Karaloʼuta namüinjatka na Hebreokana 7:1-28
7 Melquisedec, chi aluwataashikai saaʼu tü mmakat Salem, sacerdoteshi nia nümüin chi Maleiwa Miyoʼushikai. Nüleʼejapa Abrahán süchikijee nuʼutuin naaʼin na aluwataashiikana, nüpanapaka nia Melquisedec, nuchuntakalaka nümüin Maleiwa anainjatüin nukuwaʼipa Abrahán.
2 Naapakalaka* Abrahán nümüin Melquisedec süpüshi tü kasa eejatkat nümaʼana. «Chi aluwataashi lotokai akuwaʼipa», maluʼulu tü nünüliakat Melquisedec jee aluwataashiaʼaya nia saaʼu tü mmakat Salem, «chi aluwataashi eekai atuma jimataa aaʼin», maluʼulu tia.
3 Mashisai nia, meisai nia, matuushisai jee matüjaaju aaʼu joujachin joʼuuin nia jee joujachin outuin nia. Ayatüshiaʼaya sacerdotein nia süpüla kaʼikat süpüshuaʼa süka müin nukuwaʼipa maʼaka nukuwaʼipa Nüchon chi Maleiwakai.
4 Jülüjataa jaaʼin kojutuin maʼin atumawaa Melquisedec. Abrahán chi laülaashikai saaʼu nüpüshi, naapüin* nümüin Melquisedec tü saʼanasiakat tü kasa nükanajakat sünain atkawaa.
5 Shiimainña tü aküjünakat sünain tü Pütchi Aapünakat nümüin Moisés, saashin tia pütchikat na nüchonnii Leví aneekünakana süpüla sacerdoteinjanain, nachekajüinjatü namüin na israelitakana tü kasa aapünajatkat namüin,* nawalayuu naya makana, jama nüikeyuuin naya Abrahán.
6 Mayaainjeʼe nnojoliin napüshin chi wayuukai na nüchonniikana Leví, nüsülajüin Abrahán nümüin süpüshi tü kasa eejatkat nümaʼana jee nuchuntakalaka nümüin Maleiwa anainjatüin nukuwaʼipa Abrahán, chi wayuu apansaajünakai amüin tü pütchikat.
7 Chi wayuu achuntakai nümüin Maleiwa miyoʼu nuulia chi nuchuntakai apüleerua. Nnojotkalaka süpüla suʼtchejaanüin amaa tia pütchikat.
8 Na nüchonniikana Leví aapünüsü namüin tü kasa namüinjatkat, outapejeʼe naya. Eekajasaʼa chi wane wayuu aapünakai amüin tü kasa nümüinjatkat, katüsü noʼu saashin tü Karaloʼuta Nüchikimaajatkat Maleiwa.
9 Jamüshijaʼa Leví chi aapünakai amüin wanee kasa, müshi naapakaijaʼa saaʼin tü kasa eejatkat nümaʼana nümüin Melquisedec nükajee Abrahán,
10 jama nnojolin joʼuuin Leví soʼu tü kaʼi nüpanapünakalü oʼu Abrahán nutuma Melquisedec.
11 Saashin tü Pütchi Aapünakat nümüin Moisés, sacerdoteinjana na nüchonniikana Leví. Maainjalalejeʼeya wayuu sutuma sacerdotein na nüchonniikana Leví, ¿choʼujaashichejeʼeya wanee wayuu sacerdoteinjachika maʼaka nukuwaʼipa Melquisedec? ¿Nnojotsüche keraain niale neʼe sacerdotein Aarón?
12 Suʼwanajaalejeʼeya sukuwaʼipa sacerdoteinjanain na nüchonniikana Leví, aʼwanajaainjatüjaʼamata tü Pütchi Aapünakat nümüin Moisés.
13 Chi wayuu aküjünakai achiki tia, naata nüpüshi. Nnojoishi eeichin wanee wayuu saʼakajee nüpüshi chia wayuukai eekai aʼyataain sünain oʼutaa saaʼin mürüt süpüla nüsülajüinjatüin shia nümüin Maleiwa.
14 Shiimain maʼin nülüin Judá chi Waseñotsekai jee nnojotsü nüküjain Moisés eeinjanain sacerdote eekai nüikeyuuin Judá.
15 Atüjaanaleʼeya aaʼu tia niiʼiyalaapa wanee sacerdote makai akuwaʼipa maʼaka nukuwaʼipa Melquisedec.
16 Sacerdoteshi nia, nnojoipejeʼe nia sacerdotein sünainjee sacerdotein na nüpüshikana maʼaka süküjain shia tü Pütchi Aapünakat nümüin Moisés. Sacerdoteshi nia süka pülain nia, jama matüjain nia outaa.
