1. Ami lokank Bible-ant aslolea zannvaie vixim sangtat tednam zaito lok kitem korta? (Mhonnʼnneo 1:20, 21)

 ZAITEA desantlim amchim bhav-bhoinnam, rosteanche kuxik kartt uzar korun porgottnni kortat tem ami polloilam astolem. Tim eka hanstea tonddan lokank zap kortat ani tankam amchim prokaxonam ditat. Ami pasun oxe toren porgottnni kelea zait. Ani oxem kortana, Mhonnʼnneo pustokant sanglolim ‘nakeancher vo rosteancher zannvai bob marta,’ him utram amchea monant aileant astolim. (Mhonnʼnneo 1:20, 21 vachat.) Tor Bible ani Bible-acher adarit aslolea prokaxonam thaun amkam ‘zannvai vo khori zannvai,’ mhunnche Jehovachi zannvai melltta. Ani sasnachem jivit melloun gheunk hi zannvai amkam ekdom gorjechi. Tor konnui amchim prokaxonam vachunk umed dakhoita tednam ami khub khuxal zatat. Punn sogloch lok amchim prokaxonam vachunk sodhtat kai? Na. Thoddim zannam Bible-acho sondex aikonk sodhinant. Toxench, thoddim zannam amchim fokannam kortat. Karonn Bible ek pornem pustok ani tacho kainch faido na oxem tankam dista. Tea bhair, noitik vixoi-am vixim Bible-ant jem sanglam tem sarkem nhoi oxem thoddeank dista ani tea pormonnem jietat tim munxam dusreank man dinant ani apleakuch nitivont somzotat oxem tankam dista. Tori astana, Jehova mogan soglea lokank apli zannvai di-it ravta. Hem to koxe toren korta tem ami fuddem polloum-ia.

2. Aiz amkam Jehovachi zannvai koxi melltta, punn choddso lok kitem korta?

² Jehova aplea Utra udexim, tem mhunnttlear, Bible-a udexim amkam zannvai dita. Aiz choddxea lokam lagim Bible asa. Toxench Jehovachea besanvan, aiz 1,000-a poros chodd bhasamnim Bible-acher adarit prokaxonam amkam mellttat. Jim konn Bible ani Bible-acher adarit prokaxonam vachtat ani tem xiktat, ani tem aplea jivitant lagu kortat tankam faido zata. Punn choddso  lok Jehovachea zannvaiechi bob aikonk sodhinant. Tankam kosle-i nirnnoi gheunche poddttat tednam tim svotachea zannvaiecher patietat vo dusrea lokanchem aikotat. Ani ami Bible-a pormonnem cholonk nirnnoi ghetat mhunn tim ghoddie amchim fokannam korunk puro. Tor tim oxem kiteak kortat tem ami hea lekhant polloitolim. Punn poilim, amkam Jehovachi zannvai koxi mellonk xokta tem ami polloum-ia.

3. Khori zannvai mellonk ami kitem korunk zai?

³ Zannvai mhunnttlear, ami kitem zannant tem uzar korun bore nirnnoi gheunchi tank. Punn khore zannvaie vixim Bible amkam oxem sangta: “Zannvaiecho oromb mhollear Sorvesporachi bhirant, ani bhagivontanchi zannvai [“Bhov Povitr asa tachem ginean,” NW] mhollear somjikai.” (Mho. 9:10) Tor amkam ek mhotvacho nirnnoi gheuncho poddtta tednam Jehova tea vixim kitem chintʼta tem ami zannam zaun gheunchi goroz asa. Oxem korunk, ami Bible ani Bible-acher adarit prokaxonancher obheas korunk zata. Ami oxem kortat tednam amkam khori zannvai asa mhunn ami dakhoun ditolim.—Mho. 2:5-7.

