1-2. Mhonn’nneo 4:25-ant aslolo sol’lo ami koso apnnaunk zata? Ek udharonn diat.

HEA fuddlea tin bhav-bhoinnam vixim chintat. Ek zantti bhoinn aplea adlea jivita vixim chinta. Tika atam zaiteo oddchonneo asat. Tori astana, Jehova pasot apleachean zata tem ti korit asa. (1 Kor. 15:58) Tichea famili ani ixttam sangata novea sonvsarant jietoli tea vella vixim ti dor disa nialltta. Anik eke bhoinnik tika sobhentlea eka bhavan vo bhoinnin dukhoilem tem ugddas ieta. Punn ti tacher vo ticher rag dhorun ravona. (Kol. 3:13) Anik eka bhavak apnnem adim kel’lea chukim vixim ugddas ieta. Punn atam to apunn Jehovak visvaxi ravonk kitem korunk xokta tacher dhean dita.—St. 51:10.

² Hea tin bhav-bhoinnanchea jivitant kitem ek-sarkem asa? Hea tin bhav-bhoinnank aplea adlea jivita vixim ugddas ailo. Punn tim teach vixim chintit ravonk nant. Tannim aple dolle “nitt-fuddem” mhunnche fuddaracher dovorle.—Mhonn’nneo 4:25 vachat.

3. Ami amche dolle “nitt-fuddem” dovrop kiteak gorjechem?

³ Ami amche dolle “nitt-fuddem” dovrop kiteak gorjechem? Ek munis fattleanuch polloun cholta zalear to nitt fuddem cholonk xokchona. Teach toren, ami amchea jivitant adim kitem ghoddlam tacheruch dhean ditat zalear ami Jehovachi seva purnn toren korunk pavchimnant.—Lukas 9:62.

4. Hea lekhant ami kitem xiktolim?

⁴ Amchea jivitant adim kitem ghoddlam tacheruch amchem dhean voddtta toslea tin fasam vixim ami hea lekhant polloum-ia. Te mhunnttlear: (1) Amchem jivit poilim bhaxen asonk zai oxem chintit ravop, (2) rag dhorun ravop, ani (3) guneanvkari bhavnam kallzant dovrop. Hea dor eka fasa thaun amkam rakhonk ani “pattim soddlam tem visrun, fuddem asa tacheruch dolle lavun,” dovrunk, Bible-antlim totvam amkam koxim modot korunk xoktat tem ami polloum-ia.”—Filp. 3:13.

5. Upodexok 7:10 amkam khoinchea eka fasa vixim xittkaita?

⁵ Upodexok 7:10 vachat. Amchea jivitantleo boreo ghoddnneo ugddas dovorchi tank Jehova thaun ek dennem zaun asa. Taka lagon, hea versant: “Adlea kallar soglleo vostu boreo kiteak asleo?” tem vicharop chukichem mhunn sangona. Bodlek, tea versant oxem mhunnttlam: “Adlea kallar soglleo vostu atanchea poros boreo kiteak asleo? oxem mhunno naka kiteak, ho prosn zannvaiecho nhoi.” Hacho orth, ami amchi atanchi poristhiti, amchea poilinche poristhiti sangata sor korun atam chodd vaitt zalam mhunn chintit ravtat zalear ami hea fasant poddttat.

6. Amchem jivit poilim bhaxen asonk zai mhunn chintit ravop kiteak xanneponnachem nhoi? Ek udharonn diat.

⁶ Amchem jivit poilim bhaxen asonk zai mhunn chintit ravop kiteak xanneponnachem nhoi? Karonn ami oxem kortat tednam amchea adlea kallacheo vaitt ghoddnneo nhoi, punn chodd korun boreo ghoddnneoch ugddasak ieunk xoktat. Udharonnak, Israelitkaram vixim chintat. Ejipta thaun bhair sorlea uprant, thoim tanchem jivit kitlem trasachem aslem tem tim rokddinch visorlim. Bodlek, thoim kitlem borem jevonn mellttalem, tem tanchea ugddasak ailem. Tannim mhunnttlem: “Ejiptant astana ami funkott maslli, touxim, chibddam, bhaji-palo, kande ani losunn khataleanv tacho amkam kitlo mhonn ugddas ieta!” (Lok. 11:5) Punn thoim tim “funkott” jevlim kai? Na, tea vellar tim Ejiptant gulam aslim ani Ejiptkaram khala tankam zaite tras sosche poddle. (Sutt. 1:13, 14; 3:6-9) Thoim tankam sosunk poddlole tras visron, tim thoim soglem borem aslem mhunn chintunk laglim. Jehovan tankam jem kitem dil’lem tem chintchea bodlek, poilinche dis bore asle mhunn tim chintit ravlim. Jehovak tanchem hem chintop avddonk na.—Lok. 11:10.

