De Lot und sin Onkel, de Abraham, wohned zäme im Land Kanaan. Mit de Ziit hend si eso vil Tier, dass si gar kei Platz meh hend für alli zäme. De Abraham seit denn zum Lot: «Mir chönnd nüm alli mitenand da lebe. Suech doch du dir en Platz us, wo du möchtisch hii gah. Ich gah denn nöimet andersch here.» De Abraham denkt nid nur a sich. Isch das nid lieb vo ihm?

De Lot luegt ume und gseht e wunderschöni Gegend i de Nöchi vonere Stadt, wo Sodom heisst. Dört gits ganz vil Wasser und saftigs grüens Gras. De Lot entscheidet sich für die Gegend und gaht mit sinere Familie dört hii.

Ganz i de Nöchi isch Gomorra. D Mensche z Sodom und z Gomorra, die sind sehr bös. So bös, dass Jehova di beide Städt wett vernichte. Wil er aber de Lot und sini Familie wett rette, schickt er zwei Engel, wo si warned: «Schnell! Göhnd us dere Stadt use! Jehova wird si zerstöre!»

Aber de Lot hets nid pressant und bliibt no e chli. Drum nehmed d Engel de Lot, sini Frau und sini beide Töchtere a d Hand und ziehnd si us de Stadt use. D Engel rüefed: «Springed um eues Lebe, lueged ja nid hindere, suscht sterbed ihr!»

Sobald si i de Stadt Zoar achömmed, laat Jehova Füür und Schwefel uf Sodom und Gomorra regne. Beidi Städt göhnd komplett kaputt. Leider lost d Frau vom Lot nid uf Jehova. Si luegt hindere und wird grad zunere Salzsüüle. Das macht em Lot sini Töchtere sicher sehr truurig. Aber si losed uf Jehova, und drum passiert ihne nüt. Uf Jehova lose isch würklich ganz wichtig.