Bhag 8
Sonkoxtt Ietat Tednam Kitem Korchem
“Mhonntoch khuxal ravat. Atam matso vogot jinsam-jinsanche upodre tumi bhogche poddlear poddum-di.”—1 Pedru 1:6
Tumi tumchem kazari jivit ani tumcho kuttumb khuxal korunk vavurtat astolim, punn okosmat sonkoxtt ietat tednam khuxal ravonk kotthin zata. (Upodexok 9:11) Sonkoxttanchea vellar Dev amkam modot korunk toiar asa. Tor, tumchi poristhiti kitli-i vaitt zalear pasun sokol dilʼlim Bible-antlim totvam apnnailear tumi ani tumcho kuttumb bore toren tancho fuddo korunk pavtolim.
1 JEHOVACHER PATIEUN RAVAT
BIBLE KITEM SANGTA: “Sogllea tumchea huskeancho bhar tacher ghalat, kiteak taka tumchi kallji asa.” (1 Pedru 5:7) Sodanch ugddas dovrat, tumcher ietat tea trasancho zobabdar Dev nhoi. (Jakob 1:13) Tumi taka lagim sortat tednam, tumi chintunk zaina tea ritin to tumkam modot kortolo. (Izaias 41:10) Bible sangta, “Soglle tujea kallzache huske Tachea kallzant ghal.”—Stotr 62:8.
Tumi sodanch Bible vachun, obheas kortat tednam tumkam buzvonn mellttoli. Toxench, trasanchea vellar Jehova koso dhir dita tem tumi pollounk pavtolim. (2 Korintkarank 1:3, 4; Romkarank 15:4) Dev amkam “amchea gineana poros vorti” xanti ditolo mhunn bhasaita.—Filipkarank 4:6, 7, 13.
TUMI KITEM KORUNK ZATA:
-
Xant ravonk ani sarkea ritin chintunk Jehova lagim magnnem korun adar magat
-
Tumchea mukhar kosleo-kosleo vatto asat tem zannam zaiat ani magir tumkam boreak poddttoli ti vatt vinchun kaddat
2 TUMCHI ANI TUMCHEA KUTTUMBACHI KALLJI GHEIAT
BIBLE KITEM SANGTA: “Budvontachem kalliz xikovp melloita, Xanneanche kan zannvai sodtat.” (Mhonnʼnneo 18:15) Tumchea kuttumbantlea dor ekleachi poristhiti ani gorzo zannam zaiat. Tanchea lagim uloiat ani tanchem aikon gheiat.— Mhonnʼnneo 20:5.
Tumcho mogacho konnui morta tednam kitem? Tumchim bhavnam ukteponnim dakhounk fattim soronakat. Ugddas dovrat, ‘Jezuk pasun roddunk ailem.’ (Juanv 11:35; Upodexok 3:4) Favo to visov ghevop ani nhidop pasun mhotvachem. (Upodexok 4:6) Oxem kelʼlean, kotthin poristhiticho fuddo korunk tumkam modot zatoli.
TUMI KITEM KORUNK ZATA:
-
Sonkoxtt ieunchea adim tujea kuttumba lagim ulounchi sonvoim kor. Hea toren, oddchonnechea vellar tankam tujea lagim ulounk sompem zatolem
-
Tumchea sarkea oddchonneancho fuddo kela tanchea lagim uloiat
3 GOROZ TI MODOT GHEIAT
BIBLE KITEM SANGTA: “Ixtt sogllea vellar mog korta, Punn, oddchonniche gorje khatir bhav zolmota.” (Mhonnʼnneo 17:17) Tumchim ixttam tumkam modot korunk sodhtat, punn koxe toren modot korchi tem ghoddie tankam kollchem na. Tor, tumkam kiteachi goroz asa tem sangonk fattim soronakat. (Mhonnʼnneo 12:25) Toxench, Bible-achim totvam lagu korunk Devachea Utrachi bori zannvai asloleancho adar gheiat. Oxem kelʼlean, tim ditat tem margdorxon apnnaunk tumkam modot zatoli.—Jakob 5:14.
Devacher ani Devachea bhasaunneancher visvas dovortoleam sangata sodanch vell sartat tednam tumkam goroz ti modot mellttoli. Toxench, buzvonnechi goroz asa tankam tumi modot kortat tednam tumkam-i khub buzvonn mellttoli. Tankam Jehova vixim ani tachea bhasaunneam vixim sangat. Goroz asloleank modot korun vell sarat. Tumcho mog kortat ani tumchi porva kortat tanchea thaun pois ravonakat.—Mhonnʼnneo 18:1; 1 Korintkarank 15:58.
TUMI KITEM KORUNK ZATA:
-
Eka laginchea ixtta kodden uloun, tacho adar gheiat
-
Tumcheo gorzo kitem asat tem spoxttponnim sangat
