Palajatka karaloʼuta namüinjatka na chajanakana Corinto 7:1-40
7 Yootuinjachi jooluʼu taya jümaa süchiki tü kasa jüshajirakat tamüin. Anashi nnojoire sünainpünaain jierü wanee wayuu.
2 Anapejeʼe kaʼwayuusere wanee wayuu. Akaataʼaya joo chi toolokoi, anashi kaʼwayuusere nia, jama jouluin maʼin tü aʼluwajirawaakalü akuwaʼipaa.*
3 Ainkaainjachi chi toolokoi sümaa tü nuʼwayuusekat. Akaataʼaya joo tü jietkat, ainkaainjatü nümaa chi suʼwayuusekai.
4 Tü jietkat nnojotsü laülaain saaʼu sukuwaʼipa sümüiwaʼa, nia laülaaka chi suʼwayuusekai saaʼu. Akaʼaya chi toolokoi nnojoishi laülaain saaʼu nukuwaʼipa nümüiwaʼa, shia laülaaka tü nuʼwayuusekat naaʼu.
5 Nnojo jiyoutajaain suulia aaʼinraa tia. Aluʼusaʼa jaashajaajiraale süchiki sümaa müinjatüinña sukuwaʼipa jutuma maʼaka soʼu jeʼra kaʼi. Süpütaajeetkalaka kaʼi süpüla juʼuraajüinjanain. Eepejeʼe süpüla jüinkaain jüchikuaʼa suulia nuuʼulakajüin jaaʼin Satanás jee kawalaʼatain jutuma juʼwayuuse süka nnojoluin jüchecherüin jaaʼin.
6 Taküjain jümüin tüü süpüla jütüjaainjatüin saaʼu tü eekat süpüla jaainjain, nnojotpejeʼe jaaʼinrüinjatüin shia süka taluwanaajalain jia sünain.
7 Kasataalejeseʼe maʼwayuusein wayuu maʼaka maʼwayuusein taya. Eepejeʼeya tü kasa nüsülajakat Maleiwa sümüin wayuu waneʼewai sukua, müshijeseʼe eein chi eekai kasaalüin jee chi eekai maʼwayuusein.
8 Anuu jooluʼu tanüiki namüin na wayuu maʼwayuusekana jee namüin na jieyuu outakana aʼwayuuse. Anashii maʼwayuusere naya maʼaka maʼwayuusein taya.
9 Isalejeʼeya nachiki nachecherüin naaʼin, anakajaʼa kasaarüle naya. Shia anaʼleeka aluʼu kasaarüle wanee wayuu suulia suchuntaain maʼin naaʼin ainkawaa.
10 Anuu tanüiki jooluʼu namüin na wayuu eekai kasaalüin: Nnojoishi suuʼulaainjachin suʼwayuuse wanee wayuu. Nnojoishi tayain kaluwanaajalain tia, nuluwanaajala shia chi Señotkai.
11 Sükatalaale wanee wayuu nuulia chi suʼwayuusekai, nnojotsü kasaalüinjatüin nümaa wanee wayuu yalejee. Shia anaka aluʼu süleʼejüle süchikuaʼa nümaa chi suʼwayuusekai. Akaataajaʼa chi wayuu eekai kaʼwayuusein, nnojotsü nuuʼulaainjatüin tü nuʼwayuusekat.
12 Anuu tanüiki jooluʼu namüin na waneinnua, taya kanüikika tüü, nnojotsü nünüikin shia chi Señotkai: Manoujainre nuʼwayuuse wanee anoujashi jee ayateerejeʼe shia kepiain nümaa, nnojotsü shia nuuʼulaainjatüin.
13 Manoujainre suʼwayuuse wanee anoujasü jee ayateerejeʼe nia kepiain sümaa, nnojoishi nia suuʼulaainjachin.
14 Chi wayuu eekai manoujain, wulesü nukuwaʼipa saaʼujee sunoujain tü nuʼwayuusekat otta müsia tü wayuu eekai manoujain wulesü sukuwaʼipa saaʼujee nunoujain chi suʼwayuusekai. Nnojorülejeʼe müin nakuwaʼipa, nnojotsüje wulein nakuwaʼipa na nachonniikana, wuleitpapejeʼe nakuwaʼipa maaʼulu.
