1. Ami khoinchea magnneam vixim zannam zatolim?

SONVSARBHOR aslolea zaitea lokamnim, ‘Amchea Bapa’ hea magnneam vixim aikolam. Hem magnnem Jezun aplea xisank xikoilolem ani taka khub orth asa. Tantuntle poile tin bhag niallun polloilear, Bible khoreaninch kitem xikoita tem tumkam kollon ietolem.

2. Magnnem kortana Jezun aplea xisank khoinchea tin vostum vixim magonk xikoilem?

² Hea magnneachea survatek Jezun tankam mhunnttlem, “Tumi oxem prarthon korchem: ‘Amchea Bapa sorginchea, Tujem nanv povitr zaum, Tujem Raj [amkam] ieum, Tuji khuxi sorgar zata toxi sonvsarant zaum.’” (Matev 6:9-13) Hea utrancho orth kitem zait?

3. Devachea Rajea vixim ami kitem zannam zaunchi goroz asa?

³ Jehova Devachea nanvam vixim ami poilim zaitem xiklim. Toxench, munxam pasot tannem kitem kelam, ani to fuddem kitem kortolo, hachea-i vixim  ami thoddem zannam zalim. Punn Jezun amkam, ‘Tujem Raj ieum’, oxem kiteak magonk xikoilem? Devachem Raj mhunnttlear kitem? Tem ailear, Devachem nanv koxem povitr zatolem? Ani tea Rajea udexim, Devachi khuxi prithumer koxi zatoli?

4. Devachem Raj mhunnttlear kitem ani tacho raza konn?

⁴ Devachem Raj mhunnttlear Jehova Devacho ek sorkar. Devan, Jezuk tacho raza mhunn vinchun kaddla. Jezuch sonvsarantlea soglea odhikaream poros vhodd dekhun, taka “razancho Raza ani dhoniancho Dhoni!” mhunnttlolo asa. (1 Timotak 6:16) Taka sogleam poros chodd xokti aslolean, tachean haddunk zata titlem boreponn anik khoinchoch odhikari haddunk xokona.

5. Devachem Raj khoim thaun odhikar choloitolem ani konnacher?

⁵ Devachem Raj khoim thaun odhikar choloitolem? Hem somzotolim zalear, sod’deak Jezu khoim asa tem zannam zavop gorjechem. Jezu sonvsarant aslo tednam taka jivexim marlolo tumkam ugddas astolo. Tea uprant, Jehova Devan taka porot jivont kelo ani 40 disamnim to sorgar gelo. (Itihas 2:33) Devachem Raj thoinch asa. Ani taka lagon, Bible-ant taka ‘Sorginchem Raj’ mhunnttlam. (2 Timotak 4:18) Devachem Raj sorgar asa zalear pasun, thoinchean tem hea prithumer odhikar choloitolem.—Prokasovnni 11:15 vachat.

6, 7. Jezu sogleant boro raza oxem ami kiteak mhunnonk zata?

⁶ Jezu sogleant boro raza oxem ami kiteak  mhunnonk zata? Ek karonn mhunnttlear, to kednanch morchona. Jezuk “ovinaxi” jivit asa mhunn Bible dakhoita, punn atanchea razank vo fuddareank oslem jivit na. (Hebrevank 7:16) Hacho orth, Jezu lokam pasot jem kitem kortolo, tem soglem sodankal urtolem. To fuddarak zaitim borim kamam kortolo mhunn ami khatri dovrunk zata.

⁷ Jezu vixim bhasaunni korun sanglolem, “tacher denvtolo Sorvesporacho Atmo: zannvaiecho ani vivekacho Atmo, budhicho ani podvecho Atmo, Sorvesporachi vollokh ani bhokti dita to Atmo. (Sorvesporachi bhokti tacho svas.) To tondda pormannem neainit korcho na, lokachem aikun to nirnnoi gheuncho na, punn promannikponnan to lhanank-durbollank nit korun ditolo, ani desachea lhan’vik-khaltea loka khatir favo to nirnnoi ghetolo.” (Izaias 11:2-4) Hea bhasaunnentlean, Jezu aplea lokancher promannikponnan ani doiallai-en raj choloitolo mhunn amkam kollon ieta. Oslo ek raza tumcher odhikar choloita zalear tumkam borem dischem na?

8. Jezu sangata konn Raj choloitole?

⁸ Devachem Raj, Jezu ekloch cholounchona. Tachea sangata raj cholounk anikui lok astole. Hem amkam Apostl Pauluchea utrantlean kollon ieta. Tannem Timotak mhunnttlem, “Thir-ghott ami ravleanv zalear, Tachea vangdda raj kortoleanv.” (2 Timotak 2:12) Jezu sangata sorgar Raj cholounk Devan, Pauluk, Timotak ani her visvaxi munxank vinchun kaddleat. Tor, sogle mellon he visvaxi lok kitle asat?

