1-2. (a) Novea kazari zoddpeamnim Jehovacher kiteak patieunk zai? (Stotr 37:3, 4) (b) Hea lekhant ami kitem xiktolim?

TUMI kazar zaunchim asat vo halinch kazar zaleant zalear tumi tumchea sangateacho khub mog kortat ani tachea vo tichea sangata tumi sodanch khuxal aslolim tumkam zai. Punn kazari jivitant oddchonneo astatuch. Toxench, tumkam gorjeche nirnnoi pasun gheunk poddttat. Tor tumi dogaim khub temp porian khuxal aslolim tumkam zai zalear oddchonneo ietat tednam tumi tancho koso fuddo kortat ani tumi kosle nirnnoi ghetat tem gorjechem. Tor, tumi Jehovacher patietat zalear tumi bore nirnnoi gheunk pavtolim, tumchem kazari jivit ghott zatolem ani tumi khuxal astolim. Punn tumi Jehovacho solʼlo manun ghenant zalear tumchea kazari jivitant oddchonneo astoleo ani hea vorvim tumi tumchi khuxalkai hogddaitolim.—Stotr 37:3, 4 vachat.

² Ho lekh khas korun novea kazari zoddpeank lagon asa. Punn hantunt sangloleo oddchonneo soglea kazari zoddpeanchea jivitant ieunk xoktat. Tor hea lekhant ami Bible-antlea visvaxi dadlea ani bailanchim, toxench, aichea kalla voilea zoddpeamchim-i udharonnam polloitolim. Ani hea udharonnam thaun, kazari jivitant toxench her vellar koslim lisanvam apnnaunk zatat tem ami xiktolim.

3-4. Novea kazari zoddpeank koslea oddchonneancho fuddo korunk poddot?

³ Ek Kristi zoddpem kazar zata tednam tancheo famili vo soirim sonvsarantlea zoddpeam bhaxen jieunk tancher dobhav ghalunk xoktat. Udharonnak, tanchea lagim ek ghor asa zalear, tankam bhurgim asat zalear, ani jivitantleo sogleo vostu tannim ektthaim keleo zalear tim khuxal astolim mhunn tim tankam sangonk xoktat.

⁴ Tor hea dobhava khala ieun ek zoddpem nirnnoi gheta zalear tankam zaitem rinn gheunk poddot ani tem rinn farik korunk chodd voram kam korunk poddot. Taka lagon tankam svotacho Bible obheas, kuttumbik bhokti, ani porgottnni korunk ghoddie titlo vell mellcho na. Ani toxench, chodd poixe mellonk lagon chodd vell kam korchem poddtta dekhun tim ghoddie thoddeo mittingo pasun chukounk puro. Taka lagon tankam Jehovachea sevent chodd korchi sondhi mellchi na.

5. Klaus ani Marisa-chea udharonnantlean tumi kitem xiklim?

⁵ Jivitant khuxal asonk khub vostu asop gorjechem nhoi mhunn amkam zaitea zannanchea udharonnantlean kollon ieta. Zoxem, Klaus ani Marisa. * Tim kazar zalim tednam zaite poixe zoddun ek susegad jivit jieunk tim dogaim purnn vell kam korunk laglim. Punn tim khuxal naslim. Karonn hea vixim Klaus sangta: “Amchea gorzam poros chodd amchea lagim aslem. Punn Jehovachi seva vaddounk ami kednanch chintunk na. Khorem mhunnttlear, amkam zaiteo oddchonneo asleo ani ami khuxal naslim.” Klaus-a bhaxen tumchea-i lagim zaiteo vostu ason pasun, tumi ghoddie khuxal nant mhunn tumi polloilam astolem. Punn nirax zainakat. Karonn dusreanchea borea udharonnantlean tumkam modot zaunk xokta. Tor atam ami, Raza Jehoshafatachea udharonnantlean, ghovamnim kitem xikonk zata tem polloum-ia.

6. Raza Jehoshafatak ek vhoddlea oddchonnecho fuddo korunk poddlo tednam tannem Mhonnʼnneo 3:5, 6-antlo solʼlo koso apnnailo?

