યર્મિયા ૫૨:૧-૩૪
૫૨ સિદકિયા+ રાજા બન્યો ત્યારે ૨૧ વર્ષનો હતો. તેણે યરૂશાલેમમાં ૧૧ વર્ષ રાજ કર્યું. તેની માતાનું નામ હમૂટાલ+ હતું. તે લિબ્નાહના વતની યર્મિયાની દીકરી હતી.
૨ યહોવાની નજરમાં જે ખરાબ હતું એ સિદકિયા કરતો રહ્યો. તેણે યહોયાકીમની જેમ જ કર્યું.+
૩ યહોવાના કોપને લીધે યરૂશાલેમ અને યહૂદાની આવી દશા થઈ. આખરે તેમણે પોતાની નજર આગળથી તેઓને કાઢી મૂક્યા.+ પછી સિદકિયાએ બાબેલોનના રાજા સામે બળવો પોકાર્યો.+
૪ સિદકિયા રાજાના શાસનનું નવમું વર્ષ ચાલતું હતું. એના દસમા મહિનાના દસમા દિવસે બાબેલોનનો રાજા નબૂખાદનેસ્સાર* પોતાના આખા સૈન્ય સાથે યરૂશાલેમ પર ચઢી આવ્યો. તેઓએ એની સામે છાવણી નાખી અને એને ઘેરી લેવા શહેર ફરતે દીવાલ ઊભી કરી.+
૫ તેણે સિદકિયા રાજાના શાસનના ૧૧મા વર્ષ સુધી શહેરને ઘેરી રાખ્યું.
૬ એ વર્ષના ચોથા મહિનાના નવમા દિવસે+ શહેરમાં દુકાળ એટલો આકરો હતો કે લોકો માટે કંઈ જ ખાવાનું ન હતું.+
૭ છેવટે દીવાલમાં બાકોરું પાડવામાં આવ્યું. રાજાના બગીચા પાસે બે દીવાલો વચ્ચે દરવાજો હતો. રાજા પોતાના બધા સૈનિકો સાથે રાતોરાત શહેરમાંથી નાસી છૂટ્યો. ખાલદીઓએ શહેરને ઘેરી રાખ્યું હોવા છતાં, તેઓ અરાબાહને રસ્તે ભાગી નીકળ્યા.+
૮ પણ ખાલદીઓના લશ્કરે રાજાનો પીછો કર્યો. તેઓએ યરીખોના ઉજ્જડ પ્રદેશમાં સિદકિયાને પકડી પાડ્યો.+ તેનું આખું સૈન્ય તેની પાસેથી વિખેરાઈ ગયું.
૯ તેઓએ સિદકિયાને પકડી લીધો. તેઓ તેને હમાથ દેશના રિબ્લાહમાં બાબેલોનના રાજા પાસે લઈ ગયા અને રાજાએ તેને સજા ફટકારી.
૧૦ બાબેલોનના રાજાએ સિદકિયાની નજર આગળ તેના દીકરાઓને રહેંસી નાખ્યા. તેણે રિબ્લાહમાં યહૂદાના બધા અધિકારીઓને પણ મારી નાખ્યા.
૧૧ પછી બાબેલોનના રાજાએ સિદકિયાની આંખો ફોડી નાખી,+ તેને તાંબાની બેડીઓ પહેરાવી અને બાબેલોન લઈ ગયો. સિદકિયા મરી ગયો ત્યાં સુધી તેને કેદમાં રાખ્યો.
૧૨ બાબેલોનના રાજા નબૂખાદનેસ્સારના* શાસનનું ૧૯મું વર્ષ ચાલતું હતું. એના પાંચમા મહિનાના દસમા દિવસે બાબેલોનના રાજાનો સેવક, રક્ષકોનો ઉપરી નબૂઝારઅદાન યરૂશાલેમમાં આવ્યો.+
૧૩ તેણે યહોવાનું મંદિર, રાજાનો મહેલ અને યરૂશાલેમનાં બધાં ઘરો બાળી નાખ્યાં.+ તેણે મોટાં મોટાં ઘરો પણ બાળી નાખ્યાં.
