Apocalipsis 8:1-13
8 Naakatapa chi Anneetchonkai tü chiiruaajatkat shipekia tü rooyokot, maaʼinñatuuikalaka chaa sirumatuʼu, shiatapünaa oora müin tia mayaa.
2 Teʼraka akaratshishii aapiee shaʼwashawalüin nümülatuʼu Maleiwa, aapünüsü akaratshisü konneeta namüin.
3 Nüntaka joo wanee aapiee kajapulujuchi wanee sikemechipala aainjuushi süka ooro, tia süpülajatü saʼajünüin tü wunuʼu jemetakalü eejuu nümüin Maleiwa. Shaʼwatakalaka chi aapieekai süʼütpaʼa tü aʼajüleekat wanee kasa nümüin Maleiwa. Wainma wunuʼu jemeta eejuut aapünaka nümüin süpüla naʼajüinjatüin shia saaʼu tü aʼajüleekat wanee kasa nümüin Maleiwa, tia aʼajüleekat aainjuushi süka ooro. Tia wunuʼu jemetakalü eejuu aʼajünajatü shia nümüin Maleiwa wanaa sümaa saapajünüin tü nachuntakat na aneekuushikana.
4 Kaitaka nümaʼanamüin Maleiwa sümüsain tü wunuʼu jemetakalü eejuu, tü naʼajakat chi aapieekai. Naapajaleeinña Maleiwa tü nachuntakat na aneekuushikana.
5 Naapaamaataka chi aapieekai tü sikemechipalakat, niʼitaakalaka sikemechi suluʼu, naapaain tia sikemechikat saaʼujee tü aʼajüleekat wanee kasa nümüin Maleiwa jee nijitaka tü sikemechikat mmapaʼamüin. Sütüttakalaka tü juyakat, saapünaka sünüiki wayuu, kayaasü maʼin tü juyakat jee sukutkujaaka tü mmakat.
6 Yapajaka na akaratshishiikana aapiee süpüla naʼyalajirüinjatüin tü akaratshisükat konneeta.
7 Niʼyalajitkalaka tü konneetakat chi palajachikai aapiee. Eejaakalaka shiʼichiise juya, süpalirajaanaka sikoʼu sümaa isha jee sujutunaka mmapaʼamüin. Jotokoloko wanee shiʼipa tü mmakat,* jotusiaʼaya watta saalii wunuʼulia* jee jotusü süpüshuaʼa tü mojuuikat.
8 Niʼyalajitkalaka tü konneetakat chi wane aapieekai. Sujutunaka shiroku tü palaakat wanee kasa müsü aka saaʼin wanee uuchi miyoʼu eekai chuwatüin maʼin, ishajaakalaka wanee shiʼipa tü palaakat.*
9 Outaka watta saalii seʼe palaa* jee watta saalii anuwa ojuichijaʼaleeka.*
10 Niʼyalajitkalaka tü konneetakat chi wane aapieekai. Sujutuukalaka sirumatuʼujee wanee shüliwala miyoʼu maʼin. Chuwatsü shia maʼaka chuwatüin wanee sikoʼu. Sujutuukalaka shiroku watta saalii süchi* otta shiroku eejeere süparalüin wüin.
11 «Ajenjo» sünülia tia shüliwalakat, miyoʼu maʼin wüin ishika sutuma.* Watta saalii wayuu outaka sutuma tia wüinkat, jama ishin maʼin shia.
12 Niʼyalajitkalaka tü konneetakat chi wane aapieekai. Shikuukalaka wanee naʼata chi kaʼikai, wanee saʼata tü kashikat* otta ekuusü watta saalii shüliwala.* Shipiʼyuushijaakalaka soʼu pienchi oora saʼwai jee soʼukai.
13 Teʼrakalaka wanee warulapai waawatüin chaa sirumatuʼupünaa, taapaka emetuluin maʼin niʼira sünain maa: «Eʼreena maʼin müliaa na kepiakana mmapaʼa shiʼyalajinnapa tü konneetakat natuma na apünüinshiikana aapiee, alüʼütsü maʼin süpüla shiʼyalajinnüin».
Noota
^ Apünüinsü shiʼipa tü mmakalü atumawaa, saʼajünaka wanee shiʼipa.
^ Apünüinsü shiʼipa tü wunuʼuliakalü atumawaa, saʼajünaka wanee shiʼipa.
^ Apünüinsü shiʼipa tü palaakalü atumawaa, ishajaaka wanee shiʼipa.
^ Apünüinsü shiʼipa atumawaa tü seʼekat palaa, outaka wanee shiʼipa.
^ Apünüinsü shiʼipapaʼa atumawaa tü anuwakalüirua, sujuichijaaka wanee shiʼipapaʼa.
^ Apünüinsü shiʼipa atumawaa tü süchikalüirua, sujutuuka wanee shüliwala shiroku wanee shiʼipa.
^ Apünüinsü shiʼipa atumawaa tü wüinkat, ishijaaka wanee shiʼipa.
^ Apünüinsü niʼipapaʼa atumawaa chi kaʼikai jee tü kashikat, shikuuka wanee neʼipa.
^ Apünüinsü shiʼipa atumawaa tü shüliwalakat, shikuuka wanee shiʼipa.