⁶ Ghovamno, tumkam asloleo zobabdareo samballunk tumkam kotthin zata kai? Toxem zalear, tumi Raza Jehoshafatachea udharonnantlean xikonk zata. Jehoshafat ek raza aslolean akʼkhea porjechi kallji gheunchi zobabdari tacher asli. Tor itli vhoddli zobabdari to koso samballunk pavlo? Porjechi kallji gheunk tannem apleachean zata tem soglem kelem. Tannem Judachea xarank kilʼle ani purumentachim xaram bandlim. Toxench 11,60,000-a poros chodd soinikanchi manddavoll keli. (2 It. 17:12-19) Punn uprant Jehoshafatak ek vhoddlea oddchonnecho fuddo korunk poddlo. Ammonitkar, Moabitkar, ani Seir dongracher ravtole munis tancher akromonn korunk aile. (2 It. 20:1, 2) Tea vellar Jehoshafatan kitem kelem? Mhonnʼnneo 3:5, 6-ant sanglolea pormonnem, tannem Jehovacher visvas dovrun tachi modot magli. (Vachat.) Ani 2 Itihas 20:5-12-nt, tannem  kelolea magnnea thaun, taka Jehovacher kitlo visvas aslo tem amkam kollon ieta. Tor Jehovan tachea magnneak koso zobab dilo?

7. Jehovan Jehoshafatachea magnneak koso zobab dilo?

⁷ Jehovan Jahaziel nanvachea eka Levitak uzar korun Jehoshafatak oxem sanglem: “Tumche zage gheiat, ghott ravat, ani tumche voir Sorvesporachi soddvonn polleiat.” (2 It. 20:13-17) Punn hea toren konnuch ek zhuz jikhonk xokonaslo! Tori astana, him utram eka munxachim nhoi punn Jehovachim zaun aslim. Ani hea pasot, Jehovacher visvas dovrun apnnak sanglolem toxench Jehoshafatan kelem. Dusmana add zhuzonk voitana, foujechea mukhar tannem aplea sogleant borea soinikank nhoi, punn gavpeank dovorle. Ani Jehovan dusmanak haroun Jehoshafatak apnnem dilʼlem utor samballʼllem.—2 It. 20:18-23.

8. Jehoshafatachea udharonnantean ghovamnim kitem xikonk zata?

⁸ Tor ghovamno, tumi pasun Jehoshafata bhaxen Jehovacher patieun ravonk zai. Tumkam tumchea familichi kallji gheunchi zobabdari asa tem khorem, ani taka lagon tumi khub vavr kortat. Tor thoddea pavtti oddchonneo ietat tednam teo tumich suttaveo korunk xoktat, oxem tumkam disonk puro. Punn tea vellar tumcheruch patieun ravchea bodlek, magnnem korun Jehovachi modot gheiat. Toxench, tumchea baile sangata pasun kallzantlean magnnem korat. Bible ani Bible-acher adarit prokaxonam uzar korun tantuntle solʼle apnnaiat. Punn tumi Bible-antle solʼle apnnaitat tem pixemponn mhunn dusreank disonk puro. Ani poixe aslear sogleo oddchonneo suttaveo korunk zatat mhunn tim tumkam ghoddie sangonk puro. Punn tumi Jehovacher patietat mhunn korneamnim dakhoitat zalear, Jehovan Jehoshafatak sanddunk na toso to tumkam-i sanddchona. (St. 37:28; Heb. 13:5) Atam, zoddpeamnim khuxal ravonk anik kitem korunk zata tem polloum-ia.

9. Provadi Izaias ani tachea bailen kitem kelem?

⁹ Izaias ani tachea bailek Jehovachi seva korop ekdom mhotvachem zaun aslem. Izaias ek provadi aslo, ani ghoddie tachi bail pasun bhakit kortali. Karonn Bible-ant tika ‘provadin’ mhunnttloli asa. (Iz. 8:1-4) Tor tannim dogaimnim mellon Jehovache sevek aplea jivitant poilo zago dilo. Hem kazari zoddpeank ek ekdom borem udharonn zaun asa!

10. Bible-antlea bhasaunneancher obheas kelolean kazari zoddpeank Jehova pasot apleachean zata tem soglem korunk koxi modot zata?

¹⁰ Tor Izaias ani tachea baile bhaxen, kazari zoddpeamnim Jehovache sevek tanchea jivitant poilo zago diunk zata. Tim sangata mellon Bible-acheo bhasaunneo koxeo ghoddon ietat hacher obheas kortat tednam Jehovacher tancho visvas anik ghott zatolo. * (Titak 1:2) Toxench, Bible-antleo thoddeo bhasaunneo purnn zatat toxeo, tim kitem korunk xoktat hacher tannim niall korunk zata. Udharonnak, xevott ieunchea adim, akʼkhea sonvsarant bori khobor porgott zatoli mhunn Jezun bhasaunni kelʼli. (Mt. 24:14) Tor hi bhasaunni purnn zata toxi, tantunt tancho kitem bhag asa tea vixim tannim chintunk zata. Tor Bible-antli bhasaunni amchea disamnim ghoddon ieta mhunn ek zoddpeachi khatri ghott zata titli, Jehova pasot zata titlem korunk tanchi itsa vaddttoli.

