Tü nüshajalakat Mateo 4:1-25
4 Oʼuninnüshi Jesús chaa isashiipaʼamüin sükajee tü nüpülainkat Maleiwa. Shiasaʼa chapa nia chayaa, ooʼulakünüsü naaʼin nutuma chi Yolujaakai.
2 Outaka jamü Jesús süka naamajüshin pienchi shikii kaʼi.
3 Nümakalaka chi Yolujaakai nümüin: «Nüchonlejeʼe pia Maleiwa, eküülüjaa* putuma türa ipakalüirua».
4 Nusoutakalaka Jesús niʼipajee: «Müsü tü Karaloʼuta Nüchikimaajatkat Maleiwa: ‹Nnojotsü shiain neʼe katüin atuma noʼu wanee wayuu tü eküütkat, shia kataka atuma noʼu tü nünüikikat Jehová›».*
5 Nümaanaka Jesús nutuma chi Yolujaakai Jerusalénmüin, nüshaʼwaleʼeraka nia süraloʼu tü miichi aʼwaajüleekat Maleiwa.
6 Nümakalaka chi Yolujaakai nümüin: «Nüchonlejeʼe pia Maleiwa, pumutta pümata yaajee, ‹nüjüteena Maleiwa na aapiee nümaʼanajeejanakana süpüla nnojolin jamajüin pia› otta ‹najapuluʼujeechi pia suulia süsheʼetuʼulaain puuʼui sünain ipa›, mataasü sümakai tü Karaloʼuta Nüchikimaajatkat Maleiwa».
7 Nusoutakalaka Jesús niʼipajee: «Müsü tü Karaloʼuta Nüchikimaajatkat Maleiwa: ‹Nnojo puuʼulaküin naaʼin Jehová* chi Pümaleiwasekai süpüla pütüjaain saaʼu shiimainre pülashin nia›».
8 Süchikijee tia, nümaanaka Jesús nutuma chi Yolujaakai süraloʼumüin wanee uuchi miyoʼu maʼin. Niiʼiyatamaataka nümüin suumain wayuu sümaʼaleeya süwashirüin.
9 Nümakalaka chi Yolujaakai nümüin Jesús: «Taapeerü pümüin süpüshuaʼa türa piʼrakat püsapainkale pia sünain aʼwaajaa taya, jaʼitasü uwatuain neʼe».
10 Nusoutakalaka Jesús niʼipajee: «¡Puʼuna yaajee toulia Satanás! ‹Nia puʼwaajüinjachika Jehová* nümüiwaʼa, nia Pümaleiwaseka otta nia piʼyataainjachika amüin›, mataasü sümakai tü Karaloʼuta Nüchikimaajatkat Maleiwa».
11 Nuʼunakalaka chi Yolujaakai nuulia, nantaka waneinnua aapiee nümaʼanajeejana Maleiwa süpüla nakaalinjain Jesús.
12 Shiasaʼa mapa, naapapa Jesús süchiki nütaʼünüin Juan, nuʼunakalaka chamüin Galileamüin.
13 Shiasaʼa nuʼunapa chejee Nazaretjee, nukolojooka chamüin Capernaúm sotpaʼa palaakat, eere tü mmakat Zabulón sümaa Neftalí.
14 Akolojooshi nia chamüin süpüla shikeraajüinjatüin tü nümatüjütkalia paala Isaías, chi nünüikimaajachikai Maleiwa, tü makat mayaa:
15 «Galilea, tü mma eere kepiain wayuu nnojotkat judíoin, eere tü mmakat Zabulón sümaa Neftalí, chakat süpünaluʼu tü palaakat, wopumüin sünain tü süchikat Jordán.
16 Müsü kojokai saaʼin piʼyuushi paala saaʼu tü mmakat Galilea, mapajeʼe shiʼrakai saaʼin wanee luusa. Mayaainjeʼe müin kojokai saaʼin piʼyuushi paala naaʼu na wayuu chajanakana suluʼu tia mmakat saaʼujee outajanain naya, müitpa chuwatuuikai saaʼin naaʼu».
17 Soʼujeʼereeya tia, yootowaishi Jesús sümaa wayuu sünain maa: «Anashii jiyaawajaale suulia jaainjala süka sülüʼülüin nükalia Maleiwa süpüla aluwatawaa chejee iipünaajee», maʼwaishi nia.
18 Wanaa sümaa warai nümüin chaa sotpünaa tü palaa kanüliakat Galilea, niʼrüin piamashii wayuu pawalaawashii. Ajunaʼatshii naya tü nakusuinkat shiroku tü palaakat süka olojuliin naya jime. Simón nünülia wanee, eeshi Pedro nümünüle jee müshia chi wane, Andrés nünülia.
19 Nümakalaka Jesús namüin: «Anashii tamaatalai jia, jüchajaweenaka nachiki wayuu wanaa tamaa maʼaka jüchajaain süchiki tü jime julojokot».
20 Napütamaataka tü nakusuinkat, noʼunaka nümaa.
21 Mamüin aka tüsa, niʼraka piamashii wayuu pawalaawashii, Santiago nümaa Juan, na nüchonniikana Zebedeo. Eejana naya nümaa chi nashikai suluʼu tü anuwakat sünain aruwentajaʼalaa tü nakusuinkat, nuunejaakalaka naya Jesús.
22 Nashakanuwaakalaka suluʼujee tü anuwakat sümaa napütüin chi nashikai, noʼunakalaka nümaa Jesús.
23 Oʼunushi Jesús sainküinpünaa tü mmakat Galilea sünain nikirajüin wayuu suluʼupünaa tü ekirajüleekat nüchiki Maleiwa. Aküjashi nia pütchi anasü süchiki niainjachin aluwataain Maleiwa saaʼu wayuu. Anasü nutuma wayuu eekai ayuulin sutuma ayuulii eekai eein.
24 Saapünakalaka nüchiki Jesús sainküinpünaa tü mmakat Siria. Antinnüsü nümüin wayuu eekai ayuulin, eekai alin maʼin wanee kasa sünain, eekai yolujaasirüin, eekai koʼuchichajaaralin jee eekai masaʼain. Anakalaka naya nutuma Jesús.
25 Wainma wayuu oʼunakana nüchiirua Jesús. Eejatü wayuu Galileajeʼewat, eejana na chejeʼewaliikana suluʼu tü kanüliakat Decápolis,* eejana na chejeʼewaliikana Jerusalénjee, Judeajee otta eejana na chejeʼewaliikana wane saʼata tü süchikat Jordán.
Noota
^ «Pan» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ «Poloosü mma» eesü sümünüle.
