Tü nüshajalakat Lucas 18:1-43
-
Süchiki wanee wayuu outa aʼwayuuset pejeewaka akua (1-8)
-
Wanee fariseo jee müshia wanee achekajüi nneerü neʼipajee na sülaülakana mma (9-14)
-
Jesús otta müshiʼiya na tepichikana (15-17)
-
Tü asakinnakalü anain Jesús nutuma wanee wayuu aluwataashi (18-30)
-
Nüküjain Jesús süchikuaʼa nuʼutunajachin aaʼin (31-34)
-
Koʼupaʼashi nutuma Jesús wanee wayuu ojulijüi (35-43)
18 Kayaawaseka nutuma Jesús tü nikirajakalü anain süpüla nayaawatüin saaʼu na nikirajüinkana choʼujaain noʼuraajüin waneepia otta nnojoliinjanain nojoʼlooin suulia.
2 Nümakalaka namüin: «Eejaittaa wanee laülaashi suluʼu wanee pueulo, nnojoishi nia oonooin sümaa nünüiki Maleiwa otta mojutusat wayuu nümüin.
3 Eejatia suluʼu tia pueulokot wanee wayuu outa aʼwayuuset, pejeewaka akua nümaʼanamüin chi laülaashikai jee maʼwaisü shia nümüin: ‹Anasü sunoutunule akuwaʼipa tü mojujiraakalü aaʼujee taya nümaa chi teʼipolokoi›.
4 Nnojotsiaajeʼe nümüliajeein tia wayuukat paala, mapajeʼe nünüiki nüleʼeruʼu: ‹Mayaainjeʼe nnojolin toonooin sümaa nünüiki Maleiwa jee mojutuin wayuu tamüin,
5 anainjaʼa tanoutule sukuwaʼipa tü kasa alatakat sümüin tü wayuu outa aʼwayuusetkat suulia pejeewakuʼu müin sukua tamaʼanamüin sünain shikeʼejakuʼu sümüin taaʼin›».
6 Ayatakalaka naashajaain chi Señotkai sünain maa: «Jülüjataa jaaʼin tü nümakat chi laülaashikai mayaainjeʼe nnojoluin lotuin nukuwaʼipa.
7 Nialeekajaʼa joo Maleiwa, ¿aashin nunouteerüin sukuwaʼipa tü kasa alatakat namüin na wayuu nüneekajalakana, na achuntakana kaalinwaa nümüin soʼukai jee saʼwai? Nnojoishi nia akulajaain aaʼin namaa.
8 Shiimain tanüiki jümüin, nunoutamaateerü akuwaʼipa tü alatakat namüin. ¿Kanouleetchejeʼeya maʼin wayuu yaa mmapaʼa nüntapeena chi Süchonkai Wayuu?».
9 Kayaawaseka nutuma Jesús tü nikirajakalü anain nayaaluʼu na wayuu lotokana akuwaʼipa saaʼin namüin jee mojutukana amüin na waneinnua. Müshi nia namüin:
10 «Eetaalashii piamashii wayuu oʼunakana suluʼumüin tü aʼwaajüleekat Maleiwa sünain oʼuraajaa, fariseo wanee jee müshia chi wane achekajüi nneerü neʼipajee na sülaülakana mma.
11 Nüshaʼwalaakalaka chi fariseokai jee nuʼuraajakalaka suluʼu naaʼin sünain maa: ‹Maleiwakalee, taapüin analuʼutkat pümüin süka nnojoluin müin takuwaʼipa maʼaka naaʼin na waneinnua. Nemeejüin wayuu saaʼu sünneetse, nnojotsü lotuin nakuwaʼipa, kawalaʼatasü naʼwayuuse* natuma jee nnojoishi müin taya maʼaka naaʼin chira achekajüikai nneerü neʼipajee na sülaülakana mma.
