Hi poristhiti polloi: Thomas-ak aiz school-ant vochonk naka. Taka porot kednanch iskolant vochonk naka. Oxem kiteak? Tin mhoine poilinchi gozal. Tachea klasintle bhurge tacheo chaddieo korunk lagle. Taka veg-vegllea nanvamnim challounk lagle. Te tachea hatantantle book mud’dom sokol uddoitale ani chukon poddla oxem vagtale. Thodde pavtt konn eklo fattlean dukollttalo ani fatti vollon polloilear konnem kelam tem sangonk kotthin zatalem. Kal tor tacho ekdom vaitt dis aslo, taka internet-a voilean domkailo . . .

Tum Thomas-achea zagear aslear kitem korta aslo?

Tujea lagim kainch korunk zaina oxem na. Zhogddim korinastana tunvem dadagiri kortoleak fuddo korunk zata. Koxem?

•   XANT RAV. Bible sangta, “Ek piso, aplea kallzantlim soglim bhavnam ekech pavtti rokhoita. Punn, xannom takit korina, tancher tabo dovorta.” (Mhonn’nneo 29:11, NW) Tujea lagim dadagiri kortat tednam tum xant ravlear te tuka sotaunche soddun ditole.

• ZOXAK TOXEM DIUM NAKA. Bible sangta, “Konnakuch vaitt vaittan farik korum nakat.” (Romkarank 12:17) Bodlo gheunk chintlear poristhiti anik bigddonk xokta.

• MUD’DOM TRAS MAGON GHEUM-NAKA. Bible sangta, “Xittuk munis sonkoxtt polleun asro gheta.” (Mhonn’nneo 22:3) Dadagiri kortolea munxa thaun vo trasant poddonk xokta toslea poristhiti thaun, zata titlo pois rav.

• TANNIM CHINTUNK NA TOSLO ZOBAB DI. Bible sangta, “Bolo zobab tiddok pois korta.” (Mhonn’nneo 15:1) Udharonnak, tum motto asa mhunn dadagiri kortolean tuka kitem-i mhunnttlem zalear tujean fokannan mhunnonk zata, “Hoi, hanvem thoddem vozon denvoilear borem zata aslem.”

• TUM TUJEA VATTEK LAG. 19 vorsanchem, Nora mhunntta, “Dadagiri kortoleanchea tonddak lagonastana, vogi ravon aple vattek laglear tujem xannemponn dista ani tum tanchea-von bolladik mhunn kollon ieta. Tunvem, tujea tiddkicher tabo dovrunk zata jem dadagiri kortoleam lagim zaina.”—2 Timotak 2:24.

• TUZO ATMVISVAS VADDOI. Dadagiri kortole zannant ki tanchi dadagiri konnam lagim choltoli ani konnam lagim cholchi na ti. Tuka atmvisvas na hem polloun te tuka chodd sotaunk xoktat. Punn tuka svotacher visvas aslear te sotaunk fatti sortole.

• KONNAKUI SANG. Ek tticher mhunntta, “Konnui tumchea lagim dadagiri korta zalear, vogi ravonakat, tachea vixim konnakui sang.” Oxem korop sarkem karonn hem kel’lean ami dusreank trasantlean vattaunk xoktat.