhunnche tachea pormonnem korop. Jezuchi adnea pallunk eka munxak ami koso xikounk zata tem zannam zaunk ek udharonn polloum-ia. Rostea voile kaide pallunk, ek gaddi cholounk xikoupi aplea videartheank koso xikoita? Poilim, to aplea videartheank rostea voile kaide kitem asat tem xikoita. Punn tachea videartheamnim te kaide pallunk zai zalear tannem anik kitem tori korunk zai. Tannem tache videarthi gaddi choloitat tednam tanchea sangata vochon tankam modot korunk zai, ani xikoilole te rostea voile kaide koxe pallop tem tankam dakhounk zai. Hea udharonnantlean ami kitem xikonk zata?

5. (a) Juanv 14:15 ani 1 Juanv 2:3-ant sanglolea pormonnem amchea Bible videartheank ami kitem korunk xikounk zai? (b) Amchea videartheank ami koxi vatt dakhounk zata tachim udharonnam diat.

⁵ Ami eklea sangata Bible obheas ghetat tednam tannem kitem kel’lem Devak zai, tem ami taka xikoitat. Punn ami anik kitem tori korunk zai. To xikta tem tachea sodanchea jivitant tannem koxem apnnaunk zata tem ami taka xikounk zai. (Juanv 14:15; 1 Juanv 2:3 vachat.) Amchea videartheamnim Bible-antlim totvam iskolant, kamachea zagear vo monoronjon vinchun kaddttana koxim apnnaunk zatat tem ami amchea kornneamnim tankam dakhounk zata. Tea bhair, ami Bible-antlim totvam apnnailolean amkam dhokeam thaun pois ravonk ani bore nirnnoi gheunk tim koxim faideak poddleant tem tankam sangonk zata. Amchea Bible videartheam sangata magnnem kortat tednam ami Jehovachi povitr xokti tankam vatt dakhoun dium mhunn magnnem korunk zata.—Juanv 16:13.

6. Jezuchi adnea pallunk ani dusreank xikounk ami anik kitem korunk zai?

⁶ Jezuchi adnea pallunk ani dusreank xikounk ami anik kitem korunk zai? Amche Bible videarthi xiktat tem dusreank sangonk ami tankam modot korunk zai. Thodde videarthi apunn xiktat tem dusreank sangonk bhieunk puro. Tor tankam Bible-antlim sotam somzaunk ami pasiensan modot korunk zai. Hea toren tancho bhavarth ghott zatolo ani tim xikleant tem dusreank sangonk tankam urba mellttoli. Dusreank bori khobor porgottunk ami amchea Bible videartheank koxi modot korunk xoktat?

7. Dusreank bori khobor porgottunk ami amchea Bible videartheak koxi modot korunk zata?

⁷ Ami amchea Bible videartheak he prosn vicharunk zatat. “Bible kitem xikoita tem apnnailolean tuka koso faido zala? Dusreamnim pasun hem zannam zavop gorjechem oxem tuka dista? Tor tunvem dusreank koxi modot korunk zata?” (Mho. 3:27; Mt. 9:37, 38) Seve Pasot Mukhel Prokaxonam, hantuntlem ttrektt tumchea videartheak dakhoiat, ani tantuntlem khoinche ttrektt tachea soireank, ixttank vo kamachea vangddeank boreak poddttolem oxem taka dista, tem vicharat. * Tachea hatant zaitim ttrekttam diat ani tim ttrekttam tachean dusreank borea toren koxim diunk zatat tem taka xikoiat. Magir, to ek porgottnnar zalea uprant tachea sangata porgottnnent vochon tumi taka modot korunk zata.—Up. 4:9, 10; Luk. 6:40.

8. Amchea videartheamnim Jehova pasot ani xezaream pasot mog vaddovop kiteak gorjechem? (“ Deva Pasot Tumchea Bible Videartheancho Mog Koso Vaddouncho,” hem boks pasun polloiat.)