12 Aamajawaishi taya piantua süpüla semaanakat otta asülajawaishi* taya süpüshi tü kasa tamaʼanakat›.
13 Shaʼwataka mamüin aka tüsa chi achekajüikai nneerü neʼipajee na sülaülakana mma. Nnojoishi nia eirakaayaain iipünaamüin, shiajaʼa neʼe nüsheʼejüin nuʼluuwain sünain maa: ‹Maleiwakalee, pümüliajaʼaya taya, kapüleein joo wayuuin kaainjarai taya›.
14 Tamüshii paala jia, aleʼejüshi chia wayuukai nipialuʼumüin sümaa anaʼleein maʼin nukuwaʼipa noʼuluʼu Maleiwa nuulia chi fariseokai, süka jamüin, chi wayuu yaletakai aaʼin nieechi eʼraka japülii, eekajasaʼa chi nnojoikai yaletüin aaʼin nieechi kojutuka atumawaa».
15 Nayasaʼa na wayuukana nantitka na tepichikana nümaʼanamüin Jesús süpüla anainjatüin nakuwaʼipa nutuma. Nachiaapejeʼe na nikirajüinkana Jesús na wayuu kachooinkana naya tepichikana.
16 Neenajitkalaka Jesús na tepichikana jee nümakalaka: «Juuʼulaa narütkaai tanainmüin nala tepichikana, ¿jamajanakai naya jümüin? Na wayuu makana akuwaʼipa maʼaka nakuwaʼipa nala tepichikana, neʼreerü tü kasa anasü eejeetkat nuluwataapeena Maleiwa.
17 Shiimain tanüiki jümüin, chi mojutukai amüin nuluwataainjachin Maleiwa sümaa nnojoluin müin nukuwaʼipa maʼaka nukuwaʼipa wanee jintüi, nnojoleerü niʼrüin tü kasa anasü eejeetkat nuluwataapeena Maleiwa».
18 Nümakalaka nümüin Jesús wanee wayuu aluwataashi naaʼu na judíokana: «Anamia maʼin pia ekirajüikalee, ¿kasa taaʼinrajatka süpüla katüinjatüin toʼu süpüla kaʼikat süpüshuaʼa?».
19 Nusoutaka Jesús nümüin: «¿Jamüshi tayakaʼa anamiain paajüin? Niaʼala neʼe Maleiwa anamiakai nümüiwaʼa.
20 Pütüjaa aaʼulu tü pütchi nuluwataakalü anain Maleiwa, nnojo kawalaʼatain putuma puʼwayuuse, nnojo puʼutuin saaʼin wayuu, nnojo puʼluwajüin, nnojo püküjain alawaa, kojutu pümüin püshi sümaa pii».
21 Anuujeseʼe nünüiki chi wayuukai nümüin: «Kakaliairü taainjain tia, soʼujeʼereeya jintülin taya».
22 Naapapa Jesús nünüiki chi wayuukai nümakalaka nümüin: «Choʼujaʼalaa neʼe wanee kasa paaʼinrajatka, puika süpüshuaʼa tü kasa pümaʼanakat, paapeetkalaka tü nneetkat namüin na wayuu maʼletsesaliikana, meechika pünaajaakai aaʼin kasa kojutusü chaa iipünaa, püleʼejeechika püchikuaʼa süpüla tamaatalain pia».
23 Naapaiwaʼaya tia chi wayuukai, mojusü maʼin naaʼin, jama washirüin maʼin nia.
24 Niirakaakalaka Jesús nümüin chi wayuukai jee nümakalaka: «Kapüleejeerü maʼin namüin na wayuu wainmakana amaʼana nneerü neʼrüin tü kasa anasü eejeetkat nuluwataapeena Maleiwa.
25 Mapüleejeerü sümüin wanee kameeya sülatüin suluʼupünaa soʼu wanee wutia suulialeʼeya eein wanee wayuu washirü nuluwataapeena Maleiwa».
26 «¿Jaraikaʼa oʼtteʼenneechin?», namaka na wayuu aapajakana nünüiki.