4. Jehova ekloch amkam khori zannvai diunk xokta oxem ami kiteak mhunnonk zata?

⁴ Fokot Jehova Dev amkam khori zannvai diunk xokta. (Rom. 16:27) Oxem ami kiteak mhunnonk zata? Poilem karonn mhunnttlear, Jehova Dev amcho Rochnnar. Ani aplea rochnne vixim taka soglem khobor asa. (St. 104:24) Dusrem mhunnttlear, Jehova korta tea soglea kamamnim amkam tachi zannvai dison ieta. (Rom. 11:33) Ani tisrem mhunnttlear, Jehovache zannvaieche solʼle apnnaitat tankam sodanch faido zata. (Mho. 2:10-12) Tor amkam khori zannvai zai zalear, ami him tinui sotam manun gheunk zai ani ami kosle-i nirnnoi ghetat vo her koslim-i kamam kortat tednam ti apnnaunk zai.

5. Jehova ekloch khori zannvai diunk xokta mhunn lok manun ghenant dekhun porinnam kitem zala?

⁵ Amkam porgottnnent mellttat te zaite lok, tanchea bhonvtonnim asat tim fulam, zhaddam ani her vostu, ekdom sobit ani ojapvont mhunn manun ghetat. Punn teo konnem tori rochleat mhunn tim patienant. Toxench, thoddim zannam Devacher patietat. Punn Bible ek pornem pustok ani tantuntlim totvam aiz amkam faideak poddonant oxem tankam dista. Hea pasot, tim tanchem jivit tankam zai toxem jietat. Hacho porinnam kitem zaunk pavla? Jehova ekloch zannvai diunk xokta mhunn vollkhon gheunchea bodlek, tim aplea zannvaiecher patietat dekhun sonvsarachi porosthiti bori zalea kai? Tankam khori khuxalkai ani fuddara pasot patieupa sarko bhorvonso mellʼlla kai? Na. Karonn hem soglem polloitana, “Sorvespora add monʼxachi zannvai, somjikai ani budh cholona” mhunn amkam khatri melltta. (Mho. 21:30) Ani heach pasot, Jehova koddlean khori zannvai magot ravonk amkam urba melltta. Punn dukhachem mhunnttlear, choddso lok oxem korinant. Kiteak?

6. Mhonnʼnneo 1:22-25-a pormonnem, khore zannvaiek konn kan dinant?

⁶ ‘Rosteancher zannvai bob marta’ tednam zaitim zannam kan dinant. Bible-ant, oxem kortat toslea tin torechea munxam vixim sanglam: ‘somjikai naslolim,’ ‘moskorio korpi’ ani ‘pixim.’ (Mhonnʼnneo 1:22-25 vachat. *) Tor him munxam khori zannvai kiteak nakartat ani ami tanche bhaxen zaina zaunk ami kitem korunk zai tem ami fuddem polloum-ia.

7. Thoddim zannam ‘somjikai nasloleam’ bhaxenuch ravonk kiteak vinchun kaddttat?

 ⁷ ‘Somjikai naslolim’ munxam oslim munxam zaun asat, jim apunn aikotat tem soglem sot mantat, vo tankam konnui fosounk xokta. (Mho. 14:15) Porgottnni kortana zaite pavtti amkam oslo lok melltta. Oslea lakʼkhamnim lokank, rajki ani dhormik fuddari fosoitat. Hem thoddeank kolltta tednam tankam dhoko bosta. Punn Mhonnʼnneo 1:22-ant sanglolim ‘somjikai naslolimʼ munxam asat toxinch ravonk vinchun kaddttat. Karonn tankam tem borem dista. (Jer. 5:31) Apnnak zai tem korunk tankam avoddtta, ani Bible kitem sangta vo Bible-antle kaide xikonk vo te pallunk tim sodhinant. Zaiteank, Canada-nt ravpi eke Dev-bhokti bailek dislem toxem disonk xokta. Tika bhett ditolea Sakxeak tinnem oxem mhunnttlem: “Amcho padri amkam fosoita zalear ti tachi chuk, amchi nhoi!” Tor zannam zaun somjikai nasloleam porim vagtat tanche bhaxen ami zaunk sodhinant.—Mho. 1:32; 27:12.

