Hem vers mhunntta: “Zor eka ganvant goribak pillun tacher oneai zata, tor ojap zaum-naka kiteak, thoincho dor eklea odhikarea voir tachea voilea odhikareachi ani tache voir asloleachi nodor asta.”—Up. 5:7.

Jehova vixim chintinastana, tea versacher ami niall kortat zalear, hanga fokot sorkarant odhikar aslolea munxam vixim sanglam mhunn ami chintunk puro. Punn ami hea versacher bariksannen niall kortat tednam Jehova vixim ek sot hanga sanglam mhunn amkam kollon ieta. Ani hem sot amkam buzvonn ani khatri diunk xokta.

Upodexok 5:7-ant oslea eka odhikarea vixim sanglam zo goribank pillun tancher on’neai korta. Aplea poros unch podvi aslolo vo aplea poros sorkarant chodd odhikar aslolo konn eklo asa mhunn tea odhikarean ugddas dovrunk zai. Khorem mhunnttlear, tachea poros unch podvi aslole anink dusre asonk xoktat. Dukhachem mhunnttlear, munxachea sorkarant sogle odhikari broxtt asonk xoktat ani taka lagon lokank tras sosche poddtta.

Punn kainch upai na oxem dista tednam pasun Jehova munxachea sorkarant aslolea ‘voilea odhikareancher nodor dovorta’ mhunn ugddas dovorlolean amkam buzvonn melltta. Modotik lagon ami Deva lagim magonk xoktat ani amche uske tacher ghalunk xoktat. (St. 55:22; Filp. 4:6, 7) “Sorvesporachi nodor ak’khe prithvecher poddloli asta. Sogllea kallzan Apnnak sodtoleank To ghottai dita” mhunn ami zannant.—2 Itihas. 16:9.

Tor, Upodexok 5:7 ami jietolea sonvsara vixim sangta. Hanga odhikar aslolea sogleam poros chodd odhikar aslolo konn tori astach mhunn dakhoilam. Ani chodd mhotvachem mhunnttlear, sogleam poros unch podvi ani odhikar aslolo Jehova zaun asa mhunn tem vers dakhoita. To aiz aplea Puta udexim razvottki choloita. Tea Rajeacheo Raza tacho Put Jezu Krist zaun asa. Sorvpodvedar Dev soglem ani sogleank polloita ani to ani tacho Put sarke neai kortat.