Naʼyataain na Aluwataaushikana 2:1-47
2 Jutkataka naya napüshuaʼa suluʼu wanee miichi soʼunnaa tü Miʼiraa kanüliakat Pentecostés.*
2 Saapünakalaka suʼloolo wanee kasa iipünaajee müsü aka saaʼin suʼloolo wanee joutai eekai katchin maʼin. Shikerotoko suluʼumüin tü miichi eejanale naya joyojoyoluin.
3 Neʼrakalaka suchuwalaain kojuyasü siki müsü aka saaʼin shiyee wayuu, suʼttayaa sümaka tia naaʼu waneʼewai nakua.
4 Süntakalaka tü nüpülainkat Maleiwa naaʼumüin, naashajaaka suluʼu anüikii naatajatü wanaapünaa sümaa tü nountakat naashajaain sutuma tü nüpülainkat Maleiwa.
5 Shiasaʼa wanaa sümaa tia, antüshii Jerusalénmüin wayuu judío kojutukana maʼin amüin Maleiwa, sainküinjeejana mmakat.
6 Noutkajaayaa namaka watta naalii wayuu naapapa tia suʼlotuinkat, ponokoloko maʼin naaʼin naapapa naashajaain na nikirajüinkana Jesús suluʼu nanüikipala naya wayuukana.
7 Ponusü maʼin naaʼin tia na wayuukana, anuujeseʼe nanüiki: «¿Aashin wayuuin Galileajeʼewalii na makana yootuin?
8 ¿Jamakaʼa naashajaayaa namaka suluʼu tü wanüikipalakat waneʼewai wakua?
9 Anaapejeʼe wamaa wayuu suluʼujeejanakana tü mmakat Partia, Media, Elam, wayuu chejeejana Mesopotamia, Judea, Capadocia, Ponto otta wayuu suluʼujeejana tü mmakat Asia.*
10 Anaa wayuu suluʼujeejana tü mmakat Frigia, Panfilia, Egipto otta suluʼujee tü mma chakat Libia, süʼütpaʼa tü mmakat Cirene. Antüshii wayuu Romajee, wayuu judío otta müshiʼiya wayuu nnojoliikana judíoin ekerotokana naʼakamüin na judíokana sünain anoujaa.
11 Anaʼaya wayuu suluʼujeejana tü mmakat Creta otta müsia Arabia. ¿Aashin naashajaain suluʼu wanüikipala süchiki tü kasa anasü naaʼinrakat Maleiwa?».
12 Ponusü maʼin naaʼin tia na wayuukana otta nnojotsü nayaawatüin saaʼu, müshiijeseʼe namajiraain: «¿Jamaluʼutkai tüü?».
13 Eepejeʼe na wayuu makana anüiki nemeeʼerainruʼu: «Epeʼruwaashii neʼe sutuma nasaain wiino».
14 Nüshaʼwalaaka Pedro namaʼaleeya na Polookana Waneemüin nikirajüin Jesús jee nümakalaka namüin na wayuukana sümaa emetuluin nünüiki: «Jia wayuu chejeʼewaliikana Judea otta jia kepiakana Jerusalén, kacheʼe jia sümüin tanüiki.
15 Nnojoishii epeʼruwaain na wayuu jümakana, jama wattaʼajanain maalü* waya.
16 Tü makalü alatüin shia süpüla shikeraajüin tü pütchi aküjünakat paala nükajee Joel, chi nünüikimaajachikai Maleiwa, tü makat mayaa:
17 ‹Anuu nünüiki chi Maleiwakai: «Sülüʼütpa sükalia süpüla sajaʼttüin kasa mojusü, taapeerü* tü tapülainkat* sümüin wayuu maʼleekalia. Aküjeena pütchi na nachooinkana, na jimaʼaliikana jee na majayünnüükana meerü neʼrakai saaʼin wanee kasa suluʼu nekii otta aʼlapüjaajeena na laülaayuukana.
18 Soʼunnaa tia kaʼikat, taapeeriaʼaya tü tapülainkat namüin na tachepchiakana, naküjeenakalaka pütchi.
19 Aaʼinreechi taya kasa pülasü chaa iipünaa otta yaa saaʼu tü mmakat eejeerü isha, sikoʼu otta sümüsain siki.
20 Süpülapünaa süntüin tü kaʼi kasalajaneetkalü oʼu saainjala wayuu nutuma Jehová* otta tü kojuteechikalü oʼu nia, ekuujeechi chi kaʼikai jee ishapüiteerü tü kashikat.
21 Nieechi oʼttaaka chi wayuu achuntakai nünülia Jehová»›.*
22 »Jaapa tanüiki jia wayuu yaajeʼewaliikana Israel: Chi Jesús chejeʼewaikai Nazaret, nia wanee wayuu nümaʼanajeejachi Maleiwa otta atüjaana aaʼu tia sünainjee tü kasa pülasü naaʼinrakat nutuma Maleiwa, jütüjaa aaʼulu tia.
23 Ataʼünnüshi wayuukai chia süka keraatüjülüinña sukuwaʼipa nutuma Maleiwa otta nütüjaa aaʼu müinjatüinjaʼa nukuwaʼipa. Jaapüin nikii süpüla nükachennüin sünain wanee wunuʼu natuma wayuu kaainjarannuu jee noʼuta aaʼinchi nia.
24 Asoʼiraapejeʼe naaʼin nutuma Maleiwa suulia müin joo sajapuluʼujakai naaʼin tü outaakat.*
25 Süka müin nünüiki David nüchiki: ‹Waneepiashi Jehová* tapüleerua, yaashi nia tekialuʼujee süpüla nnojolinjachin jamajüin taya sutuma wanee kasa.
