AIZ sonvsarbhor lok monoitat tea festam ani porbam vixim, Bible-ant boroilolem na. Toxem zalear, him festam ani heo porbo khoim thaun aileo? Tumi ravtat thoincho khubso lok heo porbo monoitat astole. Punn hea vixim thoddim pustokam kitem mhunnttat tem vachlem zalear tumi ghoddie ojap zait. Oslea thoddea porbam vixim ami zannam zaum-ia.

Easter. The Encyclopædia Britannica hem pustok sangta tea pormonnem, “Konnui, easter hi porob monoitale mhunn Novea Korarant khoinch boroilolem na.” Toxem zalear, hi porob khoim thaun suru zali? Ti, khottea Devanchi bhokti kortolea lokam modem suru zali. Sonvsarbhor, zaito lok easter hi porob, Jezu Krist portean jivont zalo mhunn monoitat, punn tantuntleo chali-riti Kristanv dhormantlean ieunk na. Udharonnak, sonvsarant zaitea zageancher, hea porbechea vellar sonso vo tantiam khunnam koxi uzar kortat. Punn Catholic Encyclopedia pormonnem “khottea devachi bhokti kortat te lok sonso pikavollichi khunna mhunn mantale.”

 Novea Vorsachi Porob. Sonvsarbhor, novea vorsachi porob veg-vegllea disa ani ap-aplea bhaxen monoupachi chal asa. Punn hea porbechi survat koxi zali? The World Book Encyclopedia mhunntta, “Romi Somraz Julius-an, Kristi Xokachea 46-vea vorsa, Janerachea ek tarker novem voros suru zata mhunn tharailem. Romi lok ho dis Janus nanvachea devak bhettoitale. To darvontteancho, darancho ani survat dinnaro dev mhunn te mantale. Hea devak don tonddam aslim, tachem ek tondd fuddlean polloitalem ani ek fattlean. Janus hea nanva voilean, vorsachea poilea mhoineak, Janer hem nanv dovorlem.” Hache voilean, novea vorsachi porob khottea devanchi bhokti kortolea lokam modem suru zali mhunn kollon ieta.

Almachem Fest. Encyclopedia Americana hem pustok mhunntta, “Lok almachea disak pallttat teo chali-riti khoreo mhunnttlear Jezu Krist ieunchea adim, adlea dhormachea iadnikam modem suru zal’leo. Tanche don mukhel dev asle, ek suria dev ani dusro meloleancho dev. Ani tanchea pasot te festam kortale. Novembrache 1 tarker, meloleanchea devachem fest zatalem ani hea disa tanchem novem voros suru zatalem. Hem meloleanchea devachem fest, souka-soukas Kristanv dhormachea chali-ritint bhitor sorlem.”

Her Sonvsari Festam ani Porbo. Sonvsarbhor monoitat tim soglim festam ani porbo koxeo suru zaleo tem ami sangonk xokona. Punn munxank ani munxanchea songottnek mhoima diunchea pasot monoitat tim festam ani porbo, Jehova Devak manvonant. (Jeremias 17:5-7; Itihas 10:25, 26) Toxench, jim festam vo porbo kudd’ddea devanchea bhokte thaun suru zaleant tim-ui Jehova Devak manvonant. (Izaias 52:11; Prokasovnni 18:4) Hea pustokachea 16-vea odheai-ant Bible-antlim thoddim mull sotam dakhoileant. Him sotam amkam sonvsari porbent bhag ghetlo zalear Jehovak koxem dista tem zannam zaunk modot kortat.