15 Nuʼuneerejeʼe chi manoujainsaikai suulia tü nuʼwayuusekat, ketshia nuʼunai. Nnojotsü choʼujaain ichekuʼu nümüinjachin chi anoujashikai sünain nuʼwayuuse, akaataajaʼa tü anoujasükat nnojotsü choʼujaain ichekuʼu sümüinjatüin nünain chi suʼwayuusekai, jama naapüin Maleiwa wanee anaa namüin.
16 Pia wayuu kaʼwayuusekat, ¿jamüsü pütüjaaka saaʼu puʼtteʼereechire chi puʼwayuusekai jee nnojoleechire puʼtteʼerüin nia? Pia wayuu kaʼwayuusekai, ¿jamüsü pütüjaaka saaʼu puʼtteʼereerüle puʼwayuuse jee nnojoleerüle puʼtteʼerüin shia?
17 Anasü ayatüleʼeya tü jukuwaʼipakat maʼaka tü jukuwaʼipapuʼukat juʼttaiwaʼaya sünain anoujaa nünain Jehová,* chi Maleiwakai. Shia taluwataaka anain tia napüshuaʼa na anoujashiikana.
18 Süchotoonüle paala süta nükorolo* wanee wayuu süpülapünaa nikeroluin sünain anoujaa, ayatüinjatüjaʼaya müin nukuwaʼipa. Nikerotule sünain anoujaa wanee wayuu sümaa nnojoluin süchotoonüin süta nükorolo, ayatüinjatüjaʼaya müin nukuwaʼipa.
19 Nnojotsü shiain alanaʼaleein nüchoteʼerüle süta nükorolo wanee wayuu jee nnojorüle nüchoteʼerüin shia. Tü alanaʼaleekat ojutu shia noonooinjachin wanee wayuu sümaa tü nuluwataakalü anain Maleiwa.
20 Anasü ayatüle tü jukuwaʼipakat maʼaka tü jukuwaʼipakat juʼttaiwaʼaya sünain anoujaa nünain chi Maleiwakai.
21 Achepchieere pia süpülapünaa punoujain nünain chi Maleiwakai, nnojo shapaain paaʼin saaʼu tia. Eerejeʼe süpüla puuʼulaain suulia achepchieein pia, pajayataleeya tia.
22 Achepchieepuʼule wanee wayuu süpülapünaa niʼyataain nümüin chi Señotkai, taashitpa nukuwaʼipa, jama nüchepchiaichipain nia chi Señotkai. Nnojoire achepchieein wanee wayuu süpülapünaa nunoujain nünain chi Señotkai, nüchepchiaichipa jooluʼu nia Cristo.
23 Kojutusü maʼin tü nuwalaajakat Maleiwa jaaʼu. Juuʼulaa suulia süchepchiain jia wayuu.
24 Tawalayuwaa, anasü ayatüle tü jukuwaʼipakat maʼaka tü jukuwaʼipakat juʼttaiwaʼaya sünain anoujaa nünain chi Maleiwakai.
25 Nnojotsü eein wanee pütchi nüküjaka tamüin chi Señotkai namüinjatka na wayuu maʼwayuuseyüliikana. Eepejeʼe süpüla junoujain tanüiki, jama nümülialaain chi Señotkai taalin.
26 Sutuma mojuin maʼin tü mmapaʼakat maaʼulu yaa, shia anaka saaʼin tamüin ayatüle maʼwayuusein wanee wayuu.
27 ¿Kaʼwayuuseshi pia? Ayataʼaya pia sümaa puʼwayuuse. ¿Maʼwayuusesai pia? Nnojo püchajaain kaʼwayuusee.
28 Nnojoishi pia kaainjalain kasaarüle pia. Akaataajaʼa na maʼwayuuseyüliikana, kasaarüle naya, nnojoleena kaainjalain sünainjee tia, eʼreenapejeʼe müliaa na wayuu kasaatkana. Müshiijeseʼe tachiaain jia suulia sülatüin jümüin tia.