8. Somjikai aslolim munxam zaunk ami kitem korunk zai?

⁸ Bible amkam somjikai naslolim munxam nhoi, punn ‘budʼdhin vaddlolim munxam zaunk’ urba dita. (1 Kor. 14:20) Oslim munxam zaunk, ami amchea jivitant Bible-antlim totvam apnnaunk zai. Ami oxem kortat tednam sovkas-sovkas korun him totvam amkam oddchonneo pois korunk, ani bore nirnnoi gheunk koxim modot kortat tem ami zannam zaunk pavtolim. Ami atam meren ghetleat tea nirnnoi-am vixim ami chintunk zai. Zoxem, ami Bible-acho obheas ani mittingek hajir zaunk laglear thoddo temp zaun gela zalear ami azun porian Jehovak somorponn korun bautizm kiteak gheunk na? Ani ami bautizm ghetla zalear borim porgottpi ani xikoupi zaunk ami vaddavoll kortat kai? Ami ghetat tea nirnnoi-am thaun ami Bible-antlim totvam apnnaitat mhunn dison ieta kai? Jezu dusream sangata vagtolo aslo, tea toren ami dusream sangata vagtat kai? Tor ami khoim tori sudharnni korunk zai mhunn amkam kollon ieta zalear Jehovacheo adnea ami bariksannen pallum-ia. Karonn ‘somjikai nasloleank teo zannvai ditat.’—St. 19:7.

9. ‘Moskorio korpi’ lok Jehovachi zannvai koxi nakartat?

⁹ Jehovachi zannvai nakartat, te dusre toreche lok mhunnttlear, ‘moskorio korpi.’ Oslea lokank ami zaite pavtti porgottnnent polloileant astolim. Tankam dusreancheo moskorio korunk khub mouza ieta. (St. 123:4) Ani nimannea disamnim moskorio korpi zaito lok astolo mhunn Bible-ant pasun xittkaunni dilea. (2 Ped. 3:3, 4) Lota sarkea promannik munxache zanvoim asle toxe, aiz pasun thoddo lok Devachea xittkaunneancher dhean dinant. (Ut. 19:14) Ani ami Bible-achim totvam pallttat tem polloun tim amkam hanstat. Karonn tim “aplea khottea vondovnniam pormannem” jietat. (Jud. 7, 17, 18) Bible-ant moskorio korpi lokam vixim jem kitem sanglam, tem dhorm-broxtt korpi ani Devak nakartat tea lokam vixim kitlem khorem zaun asa nhoi!

10. Stotr 1:1-a pormonnem, moskorio korpi zaina zaunk ami kitem korunk zai?

¹⁰ Hea moskorio korpi munxam bhaxen zaina zaunk, ami kitem korunk zai? Ek vatt mhunnttlear, gunngunnchi sonvoim asa tanchea thaun ami pois ravonk zai. (Stotr 1:1 vachat.) Hacho orth, dhorm-broxtt korpi jem kitem sangtat tem kainch ami aikonant vo tannim boroilʼlim koslich mahiti ami vachinant. Punn ami chotur nant zalear amkam gunngunnchi sonvoim zaunk xokta ani Jehova vixim ani tache songottnne thaun melltta tea margdorxona vixim ami dubhavunk xoktat mhunn ami vollkhon ghetat. Oxem zaina zaunk, ami amkanch he prosn vicharunk zai: ‘Songottnne thaun novem margdorxon vo novi somzonni melltta tednam hanv choddxe pavtti gunngunnttam kai? Fuddakar ghetolea bhavanchea chukincheruch dhean diunchi mhaka sonvoim asa kai?’ Amkam osli sonvoim asa mhunn amkam kollon ieta zalear  ami ti rokddich soddun diunk zai. Karonn ami oxem kortat tednam Jehovak tem manvota.—Mho. 3:34, 35.

11. ‘Pixim’ kitem kortat?

¹¹ Jehovachi zannvai nakartat te tisre toreche lok mhunnttlear, ‘pixim.’ Him munxam Jehovachea noitik dorjeam pormonnem jieunk sodhinant ani apleakuch borem dista tem kortat dekhun tankam pixim mhunnttleant. (Mho. 12:15) Tim zannvaiechi Zhor zaun aslolea Jehova Devak nakartat. (St. 53:1) Ani porgottnnechea kamant, amkam oslim munxam mellttat tednam ami Bible-achea dorjeam pormonnem jietat mhunn tim amkam thomnne martat. Punn amkam faideak poddonk xokta toslem kainch tanchea lagim asona. Tea pasot, Bible-ant tanche vixim oxem mhunnttlam: ‘Pixeak zannvai mhonnge, bhitor upunk vo choddonk zaina toslo kilʼlo: Xarachea darvonttea-xim to aplem tondd ugoddcho na.’ (Mho. 24:7) Tor pixeam lagim kosloch boro solʼlo asona. Tea pasot, Jehova amkam “pixeakoddlo boroch pois rav” mhunn xittkaita.—Mho. 14:7.

