Tü nüshajalakat Juan 3:1-36
3 Eejachikalaka wanee wayuu naʼaka na fariseokana kanüliashi Nicodemo, aluwataashi nia naaʼu na judíokana.
2 Nuʼunakalaka saʼwai sünain anaʼlawaa nümüin Jesús jee nümakalaka nümüin: «Ekirajüikalee, watüjaa aaʼuchi nüjünalain pia chi Maleiwakai süpüla pikirajüinjatüin wayuu. Nnojoishi eein wanee wayuu eekai süpüla naaʼinrüin tü kasa pülasü paaʼinrakat nnojoirejeʼe Maleiwa nümaa».
3 Nusoutakalaka Jesús nümüin: «Shiimain tanüiki pümüin, nnojoire joʼuuin nüchikuaʼa wanee wayuu, nnojoleerü niʼrüin tü kasa anasü eejeetkat nuluwataapeena Maleiwa».
4 Nümakalaka Nicodemo nümüin: «¿Jeʼratuaichi joʼuuin nüchikuaʼa wanee wayuu laülaaichire nia? ¿Aashin isain nüchiki ekeroloo suluʼumüin süchoʼunla nii süpüla joʼuuinjachin nia nüchikuaʼa?».
5 Nusoutakalaka Jesús nümüin: «Shiimain tanüiki pümüin, nnojoleerü niʼrüin wanee wayuu tü kasa anasü eejeetkat nuluwataapeena Maleiwa nnojoire nimetinnüin shiroku wüin jee nnojorüle saapünüin nümüin tü nüpülainkat Maleiwa, shiasaʼa suluʼujee tia meechi joʼuukai naaʼin nüchikuaʼa.
6 Na eekana joʼuuin suluʼu wayuuin naya, yaajeʼewalii saaʼu tü mmakat. Nayasaʼa na aneekünakana sükajee tü nüpülainkat Maleiwa, chejeʼewalii iipünaajee.
7 Nnojo ponuin paaʼin tü tamakat pümüin süchiki ‹joʼuuinjanain jia jüchikuaʼa›.
8 Awawatsü tü joutaikat eepünaale neʼe suwawaleein, mayaainjeʼe paapüin sujuula nnojotsü pütüjaain saaʼu jalejeekualüin shia otta jalamüinjatüin shia. Müsia neʼe nukuwaʼipa wanee wayuu eekai nüneekuushin sükajee tü nüpülainkat Maleiwa».
9 Nümakalaka Nicodemo nümüin: «¿Jamüsü süpüla müinjatüin sukuwaʼipa tia?».
10 Nusoutakalaka Jesús nümüin: «¿Jamüsü nnojotka pütüjaain saaʼu tia eerejeʼe wayuuin ekirajüi pia yaa Israel?
11 Shiimain tanüiki pümüin, shia waashajaaka achiki tü kasa watüjaakalü aaʼu otta shia waküjaka achiki tü kasa weʼrakat. Jiyoutapejeʼe süchiki tü kasa waküjakalü achiki jümüin.
12 Nnojotsü junoujain tanüiki eerejeʼe taküjain jümüin süchiki tü kasa eekat yaa saaʼu tü mmakat, shieemataka junoujain tanüiki taküjale jümüin süchiki tü kasa chakat iipünaa.
13 Nnojoishi eeichin wanee wayuu oʼunakai chaa iipünaamüin, niaʼala neʼe ountaka tia chi Süchonkai Wayuu süka niain ashakatüin iipünaajee.
14 Maʼaka nükacherüin Moisés tü wüikat chaa isashiipaʼa, akaweechia neʼe chi Süchonkai Wayuu, akachenneechi nia.
15 Kateetkalaka noʼu waneepia wanee wayuu eekai nunoujain nünain.
16 »Aisü maʼin wayuu nüpüla Maleiwa, naapüinjeseʼe nikii chi waneeshikai Nüchon süpüla nnojoliinjanain amüloulin na wayuu anoujakana nünain. Neʼreenaka suluʼujee tia kataa oʼuu süpüla kaʼikat süpüshuaʼa.
17 Nnojoishi nüjütüin Maleiwa chi Nüchonkai saʼakamüin wayuu süpüla süsalainjatüin shia saainjala nutuma. Nüjütüin nia süpüla suʼttaainjatüin wayuu nünainjee.
