De Elkana, en Maa us Israel, het zwei Fraue: d Hanna, wo kei Chind het, und d Peninna, wo vil Chind het. D Hanna wird vo de Peninna immer wider usglacht, wil si keis Chind het. De Elkana het d Hanna aber lieber. Jedes Jahr gaht er mit sinere Familie uf Silo, um Jehova bi de Stiftshütte azbete. Dört merkt er einisch, dass d Hanna, wo er eso gern het, sehr truurig isch. Er seit: «Bitte, Hanna, tue nüm brüele. Du hesch ja mich, und ich ha dich doch eso gern!»

E chli später gaht d Hanna weg, um still für sich allei z bete. Si cha eifach nid ufhöre brüele. Si bittet Jehova immer wider, dass er ihre hilft und verspricht ihm: «Jehova, wenn du mir en Sohn schenksch, denn gib ich ihn dir. Er söll dir sis Lebe lang diene.»

De Hohe Prieschter Eli gseht, wie d Hanna schluchzet und meint, si seig betrunke. D Hanna seit: «Nei, min Herr, ich bin nid betrunke. Ich ha es riisigs Problem und drum tue ich Jehova alles verzelle.» De Eli merkt, dass er sich tüscht het und seit: «Ich wünsche dir, dass Jehova uf dis Gebet lost.» D Hanna fühlt sich jetzt besser und gaht wider zrugg. Nid emal es Jahr später chunnt d Hanna en Sohn über und git ihm de Name Samuel. Chasch du dir vorstelle, wie glücklich d Hanna jetzt isch?

D Hanna vergisst ihres Verspreche nid, wo si Jehova gee het. Jetzt, wo si de Samuel nüm stillt, bringt si ihn zu de Stiftshütte. Dört seit si zum Eli: «Das isch de Bueb, wo ich drum betet ha. Ich gib ihn jetzt Jehova. Er söll sis ganze Lebe lang Jehova ghöre.» De Elkana und d Hanna göhnd de Samuel jedes Jahr go bsueche und bringed ihm es neus ärmelloses Mänteli. Jehova schenkt denn de Hanna no drü Söhn und zwei Töchtere.