⁸ Ugddas dovrat, apnnem xikoileat teo “soglleo adnia pallunk tankam xikoiat” mhunn Jezun sanglem. Tantunt sogleam-von vhoddleo don adnea mellon asat. Devacho mog korop ani xezareancho mog korop. Heo donui  adnea porgottnnechea ani xis korchea kamak zuddloleo asat. (Mt. 22:37-39) Oxem ami kiteak mhunnonk zata? Porgottnnechem kam korunk amchem mukhel karonn mhunnttlear ami Devacho ani xezareancho mog kortat. Thoddea Bible videartheank porgottnnent bhag gheunk bhirant disonk xokta hem khorem. Punn Jehovachea modotin tankam asloli munxachi bhirant sovka-sovkas tim pois korunk xoktat mhunn ami tankam khatri diunk zata. (St. 18:1-3; Mho. 29:25) Amchea videartheamnim Deva pasot mog vaddounk ami tankam eka-fattlean-ek kitem modot diunk zata tea vixim hea lekhant aslolea boksant dakhoilam. Tea bhair, novea xisank Jehova pasot aslolo mog vaddounk, sobhentlim bhav-bhoinnam koxim modot korunk xoktat tem-ui dakhoilam.

9. Ami uzar kelolea udharonnant ek videarthi bore toren gaddi cholounk koso xikta?

⁹ Ami portun gaddi cholounk xikoita tea xikoupeachem udharonn polloum-ia. Tantunt gaddi cholounk xikta to videarthi aplea xikoupea sangata rostear gaddi choloitana koso xikonk pavta? To aplea xikoupeachem aikota, ani rostear borea toren dusre gaddi choloitat tankam polloun tanchea thaun-ui xikta. Udharonnak, ek gaddi choloupi dusrea gaddiek aplea gaddie fuddem vochonk vatt dita, vo dusrea gaddi choloupeanchea dolleancher light poddona zaunk aplea gaddiechi headlight dim korta tem to xikoupi aplea videartheak dakhoita. Tor oslea choloupeanchim udharonnam uzar korun to xikoupi aplea videartheak xikoita tednam gaddi koxi cholounk zai tem to videarthi xikta.

10. Eka videartheak vaddavoll korunk kitem modot korunk xokta?

¹⁰ Teach bhaxen, Jehovachi seva korunk suru korta to videarthi fokot aplea xikoupea thaunuch nhoi, punn Jehovachi seva kortolea her bhav-bhoinnanchea borea udharonnam thaun pasun xikta. Tor, amchea Bible videartheank vaddavoll korunk ekdom mhotvachem kitem zaun asa? Mittingek hajir zavop. Kiteak? Karonn mittingent Bible adarit xikounn ghetat tednam tanchem ginean vaddtta, tancho bhavarth ghott zata, ani Jehova pasot tancho mog pasun vaddtta. (Itihas 15:30-32) Tea bhair, tim mittingek ietat tednam tanche Bible xikoupi tankam veg-vegllea bhav-bhoinnanchi vollokh korun diunk xoktat, zankam tanchea sarkea oddchonneancho fuddo korcho poddla astolo. Toxench, sobhentlim bhav-bhoinnam eka-mekak mog koso dakhoitat tem to videarthi pollounk xoktolo. Ami oslim thoddim udharonnam polloum-ia.

11. Eka videartheak mittingent koslim borim udharonnam pollounk mellonk xoktat, ani hacho tacher koslo probhav poddonk xokta?

¹¹ Ek Bible videarthi ekttich asa dekhun tika aplea bhurgeak eklich poschem poddtta. Punn mittingek ieta tednam ti osle eke bhoinnik polloita zachi poristhiti tichea sarkich asa. Tori astana, mittingek ieunk ti korta te proitn ti polloita tednam apnnem pasun mittingek ieunk proitn korunk zai oxem tika dista. Eka videartheak sigar voddchi sonvoim soddunk kotthin zata, punn to atam mittingent oslea eka porgottnnarak melltta zannem zaito proitn korun sigar voddchi sonvoim soddlea. Ani Devache kaide pall’llolean ani Deva pasot mog vaddoilolean taka koxi modot zalea tem to porgottnnar tea videartheak sangta. (2 Kor. 7:1; Filp. 4:13) Uprant apnnem ti sonvoim koxi moddli tem sangon, tannem pasun ti sonvoim moddunk zata mhunn to taka sangta. Tor tea videartheak apnnachean-ui zatolem mhunn khatri melltta. Ek tornnattem Bible videarthi, mittingek ieta tednam ek tornnatti bhoinn kitli khuxal asa tem polloita. Tichi khuxalkai polloun, tiche bhaxen apunn pasun koxem khuxal zaunk xokta tem zannam zaunk proitn korta.

