HEBREV bhaxen she’ohl’ ani Grik bhaxen haides him utram, Bible boroilolo tednam tantunt 70 pavtt aslim. Him donui utram, mornna vixim uloitana uzar keleant. Thoddea Bible-ant tim, “fondd”, “norok” vo “patall” oxim bhaxantor keleant. Punn him bhaxantor kel’lim utram sarkim asat kai? Tea Hebrev ani Grik bhaxechea utrancho sarko orth kitem? Hem zannam zaunk, him utram Bible-ant veg-vegllea zageancher koxim uzar keleant tem ami polloum-ia.

Upodexok 9:10 mhunntta, “Jem kitem tujea hatamnim korunk zata, tem tujea sogllea bollan kor, Kiteak, tum vetai tea patallant [Xe-ol] vaur na, zoit na, ginean na, zannvai na, ievzonneom nant.” Xe-ol mhunnttlear meloleank purtat toslo ekuch zago vo fondd oxem ami mhunnonk zaina. Karonn konnakui purtat tea zagea vo fondda vixim uloita tednam, Bible Hebrev ani Grik bhaxechim dusrim utram uzar korta, she’ohl’ ani haides nhoi. (Utpoti 23:7-9; Matev 28:1) Toxench, zaitea lokank purtat tea zageak vo ghorcheank purtat tea fonddakui, Bible “Xe-ol” mhunnona.—Utpoti 49:30, 31.

Toxem zalear, khoinchea zageak “Xe-ol” mhunnttat? “Xe-ol,” vo “Hades,” fokot munxank purtat tea zagea itloch nhoi, punn tachea poros khub vhodd asa mhunn  Bible dakhoun dita. Udharonnak, Izaias 5:14 mhunntta, “Norok [Xe-ol] aplo gollo rund korun ugoddta ani aplim daddhmonnam ugddun gillunk ravta.” Zaitea melolea lokank Xe-olan gill’lleant, torui to bhukelolo asta. (Mhonn’nneo 30:15, 16) Eka purpachea zagear vo simitrint thoddeach lokank purunk melltta ani to bhorta, punn “Patall [Xe-ol] ani meloleanchi suvat bhorona.” (Mhonn’nneo 27:20) Xe-ol ho zago kednanch bhorona. Khoreponnim oso zago sonvsarant khoinch na. Punn Bible, konnui Xe-ol vo Hadesant gela mhunn sangta tednam, to munis mornnache nhident voita mhunn amchean mhunnonk zata.

Melolim porot jivont zatolim hea Bible-achea xikounne thaun, “Xe-ol” ani “Hades” hea donui utram vixim amkam anik zannam zaunk melltta. Jivont zaupi lok jea zagear asat tanchea vixim uloitana, Bible “Xe-ol” ani “Hades” him utram uzar korta. * (Job 14:13; Itihas 2:31; Prokasovnni 20:13) Jehovachi seva kelea tech nhoi, punn anik zaite lok zannim tachi seva korunk na, te pasun Xe-ol vo Hadesant asat mhunn Devachem utor dakhoita. (Utpoti 37:35; Stotr 55:15) Taka lagon Bible, “borea toxench vaitt mon’xanchem punorjivontponn astolem” mhunn sangta.—Itihas 24:15.