9. Jezu sangata kitle lok Raj choloitole ani Devan tankam vinchunk kednam suru kelem?

 ⁹ Hea pustokachea odheai 7-ant vachlolea porim, Apostl Juanvan ek dorxon polloilolem. Dorxona vixim sangtana to mhunntta, “Sion Dongracher [sorgar raza koso] ubo aslolea Menddreak [Jezuk] hanvem dekhlo; Tache borabor ekxem-chovechallis hozar (1,44,000) lok aslo: tanchea kopalar Tachem Nanv ani Tachea Bapaichem Nanv boroil’lem aslem.” He 1,44,000 lok konn? Tanchea vixim, Juanvuch fuddem sangta, “Zoi Menddro veta, thoi Tache pattlean tim-i vetat. Devak ani Menddreak bhettoil’lem prothom’ foll koxem mon’xam modlim tankam soddoun ghetleant.” (Prokasovnni 14:1, 4) Jezu sangata sorgar Raj cholounk, tacho pattlav kortat teach visvaxi munxank vinchun kaddleant. Jivont zalea uprant, tim Jezu sangata sorgar thaun “prithumer raj choloitolim.” (Prokasovnni 5:10) Jezuche apostl aslole tednam thaun, Devan hea 1,44,000 visvaxi munxank vinchunk survat keli.

10. Munxancher Raj cholounk Jezuk ani 1,44,000 lokank vinchun Devan mog dakhoilo mhunn ami kiteak sangonk zata?

¹⁰ Munxancher Raj cholounk, Jezuk ani 1,44,000 lokank vinchun, Devan amchea pasot aplo mog dakhoilo. Eka munxachem jivit koxem asta, ani taka kitle tras sosche poddtta, tem Jezu somzonk xokta. Tachea vixim Paulun mhunnttlem, “amche bhaxen sogllea jin’sanchea tallnniam-koxttamnim Tachi porikxa zali”. (Hebrevank 4:15; 5:8) Jezu borabor Raj cholounche asat, tea lokamnim sonvsarant astana khub soslem. Toxench, opurnn aslolean tannim  khub tras kaddleat ani duens ailolean zaitem soslam. Khorench, munxancher ieupi koxtt te sarke somzonk xokta!

11. Jezu Kristan Devachi khuxi sorgar zaum mhunn magonk kiteak xikoilem?

¹¹ Jezun, Devachem Raj ieum mhunn magnnem korunk xikoilem tednam, tachi khuxi “sorgar zata toxi sonvsarant zaum” hem-ui magonk sanglem. Dev sorgar asa, ani thoim tache visvaxi ainz sodanch tachi khuxi kortat. Punn odheai 3-ant ami eka vaitt ainza vixim zannam zalim. Tannem Devachi khuxi korchi soddun dili, ani Adanv ani Evek patok korunk uksailim. Ho vaitt ainz Soitan mhunn ami zannant. Tachea vixim Bible anik kitem xikoita tem amkam odheai 10-ant kollttolem. Soitan ani tachea borabor aslolea vaitt ainzank Devan rokddech sorga voile kaddun uddounk na, tannem tankam thoim thoddo vell ravonk dile. Taka lagon, tea vellar sorgar zaite ainz Devachi khuxi kori nasle. Punn Devachem Raj odhikar cholounk lagta tednam, hem soglem bodolpachem aslem. Karonn, Jezu Krist raza zaun Soitanacher zhuz korcho aslo.—Prokasovnni 12:7-9 vachat.

12. Prokasovnni 12:10-ant khoinchea don ghoddnnea vixim sanglam?

¹² Fuddem kitem zatolem tem amkam bhasailolea utrantlean kollon ieta. Thoim mhunntta, “Tednam sorgar oxem vhoddlean mhonnttalo to ek tallo hanvem aikolo: ‘Atam ki amchea Devan Aple porjechem taronn kelem! Atam Aplea hatant podvi  gheun Apunn raza mhonn To dakhoitolo! Atam Tacho Krist sonvsaracher Aplo odhikar cholounk lagtolo! Karonn amchea bhavam-bhoinnincher add garannem korun tancher amchea Devachea mureant dis-rat arop ghaltalo taka xevttun uddoilo!’” (Prokasovnni 12:10) Hanga, Devachea Rajeacho odhikari zaun Jezu Raj cholounk suru korta, ani to sorgar thaun Soitanak prithumer xevttun uddoita, hea don ghoddnnea vixim sanglam.