18 Chi wayuu anoujakai tanain nnojoleerü kasalajanain naainjala nümüin. Eekajasaʼa chi wayuu nnojoikai anoujain tanain, kasalajanaitpa naainjala nümüin süka nnojoluin nunoujain nünain chi waneeshikai Nüchoin* Maleiwa.
19 Anuu tü kasalajanainjatkalü anainjee saainjala wayuu sümüin: antüsü tü luusakat saʼakamüin wayuu, nayouta achikit na wayuukana tü luusakat, shia kamalainka namüin tü piʼyuushikat süka mojuin tü kasa naainjakat.
20 Chi wayuu aaʼinrakai kasa mojusü nnojotsü nücheküin achiki tü luusakat otta nnojoishi nia arütkaain sünainmüin süpüla nnojoluin sütüjaanüin aaʼu tü kasa mojusü naaʼinrakat.
21 Eekajasaʼa chi wayuu aaʼinrakai kasa anasü, arütkaashi nia sünainmüin tü luusakat süpüla sütüjaanajatüin aaʼu shiain naaʼinrüin tü kasa nuluwataakalü anain Maleiwa».
22 Süchikijee tia, nuʼunakalaka Jesús namaa na nikirajüinkana suluʼumüin tü pueulo joʼuuchein eejatkat chaa Judea. Eesü nükalia chayaa namaa na nikirajüinkana otta woutiisasü wayuu nutuma.
23 Woutiisasiaʼaya wayuu nutuma Juan chaa Enón, süʼütpaʼa tü mma kanüliakat Salim. Miyoʼu maʼin wüin suluʼu tia mmakat otta antawaisü wayuu nünainmüin Juan süpüla woutiisainjatüin shia nutuma.
24 Nnojoishi püreesain Juan wanaa sümaa tia.
25 Naʼülüjiraaka na nikirajüinkana Juan nümaa wanee judío sooʼopünaa tü naaʼinrajatkat na judíokana süpüla wuleinjatüin nakuwaʼipa.
26 Noʼunakalaka eemüin Juan jee namakalaka nümüin: «Ekirajüikalee, chi wayuu chajachikai pümaa wane saʼata tü süchikat Jordán, chi püküjakai achiki paala, woutiisasü wayuu nutuma otta akoʼulayaa müsü wayuu nümaa».
27 Nusoutaka Juan namüin: «Nnojotsü süpüla eein wanee kasa nümaʼana wanee wayuu nnojorüle saapuushin nümüin nutuma Maleiwa.
28 ¿Aashin eejanain jia wanaa sümaa tamüin: ‹Nnojoishi tayain chi kanüliakai Cristo, ajütüüshi neʼe taya nüpüleerua›?
29 Kasaalüinjachipa wanee wayuu, kasaatshi sümaa tü nümüraajüinkat. Niasaʼa naʼaleewain chi kasaalüinjachikai, yalashi nümaa jee talatüsü maʼin naaʼin naapapa nünüiki chi naʼaleewainkai. Müshijeseʼe talatüin maʼin taya.
30 Akooʼomüinraainjatü niʼyataain Cristo, apaliʼirajüinjatpejeʼe tü taʼyataainkat».
31 Chi chejeʼewaikai iipünaajee alanaʼaleesia maʼin nukuwaʼipa suulia wayuu. Chi wayuu yaakai saaʼu tü mmakat isasü nüchiki nüküjain süchiki tü kasa eekat chaa iipünaa, jama yaajeʼewalin nia saaʼu tü mmakat.
32 Chi chejeʼewaikai iipünaajee nüküjain tü kasa niʼrakat jee tü kasa naapakalü achiki, shiyoutapejeʼe achiki wayuu tü nümakat.
33 Eekajasaʼa chi wayuu aapaakai sümaa nünüiki, nüküjain shiimain tü nümakat Maleiwa.
34 Chi nüjünalakai Maleiwa shia nüküjaka nünüiki Maleiwa süka nnojoluin naʼalijirüin Maleiwa suulia wayuu tü nüpülainkat.
35 Chi Washi iipünaajachikai aishi chi Nüchonkai nüpüla, niʼitaainjeseʼe najapuluʼu kasa süpüshuaʼa.
36 Chi wayuu anoujakai nünain Nüchon chi Maleiwakai, kateerü noʼu waneepia. Eekajasaʼa chi wayuu nnojoikai oonooin sümaa nünüiki Nüchon Maleiwa, jashicheechi Maleiwa nümüin jee nnojoleerü katüin noʼu.
Noota
^ «Nünülialuʼu Nüchon» maluʼulu tia suluʼu griego.