૧૪ રક્ષકોના ઉપરી સાથે આવેલા ખાલદીઓના આખા લશ્કરે યરૂશાલેમ ફરતેની દીવાલો જમીનદોસ્ત કરી નાખી.+
૧૫ અમુક ગરીબ લોકો, શહેરમાં બચેલા લોકો, બાબેલોનના રાજાના પક્ષમાં ભળી ગયેલા લોકો અને બાકી રહેલા કુશળ કારીગરોને રક્ષકોનો ઉપરી નબૂઝારઅદાન ગુલામ બનાવીને લઈ ગયો.+
૧૬ રક્ષકોનો ઉપરી નબૂઝારઅદાન ત્યાંના એકદમ ગરીબ લોકોમાંથી અમુકને દ્રાક્ષાવાડીમાં કામ કરવા અને કાળી મજૂરી કરવા મૂકી ગયો.+
૧૭ યહોવાના મંદિરમાં* તાંબાના જે સ્તંભો હતા, એના ખાલદીઓએ ટુકડે-ટુકડા કરી નાખ્યા.+ તેઓએ યહોવાના મંદિરની લારીઓ*+ અને તાંબાના હોજના+ પણ ટુકડે-ટુકડા કરી નાખ્યા. એનું બધું તાંબું તેઓ બાબેલોન ઉપાડી ગયા.+
૧૮ તેઓ ડોલ, પાવડા, કાતરો,* વાટકા,+ પ્યાલાઓ+ અને મંદિરમાં વપરાતી તાંબાની બધી વસ્તુઓ પણ લઈ ગયા.
૧૯ રક્ષકોનો ઉપરી ચોખ્ખાં સોના-ચાંદીનાં કુંડ,+ અગ્નિપાત્રો,* વાટકા, ડોલ, દીવીઓ,+ પ્યાલા અને બીજા વાટકા લઈ ગયો.+
૨૦ યહોવાના મંદિર માટે સુલેમાન રાજાએ બનાવેલાં બે સ્તંભો, હોજ, હોજ નીચેના તાંબાના ૧૨ આખલાઓ+ અને લારીઓમાં* પણ ઘણું તાંબું વપરાયું હતું. એમાં એટલું તાંબું વપરાયું હતું કે એના વજનનો કોઈ હિસાબ ન હતો.
૨૧ દરેક સ્તંભની ઊંચાઈ ૧૮ હાથ* હતી અને એનો ઘેરાવો ૧૨ હાથ હતો.+ સ્તંભ પર મઢેલા તાંબાની પહોળાઈ ચાર આંગળ* હતી. દરેક સ્તંભ અંદરથી પોલો હતો.
૨૨ એના પર તાંબાનો કળશ* હતો, જેની ઊંચાઈ પાંચ હાથ હતી.+ કળશ ફરતેની જાળી અને દાડમો તાંબાનાં હતાં. બીજો સ્તંભ અને દાડમો પણ એવાં જ હતાં.
૨૩ કળશ ફરતે ૯૬ દાડમો હતાં.* કુલ મળીને જાળી ફરતે ૧૦૦ દાડમો હતાં.+
૨૪ રક્ષકોનો ઉપરી પોતાની સાથે મુખ્ય યાજક* સરાયાને,+ સહાયક યાજક સફાન્યાને+ અને ત્રણ દરવાનોને પણ લઈ ગયો.+
૨૫ તે શહેરમાંથી એક રાજદરબારીને લઈ ગયો, જે સૈનિકોનો ઉપરી હતો. તેને શહેરમાંથી રાજાના સાત સલાહકારો મળી આવ્યા અને સેનાપતિનો મંત્રી પણ મળી આવ્યો, જે દેશના લોકોને લશ્કરમાં ભરતી કરતો હતો. તેઓને અને શહેરમાંથી મળી આવેલા બીજા ૬૦ લોકોને પણ તે પકડીને લઈ ગયો.
