Karaloʼuta namüinjatka na chajanakana Roma 13:1-14
13 Nia Maleiwa aapaka laülawaa namüin na sülaülakana mma, müsüjeseʼe jüüjüüinjatüin wayuu namüin. Niʼinaajala naya Maleiwa süpüla aluwatawaa.
2 Wayoutajaale sümaa tü namakat, wayouta achikirü tü kasa niʼinaajalakalü akuwaʼipa Maleiwa, kasalajaneetka tia wamüin.
3 Na wayuu aaʼinrakana kasa anasü, nnojotsü mmoluwaain naaʼin neema na sülaülashiikana mma, nayainjanainjaʼa mmoluwaain aaʼin na wayuu aaʼinrakana kasa mojusü. Nnojoleerü mmoluwaain paaʼin neema na sülaülashiikana mma paaʼinrüle kasa eekai anain, aneerü nanüiki püchiki.
4 Aʼyataashii na sülaülashiikana mma niʼipajee Maleiwa süpüla anain pukuwaʼipa, mmoluwaainjatpejeʼe paaʼin neema paaʼinrüle kasa mojusü, jama saapünüin laülawaa namüin süpüla kasalajanainjatüin saainjala wayuu natuma. Aʼyataashii naya niʼipajee Maleiwa süpüla kasalajanainjatüin natuma tü kasa mojusü saaʼinrakat wayuu.
5 Jülüjeekalaka jaaʼin tia süpüla jüüjüüinjanain jia namüin. Nnojoliipejeʼe jüüjüüinjanain neʼe jia namüin suulia naashichijaain jooʼomüin, jüüjüüinjana jia süpüla ayatüinña anain jaaʼin.*
6 Müshiijeseʼe juwalaajüinjanain tü nneerü aapünajatkat namüin na sülaülakana mma, süka jamüin, aʼyataashii naya nümüin Maleiwa waneepia.
7 Anasü jaapüle sümüin wayuu tü aapünajatkat sümüin. Chi wayuu aapünajachikai amüin tü nneerü awalaajünüinjatkat namüin na sülaülakana mma, anasü saapünüle nümüin. Chi wayuu oonoonüinjachikai amaa anüiki, anashi noonoonüle amaa. Chi wayuu kojutuinjachikai atumawaa, anashi kojutule nia atumawaa.
8 Nnojo jujuyaajüin wanee kasa, eepejeʼe wanee kasa jaaʼinrüinjatka, aijiraainjana jia waneʼewai jukua. Chi wayuu aikai apüla wayuu noonoo amaalü tü Pütchi Aapünakat nümüin Moisés.*
9 Anuu tü sümakat tü Pütchi Aapünakat nümüin Moisés: «Nnojo kawalaʼatain putuma puʼwayuuse,* nnojo puʼutuin saaʼin wayuu, nnojo puʼluwajüin, nnojo suchuntaain paaʼin wanee kasa naata kakorotshi». Anuupejeʼe tü saaʼinsükat maʼin tia pütchikat jee shiale wanee pütchi aluwataanaka anain: «Alinjatü püpüla wayuu maʼaka alin pia püpülajiraa».
10 Chi wayuu aikai apüla wayuu nnojotsü naaʼinrüin wanee kasa mojeetka atuma sukuwaʼipa. Aire wayuu nüpüla, noonoo amaalü tü Pütchi Aapünakat nümüin Moisés.*
11 Jaaʼinrüinjatü tia süka süntüin tü kaʼi müinjanakalü oʼu jüchijiraakai aaʼin, alüʼütsü maʼin tü kaʼi juʼtteʼennüinjanakalü oʼu. Alüʼütsü maʼin shia suulialeʼeya wekeroloiwaʼaya sünain anoujaa.
12 Alüʼütsü süpüla suwasajaain tü aikat, jaʼyuuweematüirü saaʼin kaʼikat. Nnojotkalaka anain waaʼinrüle tü kasa aaʼinnakat saʼaka piʼyuushi. Anasü shiale waʼatüin wanain jaʼiiwaʼaya kaʼi tü kasa naapakat wamüin Maleiwa süpüla watkaayainjatüin.
13 Anasü lotule wakuwaʼipa sünain tü kasa waaʼinrakat. Müinjana waya maʼaka naaʼin na wayuu aaʼinrakana wanee kasa eeiwaʼaya kaʼi, nnojo maaʼin waaʼin sünain miʼiraa, nnojo wepeʼrüin, nnojo waʼluwajiraain wakuwaʼipa* jee nnojo maapülin waaʼin sünain aaʼinraa kasa mojusü,* nnojo watkaain otta nnojo wachumujüin saaʼujee wanee kasa.
14 Shia anaka aluʼu jüshatüle nukuwaʼipa chi Señotkai Jesucristo. Nnojo jukumajüin suluʼu jikii jaaʼinrajanain tü kasa mojusü suchuntaakat jiʼiruku.
Noota
^ Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
