યહોશુઆ ૧૪:૧-૧૫
૧૪ હવે એલઆઝાર યાજક, નૂનના દીકરા યહોશુઆ અને ઇઝરાયેલનાં કુળોના પિતાનાં કુટુંબોના* વડાઓએ ઇઝરાયેલીઓને કનાન દેશના વિસ્તારો વારસા તરીકે આપ્યા.+
૨ યહોવાએ મૂસાને આજ્ઞા આપી હતી, એ મુજબ ચિઠ્ઠીઓ* નાખીને નવ કુળો અને અડધા કુળને એ વારસો વહેંચી આપવામાં આવ્યો.+
૩ મૂસાએ બીજાં બે કુળોને અને અડધા કુળને યર્દનની પેલી તરફ* વારસો આપ્યો હતો.+ તેણે લેવીઓને તેઓ મધ્યે કોઈ વારસો આપ્યો ન હતો.+
૪ યૂસફના વંશજોને બે કુળો ગણવામાં આવ્યા,+ મનાશ્શા અને એફ્રાઈમ.+ તેઓએ લેવીઓને રહેવા માટે શહેરો+ અને ઢોરઢાંક ચરાવવાની જમીન સિવાય દેશમાં બીજો કોઈ હિસ્સો આપ્યો નહિ.+
૫ યહોવાએ મૂસાને આજ્ઞા આપી હતી એ પ્રમાણે ઇઝરાયેલીઓએ એ દેશ વહેંચી લીધો.
૬ પછી યહૂદાના માણસો ગિલ્ગાલમાં યહોશુઆ પાસે આવ્યા.+ કનિઝ્ઝી યફૂન્નેહના દીકરા કાલેબે+ યહોશુઆને કહ્યું: “કાદેશ-બાર્નેઆમાં તારા અને મારા વિશે યહોવાએ પોતાના સેવક મૂસાને+ જે કહ્યું હતું,+ એ તું સારી રીતે જાણે છે.+
૭ યહોવાના સેવક મૂસાએ મને કાદેશ-બાર્નેઆથી દેશની જાસૂસી કરવા મોકલ્યો+ ત્યારે હું ૪૦ વર્ષનો હતો. મેં પાછા આવીને દેશ વિશે સાચો અહેવાલ આપ્યો હતો.+
૮ મારી સાથે આવેલા મારા ભાઈઓએ ભલે લોકોને ડરાવી મૂક્યા, પણ હું પૂરા દિલથી યહોવા મારા ઈશ્વરની પાછળ ચાલ્યો.+
૯ એ દિવસે મૂસાએ સમ ખાતા કહ્યું હતું: ‘દેશમાં જે જે જગ્યાએ તારા પગ પડ્યા છે, એ તારો અને તારા દીકરાઓનો હંમેશ માટે વારસો થશે, કેમ કે તું પૂરા દિલથી મારા ઈશ્વર યહોવા પાછળ ચાલ્યો છે.’+
૧૦ જ્યારે ઇઝરાયેલીઓ વેરાન પ્રદેશમાં મુસાફરી કરતા હતા+ ત્યારે યહોવાએ મૂસાને મારા વિશે એ વચન આપ્યું હતું.+ એ વચન પ્રમાણે આ ૪૫ વર્ષ યહોવાએ મને સહી-સલામત રાખ્યો છે.+ હવે હું ૮૫ વર્ષનો થયો છું.
૧૧ મૂસાએ મને મોકલ્યો એ દિવસે હું જેટલો બળવાન હતો, એટલો જ આજે પણ છું. લડાઈમાં જવાની અને બીજાં કામો કરવાની હમણાં પણ મારામાં અગાઉ જેટલી જ તાકાત છે.
૧૨ તેથી મને આ પહાડી વિસ્તાર આપ, જેના વિશે યહોવાએ એ દિવસે વચન આપ્યું હતું. એ દિવસે તેં સાંભળ્યું હતું કે ત્યાં અનાકીઓ*+ છે, જેઓ કોટવાળાં શહેરોમાં રહે છે.+ પણ યહોવા ચોક્કસ* મારી સાથે રહેશે+ અને યહોવાના વચન પ્રમાણે હું તેઓને ત્યાંથી હાંકી કાઢીશ.”+
૧૩ યહોશુઆએ યફૂન્નેહના દીકરા કાલેબને આશીર્વાદ આપ્યો અને વારસા તરીકે હેબ્રોન આપ્યું.+
૧૪ હેબ્રોન આજ સુધી કનિઝ્ઝી યફૂન્નેહના દીકરા કાલેબનો વારસો ગણાય છે, કારણ કે તે પૂરા દિલથી ઇઝરાયેલના ઈશ્વર યહોવા પાછળ ચાલ્યો હતો.+
૧૫ હેબ્રોનનું નામ અગાઉ કિર્યાથ-આર્બા+ હતું (આર્બા તો અનાકીઓમાં પ્રખ્યાત માણસ હતો) અને આખા દેશમાં લડાઈનો અંત આવ્યો.+