7. Poilinche dis bore asle mhunn chintit ravchea fasant poddona zaunk eke bhoinnik kitem modot zali?

⁷ Poilinche dis bore asle mhunn chintit ravchea fasant poddona zaunk ami kitem korunk zata? Ami eke bhoinnichem udharonn polloum-ia. Tinnem 1945-ant Brooklyn Bethel-ant seva korunk suru kel’li. Ani thoddea vorsam uprant thoim seva kortolea eka bhava lagim ti kazar zali. Tinnem aplea ghova sangata  thoim zaitim vorsam seva keli, punn 1976-ant ticho ghov duent poddlo. Morchea poilim tika tem dukh sosunk modot zaunk tichea ghovan tika borim utram sanglim mhunn ti sangta. Tannem tika mhunnttlem: “Zaitim zannam aplea kazari jivitant khuxal asonant. Punn amchea kazari jivitant ami khuxal aslim.” Ani uprant tannem hem-ui tichea ugddasak haddlem: “Ami sangata sarlolo vell tum visronk xokchem na. Punn teach vixim tum chintit ravonaka. Vell voita toso, tuji dukh unni zatoli. Tor tuka jem soglem vaitt ghoddlam tea vixim chintun tum niraxi vo dukhi zaum naka. Punn ami sangata mellon Jehovachi seva korunk pavlim mhunn tunvem khuxal zaunk zata. . . . Amchea jivitant ghoddlam tem ugddas dovorchi tank Jehova thaun ek dennem zaun asa.” Ho ek ekdom boro sol’lo zaun aslo.

8. Aplea ghovan dil’lo sol’lo apnnailolean tea bhoinnik koso faido zalo?

⁸ Tea bhoinnin tichea ghovan dil’lo sol’lo apnnailo. Moro porian tinnem Jehovachi seva visvaxiponnan keli. Ti 92 vorsanchi asli tednam meli. Punn morchea thoddea vorsam poilim tinnem mhunnttlem: “Gel’lea 63 vorsam thaun hanvem Jehova pasot purnn-vellachi seva kelea ani mhojea jivitant mhaka khub khuxalkai mell’llea mhunn hanv sangonk xokta.” Ti oxem kiteak mhunnonk pavli? Ti mhunntta: “Mhojea jivitant khori khuxalkai haddtta tem mhunnttlear, amchea bhav-bhoinnanchi ixttagot ani tanchea sangata novea sonvsarant, amcho vhodd rochnnar ani khoro Dev Jehovachi seva sasnachea-sasnank korcho bhorvonso.” * Hea bhoinnin aple dolle nitt-fuddem dovrun amkam kitlem borem udharonn dovorlam!

9. Lev-Xastr 19:18-ant sanglolea pormonnem amkam bhogsunk kednam kotthin zaunk puro?

⁹ Levi-Xastr 19:18 vachat. Chodd korun, amchim Kristi bhav-bhoinnam, laginchim ixttam, vo soirim amkam dukhoitat tednam tem visronk amkam khub kotthin zata. Udharonnak, aple poixe chorle mhunn eke bhoinnin dusrea eka bhoinnicher boglantt ghatlem. Punn uprant,  tinnem poixe chorunk na mhunn tea bhoinnik kollon ailem. Atam jea bhoinnicher tinnem boglantt ghatlolem ti hea ghoddnne vixim chintit ravli. Tumchea sangata oxem kednam-i ghoddlam? Amkam oxench ghoddonk na astolem, punn thodde pavtti konnem tori amkam dukhoilam dekhun ami ragar zaleant ani ami tankam kednam-i bhogsunk xokchimnant mhunn ami ghoddie chintlam astolem.

10. Rag dhorinastana ravonk amkam kitem modot korunk xokta?

¹⁰ Rag dhorinastana ravonk amkam kitem modot korunk xokta? Ek vatt mhunnttlear, Jehova soglem polloita ani amkam koxem bhogta tem to zannam mhunn ugddas dovrop. Amcher koslo-i on’neai zalear taka tea vixim khobor asta. (Heb. 4:13) Ami on’neai sostat tednam taka dukh bhogta. (Iz. 63:9) Ani on’neai-ak lagon amkam zalam tem dukh, to fuddarak kaddun uddoitolo mhunn tannem bhasailam.—Prok. 21:3, 4.