12. Sobhentlea dor eklean Bible videartheank modot korunk zata mhunn ami kiteak mhunnonk xoktat?

 ¹² Bible videarthi oslea visvaxi bhav-bhoinnanchim udharonnam polloitat tednam, Devacho ani xezareancho mog korop hi Jezun diloli adnea koxi pallop tem tim xiktat. (Juanv 13:35; 1 Tim. 4:12) Ani ami poilim polloil’lem toxem amche Bible videarthi oslea bhav-bhoinnam thaun xikonk xoktat, zannim tanchea sarkea oddchonneancho fuddo kela. Jezucho xis zaunk apnnem korunk zai te bodlav apnnachean korunk zatat mhunn tea videartheak somzota. (D.S. 30:11) Tor, Bible videartheank vaddavoll korunk sobhentlea dor eklean zaitea ritimnim modot korunk zata. (Mt. 5:16) Tumchea sobhechea mittingek ietolea Bible videartheank urba diunk tumi koxim vavurtat?

13-14. Niraxi aslolea aplea apostlam thaim Jezu koso vaglo?

¹³ Xis korchea kamant bhag gheunk, seva bond kelolea bhav-bhoinnank ami modot korunk sodhtat. Aple apostl niraxi asle tednam, Jezu tanchea sangata koso vaglo tantuntlean hem koxem korop tem ami xikonk zata.

¹⁴ Jezu morchea thoddeach vella poilim, tache apostl “taka sanddun pollun gele.” (Marku 14:50; Juanv 16:32) Tea thoddea vellak, Jezuche apostl bhiele ani niraxi zale tednam Jezu tanchea sangata koso vaglo? Jezu porot jivont zalea uprant tannem rokddench aplea thoddea xisank oxem sanglem: “Bhieum nakat; vochun Mhojea bhavank [hanv punorjivont zala] mhunn sangat.” (Mt. 28:10) Jezun aplea apostlank soddun diunk na. Te taka soddun gele khore, punn tannem tankam ‘mhoje bhav’ mhunnttle. Jehova bhaxen, Jezu doiall aslo ani dusreank bhogxitalo.—2 Raz. 13:23.

15. Seva bond kelolea porgottnnaram vixim amkam koxem dista?

¹⁵ Teach toren, seva bond kelolea porgottnnaranchi ami khub porva kortat. Tim amchim bhav-bhoinnam, ani ami tancho mog kortat! Jehova pasot tannim kel’lo koxtti vavr ami visronant. Karonn thoddim zaitim vorsam Jehovachea sevent khub vavurleant. (Heb. 6:10) Amkam tancho khub ugddas ieta! (Lukas 15:4-7) Tor, Jezuchi dekh gheun ami tanchi porva kortat mhunn koxi dakhounk xoktat?

16. Seva bond kelolea bhav-bhoinnanchi ami porva kortat mhunn koxim dakhoun xoktat?

¹⁶ Mogan ieukar diat. Jezun aplea niraxi zal’lea apostlank urba dil’li ti ek vatt mhunnttlear, tannem tankam eka mittingek apoile. (Mt. 28:10b; 1 Kor. 15:6) Seva bond kelole porgottnnar, mittingek ienant zalear tankam mittingek ieunk ami urba diunk zata. Oxem korunk amkam ghoddie tankam zaite pavtti sangchem poddttolem. Aple xis apnnem apoilolea mittingek aile tem polloun Jezu khuxal zalo mhunn dubhavuch na.—Matev 28:16 ani Lukas 15:6 sor korat.

