Ami amchea bhav-bhoinnam sangata astat tednam amkam Davida bhaxen dista. Tannem mhunnttlem: “Khorim bhavbhoinn koxim zor ekcharan jietat sogllim, kitlem borem, kitlem sobit!” (Stotr 133:1) Punn, ho ekvott apxinch zaina. Ho ekvott samballunk amkam dor ekleak khub vavr korcho poddtta.

1. Devachea lokam modem kitem khas asa?

Chintat tumi eka novea zagear geleant. Ani thoim tumi mittingek hajir zaleant. Tumkam tanchi bhas somzona zait. Tori astana, tumi eka onvollkhi zagear asat oxem tumkam bhogona. Kiteak? Karonn thoinchim bhav-bhoinnam uzar kortat tim prokaxonam ami pasun uzar kortat, ami eka-mekacho mog kortat ani Jehovachich bhokti kortat. Hoi, ami ‘Sorvesporachem nanv ghetat ani ek-chitan tachi chakri kortat.’—Zefania 3:9.

2. Ekvott samballunk tumi kitem korunk zata?

Bible sangta: “Kallzan thaun eka-mekacho mog korat.” (1 Pedru 1:22) Hem ami koxem korunk zata? Bhav-bhoinnanchea chukincher dhean diunchea bodlek, tanchea borea gunnancher dhean diat. Toxench, fokot tumkam avoddtta tanchea sangata ixttagot korche bodlek, veg-vegllea zatichea bhav-bhoinnam sangata ixttagot korat. Thoddim umkech zatichim mhunn tumi bhed-bhav kortat zalear, oslim bhavnam tumchea monantlean kaddunk zata titlo proitn korat.—1 Pedru 2:17 vachat. a

3. Sobhent konnem-i tumkam dukhoilam vo tumi konnakui dukhoilam zalear tumi kitem korunk zata?

Ami soglim patki dekhun ami ek-ek pavtti konnak tori dukhounk xoktat. Heach pasot, Bible sangta: “Eka-mekak kallzant thaun bhogxit ravat. Jehovan tumkam kallzant thaun bhogxileant toxem tumi-i bhogsunk zai.” (Koloskarank 3:13 vachat.) Ami Jehovak zaite pavtti dukhoitat. Tori astana, to amkam bhogxita. Tech bhaxen, ami amchea bhav-bhoinnank bhogxilʼlim Jehovak zai. Tor, tumi konnakui dukhoilam oxem tumkam dista zalear tumi vochon tanchea lagim uloiat ani xanti korat.—Matev 5:23, 24 vachat. b

 KHOLAIEN XIKAT

4. Bhedbhav korinakat

Amkam bhav-bhoinnancho mog asa hem khorem. Punn thodde pavtti dusrea zatichea bhav-bhoinnancho mog korunk amkam kotthin zait. Tednam amkam koxi modot zaunk xokta? Itihas 10:34, 35 vachun sokol dilʼlea prosnanche zobab zannam zaum-ia:

• Jehova bhedbhav korina. Zo konn tachi bhokti korunk sodhta taka to manun gheta. Magir to munis khoinchea-i zaticho zaum. Tor, ami Jehova koddlean kitem xikonk zata?

• Tumi ravtat tea zagear, lok dusreancho kiteak bhed-bhav kortat ani ho sobhav tumkam asa zalear tumi to kiteak pois korunk sodhtat?

2 Korintkarank 6:11-13 vachun sokol dilʼlea prosnacho zobab zannam zaum-ia:

• Tumi kitem kelear dusrea zatichea bhav-bhoinnam lagim ixttagot korunk pavtolim?

5. Dusreank udar kallzan bhogxiat ani xanti korat

Jehova kednanch chukona dekhun ami taka bhogsunchi goroz poddona. Tori astana, ami chuktat tednam Jehova amkam udar kallzan bhogxita. Izaias 55:7 vachun sokol dilʼlea prosnanche zobab zannam zaum-ia:

• Jehova amkam koso bhogxita?

• Jehova amkam bhogxita mhunn tumi kiteak upkari asat?

• Dusream sangata xanti samballunk amkam kednam kotthin zaunk xokta?

Jehovachi dekh gheun amchea bhav-bhoinnam sangata ami amcho ekvott koso samballunk zata? Mhonnʼnneo 19:11 vachun sokol dilʼlea prosnacho zobab zannam zaum-ia:

• Konnui amkam rag haddtta vo opman korta tednam ami kitem korunk zata?

 Ek-ek pavtti ami dusreank dukhoitat astolim. Tednam ami kitem korunk zata? VIDEO polloun sokol dilʼlea prosnacho zobab zannam zaum-ia:

• Video-nt dakhoilʼle bhoinnin xanti korunk kitem kelem?

 KITEM XIKLIM

Tumi dusreank bhogxitat ani soglea torechea bhav-bhoinnancho mog kortat tednam tumi sobhent ekvott samballunk pavtolim.

Porot Ugddas Korum-ia

• Tumi bhed-bhav koso pois korunk zata?

• Sobhent konnem-i tumkam dukhoilam vo tumi konnakui dukhoilam zalear tumi kitem korunk zata?

• Jehovachi dekh gheun tumi dusreank kiteak bhogsunk sodhtat?