૨૬ રક્ષકોનો ઉપરી નબૂઝારઅદાન તેઓને પકડીને રિબ્લાહમાં બાબેલોનના રાજા પાસે લઈ ગયો.
૨૭ બાબેલોનના રાજાએ તેઓને હમાથ દેશના રિબ્લાહમાં મારી નાખ્યા.+ આ રીતે યહૂદાએ પોતાનું વતન છોડીને પારકા દેશમાં ગુલામ થવું પડ્યું.+
૨૮ નબૂખાદનેસ્સાર* પોતાના શાસનના સાતમા વર્ષે ૩,૦૨૩ યહૂદીઓને ગુલામ બનાવીને લઈ ગયો.+
૨૯ નબૂખાદનેસ્સારના* શાસનના ૧૮મા વર્ષે+ ૮૩૨ લોકોને યરૂશાલેમથી ગુલામ બનાવીને લઈ જવામાં આવ્યા.
૩૦ નબૂખાદનેસ્સારના* શાસનના ૨૩મા વર્ષે રક્ષકોનો ઉપરી નબૂઝારઅદાન ૭૪૫ યહૂદીઓને ગુલામ બનાવીને લઈ ગયો.+
કુલ મળીને ૪,૬૦૦ લોકોને ગુલામ બનાવીને લઈ જવામાં આવ્યા.
૩૧ યહૂદાનો રાજા યહોયાખીન ગુલામીમાં ગયો એને ૩૭મું વર્ષ ચાલતું હતું.+ એ સમયે એવીલ-મરોદાખ બાબેલોનનો રાજા બન્યો. એ જ વર્ષના ૧૨મા મહિનાના ૨૫મા દિવસે તેણે યહૂદાના રાજા યહોયાખીનને કેદમાંથી આઝાદ કર્યો.+
૩૨ તેણે યહોયાખીન સાથે પ્રેમથી વાત કરી. તેણે પોતાની સાથેના બાબેલોનના બીજા રાજાઓ કરતાં તેને વધારે સન્માન આપ્યું.*
૩૩ યહોયાખીનને કેદખાનાનાં કપડાંને બદલે નવાં કપડાં આપવામાં આવ્યાં. તેણે જિંદગીભર બાબેલોનના રાજા આગળ ભોજન લીધું.
૩૪ યહોયાખીનને આખી જિંદગી, તે મરી ગયો ત્યાં સુધી બાબેલોનના રાજા પાસેથી દરરોજ ભોજન પૂરું પાડવામાં આવ્યું.
ફૂટનોટ
^ મૂળ, “નબૂખાદરેસ્સાર,” અલગ જોડણી છે.
^ મૂળ, “નબૂખાદરેસ્સારના,” અલગ જોડણી છે.
^ અથવા, “ઘરમાં.”
^ અથવા, “જળગાડીઓ.”
^ અથવા, “જળગાડીઓમાં.”
^ એક હાથ એટલે ૪૪.૫ સે.મી. (૧૭.૫ ઇંચ). વધારે માહિતી ખ-૧૪ જુઓ.
^ એક આંગળ એટલે ૧.૮૫ સે.મી. (૦.૭૩ ઇંચ). વધારે માહિતી ખ-૧૪ જુઓ.
^ અથવા, “૯૬ દાડમો જોઈ શકાતાં હતાં.”
^ મૂળ, “નબૂખાદરેસ્સાર,” અલગ જોડણી છે.
^ મૂળ, “નબૂખાદરેસ્સારના,” અલગ જોડણી છે.
^ મૂળ, “નબૂખાદરેસ્સારના,” અલગ જોડણી છે.
^ મૂળ, “તેને વધારે ઊંચી રાજગાદી આપી.”