11. Ami rag soddun ditat tednam amkam koso faido zata?

¹¹ Ami monant rag dhorinastana ravtat tednam amkam pasun faido zata mhunn ami ugddas dovrunk zai. Ani hem khorem mhunn boglantt ghatlolea tea bhoinnik kollon ailem. Thoddea tempa uprant tinnem aplo rag soddun dilo. Ami dusreank bhogxilearuch Jehova amkam bhogxitolo mhunn tika somzolem. (Mt. 6:14) Ticher boglantt ghatlolea bhoinnin kel’lem tem chukichem aslem mhunn ti zannam asli. Tori astana, ti rag dhorun ravonk na ani tinnem tika bhogxili. Taka lagon, ti khuxal zali ani Jehovachea sevent dhean diunk pavli.

12. 1 Juanv 3:19, 20-a thaun ami kitem xiktat?

¹² 1 Juanv 3:19, 20 vachat. Amkam sogleank ami guneanvkari asat mhunn thodde pavtti dista. Udharonnak, sot xikchea poilim tannim kel’lea chukink lagon, thoddeank apunn guneanvkari asat oxem disonk puro. Ani thoddeank, tannim bautizm ghetlea uprant kel’lea chukink lagon apunn guneanvkari asat mhunn disonk puro. (Rom. 3:23) Ami sarkem tem korunk sodhtat hem khorem, punn ami “sogllim zaitea vattamnim chuki kortanv.” (Jak. 3:2; Rom. 7:21-23) Guneanvkari bhavnam astat tednam amkam borem disona. Punn tantuntlean faido pasun zata. Koso? Oslim bhavnam aslear ami amchea jivitant bodlav korunk pavtat, ani ami kel’leo chuki portun korina zaunk amkam modot zata.—Heb. 12:12, 13.

13. Ami guneanvkari asat mhunn kiteak chintit ravchem nhoi?

¹³ Punn ami ghoddie guneanvkari bhavnam amchea kallzant dovrunk xoktat. Hacho orth, ami poschatap kelea uprant ani Jehovan amkam bhogxilea uprant pasun ami guneanvkari asat oxem amkam disonk puro. Hem dhokeachem zaunk xokta. (St. 31:10; 38:3, 4) Koxem? Eke bhoinnichem udharonn gheum-ia. Tinnem adim kel’lea patkank lagon ti guneanvkari oxem tika distalem. Ti mhunntta: “Jehovachea sevent khub vavrun kainch faido na oxem mhaka distalem. Karonn chodd korun hanv salvar zaunchem na mhunn hanv chintalem.” Amchea modlea zaiteank tea bhoinni sarkem disonk puro. Tor guneanvkari bhavnam amchea kallzant dovorchea vixim ami chotrai dovrunk zai. Kiteak? Jehova amcho mog korta ani bhogxita toriastana oslea bhavnank lagon ami tachi seva korop bond keli zalear Soitan kitlo khuxal zatolo tea vixim chintat!—2 Korintkarank 2:5-7, 11.

14. Jehovan amkam bhogxileant mhunn ami koxi khatri korun gheunk zata?

¹⁴ Tori astana ami chintunk puro, ‘Jehovan mhaka soddun diunk na mhunn hanvem koxi khatri korun gheunk zata?’ Tumi ho prosn vichartat zalear, hacho orth Jehova tumkam bhogsunk xokta. Zaitea vorsam poilim, The Watchtower masikent oxem sanglolem: “Ami ghoddie ek chuk porot-porot korunk xoktat. Devachi seva korunk suru korchea poilim aslolea eka unneponnam add purnn toren  zhuzonk ami atam meren pavonk nant astolim. . . . Oxem zata tednam, niraxi zaun tumi bhogsonnem mellona toslem patok adarlam mhunn chintinakat. Tumi tea toren chintlolem Soitanak zai. Tumi patok kortat tednam tumkam vaitt dista hacho orth, tumi ek vaitt munis nhoi ani Jehova tumkam bhogsunk xokta. Khaltikaien bhogsonnea pasot Jehova lagim magot ravat. Ek nitoll ontoskornn samballunk, ani tem patok porot korina zaunk modotik lagon tachea lagim magot ravat. Ek dhaktto bhurgo ekach somosia vixim modotik lagon aplea bapai lagim porot-porot vochonk fatti sorona. Teach bhaxen, tumi Jehova lagim magat ani to tumkam modot kortolo.” *

15-16. Jehovan tankam bhogxileant mhunn koll’llea uprant thoddeank koxem dislam?

