ODHEAI 04
Khoro Dev Konn?
Adlea kallar thaun lok veg-vegllea devanchi bhokti korit aileat. Punn Bible-ant oslea eka Deva vixim sanglam zo “sogllea devam poros vorto” asa. (2 Itihas 2:5) Ho Dev konn ani to soglea devam poros vorto oxem kiteak mhunnonk zata? Hea odheai-ant, khorea Deva vixim Bible kitem sangta tem ami polloitolim.
1. Devachem nanv kitem ani to amkam aplem nanv kollounk sodhta mhunn ami kiteak mhunnonk zata?
Bible-ant, Dev amkam aplea vixim zaitem sangta. Tantunt tannem oxem mhunnttlam: “Hanv Jehova. Hem mhojem nanv.” (Izaias 42:5, 8, NWT) Adlea tempa voilea Hebrev bhaxent, (jea bhaxent Bible-achim thoddim pustokam boroilʼlim) Devak ek nanv asa mhunn kollon ieta. Tea nanvacho orth zaun asa: “To ghoddon ieum-xem korta.” Amchea bhaxent tem nanv “Yahweh” vo “Jehova” mhunn bhaxantor kelam. Jehova Dev amkam aplem nanv kollounk sodhta oxem ami kiteak mhunnonk zata? (Stotr 117:1) Karonn Bible-ant tachem nanv 7,000 poros chodd pavtti melltta. a Bible sangta, ‘unch sorgar ani khala sonvsarant Jehova ekloch Dev’ zaun asa.—Dusri Somurt 4:39.
2. Bible Jehova Deva vixim kitem sangta?
Lok zaitea devanchi bhokti kortat. Punn, Jehova ekloch khoro Dev mhunn Bible sangta. Kiteak zait? Hachim zaitim karonnam asat. ‘Akʼkhe prithume voir Jehova ekloch Bhov Vorto’ zaun asa. Mhunnche, tachea poros chodd odhikar anik konnakuch na. (Stotr 83:18 vachat.) To “Sorvxoktivont” zaun asa, mhunnche taka zai tem korunk tache lagim xokti asa. Tannem hea vixvant ani prithumer aslolea “sogleo vostu rochleat.” (Prokasovnni 4:8, 11) Jehova Devak survat na ani xevottui na, to sodanch aslo ani sasnak astolo.—Stotr 90:2.
KHOLAIEN XIKAT
Dev, Bap vo Sorvespor hea utram modem ani Devachea nanva modem kitem ontor asa tem zannam zaiat. Toxench, Devan amkam aplem nanv koxem ani kiteak kolloilam tem-ui zannam zaiat.
3. Devak Bap vo Sorvespor mhunnttat punn tachem nanv Jehova
Eka munxak ami injinier vo advogad mhunnonk puro, punn taka ek nanv asta. Tor, nanv kiteak mhotvachem tem somzonk, VIDEO polloun sokol dilʼlea prosnacho zobab zannam zaum-ia.
-
Devachem nanv ani Bap vo Sorvespor hea utram modem kitem ontor asa?
Lok zaitea devanchi bhokti kortat mhunn Bible sangta. Stotr 136:1-3 vachun hea prosnacho zobab zannam zaum-ia:
-
Hea Stotra pormonnem ‘devancho Dev’ ani ‘dhoniancho Dhoni’ konn zaun asa?
4. Ami Devak nanvan ulo korop mhotvachem
Jehova aplem nanv amkam kollounk sodhta mhunn koxem kolltta? VIDEO polloun sokol dilʼlea prosnanche zobab zannam zaum-ia.
-
Aplem nanv lokank kollon ailʼlem Jehovak zai mhunn tumkam dista? Ani kiteak?
Apleak lokamnim nanvan ulo kelʼlo Jehovak zai. Itihas 2:21 vachun sokol dilʼlea prosnanche zobab zannam zaum-ia:
-
Ami Jehovak nanvan ulo korop kiteak gorjechem?
-
Konnui tumchem nanv ugddas dovorta tednam tumkam koxem dista?
-
Tumi Jehovak nanvan ulo kortat tednam taka koxem dista?
5. Jehova tumchea lagim ixttagot korunk sodhta
Cambodia-antli Soten nanvachi ek bail mhunntta ki Jehovachem nanv zannam zaun ti khub khuxal zali. VIDEO polloun sokol dilʼlea prosnacho zobab zannam zaum-ia.
-
Devachem nanv kollon ailea uprant Soten-achem jivit koxem bodolʼlem?
Eka munxa lagim ixttagot kortolim zalear amkam tachem nanv khobor asonk zai. Jakob 4:8a vachun hea prosnanche zobab zannam zaum-ia:
-
Hanga Jehova tumkam kitem korunk sangta?
-
Deva lagim ixttagot kortolim zalear tachem nanv zannam zavop ani taka nanvan ulo korop kiteak gorjechem?
THODDO LOK MHUNNTTA: “Devak nanvan ani kiteak ulo korunk zai, Dev mhunnttlear puro nhoi.”
-
Devachem nanv Jehova mhunn tumi mantat kai?
-
Devak nanvan ulo korop gorjechem mhunn tumi dusreank koxim somzaitolim?
KITEM XIKLIM
Ekuch khoro Dev asa ani tachem nanv Jehova. To amchea lagim ixttagot korunk sodhta. Hea pasot tannem aplem nanv amkam kolloilam ani ami taka tea nanvan ulo korop gorjechem.
Porot Ugddas Korum-ia
-
Jehova soglea devam poros vegllo oxem ami kiteak mhunnonk zata?
-
Ami Devak nanvan kiteak ulo korunk zai?
-
Jehova Dev amchea lagim ixttagot korunk sodhta mhunn amkam koxem kolltta?
ANIK SODHAT
Dev khoroch asa mhunn zannam zaunk panch purave polloiat.
Devak survat ani xevottui na oxem ami kiteak mhunnonk zata? Hacho zobab zannam zaunk ho lekh vachat.
Adim lok Devachem nanv koxe uchartale tem konnakuch khobor na, tori astana ami taka nanvan ulo korop kiteak gorjechem tem zannam zaunk ho lekh polloiat.
Ami Devak kitem mhunn ulo kortat tem mhotvachem kai? Devak fokot ekuch nanv asa mhunn ami kiteak mhunnonk zata tem zannam zaunk ho lekh vachat.
a Devachea nanvacho orth kitem, ani thoddea bhaxantor korpeamnim Bible-antlean tachem nanv kiteak kaddlam tem zannam zaunk New World Translation of the Holy Scriptures hantunt Appendix A4 (Inglez bhaxen) polloiat.
Tumkam Hem-ui Avoddttolem
ZAITE PAVTT VINCHARLOLE PROSN
Jehovachim Sakxim Bible xikonk koxim modot kortat?
Jehovachea Sakxeamnim Bible xikonk ji funkott manddavoll kelʼli asa tantunt tumi Bible-achem khoinchem-i bhaxantor uzar korunk zata. Tumchea ghorcheank vo ixttank tumchea sangata Bible xikonk apounk fattim soronakat.