12. Ami kitem kelear pixeam sarkim zaunchimnant?

¹² Ami hea pixeam bhaxen, Devachea solʼleancho dves korunk sodhinant. Punn Devache solʼle ani tachea kaideancho ami mog korunk sodhtat. Jehovache solʼle pallʼllear ani pallina zalear kitem zata tem ami sor korun polloitat tednam Jehovachea solʼleam pasot amcho mog anikui vaddtta. Lok aplea pixeponna khatir Jehovachi zannvai nakartat tednam kitlea trasant poddttat tem ami pollounk zata. Punn Jehovache solʼle aikon amchem jivit kitlem borem zalam tacher ami niall kortat tednam Devachea solʼleam pasot amcho mog anikui vaddtta.—St. 32:8, 10.

13. Jehova aple zannvaieche solʼle sogleam munxank diunk sodhta zalear pasun, to kitem korina ani kitem korta?

¹³ Jehova sogleam munxank apli zannvai diunk sodhta. Punn ti manun gheunk to konnacheruch dobhav ghalina. Tori astana, apli zannvai manun ghenant tancho porinnam kitem zatolo, tem tannem sangon dovorlam. (Mho. 1:29-32) Jim konn Jehovachi adnea pallinant, tim ‘tanchea vavracho foll khatolim vo porinnam bhogtolim.ʼ Tim aplem jivit jea toren jietat, tea pasot uprant tankam zaitem dukh-tras sosunk poddttole ani xevottak Jehova tancho nas kortolo. Punn Jehovache zannvaieche solʼle manun ghetat ani te apnnaitat tankam tannem oxi bhas dilea: “Mhojem aikota To surokxit jietolo, Odruxttachi koslich bhirant nastana to xant astolo.”—Mho. 1:33.

14-15. Mhonnʼnneo 4:23-antlean ami kitem xiktat?

¹⁴ Jehovachi zannvai apnnailear amkam sodanch faido zata. Ami atam meren polloilem toxem, Jehovachi zannvai amkam sompeponnim mellonk xokta. Udharonnak, Mhonnʼnneo pustokant amkam zaite solʼle mellttat, je apnnailear ami ek borem jivit jieunk xoktat. Tor atam tantuntlea char solʼleancher dhean dium-ia.

¹⁵ Tumchea monachi, chintnanchi ani bhavnanchi rakhonn korat. Bible-ant sanglam: “Koslei dusre vostu poros tujea kallzachi kallji ghe,  karann, tantlean jivitachi zhor futtʼtta.” (Mho. 4:23) Hem kalliz mhunnttlear, amchem mon, chintnam ani bhavnam. Tor amchi bholaiki bori uronk ani amchea kallzachi rakhonn korunk, ami bholaikek boreak poddtta toslem jevonn jevtat, goroz titli exercise kortat ani vaitt sonvoim-am thaum pois ravtat. Teach bhaxen amchem mon, chintnam ani bhavnanchi rakhonn korunk, ami dor disa Devachem Utor vachtat, mittinge pasot toiari kortat, mittingek hajir zatat ani tantunt bhag ghetat. Toxench, ami chukonastana porgottnnechea kamant bhag ghetat. Tea bhair, amchem chintop piddʼddear korunk xoktat toslea vaitt sonvoim-am thaun ami pois ravtat. Zoxem, onoitik monoronjon ani vaitt sangati.

