ખરાબ લોકોને શિક્ષા કરવા ઈશ્વર આફતો લાવે છે, એ માન્યતા કંઈ નવી નથી. પોર્ટુગલના લિસ્બન શહેરમાં ૧૭૫૫ની સાલમાં મોટો ધરતીકંપ થયો હતો, પછી આગ લાગી અને સુનામી આવી હતી. એમાં આશરે ૬૦,૦૦૦ લોકો માર્યા ગયા હતા. પ્રખ્યાત ફિલસૂફ વૉલ્ટૅરે એના વિષે લખ્યું: ‘પૅરિસમાં ઘણા લોકો ભોગવિલાસી જીવનનો આનંદ માણે છે. પરંતુ શું લિસ્બનમાં એથી વધારે ખરાબ લોકો છે?’ ખરેખર, લાખો લોકો માને છે કે ઈશ્વર માણસોને શિક્ષા કરવા કુદરતી આફતો લાવે છે. એટલે જ ઘણાં દેશોમાં એવી આફતોને ઈશ્વરનું કામ કહેવામાં આવે છે.

આ બધું જોયા પછી આ સવાલોનો વિચાર કરવો જોઈએ: શું લોકોને શિક્ષા કરવા ઈશ્વર ખરેખર કુદરતી આફતો લાવે છે? હાલમાં આવેલી કુદરતી આફતો શું ખરેખર ઈશ્વર તરફથી છે?

અમુક લોકો કુદરતી આફતો માટે ઈશ્વરને જવાબદાર ઠેરવે છે. તેઓ બાઇબલના એવા અહેવાલોનો ઉલ્લેખ કરે છે, જેમાં ઈશ્વરે કુદરતી આફતો લાવીને વિનાશ કર્યો હતો. (ઉત્પત્તિ ૭:૧૭-૨૨; ૧૮:૨૦; ૧૯:૨૪, ૨૫; ગણના ૧૬:૩૧-૩૫) જો આપણે એ અહેવાલોનો ધ્યાનથી અભ્યાસ કરીએ, તો ત્રણ મુખ્ય બાબતો જોવા મળશે. પહેલી, ઈશ્વરે આફત લાવતા પહેલાં લોકોને ચેતવણી આપી હતી. બીજી, આજની કુદરતી આફતોમાં સારા અને ખરાબ બંને લોકોનો નાશ થાય છે. પરંતુ ઈશ્વર તરફથી આવેલા વિનાશમાં અમુક લોકોનો જ નાશ થયો હતો. જેઓ દુષ્ટ હતા અથવા ચેતવણીને ધ્યાનમાં લેતા ન હતા તેઓ જ નાશ પામતા. ત્રીજી, ઈશ્વર હંમેશા નિર્દોષ લોકોને બચાવવાનો માર્ગ કાઢતા.—ઉત્પત્તિ ૭:૧, ૨૩; ૧૯:૧૫-૧૭; ગણના ૧૬:૨૩-૨૭.

આપણા સમયમાં ઘણી કુદરતી આફતો આવી છે, જેમાં લાખો લોકોએ પોતાનો જીવ ગુમાવ્યો છે. પરંતુ એ આફતોમાં એવી કોઈ સાબિતી નથી કે એની પાછળ ઈશ્વરનો હાથ છે. તો પછી, આપણે આફતોનો સામનો કેવી રીતે કરી શકીએ? શું એવો કોઈ સમય હશે જ્યારે કુદરતી આફતો હશે જ નહિ? હવે પછીના પાનાઓમાં એના વિષે વધુ જાણવા મળશે. (w11-E 12/01)