26 Müsüjeseʼe talatüin maʼin taaʼin, talatüshi maʼin taya sünain aashajawaa, taʼatapajeetkalaka tü kasa anasü teʼreetkat mapeena.
27 Nnojoleechi puuʼulaain taya suluʼu tü Amuuyuukat,* nnojoleerü puuʼulaain ittüin niʼiruku chi wayuu waneepiakai pümaa.
28 Piʼraajirüin taya tü wopu sünainmüinjatkat tü kataakalü oʼuu. Talatüshi maʼin taya süka anain maʼin takuwaʼipa poʼuluʼu›.
29 »Tawalayuu, yootushi paala taya jümaa süchiki nukuwaʼipa chi watuushikai David. Outushi nia jee niʼitaanaka, anuuyülüjaʼaya maaʼulu tü woowira nütasükat.
30 Nünüikimaajachi nia Maleiwa otta nütüjaa aaʼu pansaatüjülüin nünüiki Maleiwa nümüin sünain nüikalaajeechin wanee nülüin niiʼirakaluʼu sünain aluwatawaa.
31 Müsüjaʼaya niʼrakai saaʼin paala nüsoʼireʼennüin aaʼin Cristo, nüküjakalaka süchiki nnojolin nuuʼulaanüin suluʼu tü Amuuyuukat otta nnojoluin ittüin tü niʼirukukat.
32 Watüjaa aaʼu wapüshuaʼa süsoʼireʼennüin naaʼin Jesús nutuma chi Maleiwakai.
33 Nümaashi nia Maleiwa chaa iipünaamüin süpüla chainjachin nia nikialuʼujee, saapünaka nümüin nutuma chi Nüshikai tü nüpülainkat Maleiwa, tü aküjünatüjütkalia achiki paala. Eeitpaka joo nutuma tü anuu jaapüin sümaa jiʼrüin.
34 Nnojoishi oʼunuin David chaa iipünaamüin, anuupejeʼe nünüiki: ‹Müshi Jehová* nümüin chi Taseñotsekai: «Püikalaa yaa tekialuʼujee
35 waneʼereeya puuʼuipalapa tatuma na püʼünüükana»›.
36 Natüjaainjatü aaʼu napüshuaʼa na wayuu kepiakana Israel niʼitaanüin Jesús nutuma Maleiwa süpüla Waseñotseinjachin nia otta süpüla Cristoinjachin nia, chi anii joo jükacherüin sünain wanee wunuʼu süpüla outajachin nia».
37 Naapaiwaʼaya na wayuukana tia pütchikat, müsüjaʼaya sütkünakai naaʼin jee namakalaka nümüin Pedro otta namüin na wane aluwataaushikana: «Wawalayuu, ¿kasakaʼa anain süpüla waaʼinrüin?».
38 Nusoutakalaka Pedro namüin: «Anashii jiyaawajaale suulia jaainjala waneʼewai jukua, woutiisaiwa jia nünülialuʼu Jesucristo, sülatinneetka jaainjala juulia otta aapüneerü jümüin tü nüpülainkat Maleiwa.
39 Nüküjatüjülia Maleiwa naapajatüin tü nüpülainkat jümüin, namüin jüchonnii, namüin na wayuu wattakana epia otta namüin na wayuu nuunejakana chi Wamaleiwasekai Jehová».*
40 Nüküjakalaka namüin süpüshuaʼa tü nünüikikat Maleiwa jee nümaka namüin: «Anashii juʼttaale noulia na wayuu mojulaashiikana».
41 Woutiisaka na wayuu aapaakana sümaa nünüiki Pedro, nekeroloko maʼaka naaʼin 3.000 wayuu nooʼomüin na nikirajüinkana Jesús soʼu kaʼikat tia.
42 Nekirajaakalaka maʼin sünain tü ekirajünakalü anain naya natuma na aluwataaushikana. Alatitshii naya kaʼi namaa na nawalayuukana, kottushii naya sünain ekawaa jee sünain oʼuraajaa.
43 Naaʼinrakalaka kasa pülasü na aluwataaushikana, kojutuka maʼin Maleiwa namüin na wayuukana suluʼujee tia.
44 Nayasaʼa na wayuu ekerotokana sünain anoujaa, kottushii naya otta nasülajiraain wanee kasa eekai namaʼanain.
45 Noiküin tü kasa eejatkat namaʼana sümaʼaleeya noumain süpüla neitajüin tia nakaaluʼu na nawalayuukana, wanaapünaa sümaa tü kasa choʼujaakat namüin.
46 Weinshishii naya suluʼumüin tü aʼwaajüleekat Maleiwa, naatawaisü tü miichi nekaʼawaikalü aluʼu otta nekiraain tü neküinkat sümaa talatüin maʼin naaʼin. Nnojotsü piamain noʼupünaa sünain aaʼinraa tia.
47 Naʼwaajüin Maleiwa otta talatüsü wayuu maʼleekalia namaa. Nikerotirüin Jehová* waneepia naʼakamüin na nikirajüinkana Jesús na wayuu oʼttaainjanakana.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Maʼaka apünüin oora süchikijee nujuʼitaain kaʼikai» maluʼulu tia suluʼu griego.
^ «Amülasü» maluʼulu tia suluʼu griego.
^ Jee shiale «süpüshi tü tapülainkat». «Sünainjee tapülain» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Jee shiale «kapükai naaʼin sutuma tü outaakat». «Saalin tü outaakat» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
