Tü nüshajalakat Marcos 4:1-41
-
KAYAAWASESÜ NUTUMA JESÚS NULUWATAAINJACHIN MALEIWA (1-34)
-
Nüchiki wanee wayuu apünajüi (1-9)
-
Kayaawasesü nutuma Jesús tü nikirajakalü anain (10-12)
-
Nüküjain Jesús jamaluʼuluin tü nikirajakalü nüchiki chi apünajüikai (13-20)
-
Shipejaanüle wanee ranpara, nnojotsü aʼwachinnüin wanee kasa saaʼu (21-23)
-
Tü kasa jaapakat sümüin wayuu, shieerü aapünaka jümüinña (24, 25)
-
Wanee apünajüi atunkakai (26-29)
-
Tü süʼükat «mostaza» (30-32)
-
Kayaawasesü nutuma Jesús tü nikirajakalü anain (33, 34)
-
-
Niimaleʼerüin Jesús wanee wawai (35-41)
4 Ekirajüshi Jesús nüchikuaʼa sotpaʼa tü palaakat. Sutuma pasanain nia sünain watta saalii wayuu, oʼotooshi nia suluʼu wanee anuwa jee nüikalaaka suluʼu. Nuʼuniraka tü anuwakat mamüin aka tüsa, makatapejeʼe na wayuukana yala sotpaʼa tü palaakat.
2 Nikirajaka naya sünain wainma kasa sümaa kayaawasein shia nutuma. Anuukalaka nünüiki namüin:
3 «Jülüjataa jaaʼin tüü: Eejaittaa wanee wayuu apünajüshi.
4 Shiʼipaʼaya nüpünajüin, ejituusü süpüshi tü waüyeekat sotpaʼa tü wopukot, shikaka shia wüchii.
5 Eesü tü ejituukat saaʼu tü ipa arülakalü aaʼu mma, susonuwaayaa sümaka süka arülain mma saaʼu tü ipakat.
6 Niweetapa chi kaʼikai ojulujaasü tü pünajütkat süka nnojoluin oʼutuin tü suuralakat.
7 Eesü tü ejituukat saʼaka mojuui keipüsesü, sujulujaaka miyoʼupa tü mojuui keipüsesükat, machonkalaka shia.
8 Eepejeʼe tü ejituukat saaʼu mma anasü. Eesü tü pünajüt apünüinkat shikii süchon, eesü tü aipiruakat shikii süchon otta eesü tü polookat shikii süchon».
9 Anuuka nünüiki Jesús: «Eekai kacheʼejüin sümüin tü pütchikat naapaainjatü amaa».
10 Shiasaʼa nümüiwaʼapa Jesús namaa na Polookana Piamamüin aluwataaushi otta waneinnua wayuu, nasakirüin nia jamaluʼuluin shiyaawase tü nikirajakalü anain.
11 Anuukalaka nünüiki Jesús namüin: «Jia ayaawataka saaʼu tü kasa nütüjaakalü aaʼu Maleiwa, jama niainjachin aluwataain. Eekajasaʼa na wayuukana, choʼujaasü kayaawaseinjatüin tü pütchikat namüin.
12 Koʼushii naya, nnojotpejeʼe kasain neʼrüin, kacheʼeshii naya, nnojotpejeʼe kasain naapüin otta nnojotsü kasain nayaawatüin aaʼu. Nnojoleena aleʼejüin nünainmüin Maleiwa jee nnojoleerü alatinnüin naainjala noulia».
13 Anuuka sooʼomüin nünüiki namüin: «Nnojorüle jiyaawatüin saaʼu shiyaawase tü tekirajakalü anain, ¿jamüsü süpüla jiyaawatüinjatüin saaʼu tü süpüshikat?
14 »Chi apünajüikai müshi aka naaʼin chi wayuu aküjakai pütchi* nüchiki Maleiwa.
15 Eetaasü tü waüyee ejituukat sotpaʼa wopu, tia naya na wayuu aapaakana sümaa tü nünüikikat Maleiwa, nüsütamaatapejeʼe Satanás tü pütchikat suluʼujee naaʼin naya wayuukana.
16 Eetaasü tü waüyee ejituukat saaʼu tü ipalirakat, tia naya na wayuu aapakana tü pütchikat sümaa talatüin maʼin naaʼin.
17 Nnojotpejeʼe shia ichein suluʼu naaʼin, motsomüin neʼe nanoujain. Sülatapa namüin kasa mojusü jee napüleeruaanapa aaʼin saaʼujee nanoujain, ooʼulaashii naya suulia anoujaa.
18 Eetaasü tü waüyee ejituukat saʼaka mojuui keipüsesü, tia naya na wayuu aapakana tü pütchikat,
19 nnojotpejeʼe sütanalüin naaʼin süka shapaakuʼu sümüin naaʼin saaʼu tü kasa eekat maaʼulu* otta sümalajaaka nanoula sutuma washireein naya. Müshii naya aka saaʼin wanee wunuʼu eekai machooin.