17 Eesü wanee pütchi aküjünaka nüchiki makat mayaa: «Sacerdoteshi pia süpüla kaʼikat süpüshuaʼa maʼaka nukuwaʼipa Melquisedec».
18 Aʼwüinjaaitpa tia pütchi aluwataanakalü anain, eesü tü kasa nnojotkat wountuin sutuma jee nnojotsü kasain saamüin wamüin.
19 Nnojotsü maainjalain wayuu sutuma tü Pütchi Aapünakat nümüin Moisés, maainjalaitpapejeʼe shia sünainjee tü kasa naʼatapajakat, warütkaainnaka nünainmüin Maleiwa suluʼujee tia.
20 Nüpansaajüin Maleiwa nünüiki wanaa sümaa nüneeküin Jesús süpüla sacerdoteinjachin nia.
21 Eeshii wayuu sacerdotekana mayaainjeʼe nnojoluin süpansaajünüin wanee pütchi namüin, sacerdotepejeʼe Jesús soʼu nüpansaajüin Maleiwa nünüiki nümüin sünain maa: «Tayakai Jehová* tapansaajüitpa tanüiki jee nnojoleerü teeʼiratüin shia, sacerdoteshi pia süpüla kaʼikat süpüshuaʼa».
22 Aapünüshi Jesús nutuma Maleiwa süpüla nüpansaajüinjatüin wanee pütchi jeketü, anaʼleejeetka suulia tü sümaiwajatkat.
23 Na sacerdotekana nnojoishii sacerdotein naya waneepia, jama outawalin naya, müshiijeseʼe keeʼirakawalin naya.
24 Saaʼujee katüin noʼu Jesús süpüla kaʼikat süpüshuaʼa, nnojoishi eein wanee sacerdote niiʼirakainjachikai.
25 Keraashi nia süpüla nuʼtteʼerajanain na wayuu arütkaakana nünainmüin Maleiwa nükajee niakai, matüjainsai nia outaa eekalaka süpüla nusoutuin naaʼu naya wayuukana.
26 Choʼujaashi wamüin wanee wayuu laülaashikai napüleerua na sacerdotekana, eekai müin akuwaʼipa maʼaka nukuwaʼipa Jesús. Aʼyataashi nia nümüin Maleiwa, maainjalasai, wulesü nukuwaʼipa, nnojoishi nia naʼakain na wayuu kaainjaraliikana jee alanaʼaleeshia nia suulia tü sirumatuʼukat.
27 Nnojotsü müin nukuwaʼipa maʼaka nakuwaʼipa na laülaashiikana napüleerua na sacerdotekana, nnojotsü choʼujaain nuʼutuinjatüin saaʼin mürüt weinshi nümüin Maleiwa jee nüsülajüinjatüin shia nümüin saaʼu naainjala jee naainjala na wayuukana. Aapajiraashi nia nikii uwatua, nükaalinjaka wayuu sükajee tia süpüla kaʼikat süpüshuaʼa.
28 Kaainjalashii na wayuu aneekünakana süpüla laülaashiinjanain naya napüleerua na sacerdotekana wanaapünaa sümaa tü aküjünakat suluʼu tü Pütchi Aapünakat nümüin Moisés. Eekajasaʼa saashin tü pütchi apansaajünakat süchikijee tü Pütchi Aapünakat nümüin Moisés, niainjachi laülaashikai napüleerua na sacerdotekana chi Nüchonkai Maleiwa, niaʼaya keraaka süpüla aaʼinraa tia süpüla kaʼikat süpüshuaʼa.
Noota
^ Saashin tü Pütchi Aapünakat nümüin Moisés nükotchojüle wanee wayuu poloosü kanaasüta süchon nüpünajüin, nüsülajüinjatü waneesia nümüin Maleiwa.
^ Saashin tü Pütchi Aapünakat nümüin Moisés nükotchojüle wanee wayuu poloosü kanaasüta süchon nüpünajüin, nüsülajüinjatü waneesia nümüin Maleiwa.
^ Saashin tü Pütchi Aapünakat nümüin Moisés nükotchojüle wanee wayuu poloosü kanaasüta süchon nüpünajüin, nüsülajüinjatü waneesia nümüin Maleiwa.
^ Pünaʼla tia suluʼu tü kanüliakat «Sooʼomüin pütchi A5».
