Ami amchea kazari sangateak “ovisvaxi” zalʼlim Jehovak naka. (Malaki 2:16) Kazari jivitant eka-mekak visvaxi ravop khub gorjechem, karonn ghov-bail ovisvaxi asat zalear tankam eka-mekacher bhorvonso dovrunk kotthin zatolem. Punn tim visvaxi ravlear tancho mog vaddot voitolo.

Ovisvaxiponnak lagon kazari jivit aiz dokheant asa. Tumchem kazari jivit samballunk tumi don vostu korcho tharav gheunk zai.

BIBLE KITEM SANGTA: ‘Kitem odik mhotvachem tem tumi sodanch vichun kaddunk pavum.’ (Filipkarank 1:10) Tujea jivitant, tujem kazari jivit sogleam-von chodd mhotvachem. Tor, tunvem tujea kazari jivitak poilo zago diunk zai.

Tuzo kazari sangati mhotvacho mhunn lekhun tachea sangata tum khuxal aslolo Jehovak zai. (Upodexok 9:9) Tumi tumchea sangateachi beporva korchi nhoi punn, eka-mekak khuxal korunk vatto sodhunk zai mhunn Jehova spoxtt ritin dakhoita. (1 Korintkarank 10:24) Tuzo kazari sangati tuka moladik ani tuka tachi goroz asa mhunn taka kollom di.

TUMI KITEM KORUNK ZATA:

• Sodanch eka-meka borabor vell sarat ani eka-mekak purnn dhean diat

• “Hanv” mhunn chintchea bodlek “ami” mhunn chintat

BIBLE KITEM SANGTA: “Zor konnui eke ostorecher kamcharim dolle ghalit, tannem aplea kallzant tiche kodde pordvar kelo.” (Matev 5:28) Tor, konnui pozddea vostum vixim chintʼtit ravta zalear to eka orthan aplea kazari sangateak ovisvaxi zata.

“Tujea kallzachi kallji ghe” mhunn Jehova sangta. (Mhonnʼnneo 4:23; Jeremias 17:9) Tor, tumi kitem polloitat tacher dhean diat. (Matev 5:29, 30) Job nanvachea munxachi dekh gheiat. Apunn dusre ostorek vaitt nodren pollouncho na mhunn tannem aplea dolleam lagim ek korar kelʼlo. (Job 31:1) Burxim sahitiam kednanch pollounchimnant mhunn ghott tharav korat. Tumchea kazari sangatea bhair dusrea konnakuch mogachim bhavnam dakhoi nakat.

TUMI KITEM KORUNK ZATA:

• Tum kazari, ani tujea kazari sangateak tum visvaxi asa mhunn herank spoxtt kollom di

• Tujea kazari sangateachea bhavnanchi kallji ghe. Eka munxa lagim tuji ixttagot taka sarki disona zalear ti moddun uddoi