16. Mhonnʼnneo 23:4, 5-ant dilʼlo solʼlo aiz ekdom faideacho kiteak zaun asa?

¹⁶ Tumche lagim asa tantunuch dhadoxi ravat. Bible amkam ho solʼlo dita: “Girest zaunk fugar zaum nakai . . . Tuka mellunk xokonant, tea dovlotincher nodor ghalunaka kiteak, ghonni bhaxen tankam pakhotte futtʼtole ani teo ontrollant uddun vetoleo.” (Mho. 23:4, 5) Hanga sanglolea bhaxen, eka munxa lagim aslole poixe ani girestkai, to sompeponnim hogddaunk xokta. Tori astana, aiz girest toxench gorib lok, poixe zoddchea vixim chodduch usko kortat. Ani poixe zoddunk, thodde pavtti tim oslim kamam kortat, jea vorvim tanchem nanv, heram sangata tanchem natem ani tanchi bholaiki pasun tim piddʼddear kortat. (Mho. 28:20; 1 Tim. 6:9, 10) Punn dusre vatten, Jehovachi zannvai amkam poixeam vixim sarkem chintop dovrunk, as pois korunk, ani amche lagim asa tantunuch dhadoxi ani khuxal ravonk modot korta.—Up. 7:12.

17. Mhonnʼnneo 12:18-nt sangloli “xanneanchi jib” melloun gheunchea vixim ami kitem xiktat?

¹⁷ Ulounchea poilim chintat. Ami chotur nant zalear, amchea utramnim ami dusreank dukhounk xoktat. Hea vixim Bible sangta: “Ovichari utram torvari bhaxen toptat, punn, xanneanchi jib pekovnni haddta.” (Mho. 12:18) Tor ami dusreancheo chaddio korinant tednam ami tanchea sangata ek borem natem samballunk pavtolim. (Mho. 20:19) Oxem korunk amkam koxi modot zatoli? Ami Devachem Utor sodanch vachunk zai ani tache vixim chintunk zai. Oxem kelear, amchea uloupantlean ami dusreank dukhounchim nant, punn tankam bhuzvonn diunk pavtolim. (Luk. 6:45)  Ami vachtat tacher niall kortat tednam amchim utram ‘zannvaiechi ghosghoxeanchi zhor’ koxi zaunk pavtoli, jea udexim dusreank urba mellttoli.—Mho. 18:4.

18. Mhonnʼnneo 24:6-ant dilʼlo solʼlo apnnailear amkam porgottnnechea kamant koso faido zaunk xokta?

¹⁸ Songottnne thaun melltta tem margdorxon apnnaiat. Hea vixim Bible amkam boro solʼlo dita: “Bore hikmotin zhuz manddchem ani zhuzhacho ies zaitea bud dinnareancher tharlolo asta.” (Mho. 24:6) Ho solʼlo apnnailear ek boro porgottpi ani xikoupi zaunk amkam koxi modot zatoli? Porgottnnechem kam amkam zai toxem korchea bodlek, songottnne thaun mellttat teo suchounneo ami apnnaitat tednam amkam faido zata. Amkam he zannvaieche solʼle mittingek mellttat. Thoim onubhov aslole bhav, Bible-acher adarit bhaxonnam ditat ani amkam proxikxonn diunk dekhave astat. Toxench, Bible somzonk lokank modot zata toslim sadhonam Jehovache songottnnen amkam dileant. Zoxem, prokaxonam ani video. Hea sadhonancho tumi zata titlo faido gheunk xoktat kai?

19. Jehova dita tea zannvaie vixim tumkam koxem dista? (Mhonnʼnneo 3:13-18)

¹⁹ Mhonnʼnneo 3:13-18 vachat. Devachea Utrant melltta tea zannvaiek lagon ami khorench kitlim upkari asat! Hi zannvai Jehovan amkam diunk nasli zalear amchea jivitak orthuch ascho naslo. Tor hea lekhant, Mhonnʼnneo pustokantlean amkam faideak poddttat tosle solʼle ami polloile. Punn Jehovachim zannvaiechim utram amkam akʼkhea Bible-ant mellttat. Tor tim amchea jivitant apnnaunk nichov korum-ia. Hea sonvsarache lok Jehovache zannvaiek khoinchea nodren polloitat tem amkam mhotvachem nhoi. Karonn ‘zannvaiek chittkun ravtat tim khuxalkaien jietolim’ mhunn amkam khatri asa.