11. Prisila ani Akuila kitem korunk pavlim, ani kiteak?

¹¹ Halinch kazar zalʼlea zoddpeamnim Prisila ani Akuila thaun zaitem xikonk zata. Hem  Judev zoddpem Romi xarant ravtalem ani Jezu Krista vixim bori khobor aikon tim Kristanv zalʼlim. Tim aplea jivitant khuxal aslim. Punn ek dis, Somratt Klaudiusan soglea Judevank Romi xar soddun vochonk hukum ghatlo. Tor atam tannim aplem ganv-ghor ani kam soddun eka novea zagear vochon porot aplem jivit suru korunk zai aslem. Punn itleo oddchonneo aslear pasun Jehovachi seva aplea jivitant poilea zagear dovrunk tim chuklim kai? Na. Tim Korintant gelim tednam thoinchea sobhentlea bhav-bhoinnank tannim modot keli ani apostl Paulu vangdda mellon tankam ghottai ani urba dili. Toxench, jea zagear porgottnnaranchi chodd goroz asli thoim tim gelim. (Itihas 18:18-21; Rom. 16:3-5) Khorench, tankam korunk zaitem aslem, punn Jehovachea sevent tim dogaim khuxal ani dhadoxi aslim!

12. Kazari zoddpeamnim Jehovachea sevent kitem kortolim tea vixim kazara poilinch kiteak ulounk zai?

¹² Aiz pasun Prisila ani Akuila bhaxen kazari zoddpeamnim Jehovachi seva aplea jivitant poili dovrunk zata. Hem korunk ek zoddpem Jehovachea sevent kosle dhei dovortolem tea vixim kazar zaunchea poilinch tannim eka-meka lagim ulounk zai. Ani te dhei melloun gheunk tim sangata proitn kortat tednam Jehova tankam koxi modot korta hem tim pollounk pavtolim. (Up. 4:9, 12) Hea vixim amkam Russell ani Elizabeth nanvachea eka zoddpeachem udharonn asa. Russell sangta, “Kazar zaunchea poilim, sangata mellon Jehovachea sevent kitem kortolim tea vixim ami uloilim.” Elizabeth sangta, “Oxem kelolean, kazara uprant veg-veglle nirnnoi ghetana ami dovorlolea dhei-am pormonnem nirnnoi gheunk amkam modot zali.” Tor hea toren Micronesia-nt, zoim porgottnnaranchi chodd goroz asa thoim vochon tim seva korunk pavlim.

13. Stotr 28:7-a pormonnem, kazari zoddpim Jehovacher visvas dovortat tednam kitem zaunk pavtolem?

¹³ Russell ani Elizabeth-a bhaxen, aiz zaitim zoddpim porgottchea ani xikounchea kamant chodd vell diunk aplem jivit sadem dovortat. Jehovachi seva vaddounk tim osle dhei dovrun te melloun gheunk vavurtat tednam tankam khub besanvam mellttat. Zoxem Jehova tanchi koxi kallji gheta tem tankam dison ieta. Hea vorvim, Jehovacher tanchi patienni anik ghott zata ani tankam khori khuxalkai melltta.—Stotr 28:7 vachat.

14. Matev 6:25, 31-34-ant dilʼlea bhasaunnecher, apostl Pedruk ani tachea bailek khatri asli mhunn tannim koxem dakhoun dilem?

¹⁴ Kazari zoddpeamnim apostl Pedru ani tachea baile thaun pasun xikonk zata. Pedru nusteacho dhondo korun aplea familik postalo. Punn Jezuk mellʼllea uprant tachem jivit bodolʼlem. Karonn thoddea mhoinea uprant to Jezuk porot mellʼllo tednam Jezun taka apnna sangata purnn vellachi seva korunk apoilo. Tea vellar, tannem aplea famili vixim chintlem astolem. (Lukas 5:1-11) Tori astana, Jezu sangata porgottnnechea kamant vochon tannem ek boro nirnnoi ghetlo. Ani hea nirnnoiak Pedruchea bailen tenko dilo mhunn ami mhunnonk zata. Karonn Jezuchea punorjivontponna uprant, Pedruchea thoddea bhonvdde vellar tachi bail pasun tachea sangata asli. (1 Kor. 9:5) Tea bhair, tinnem Kristi bailank ek borem udharonn dovorlem astolem. Taka lagon, Pedru Kristi ghovank ani bailank aplea chittient ukteponnim sobhank solʼlo diunk pavlo. (1 Ped. 3:1-7) Khorench, Pedruk ani tachea bailek Jehovachea hea bhasaunnecher khatri asli mhunn dison ieta: Aplem Raj poilea zagear dovorlem zalear, Jehova amcheo gorzo purnn kortolo.—Matev 6:25, 31-34 vachat.