20 Tü waüyee ejituukat saaʼu tü mma anasükat müsü aka naaʼin na wayuu aapaakana sümaa tü pütchikat jee talatüsü maʼin naaʼin sümaa. Müshii naya maʼaka saaʼin wanee pünajüt eekai kachooin. Eesü tü pünajüt apünüinkat shikii süchon, eesü tü aipiruakat shikii süchon otta eesü tü polookat shikii süchon».
21 Anuukalaka sooʼomüin nünüiki: «Shipejaanüle wanee ranpara nnojotsü aʼwachinnüin wanee kasa saaʼu jee nnojotsü eʼitaanüin suupünaa tü atunkuleekat, ¿aashi müin? ¿Aashin shiʼitaanüin saaʼu tü süpülajanakat?
22 Suunjunnüle wanee kasa antüneerü anain, akaataajaʼa suunjulajünüle achiki wanee kasa atüjaana aaʼu mapa sutuma wayuu.
23 Eekai kacheʼejüin sümüin tü pütchikat naapaainjatü amaa».
24 Ayatüshi aashajaain Jesús namaa sünain maa namüin: «Jülüja jaaʼin tü pütchi jaapajakat. Wainmale tü kasa jaapakat sümüin wayuu, wainmeerü tü kasa aapüneetkat jümüinña, alanaʼleejeeria maʼin.
25 Chi wayuu eekai amaʼana wanee kasa aapüneerü sooʼomüin nümüin, wainmaleejeetka kasa nümaʼana. Eekajasaʼa chi nnojoikai eein amaʼana wanee kasa asütüneerü nuulia tü eekai nümaʼanain».
26 Anuukalaka sooʼomüin nünüiki Jesús: «Aluwataajeechi Maleiwa saaʼu mmakat. Tia müsü aka naaʼin wanee wayuu apünajakai waüyee.
27 Atunkushi chi wayuukai saʼwai jee atamaashi waneemüin kaʼi. Yalataapajasaʼa tü nüpünajüinkat asotuin jee emiyoʼulaasü shia nujuuna.
28 Asotusü tü pünajütkat süka saaʼin sümüiwaʼa süleʼeruʼujee tü mmakat. Palajana asotusü tü shiʼichikat, mapa kasiisü, kachonkalaka shia.
29 Keraapa shia süpüla süshannüin, ashottünüsü, jama keraaitpain sükalia».
30 Anuu sooʼomüin nünüiki Jesús: «Aluwataajeechi Maleiwa saaʼu mmakat, ¿kasache makat aka saaʼin tia? ¿Kasache shiyaawaseyaajeetka paala tatuma?
31 Tia müsü aka saaʼin süʼü ‹mostaza›, nnojotsü eein wanee eekai müin aka saaʼin, joʼuucheʼechon maʼin shia süpünajünaiwaʼaya.
32 Miyoʼupejeʼe maʼin tü suuʼuliakat süpünajünapa suulialeʼeya tü wunuʼulia suluʼukat tü yüüjakat. Miyoʼuyuu maʼin tü sütünakat, sukumajüinjeseʼe shipia wüchii saaʼu sütüna tia wunuʼukat suulia kaʼipalain shia».
33 Kayaawasewaisü nutuma Jesús tü nikirajakalü anain nüküjapa pütchi. Jülüjasü naaʼin wanaapünaa sümaa tü nayaawatakalü aaʼu na wayuukana.
34 Nnojotsü eein wanee kasa mayaawaseka nutuma, nüküjapejeʼe namüin na nikirajüinkana jamaluʼuluin tia namüiwaʼapa naya.
35 Shiasaʼa aipouupa nümakalaka namüin na nikirajüinkana: «Anashii walatüle waneemüin saʼata palaakat».
36 Noʼunayaa namapa napüshuaʼa na wayuukana noʼuniraka na nikirajüinkana tü anuwakat nümaa,* eejatka waneirua anuwa oʼunaka wanaa namaa.
37 Sukumajaʼalaa sümakalaka wanee wawai shiroku tü palaakat. Miyoʼu maʼin tü sümünakat* palaa, epirajaweesü tü anuwakat sutuma.
38 Atunkapejeʼe neʼe Jesús süchiiruajee tü anuwakat sümaa kekiipalain nia. Nüchijinnaka natuma na nikirajüinkana sünain namüin nümüin: «Ekirajüikalee, jalia waya, ¿outajanakai neʼe waya puʼupala?».
39 Nütamaaka, nüchiaaka tü wawaikat otta tü palaakat jee nümakalaka sümüin: «¡Kaseesün! ¡Jimata pia!». Shiimalaʼalaa sümaka tü palaakat süchikijee tia.
40 Anuuka nünüiki Jesús namüin: «¿Jamüshii mmotkaʼa jia? ¿Kanoulayaashiikaijeʼe jia?».
41 Mmotkalaka maʼin naya jee namajiraaka: «¿Jaraikai wayuukai chii, jüüjüükai amüin wawai otta palaa?».
Noota
^ «Apünajaa tü pütchikat» maluʼulu tia suluʼu griego.
^ Pünaʼla tü pütchikat «Tü kasa alatakat sainküin mma» suluʼu tü kanüliakat «Jamaluʼulu pütchikat».
^ «Maʼakaajüle eejachin nia suluʼu anuwakat» maluʼulu tia suluʼu griego.
^ «Süshi palaa» eesü sümünüle.
