Apocalipsis 15:1-8
15 Sülatakalaka wanee kasa chaa sirumatuʼu, eesü tü kayaawasekat tia makat, anasü maʼin shia jee ponusü maʼin saaʼin wayuu tia, teʼrüin akaratshishii aapiee nümaʼanajeejana Maleiwa, naya na antirakana akaratshisü kasa mojusü eeka atuma müliaa. Shia sajaʼttiamüinka kasa mojusü tia, sülatapa tia ooʼulaweechi Maleiwakai suulia jashiee.
2 Teʼrakalaka wanee kasa müsü aka saaʼin palaa jorottoko maʼin, eejatü siki saʼaka tia makat, teʼrüinña na ayamütkana tü wüchii wünaʼapüjatkat sümaʼaleeya tü shiyaakuakat otta tü nuumero sünüliamaajatkat. Shaʼwatüshii naya süʼütpaʼa tü palaa jorottokot maʼin, najapuluʼusü tü arpa nümaʼanajeejatkat chi Maleiwakai.
3 Neeʼirajüin tü jayeechi niiʼirajakat Moisés, chi Nüchepchiakai Maleiwakai otta neeʼirajüin tü jayeechi niiʼirajakat chi Anneetchonkai. Müshii naya sünain eeʼirajaa:
«Jehovákalee,* Maleiwa Pülashikai maʼin, anasü maʼin tü kasa pukumalakat jee ponusü saaʼin wayuu tia, pia chi Maleiwa Aluwataakai süpüla kaʼikat süpüshuaʼa, anasü süpüshuaʼa tü kasa paaʼinrakat jee shiimain shia.
4 Jehovákalee,* ¿jaraleechikaʼa nnojolin kojutuin atuma pia? ¿Jaraleechikaʼa nnojolin aʼwaajüin pia?* Pia chi waneepiakai sümaa wayuu. Anteena pünainmüin na wayuu sainküinjeejanakana tü mmakat jee naʼwaajeechi pia, jama sütüjaanüitpain aaʼu lotuin sukuwaʼipa süpüshuaʼa tü kasa puluwataakalü anain».
5 Süchikijee tia, teʼrakalaka sujutalaain chaa sirumatuʼu tü aʼwaajüleekat Maleiwa.*
6 Nojuʼitaka akaratshishii aapiee sümaa akaratshisü kasa mojusü eeka atuma müliaa. Kuluulu lino nasheʼin, wulesü maʼin otta jorottusü maʼin jee eesü wanee kuluulu ooroleʼeya naʼluuwainpünaa.
7 Eekalaka wanee naʼakajee na pienchishiikana aapiee, naapüin wanee iita aainjuushi süka ooro namüin na akaratshishiikana aapiee, shia tü iita sümaajatkat jashiee nutuma Maleiwa, chi matüjainkai outaa.
8 Kaitüsü sümüsain wanee kasa suluʼupünaa tü aʼwaajüleekat Maleiwa saaʼujee warattüin maʼin chi Maleiwakai jee saaʼujee pülashin maʼin nia. Nnojoishi jaralinjachin ekerotuin suluʼu tü aʼwaajüleekat Maleiwa waneʼereeya kettaapa tü akaratshisükat kasa mojusü eeka natuma na akaratshishiikana aapiee.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ «Kojutuinjatü pünülia atumawaa» maluʼulu tia suluʼu griego.
^ «Tü Kuatta Wulekat maʼin suluʼu tü aʼwaajüleekat» maluʼulu tia.