13. Sorgar thaun Soitanak bhair uddoilolean kitem porinnam zalo?

¹³ Hea don ghoddnneancho porinnam kitem zalo? “Sorga ani thoi asloleamno, sontosbhorit zaiat!” mhunn Bible sangta. (Prokasovnni 12:12) Sorgar aslole Devache ainz khuxal zale, karonn Soitan ani tache sangateank kaddun uddoileat. Thoim fokot Devache visvaxi ainz asat. Taka lagon thoim xanti ani ekvottai asa. Atam sorgar, Devachi khuxi zata.

14. Prithumer uddoilolean Soitanan kitem kelem?

¹⁴ Punn prithume vixim kitem? Bible sangta, “Prithumechem ani somdirachem kotta! Kiteak devchar bhov ragixtt zaun tumche modem denvun aila, ani apnnak thoddoch kall asa mhonn to zanno.” (Prokasovnni 12:12, 13) Apleak Sorga voilean prithumer uddoila ani aplo thoddoch vell urla hem zannam zal’lean, Soitan khub ragar asa. Ragan to sonvsaracher sonkoxtt haddtta, ani taka lagon prithumechem “kotta” oxem mhunnttlam. Hea sonkoxttam vixim ami fuddlea odheai-ant xiktolim. Punn Devachem Raj hea Prithumer tachi khuxi koxem kortolem?

15. Prithume pasot Devachi khuxi kitem asa?

 ¹⁵ Prithume pasot Devachi khuxi kitem asa, ti tumkam ugddas astoli. Hachea vixim ami odheai 3-ant xiklolim. Ak’khi prithum sobit bag zaun, nitivont lok thoim sodankal jielole apnnak zai mhunn Devan Eden bagent kolloilolem. Soitanak lagon Adanv ani Even patok kelem, ani prithume pasot Devan chintlolem toxem zaunk na. Punn haka lagon Devacho ud’dhex bodol’lo kai? Na! Aizui Devacho ud’dhex toch asa. To sangta, “Des zatolo borea mon’xanchem daiz: thoim tim tthikann kortolim sasnnachea sasnnak!” (Stotr 37:29) Ani hem Devachea Rajeant zatolem. Punn koxe ritin?

16, 17. Daniel pustokachea odheai 2:44, 45-ant Devachea Rajea vixim kitem sanglam?

¹⁶ Daniel 2:44, 45-ant boroun dovorloli bhasaunni polloiat. Thoim mhunntta, “Tea razanchea kallar, sorgincho Dev kednanch bhosm zaun vechem na toslem ek raj sthaptolo, ani hem raj dusre porjechea tabeant podd-chem na; . . . hem raj sogllea adlea rajeancho churo kortolem ani tankam gilltolem, punn tem apunnuch sodankal togtolem.” Hea utrantlean amkam Devachea Rajea vixim kitem kolltta?

¹⁷ Poilem mhunnttlear, Devachem Raj “tea razanchea kallar” mhunnchem, her rajeam astana staphon zatolem. Dusrem mhunnttlear, hem Raj sasnank urtolem. Anik khoinchench raj taka zhuz korun, harounk vo aplea tabeant korunk xokchem na. Ani tisrem, Devachem Raj, ani sonvsarachea rajea modem zhuz zatolem. Tantunt Devachem Raj jiktolem, ani magir tench ak’khea sonvsaracher sorkar choloitolem.  Munxamnim kednanch pollounk na titlo boro ho sorkar astolo.

18. Munxanchea ani Devachea Rajea modlea xevottachea zhuzak kitem mhunnttat?

¹⁸ Devachea ani sonvsarachea rajeam modem zatolea xevottachea zhuza vixim Bible-ant boroilolem asa. Hea zhuzache dis lagim pavta toxe, vaitt ainz fotti sangon “sonvsarantlea razank” fosoitat. Punn kiteak? Sonvsarantlea razank “Sorpodvedar Devachea Vhoddlea Disachea zhuzak” ektthaim korunk te oxem kortat. Ani, “Hebrev bhaxen Armaged’don mhonnttat tea zagear” te tankam ektthaim kortole. (Prokasovnni 16:14, 16) Hea vachpant sanglam tache voilean, munxanchea ani Devachea Rajea modem zatolea xevottachea zhuzak, Armaged’don mhunnttlam.

19, 20. Atam prithumer Devachi khuxi kiteak zaina?

