લેવીય ૧:૧-૧૭
-
અગ્નિ-અર્પણ (૧-૧૭)
૧ અને યહોવાએ* મૂસાને બોલાવ્યો અને મુલાકાતમંડપમાંથી*+ તેની સાથે વાત કરતા કહ્યું:
૨ “ઇઝરાયેલીઓ* સાથે વાત કરીને તેઓને કહે: ‘જો તમારામાંથી કોઈ માણસ યહોવાને પ્રાણીઓનું અર્પણ ચઢાવે, તો એ ઢોરઢાંક કે ઘેટાં-બકરાંમાંથી હોય.+
૩ “‘જો તે પોતાનાં ઢોરઢાંકમાંથી અગ્નિ-અર્પણ* ચઢાવે, તો એ ખોડખાંપણ વગરનો આખલો* હોય.+ તે એને મુલાકાતમંડપના પ્રવેશદ્વાર આગળ રાજીખુશીથી+ યહોવાને અર્પી દે.
૪ અગ્નિ-અર્પણમાં આપેલા આખલાના માથા પર તે પોતાનો હાથ મૂકે. પછી તેના પ્રાયશ્ચિત્ત* માટે એ અર્પણ સ્વીકારવામાં આવશે.
૫ “‘પછી યહોવાની આગળ એ આખલાને કાપવો. હારુનના દીકરાઓ, એટલે કે યાજકો*+ મુલાકાતમંડપના પ્રવેશદ્વાર આગળ વેદી* પાસે એનું લોહી+ લાવે અને એની ચારે બાજુ છાંટે.
૬ અગ્નિ-અર્પણના આખલાનું ચામડું ઉતારી લેવું અને એ આખલાના ટુકડા કરવા.+
૭ હારુનના દીકરાઓ, એટલે કે યાજકો વેદી પર આગ મૂકે+ અને એના પર લાકડાં ગોઠવે.
૮ પછી હારુનના દીકરાઓ, એટલે કે યાજકો વેદી પર સળગતાં લાકડાં ઉપર આખલાના ટુકડા, એનું માથું અને એની ચરબી* ગોઠવે.+
૯ આખલાનાં આંતરડાં અને પગ પાણીથી ધોવાં. પછી યાજક વેદી પર એને અગ્નિ-અર્પણ તરીકે ચઢાવે.* એ આગમાં ચઢાવવાનું અર્પણ છે, જેની સુવાસથી યહોવા ખુશ* થાય છે.+
૧૦ “‘જો તે પોતાનાં ઘેટાં-બકરાંમાંથી અગ્નિ-અર્પણ ચઢાવે,+ તો એ ખોડખાંપણ વગરનો ઘેટો અથવા બકરો હોય.+
૧૧ એને વેદીની ઉત્તર તરફ યહોવા આગળ કાપવો. પછી હારુનના દીકરાઓ, એટલે કે યાજકો એનું લોહી વેદીની ચારે બાજુ છાંટે.+
૧૨ એ પ્રાણીના ટુકડા કરવા અને પછી યાજક વેદી પર સળગતાં લાકડાં ઉપર પ્રાણીના ટુકડા, એનું માથું અને એની ચરબી* ગોઠવે.
૧૩ એ પ્રાણીનાં આંતરડાં અને પગ પાણીથી ધોવાં. પછી યાજક એને વેદી પર અગ્નિ-અર્પણ તરીકે ચઢાવે. એ આગમાં ચઢાવવાનું અર્પણ છે, જેની સુવાસથી યહોવા ખુશ થાય છે.
૧૪ “‘પણ જો તે યહોવાને પક્ષીનું અગ્નિ-અર્પણ ચઢાવે, તો એ હોલા અથવા કબૂતરનાં બચ્ચાં+ હોય.
૧૫ યાજક એને વેદી પાસે લાવીને એની ડોક કાપે* અને એનું લોહી વેદીની એક બાજુએ ઢોળી દે. પછી એ ડોક વેદી પર આગમાં ચઢાવે.
૧૬ યાજક પક્ષીના ગળાની થેલી* અને પીંછાં કાઢી નાખે અને વેદીની પૂર્વ બાજુએ જ્યાં રાખ* નાખવામાં આવે છે,+ ત્યાં ફેંકી દે.
૧૭ યાજક એને પાંખો પાસેથી ચીરે, પણ એના બે ભાગ છૂટા ન પાડે. પછી તે એને વેદી પર સળગતાં લાકડાં ઉપર ચઢાવે. એ આગમાં ચઢાવવાનું અર્પણ છે, જેની સુવાસથી યહોવા ખુશ થાય છે.
ફૂટનોટ
^ વધારે માહિતી ક-૪ જુઓ.
^ મૂળ, “ઇઝરાયેલના દીકરાઓ.”
^ અથવા, “મૂત્રપિંડ ઉપરની ચરબી.”
^ અથવા, “એને અગ્નિ-અર્પણ તરીકે ચઢાવે, જેથી એનો ધુમાડો ઉપર ચઢે.”
^ મૂળ, “શાંત.”
^ અથવા, “મૂત્રપિંડ ઉપરની ચરબી.”
^ એટલે કે, અડધી ગરદન કાપે, જેથી એનું માથું છૂટું પડી ન જાય.
^ ગળામાં આવેલી ખોરાકની થેલી.
^ અથવા, “ચરબીવાળી રાખ.” એટલે કે, બલિદાનોની ચરબીથી પલળેલી રાખ.