¹⁵ Jehovan tankam bhogxileant mhunn manun ghetlea uprant zaitea Jehovachea sevokank buzvonn mell’llea. Udharonnak, thoddea vorsam poilim, “The Bible Changes Lives” hea lekhamnim ailolo ek onnbhov vachlea uprant eka bhavacher khub probhav poddlo. Tea lekhant, ek bhoinn sangta ki tichea jivitant ghoddlolea vaitt ghoddnneank lagon, Jehova ticho mog kortolo mhunn manun gheunk tika kotthin zalem. Tinnem bautizm gheun zaitea vorsam uprant pasun tika oxem distalem. Punn tinnem Jezuchea soddvonnecher niall kelo tednam Jehova aplo mog korta mhunn tika khatri mell’lli. *

¹⁶ Ho onnbhov vachlea uprant eka bhavacher koslo porinnam zalo? To oso boroita: “Hanv lhan aslo tednam mhaka pozddim chitram pollounchi sonvoim asli, ani ti soddunk mhaka khub kotthin zalem. Punn halinch hanv toslim chitram porot pollounk laglom. Hanvem vhoddilanchi modot ghetlea ani ti sonvoim soddunk hanv khub vavrit asa ani tantunt mhaka ies mellot asa. Jehova mhozo mog korta ani mhaka modot korit asa mhunn vhoddilamnim mhaka khatri dilea. Tori astana, thoddea pavtti hanv kainch valoracho nhoi, ani Jehova mhozo kednanch mog korcho na oxem mhaka dista. Punn hea bhoinnicho onnbhov vachlea uprant mhaka khub modot zali. Jehova mhaka bhogsuncho na mhunn hanv chinta tednam hanv dusream utramnim, tachea Putan dil’lem bolidan, mhojim patkam dhuvunk  pavchem na mhunn sanglolea bhaxen zata mhunn mhaka kollon ailem. Jehova mhozo mog korina oxem mhaka dista tednam vachunk ani niall korunk lagon hanvem ho lekh samballun dovorla.”

17. Guneanvkari bhavnam kallzant dovorcho fas, apostl Paulun koso pois kelo?

¹⁷ Osle onnbhov ami vachtat tednam amkam apostl Paulucho ugddas ieta. Kristanv zaunchea poilim tannem zaitim vaitt kamam kel’lim. Pauluk tea vixim ugddas ietalo, punn to teach vixim chintit ravonk na. (1 Tim. 1:12-15) Tachea bodlek, Jezuchem bolidan Devan taka dil’lem ek dennem koxem tannem lekhlem. (Gal. 2:20) Tor soddvonnechea bolidana udexim apnnak bhogsonnem melltta mhunn niall kelea uprant, guneanvkari bhavnam kallzant dovorcho fas to pois korunk pavlo. Ani to Jehovachea sevecher aplem dhean dovrunk pavlo.

18. Hea lekha thaun ami kitem xiklim?

¹⁸ Hea lekha thaun ami kitem xiklim? (1) Amchea jivitantleo boreo ghoddnneo ugddas korchi tank Deva thaun ek dennem zaun asa. Punn amchem poilinchem jivit kitlem-i borem asum, fuddaracho novo sonvsar anik-ui boro astolo. (2) Dusrim amkam dukhounk xoktat. Punn ami tankam bhogxitat tednam ami Jehovachea sevecher dhean diunk pavtat. (3) Guneanvkari bhavnam ami kallzant dovortat zalear ami Jehovachi seva khuxalkaien korunk pavchimnant. Punn Paulu bhaxen Jehovan amkam bhogxileant mhunn ami manun gheunk zai.

19. Amchea jivitantleo vaitt iadi amkam novea sonvsarant sotouncheo nant mhunn ami koxim zannant?

¹⁹ Amkam sasnank jieuncho bhorvonso asa. Devachea novea sonvsarant ami jietolim tednam poilincheo vaitt iadi amkam anik sotouncheo nant. Tea vella vixim Bible sangta: “Adlea kallachi anink iad aschi na.” (Iz. 65:17) Chintun polloiat: Jehovachi seva zaitim vorsam korun thoddim atam zanttim zaleant. Punn novea sonvsarant, tim portun tornnattim zatolim. (Job 33:25) Tor, amchea jivitant adim kitem ghoddlam tacheruch dhean diunchea bodlek, fuddarachea novea sonvsaracher dhean diun ani thoim jieunk ami amchean zata tem soglem korum-ia!