¹⁹ Armaged’don hea zhuza udexim Devachem Raj kitem kortolem? Hea prithume pasot Devachi khuxi kitem asa tache vixim chintun polloiat. Devak, nitivont lokamnim sobit bag zal’le prithumer sasnak ravon, apli seva kel’li zai asli. Toxem zalear, atam oxem kiteak zainam? Karonn ami patki, ami duent zatat ani mortat. Punn odheai 5-ant xiklolim toxim, amkam sasnachem jivit diunchea pasot, Jezun aplem bolidan dilem. Tache vixim Apostl Juanvan boroilem, “Tacher bhavarth tthevta tea dor-eka mon’xacho nas zaina zaunk punn taka Sasnnik Jivit mellche khatir, Devan Aplea ekleach Putak dilo: itlo Tannem sonvsaracho mog kelo!”—Juanv 3:16.

²⁰ Anik ek karonn mhunnttlear, zaite lok vaitt kamam kortat. Te fott martat, dusreank fosoitat  ani pozddim kamam kortat. Tankam Devachi khuxi korunk naka. Oslea vaitt lokancho Armaged’don, hea Devachea zhuzant nas zatolo. (Stotr 37:10 vachat.) Devachi khuxi sonvsarant zaina zaunk anik ek karonn mhunnttlear, hea sonvsarachim sorkaram. Tim lokank Devachi khuxi korunk fuddem kaddina. Khubxea sorkarank lokanchi doia na, te lokam pasot kainch korunk sodhinant, voilean tanche poixe khatat. Bible mhunntta, “sonvsarant thoddeach lokank podvi asta, ani urlole tanchea xeka thala koxttovtat.”—Upodexok 8:9.

21. Devachem Raj sonvsarant tachi khuxi koxem kortolem?

²¹ Armaged’dona uprant fokot Devachem Raj astolem ani tea sorkara khala soglo lok ravtolo. Hem Raj Devachea khuxe pormonnem choltolem ani amkam zaitim besanvam haddttolem. Udharonnak, tem Soitanak ani tachea ainzank kaddun uddoitolem. (Prokasovnni 20:1-3) Jezun dilolea bolidanak lagon, visvaxi munis kednanch duent zauncho na ani morcho-i na. Devachea Rajeant te sasnank jieunk xoktole. (Prokasovnni 22:1-3 vachat.) Ak’khi prithum ek sobit bag zatoli. Oxe ritin, hem Raj sonvsarant Devachi khuxi kortolem ani tachem nanvui povitr kortolem. Hacho orth, tea Rajeant aslolo soglo lok, Devachea nanvak mhoima haddttolo.

22. Devachem Raj Jezu prithumer astana ieunk na ani sorgar gelea uprantui ieunk na mhunn ami kiteak mhunnonk zata?

²² Prithumer astana Jezun aplea xisank, “tujem Raj amkam ieum” hem magonk xikoilolem tachea  voilean, tem Raj tednam ieunk naslem mhunn kolltta. Tem Raj ailolem zalear, Jezu tem ieum mhunn magonk xikouncho naslo. To sorgar gelea uprantui tem ieunk na. Karonn Jezu sorgar gelea uprant, Stotr 110:1-ant diloli bhasaunni purnn zali mhunn Pedru ani Paulun sanglem. Thoim mhunnttlam, “Mhojea Somiak Sorvesporachem utor hem; ‘Mhojea uzveak bos; tujea dusmanank hanv tujea paiam tolla ghaltam.’” (Itihas 2:32-35; Hebrevank 10:12, 13) Hachea voilean, sorgar vochon Jezuk zaito temp ravchem poddlem mhunn kollon ieta.

23. (a) Sorgar Devachem Raj kednam suru zalem? (b) Fuddlea odheai-ant ami kitem zannam zatolim?

²³ Punn taka kitlo vell ravchem poddlem? 1914 hea vorsa ho vell somptolo mhunn, Bible obheas kortoleank (atam Jehovache Sakxi mhunn vollkhotat) hem voros suru zaunchea sumar 40 vorsam poilim somzon ailem. (Hea tarke vixim pan 246-249 polloiat.) Tanchi somzonni sarki asli mhunn, 1914-ant sonvsarbhor suru zal’lea ghoddneantlean koll’llem. 1914 hea vorsa Krist raza zalo ani tannem sorgar raj cholounk suru kelem, mhunn Bible-antleo bhasaunneo dakhoitat.  Hachea voilean, Soitanak “thoddoch kall” dilolo asa, ani atam ami tea kallar ravtat hem kollon ieta. (Prokasovnni 12:12, 13; Stotr 110:2) Beginuch hem Raj Devachi khuxi prithumer kortolem mhunn ami khatren sangonk zata. Hache vixim Bible-ant kitem boroilam tem tumi zannant? Fuddlo odheai tumkam hem zannam zaunk modot kortolo.