27 Nusoutakalaka Jesús namüin: «Tü kasa isakat süchiki wayuu, nnojotsü isain nüchiki Maleiwa».
28 Anuujeseʼe nünüiki Pedro nümüin: «Wapütüin süpüshuaʼa tü kasa eejatkat wamaʼana süpüla pümaatalain waya».
29 Nusoutaka Jesús nümüin: «Chi eekai nüpütüin nipia, nuʼwayuuse, nuwalayuu, nüshi, nii jee nayale nüchooin süpüleerua naaʼinmaain niʼyataain nümüin Maleiwa, chi aluwataainjachikai saaʼu tü mmakat,
30 alanaʼaleejeeria maʼin tü kasa aapüneetkat nümüin maaʼulu otta kateerü noʼu mapeena süpüla kaʼikat süpüshuaʼa».
31 Nuunejaaka Jesús namüiwaʼa na Polookana Piamamüin aluwataaushi jee nümaka namüin: «Anaasaʼa joo waya oʼunuin Jerusalénmüin, ekeraajeeria süpüshuaʼa tü nashajakat na nünüikimaajanakana Maleiwa paala süchiki tü alatajatkat nümüin chi Süchonkai Wayuu.
32 Jamüshijaʼa nia, aapüneechi sajapuluʼu wayuu nnojotka judíoin, shimeeʼerainpaleechi nia, airuʼuleerü sünüiki nümüin otta sejeteechi aaʼu nia.
33 Süchikijee shiʼyaajüin nia, suʼuteechi aaʼin, asoʼiraajeetpejeʼe naaʼin soʼu tü apünüinkat kaʼi».
34 Nnojotpejeʼe nayaawatüin saaʼu tü nüküjakat namüin süka müin suunjunnakai aaʼin noulia tia pütchikat süpüla nnojoluin nayaawatüin saaʼu.
35 Shiasaʼa nülüʼülaapa Jesús sünain tü pueulokot Jericó, yalajachikalaka wanee wayuu moʼupaʼasai joyotuin sotpaʼa tü wopukot, ojulijashi chia wayuukai.
36 Nüsakitkalaka süchiki kasain alatüin sutuma naapüin shiyorolo watta saalii wayuu alataka suluʼupünaa tia wopukot.
37 Susoutaka wayuu nümüin: «Nia alataka Jesús chi chejeʼewaikai Nazaret».
38 Naapaiwaʼaya tia, nuʼwaataka sünain maa: «Jesúwaa, Nüchonkai David,* pümüliajaʼaya taya».
39 Nüchiaanaka chi wayuukai natuma na oʼunakana napüleerua na wayuu wattakana naalii. Emetutpejeʼe maʼin nikiisa sünain maa: «Pümüliajaʼaya taya piakai Nüchonkai David».
40 Nüshaʼwalaaka Jesús jee nüsaajitkalaka chi wayuukai. Nürütkaapa chi wayuukai, nümakalaka Jesús nümüin:
41 «¿Kasa püchekaka taaʼinrüin püpüleerua?». Nusoutakalaka chi moʼupaʼasaikai nümüin Jesús: «Señotkalee, anashi koʼule taya putuma».
42 Anuujeseʼe nünüiki Jesús nümüin: «Anakajaʼa koʼule pia süka kanoulain pia».
43 Koʼukalaka nüchikuaʼa chia wayuukai jee nuʼunaka nüchiirua Jesús sümaa nuʼwaajüin Maleiwa, neʼrapa tia na wayuukana naʼwaajaka Maleiwa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Saashin tü Pütchi Aapünakat nümüin Moisés, nükotchojüle wanee wayuu poloosü kanaasüta süchon nüpünajüin, nüsülajüinjatü waneesia nümüin Maleiwa.
^ Pünaʼla tia suluʼu tü kanüliakat «Jamaluʼulu pütchikat».
