Wo Jesus mit sine Aposchtel no i dem Huus gsi isch, wo si s Abigmahl gfiiret hend, seit er zu ihne: «I dere Nacht werded ihr mich alli im Stich laa.» Aber de Petrus behauptet: «Ich nid! Ich würd dich nie im Stich laa, au wenn alli andere das würded mache.» Da seit Jesus zum Petrus: «Bevor hüt en Güggel chräit, wirsch du drü Mal säge, dass du mich nid kennsch!»

D Soldate bringed Jesus jetzt zum Huus vom Kaiphas und alli Aposchtel springed devo, nume zwei göhnd Jesus vorsichtig nache. Eine vo dene zwei isch de Petrus. Er gaht i Innehof vo dem Huus und wärmt sich am Füür uf. Es Dienschtmeitli gseht ihn am Füür und seit: «Ich kenne dich. Du ghörsch doch zu Jesus!»

De Petrus striitets ab: «Nei, das stimmt nid! Ich weiss nid, vo was du redsch!» Er lauft weg Richtig Iigangstor. E chli später gseht ihn es anders Dienschtmeitli und verzellt de Lüt: «Dee Maa ghört zu Jesus!» De Petrus behauptet: «Ich kenne Jesus überhaupt nid!» En Maa seit: «Du bisch ganz sicher eine vo dene. A dim Dialekt a ghör ich, dass du us Galiläa bisch – eso wie Jesus.» De Petrus schwört: «Ich kenn ihn nid!»

I dem Augeblick chräit en Güggel. Jesus dreit sich um und luegt de Petrus a. Denn chunnt em Petrus wider i Sinn, was Jesus gseit het. Er gaht use und brüelet ganz fescht.

Unterdesse chömmed d Richter vom Sanhedrin zum Huus vom Kaiphas. Si wend Gründ finde, zum Jesus z verurteile. Aber si hend vorher scho entschide, dass si Jesus wend töte. Jetzt sueched si nume no en Bewiis defür. Si finded aber keine. Da fragt de Kaiphas Jesus ganz direkt: «Bisch du de Sohn vo Gott?» Jesus git zur Antwort: «Dee bin ich.» De Kaiphas seit: «Wiso bruched mir no meh Bewiis? Er het über Gott gläschteret!» D Richter sind de gliiche Meinig: «Dee Maa muess sterbe.» Si gebed ihm Ohrfiige, spoized ihn a, verdecked ihm s Gsicht und schlönd ihn mit de Füscht. Währenddem mached si sich luschtig über ihn: «Wenn du en Prophet bisch, denn säg doch, wer dich gschlage het!»

Wos Tag wird, bringed si ihn zum Grichtssaal vom Sanhedrin und fraged wider: «Bisch du de Sohn vo Gott?» Jesus git zur Antwort: «Ihr säged ja selber, dass ich dee bin.» Wege dem behaupted si, er heg gege Gott gläschteret und drum verurteiled si ihn. Si bringed ihn zum Palascht vom Pontius Pilatus – er isch als Statthalter vo Rom de Höchscht i de Region. Was passiert jetzt?