Karaloʼuta namüinjatka na chajanakana Galacia 2:1-21
2 Sülatapa poloo pienchimüin juya aleʼejüshi taya Jerusalénmüin nümaa Bernabé otta nümaa Tito.
2 Oʼunushi taya Jerusalénmüin sünainjee tü kasa nüküjakat tamüin Jesucristo jee taküjaka namüin na wawalayuukana süchiki tü pütchi anakat maʼin, tü taküjakat namüin na wayuu nnojoliikana judíoin. Nayapejeʼe neʼe taküjain amüin tia na wayuu kojutukana atumawaa, jama tatüjaweein saaʼu analejeʼeya tü taʼyataainkat nümüin Maleiwa. Nnojorüle anain shia, amülajaʼa neʼe tü kasa taaʼinrakat.
3 Jaʼitakajeʼe neʼe Tito, eerejeʼe chajachin nia tamaa nnojoishi napüleeruain aaʼin shiiʼiree nüchoteʼerajachin süta nükorolo mayaainjeʼe wayuuin griego nia.
4 Eepejeʼe waneinnua wayuu anoujayaashii mojukana anüiki. Ekerotushii naya naʼakamüin na anoujashiikana süpüla natüjaainjatüin saaʼu jamüin jutataka wakuwaʼipa nutuma Cristo Jesús otta shiiʼiree nataʼüleein wakuwaʼipa süpüla shiainjatüin woonooin amaa tü Pütchi Aapünakat nümüin Moisés.
5 Nnojoliireejaʼa waya oonooin sümaa tü namakat süpüla nnojoliinjanain juuʼulaain suulia tü pütchi ekirajünakalü anain jia wanaa sümaa süküjünüin jümüin tü pütchi anakat maʼin.
6 (Nnojotsü kasajatüin tamüin nakuwaʼipa na wayuu kojutukana sümüin wayuu, jama nnojoluin koʼuin nukuwaʼipa Maleiwa). Naya wayuu kojutukana maʼin atumawaa nnojotsü naküjain tamüin wanee kasa nnojotka taapüirüin achiki.
7 Aluʼu shiainjaʼa nayaawatüin aaʼu tajütünüin sünain aküjaa tü pütchi anakat maʼin namüin na wayuu nnojoliikana achoteʼerüin süta nakorolo maʼaka nüjütünüin Pedro sünain aküjaa pütchi namüin na wayuu achoteʼerakana süta nakorolo.
8 Chi aapakai nüpülain nümüin Pedro süpüla nuluwataaushinjachin namüin na wayuu achoteʼerakana süta nakorolo, niaʼaya neʼe chi aapakai tamüin nüpülain süpüla taluwataaushinjachin namüin na wayuu nnojoliikana judíoin.
9 Nayaawata aaʼu kamaneein maʼin chi Maleiwakai tamüin. Niasaʼa Santiago, Cefas otta müshia Juan, na nekiipüʼükana* na anoujashiikana, naapaka tü najapü nekiakat tamüin otta nümüin Bernabé, shiyaawase tia natuma waʼyanaajiraain namaa süpüla woʼunajanain namaʼanamüin na wayuu nnojoliikana judíoin otta süpüla noʼunajanain nayakana namaʼanamüin na wayuu achoteʼerakana süta nakorolo.
10 Shiaka neʼe nachuntuin wamüin kapülainjatüin waaʼin nakuwaʼipa na wawalayuu maʼletsekana, shiaʼaya maʼin taaʼinmaaka tia.
11 Nüntapa Cefas chamüin Antioquíamüin, taküjakalaka nümüin niʼipamüinreeya nnojoluin anain tü kasa naaʼinrakat.
12 Jamüshijaʼa paala nia, ekaapuʼushi namaa na wayuu nnojoliikana judíoin. Shiasaʼa nantapaapa waneinnua wayuu nümaʼanajeejana Santiago, ooʼulaashi suulia ekawaa namaa otta nükatalaaka noulia suulia mojushiijüin tia namüin na wayuu antapaakana, na achoteʼerakana süta nakorolo.
13 Nashatayaa namaka na wane judíokana tü kasa naaʼinrakat Cefas, jaʼitakajeʼe neʼe Bernabé nüshatüin tü kasa naaʼinrakat.
14 Tatüjaapa saaʼu nnojoluin pansaain nakuwaʼipa wanaapünaa sümaa tü pütchi shiimain ekirajünakat süchiki tü pütchi anakat maʼin, anuujeseʼe tanüiki nümüin Cefas noʼupala napüshuaʼa na wayuu yalajanakana: «Püshatüin nakuwaʼipapala na wayuu nnojoliikana judíoin, nayapejeʼe nnojoluin püshatüin akuwaʼipa na judíokana, eereje judíoin pia. ¿Jamakaʼa püpüleeruaka naaʼin na wayuu nnojoliikana judíoin süpüla nashatajatüin nakuwaʼipa na wayuu judíokana?».
15 Eweeniraashii waya suluʼu judíoin waya, nnojoishii kaainjaraliin waya maʼaka naaʼin na wayuu nnojoliikana judíoin,
16 watüjaapejeʼe saaʼu nnojoluin lotuin nukuwaʼipa wanee wayuu sünainjee neʼe naaʼinrüin tü sümakat tü Pütchi Aapünakat nümüin Moisés,* lotusü nukuwaʼipa sünainjee kanoulain nia nünain Jesucristo. Müshiijeseʼe wanoujain nünain Cristo Jesús süpüla lotuinjatüin wakuwaʼipa sünainjee wanoujain nünain Cristo, nnojotsü shiain sünainjee waaʼinrüin tü sümakat tü Pütchi Aapünakat nümüin Moisés. Nnojotsü shiain lotuin atuma nukuwaʼipa wanee wayuu naaʼinrüle tü sümakat tü Pütchi Aapünakat nümüin Moisés.
17 Wachajaalejeʼeya maʼin sukuwaʼipa shiiʼiree loteein wakuwaʼipa nünainjee Cristo sümaa ayatataain kaainjalain waya, ¿shiache sutuma nootuin waya Cristo sünain aaʼinraa kasa mojusü? Nnojotsü shiain sutuma tia.
18 Tatameʼerülejeʼeya süchikuaʼa tü kasa tojuttirakat paala, nnojoishijaʼamata taya oonooin sümaa tü Pütchi Aapünakat nümüin Moisés.
19 Müshijaʼaya outakai taaʼin sutuma taapaain sümaa tü Pütchi Aapünakat nümüin Moisés, müichipakalaka katakai toʼu nümüin Maleiwa.
20 Müshijaʼaya tachitünakai aaʼin sünain wanee wunuʼu wanaa nümaa Cristo soʼu nükachennüin süpüla outaa. Nnojolitchipaka tayain katüin oʼu, nia kataka oʼu Cristo süka paaʼinwaichipain nia tamaa. Katakalaka toʼu süka kanoulain taya nünain Nüchon chi Maleiwakai, chi aikai apüla taya otta chi aapajiraakai nikii taaʼu.
21 Nnojotsü tayoutuin achiki nümanee Maleiwa, shialejeʼeya lotuin anainjee nukuwaʼipa wanee wayuu tü Pütchi Aapünakat nümüin Moisés, amülashijaʼa neʼe outuin Cristo.
Noota
^ Jee nayale «na makana aka saaʼin süsaʼa miichi, jama nekiipüʼüin naya na anoujashiikana».
^ Pünaʼla tia suluʼu tü kanüliakat «Jamaluʼulu pütchikat».
