Naʼyataain na Aluwataaushikana 14:1-28
-
Watta naalii na wayuu anoujakana chaa Iconio jee müliashi Pablo nümaa Bernabé atumawaa (1-7)
-
Maleiwayaa Pablo nümaa Bernabé naaʼinruʼu na wayuu chajanakana Listra (8-18)
-
Aʼinnaʼanüshi Pablo süka ipa, nnojoipejeʼe nia outuin (19, 20)
-
Atütüleʼennüsü naaʼin na anoujashiikana nutuma Pablo nümaa Bernabé (21-23)
-
Aleʼejüshi Pablo chaa Antioquíamüin, tü chakat Siria (24-28)
14 Wanaa sümaa chajachin Pablo nümaa Bernabé chaa Iconio, ekerotushii naya suluʼumüin tü ekirajüleekat nüchiki Maleiwa natuma na judíokana otta kemeʼeriasü maʼin nanüiki, wattaka naalii na judío jee na griego anoujakana.
2 Nayasaʼa na judío nnojoliikana anoujain, nashükajüin na wayuu nnojoliikana judíoin, naʼürülaanaka anain na anoujashiikana natuma.
3 Kakaliaka naya chaa Iconio sünain aküjaa pütchi nünülialuʼu Jehová.* Naainjiraka naya kasa pülasü süpüla napansaajüinjatüin süchiki tü nümaneekat Maleiwa sümüin wayuu.
4 Nnojoliipejeʼe paaʼinwain na wayuu sulujunakana tia mmakat, eeshii na wanaawakana aaʼin namaa na judíokana otta eeshii na wanaawakana aaʼin namaa na aluwataaushikana.
5 Naashajaajiraaka nikiira Pablo otta Bernabé na wayuu nnojoliikana judíoin, na judíokana otta na wayuu aluwataakana naaʼu süpüla müliainjanain naya natuma jee naʼinaʼalajanain naya süka ipa.
6 Naapapa Pablo nümaa Bernabé süchiki tia, naʼluwataaka suluʼumüin tü mmakat Licaonia, eekai tü pueulokot Listra otta Derbe jee müsia suluʼumüin tü mma chakat süʼütpünaa.
7 Yalajanaka naya sünain aküjaa tü pütchi anakat maʼin.
8 Chaa Listra, eejachi wanee wayuu masaʼasai joyotokoi süka isain nüchiki oʼunaa, eweeniraashi sümaa müin nia.
9 Naapajaka chia wayuukai nünüiki Pablo. Niʼrajaaka maʼin nia Pablo jee niyaawatapa saaʼu nunoujain chia wayuukai sünain naawaleʼenneechin nutuma,
10 nümakalaka Pablo nümüin sümaa emetuluin nünüiki: «¡Püshaʼwalaa!». Nüshaʼwalaakalaka wayuukai jee nuwarairaaka.
11 Neʼrapa na wayuukana tü kasa pülasü naainjakat Pablo, emetutkalaka maʼin nanüiki sünain maa suluʼu nanüikipala na wayuu chajanakana Licaonia: «Wayuuinnapala maʼin na maleiwakana jee ashakatüshii naya waʼakamüin».
12 «Zeus» namakalaka nümüin Bernabé, niakalaka «Hermes» namüin amüin Pablo, jama niawalin aashajaain.
13 Chi sacerdote aʼyataakai suluʼu tü aʼwaajüleekat Zeus, tü chakat soʼuluʼu tü pueulokot, antitshi nia paaʼa toolo süpüla nuʼutajatüin saaʼin, niakai namaa na wayuukana. Antitshi nia sütüna wunuʼu jee süsii süpüla saalajayaainjatüin nekii.
14 Naapapa süchiki tia Pablo nümaa Bernabé, nachatajaakalaka nasheʼin, nawataaka naʼakamüin na wayuukana jee namakalaka sümaa emetuluin nanüiki:
15 «¿Jamüshii makaʼa waya jutuma? Wayuu waya wanaa jümaa otta eʼrüshii waya müliaa wanaa jümaa. Aküjashii waya tü pütchi anakat maʼin süpüla juuʼulaainjanain suulia türa kasa nnojotkat kasain anain apüla. Niainjachi juʼwaajaka chi Maleiwa matüjainkai outaa, chi Kakumalakai tü sirumatuʼukat sümaa süpüshuaʼa tü kasa eekat chaa iipünaa, tü mmakat sümaa tü kasa eekat süpaʼa otta tü palaakat sümaa tü kasa eekat shiroku.
16 Sümaiwa paala, nuuʼulaain wayuu süpüla saaʼinrajatüin tü kasa saaʼinreekalü amüin.
17 Sükajee tü kasa naaʼinrakat nüküjain jümüin jaralin maʼin nia. Aluwataashi nia juya jümüin, watta saalii jüʼttia nutuma, aapüshi nia eküülü jümüin jee talatüsü maʼin jaaʼin nutuma».
18 Sükajee nüküjain Pablo tia nümaa Bernabé namüin na wayuukana, nountuin nooʼuleʼerüin naya suulia noʼutuin saaʼin mürüt süpüla naʼwaajüinjanain naya.
19 Nantapaaka waneinnua judío sejena Antioquíajee otta Iconiojee. Nootoko wayuu nooʼomüin Pablo, naʼinaʼalüinjeseʼe nia jee najaraijaka nia anooipaʼamüin sünain tü pueulokot, outayaashi nia naaʼinruʼu.
20 Shiasaʼa noutkajaapa na anoujashiikana nüʼütpünaa Pablo, nütamaaka jee nikerotoko suluʼumüin tü pueulokot. Waneemüin kaʼi, nuʼunakalaka Derbemüin nümaa Bernabé.
21 Süchikijee naküjain tü pütchi anakat maʼin jee wainmain na wayuu nekirajakana suluʼu tia mmakat, naleʼejaka nachikuaʼa chaa Listramüin, Iconiomüin otta Antioquíamüin.
22 Nantapa chamüin, natütüleʼeraka naaʼin na anoujashiikana süpüla ayatüinjatüin ichein nanoula jee namakalaka namüin: «Eʼrüinjana waya wamüliala palajana süpülapünaa nuluwataain Maleiwa waaʼu».
23 Aneekünüshii nutuma Pablo nümaa Bernabé anoujashii laülaashiinjanakana suluʼu waneʼewai sukua tü outkajaaleekat. Oʼuraajüshii naya jee aamajüshii naya. Neʼitaaka naya najapuluʼu Jehová,* jama niain nanoujain anain naya wayuukana.
24 Nalataka suluʼupünaa tü mmakat Pisidia jee nantaka Panfiliamüin.
25 Süchikijee naküjain pütchi suluʼu tü mmakat Perga, noʼunakalaka suluʼumüin tü mmakat Atalia.
26 Nuʼunaka Pablo nümaa Bernabé suluʼu anuwa chaa Antioquíamüin. Tia, shia tü mma eejanale nachuntuin na anoujashiikana nüpüleerua Pablo otta Bernabé süpüla anainjatüin nakuwaʼipa sünain tü aʼyatawaa eʼitaanakat napüleerua, tü anuu joo nekeraajüin.
27 Nantapa chamüin, noutkajeʼerüin na anoujashiikana jee naküjakalaka namüin süpüshuaʼa tü kasa naainjakat Maleiwa nakajee. Naküjainña namüin müin nujutatkai saaʼin Maleiwa wanee puettoʼu napüleerua na wayuu nnojoliikana judíoin süpüla nekeroluinjanain sünain anoujaa.
28 Kakaliaka makatüin Pablo nümaa Bernabé chayaa namaa na anoujashiikana.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