29 Tawalayuwaa, anuusa jooluʼu tanüiki jümüin: Apaliʼirajüsü tü kaʼikat. Na wayuu eekai kaʼwayuusein anashii müle maʼwayuusekai naaʼin.
30 Na aʼyalajakana müinjana maʼyalajüinkai naaʼin, na talatakana aaʼin müinjana nnojotkai talatüin naaʼin, na ayaʼlajakana wanee kasa müinjatü nnojotkai saaʼin eein namaʼana.
31 Na wayuu aapaakana sümaa tü kasa eekat maaʼutpünaa yaa, anasü nnojorüle naaʼinmaain maʼin shia, süka jamüin, aʼwanajaasü maʼin tü mmapaʼakat.
32 Chi wayuu eekai maʼwayuusein shia naaʼinmaaka maʼin tü aʼyatawaakat nümüin chi Señotkai süpüla talatüinjatüin naaʼin chi Señotkai nümaa.
33 Chi wayuu eekai kasaalüin shapaasü naaʼin saaʼu tü kasa eekat maaʼutpünaa jee shapaasü naaʼin saaʼu tü naaʼinrajatkat süpüla talatüinjatüin saaʼin nuʼwayuuse.
34 Nnojoikalaka nia müin naaʼinruʼukai naaʼin. Akaataajaʼa tü wayuu nnojotkat kasaalüin jee tü wayuu nnojoyütkalia kaʼwayuusein shia saaʼinmaaka maʼin tü aʼyatawaakat nümüin chi Señotkai, wulekalaka sukuwaʼipa jee tü jülüjakat saaʼin. Eekajasaʼa tü wayuu eekai kasaalüin, shapaasü saaʼin saaʼu tü kasa eekat maaʼutpünaa jee shapaasü saaʼin saaʼu tü eekat süpüla saaʼinrüin süpüla talatüinjatüin naaʼin chi suʼwayuusekai.
35 Taküjain jümüin tia süpüla anainjatüin jukuwaʼipa. Nnojotsü shia taküjain jümüin süpüla tapülajüinjatüin juulia wanee kasa. Taküjain jümüin tia süpüla jaaʼinrüinjatüin tü kasa eekai anain jee ayatüinjanain jiʼyataain nümüin chi Señotkai sümaa nnojoluin eein wanee kasa ataʼülaka jukuwaʼipa.
36 Nülaüleʼerapa naaʼin wanee wayuu jee nütüjapa süpüleerua nukuwaʼipa sümaa niyaawatüin saaʼu nnojoluin anain ayatüleʼeya maʼwayuusein nia, anakajaʼa naaʼinrüle tü anakat saaʼin nümüin. Nnojoleechi nia kaainjalain, anashi kasaarüle.
37 Anale naaʼin wanee wayuu suluʼu maʼwayuusein nia jee nnojorüle choʼujaain nümüin kasaalüinjachin nia sümaa nüchecherüin naaʼin suulia naaʼinrüin tü kasa suchuntaakat naaʼin, aneerü nukuwaʼipa nnojoire kaʼwayuusein nia.
38 Kasaarüle wanee wayuu anasü tia naaʼinrakat. Eekajasaʼa chi wayuu nnojoikai kasaalüin anaʼleejeeria tü naaʼinrakat.
39 Ayatüinjatia wanee wayuu nümaa suʼwayuuse kataiwaʼaya noʼu. Eekajaʼa outule chi suʼwayuusekai taashisü sukuwaʼipa süpüla kasaalüin shia nümaa chi eekai sücheküin, niainjachipejeʼe wanee wayuu nikirajakai Cristo.
40 Eekajasaʼa saaʼin tamüin, talataleejeeria maʼin saaʼin ayatüle maʼwayuusein shia. Pansaasü tamüin eein tü nüpülainkat Maleiwa taaʼu.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Circuncisión» suluʼu tü kanüliakat «Jamaluʼulu pütchikat».