15. Tiago ani Esther-achea onubhovantlean tumi kitem xiktat?

¹⁵ Tor tumchem kazar zaun thoddim vorsam zaleant zalear pasun, Jehovachea sevent chodd korunk tumi tumchi itsa koxi vaddounk xoktat? Ek vatt mhunnttlear, tumi dusrea kazari zoddpeanchi dekh gheunk zata. Oslea zoddpeanche onubhov tumkam, “They Offered Themselves Willingly,” hea lekhamnim vachunk mellttat. Brazil-antlea Tiago ani Esther nanvachea eka kazari zoddpeak, porgottnnaranchi chodd goroz asa toslea zagear vochon porgottnni korunk, osle lekh vachlolean urba mellʼlli. Tiago mhunntta: “Jehova aplea sevokanchi koxi kallji gheta ani vatt dakhoita tem ami vachlem tednam amkam-i tem onubhovunk zai aslem.” Tor tim uprant, Paraguay desant seva korunk gelim, ani thoim tim 2014 thaun Portuguese bhaxechea vattarant seva korit asat. Esther mhunntta: “Amkam Efezkarank 3:20 ho vers khub avoddtta. Karonn Jehovachi seva kortana tea versantlim utram zaitea pavtti khorim zaleant mhunn ami polloilam.” Efezkarank boroilolea tea chittient Paulu khatri dita ki ami magtat tachea-von chodd Jehova amkam ditolo. Hem kitlem khorem nhoi!

16. Dhei dovortana kazari zoddpeamnim konnam thaun solʼlo gheunk zata?

¹⁶ Aiz zaitea kazari zoddpeamnim Jehovacher patieun tachea sevent khub vorsam sarleant. Tor halinch kazar zaleant tannim tanchea udharonnantlean xikonk zata. Jehovachea sevent dhei dovortana tannim tancho solʼlo gheunk zata. Ani tim oxem kortat tednam tankam Jehovacher visvas asa mhunn tim dakhoun ditat. (Mho. 22:17, 19) Toxench, vhoddilamnim pasun novea kazar zalʼlea zoddpeank Jehovachea sevent dhei dovrunk ani te melloun gheunk tankam modot korunk zata.

17. Klaus ani Marisa-k kitem ghoddlem, ani tanchea udharonnantlean ami kitem xiktat?

¹⁷ Punn thodde pavtti, tumi Jehovachi seva korunk sodhtat teach toren tumkam tachi seva korunk ghoddie mellona astoli. Tednam tumi kitem kortolim? Ami Klaus ani Marisa, zanchea vixim ami poilim uloilʼlim, tanchem udharonn polloum-ia. Kazar zaun tin vorsam uprant, tim Finland xakhent bandkamachea kamant modot korunk fuddem sorlim. Punn thoim tankam sov mhoineam poros chodd ravonk mellchem na mhunn kollʼllem tednam survatek tim niraxi zalim. Punn uprant, tankam Arabic bhas xikonk eka  korsant apounnem mellʼllem, ani atam tim eka dusrea desant Arabic bhas uloitolea vattarant khuxalkaien seva kortat. Aplea onubhovantlean, tem kitem xikonk pavlem tea vixim Marisa sangta: “Hanvem kednanch korunk na tem korunk ani Jehovacher purnn visvas dovrunk hanv poilim bhielem. Punn hanvem chintunk na tea toren Jehovan amkam koxi modot keli tem hanvem polloilem. Ani hea vorvim tacher mhozo visvas anikui ghott zalo.” Tor tumi Jehovacher purnn visvas dovortat tednam tumi kortat tea kamacher Jehova besanv ghaltoloch mhunn tumi khatri dovrunk zata, hem ami hea udharonnantlean xiktat.

18. Jehovacher patieun kazari zoddpeamnim kitem korunk zata?

¹⁸ Kazar hem Jehovachem dennem zaun asa. (Mt. 19:5, 6) Ani kazari zoddpim khuxal aslolim Jehovak zai. (Mho. 5:18) Tor novea kazari zoddpeamno, tumi tumchea jivitant kitem kortat tea vixim chintun polloiat. Jehovan tumkam dilʼlea soglea denneank lagon tumi upkariponn dakhounk sodhtat kai? Tor Jehova lagim magnnem korat. Tumchea poristhitik lagu zata tim totvam tachea Utrant sodhat ani tim apnnaiat. Hea toren, Jehovache sevek tumi tumchea jivitant poilo zago ditat tednam tumchea kazari jivitant tumi khuxal astolim!