17. Seva bond kelolo porgottnnar mittingek ieta tednam ami tache thaim koxem vagonk zai?

¹⁷ Kallzantlean tankam ieukar diat. Jezuche xis taka mell’lle tednam tannim aplea lagim ulounk zai mhunn chintchea bodlek to tanchea lagim ulounk gelo. (Mt. 28:18) Seva bond kelolo ek porgottnnar sobhent porot ieta tednam ami kitem kortolim? Tannem amchea lagim ieun ulounk zai hem chintchea bodlek ami tachea lagim vochon ulounk zai. Punn ami ghoddie, tachea lagim ami kitem uloitolim mhunn chintunk puro. Taka polloun ami kitlim khuxal zaleant tem ami taka sangonk zata. Toxench, taka lojek ghalta toxem ami kainch korchem nhoi mhunn ugddas dovrunk zata.

18. Seva bond kelolea porgottnnarank ami koxi urba diunk zata?

¹⁸ Taka kallzantlean urba diat. Jezun aplea xisank sonvsarbhor porgottnnechem kam korunk zai mhunn sanglem tednam, tannim ghoddie hem kam ami koxe kortole mhunn chintlem astolem. Punn Jezun tankam urba  diun oxem mhunnttlem: “Sodanch-sodam, . . . Hanv tumchea sangata asam!” (Mt. 28:20) Jezuchea hea utram thaun tachea xisank urba mell’lli kai? Hoi. Karonn te rokddech lokank ‘xikoit ravle ani xubhvortoman porgottit ravle.’ (Itihas 5:42) Seva bond kelolea porgottnnarank pasun urba zai. Karonn apunn porot porgottnnechem kam koxim kortolim mhunn tim bhieunk xoktat. Porgottnnent tim ekttinch nant mhunn ami tankam khatri diunk zata. Tim apli porgottnni porot chalu kortat tednam ami tanchea sangata vochon tankam tenko ditat zalear tim khub khuxal zatolim. Seva bond kelolim porgottnnaram amchim bhav-bhoinnam mhunn ami lekhtat tednam tim porgottnnent urben bhag gheunk xoktolim ani hem polloun sobhentlim soglim bhav-bhoinnam khuxal zatolim.

19. Ami kitem korunk sodhtat, ani kiteak?

¹⁹ Jezun amkam dilam tem kam ami kednam porian kortolim? Kalla iugachea sompaddnne porian ami tem kam korit ravtolim. (Mt. 28:20; “Conclusion of the system of things,” hem NW-chea Glossary-int polloiat.) Tednam meren amchean porgottnnechem ani xikoupachem kam korunk zatolem kai? Hem kam kortolim mhunn ami ghott nichov kela! Hea kamant ami amcho vell, takot ani poixe “sasnik jivit zoddunk favo asat” tea lokank sodhunk uzar kortat. (Itihas 13:48, NW) Oxem kel’lean ami Jezuchi dekh ghetat. Tannem mhunnttlem: “Zannem Mhaka pattoila Tachi khuxi korunk ani Tachem kam sompadunk, hench Mhojem khann-jevonn.” (Juanv 4:34; 17:4) Amkam-i oxench dista, ani Jezun amkam dilam tem kam korun sompounk amkam zai. (Juanv 20:21) Amchea Bible videartheamnim ani seva bond kelolea bhav-bhoinnamnim amchea sangata seva korit ravloli amkam zai.—Mt. 24:13.

20. Filipkarank 4:13-ant sanglolea pormonnem, Jezun amkam dilolem kam ami kiteak korun sompounk xoktolim?

²⁰ Jezun dilolem kam purnn korunk sompem na tem khorem. Punn hea kamant ami ekttinch nant. Jezu amchea sangata astolo mhunn tannem amkam bhas dilea. Tor, ami hem kam kortat tednam ami “Devache sohokari” zaun asat ani “Kristachea ekvottant” ami kam kortat. (1 Kor. 3:9; 2 Kor. 2:17, Povitr Pustok – Novo Korar) Amchean hem kam korun sompounk zatolem. Khorench, hem kam korop ani dusreank tem kam korunk modot korop, ek vhodd sueog zaun asa. Ani hantunt amkam khuxalkai melltta!​—Filipkarank 4:13 vachat.