Jea somosiank lagon amkam xanti ani surokxa na teo munxam lagim suttaveo zatoleo oxem tumkam dista kai? Khorem mhunnttlear, heo oddchonneo suttaveo zaunk tanchem mull karonn kitem vo teo kiteak lagon asat tem zannam zavop gorjechem.

Tor hem somzonk ami Tom-achem udharonn polloum-ia zo duent zaun bhair poddlo. Oxem kiteak zalem? Tom morchea poilim jea hospitalant aslo, thoincho ek dotor mhunntta: “To kiteak duent zalo, tem karonn zannam zaunk konnench proitn korunk na.” Oxem dista ki survatek zannim tacho ilaz kelo tannim taka fokot tache tras unnem zaunk vokhdam dilim.

Sonvsarantleo oddchonneo suttaveo korunk aiz munis pasun oxench kitem tori kortat. Te voilea voir vavurtat. Zoxem, oprad zaina zaunk sorkar kaide kaddtta, camera bosoita ani pulis dovorta. Oxem kelʼlean oprad thodde unnem zaleat, punn te purnn toren kabar zainant. Karonn, oprad munxanchea vaitt chintnank, anvddeank ani sobhavak lagon zatat.

Daniel, Dokxinn America-chea eka ganvant ravta, zoim khub goribi asa. To mhunntta: “Eka tempar ami susegad jietale. Amchea ganvamnim chori zait mhunn amkam usko naslo. Punn atam, soglem bodolʼlam. Goribi vaddli toxi lokancho khoro sobhav dison ailo. Aiz lok itle axen bhorlole asat ki te dusreancheo vostu luttunk vo jiv pasun kaddunk bhienant.”

Gulf-ant zhuz zata mhunn dusrea desant pollon gelʼlo Elias nanvacho ek dadlo uprant Bible xikonk laglo. To oxem sangta: “Hanv vaddlolom tea xarant tornnatteank zhuzant vochonk tanchim ghorchim, toxench rajki ani dhormik fuddari oxem sangon urba ditale ki te desa pasot zhuzlear te hero koxe zatole. Ani amchea add zhuztolea desachea tornnatteank pasun oxench xikoitale. Tor, hea sonvsarachea fuddareancher visvas dovrop kitlem dhokeachem tem mhaka kollon ailem.”

Eka adlea pustokant kitlem sarkem boroilam:

• “Tornneponnar thaun tachea kallzant vankddeo vonddovnnio upzotat.”—Utpoti 8:21.

• ‘Kalliz sogleam-von ghatki, itlem vaitt ki taka anik ilaz na: tache gutt konnak tthave?’ —Jeremias 17:9.

• “Vaitt chintnam kallzantlean bhair sorta ani taka lagon munis khun korta, . . . onoitik kuddicho sombond dovorta, chorio korta, fotti govai dita.”—Matev 15:19.

Lokanchea monant jim vaitt chintnam asat tim khoinchoch munis kaddun uddounk xokona. Lokancho vaitt sobhav disan-dis anik vaitt zait voita, dekhun sonvsarant somosia vaddttat, jeo ami fattlea lekhant polloileo. (2 Timotak 3:1-5) Aiz lokam kodden poilim poros chodd mahiti asa ani eka-mekak sompork korunk ekdom borim sadhonam asat. Tori astana, amchi xanti ani surokxa dhokeant asa. Tor, prosn ieta ami sonvsarant xanti ani surokxa kiteak haddunk xokonant? Amkam kednam tori ies mellttolem kai? Xanti ani surokxa haddop amchea hata bhair asa kai?

Ami munxanchea monantlim vaitt chintnam kaddlear pasun sonvsarant surokxa haddunk xokonant. Karonn, munis thoddeo vostu korunk xokona.

Khorem mhunnttlear: “Monxancheo vatto tanchea hatant nant, aplim panvlam nitt vatter ghalunk tanche adhin na.” (Jeremias 10:23) Amchea pasot kitem borem ani kitem vaitt tem ami nokllo. Karonn, Devan  amkam tea ritin rochunk nant. Zoxem, amkam doriant vo ontrollar jieunk rochunk na. Toxench, ami dusrea munxancher raj cholounk xoktat tea ritin amkam rochunk na.

Hea vixim chintat: Amchea pasot kitem borem ani kitem vaitt vo ami jivit koxem jieunchem, gorbpat korcho kai na vo ami amchea bhurgeank xist koxi diunchi, hem dusreamnim sanglear tem amkam avoddtta kai? Osleach zaitea vixoiancher lokanchem ekuch chintop na dekhun vad-vivad zatat. Hea soglea vostuncho vichar kelear, Bible sangta tem sarkem mhunn amkam kollon ieta. Tem mhunnttlear, munxank dusreancher raj korunk odhikar na ani tankui na. Toxem zalear, amkam sarki vatt konn dakhounk xokta?

Devan amkam rochleant dekhun toch amkam sarki vatt dakhounk xokta, oxem ami mhunnonk zata. Devak amchem kainch poddon vochonk na, oxem zaite lok chintʼtat. Punn hem khorem nhoi. Taka amchi khub kallji asa. Dekhun tannem Bible-ant bore solʼle boroun dovorleat. Bible her pustokam thaun ekdom vegllo asa. Bible vachlear ami kitem korunk xoktat ani kitem korunk xokonant tem amkam kollon ieta. Toxench, aiz meren munxakullak itle dukh-tras kiteak sosche poddttat tem pasun amkam kollon ieta. Dekhun eka German totv-gineani munxan oxem kiteak boroilem tem amkam kollon ieta. Tannem boroilem: “Lokamnim ani sorkaramnim adim ghoddlolea ghoddnneantlean kainch xikonk na.”

Eka zannar munxan ek pavtt oxem mhunnttlem: “Zannvai porinnama udexim sarki mhunn dison ieta.” (Lukas 7:35) Udharonnak, ek zannvaiecho solʼlo amkam Stotr 146:3-ant melltta, zoim mhunnttlam: “Monxacher patieun ravum naka.” Ho solʼlo pallʼllolean ami munxacher patieun niraxi zaunchimnant. Karonn, munis jem korunk xokona toslea vostuncher ami visvas dovorchimnant. Kenneth, Utʼtor America-chea eka oslea xarant ravta, zoim khub hinvsa zata. To mhunntta: “Dor ek montri, apunn boreponn haddttolo mhunn bhas dita. Punn oxem kainch zaina. Tor, hantuntlean Bible-ant boroilam tem kitlem khorem ani sarkem asa tem kollon ieta.”

Daniel, zachi khobor ami poilim sangloli, to mhunntta: “Munis dusreancher raj korunk xokona mhunn dor dis mhaka khatri zata. Tumchea bank-ent khub poiso asa vo eka pension scheme-int tumi poiso ghatla, hacho orth tumcho fuddar ekdom boro astolo oxem na. Karonn, hacher visvas dovorlolean zaiteank niraxiponn bhoglam mhunn hanvem polloilam.”

Tor Bible-antle solʼle apnnailolean, ji vost kednanch zaunchi na, tacher patieun ami niraxi zaunchim nant. Ani Bible amkam fuddara pasot ek bhorvonso vo ek axa pasun dita, jea vixim ami fuddlea lekhant polloitolim.