Karaloʼuta namüinjatka na chajanakana Roma 15:1-33
15 Na anoujashii katchinkana anoula, nakaalinjainjana na matsüinkana anoula. Nnojotsü jülüjainjatüin neʼe naaʼin nakuwaʼipa namüiwaʼa.
2 Anashii jaaʼinrüle waneʼewai jukua wanee kasa talatüinjatkalü atuma saaʼin wayuu, tü anainjatkalü atuma sukuwaʼipa jee tü katchinjatkalü atuma saaʼin.
3 Jaʼitakajeʼe neʼe Cristo nnojotsü kapülain naaʼin nukuwaʼipa nümüiwaʼa, shia naaʼinraka tü aküjünakat suluʼu tü Karaloʼuta Nüchikimaajatkat Maleiwa, tü makat mayaa: «Tü püliajatkat sutuma wayuu, taliajatiaʼaya shia sutuma».
4 Süpüshuaʼa tü pütchi ashajünakat sümaiwa paala, ashajünüsü süpüla wekirajünüinjanain sünain. Shia waʼatapajaka weʼrüinjanain kasa anasü sünainjee wachecherüin waaʼin otta sünainjee sümülialaain waaʼin sutuma tü sümakat tü Karaloʼuta Nüchikimaajatkat Maleiwa.
5 Kasataalejeseʼe katchin jaaʼin nutuma chi Maleiwakai otta nümülialüin jaaʼin. Tachuntuin nümüin wanaawainjatüin tü jülüjakat jaaʼin sümaa tü jülüjakat naaʼin Cristo Jesús.
6 Suluʼujee tia, paaʼinweena maʼin jia sünain aʼwaajaa chi Maleiwakai, chi Nüshikai chi Waseñotsekai Jesucristo.
7 Kamaneejiraainjana jia maʼaka kamaneein Cristo jümüin, nuʼwaajüneechika Maleiwa suluʼujee tia.
8 Taküjeein jümüin anashiin nümüin Cristo nachepchiainjachin nia na judíokana süpüla nüküjainjachin namüin nikeraajüin Maleiwa tü nümakat otta süpüla nüpansaajüin tü pütchi nüküjatüjütkalia Maleiwa namüin natuushinuu na judíokana
9 jee süpüla nuʼwaajünüin chi Maleiwakai sainküinpünaa tü mmakat saaʼu nümüliajülin. Shiaʼaya ashajünaka achiki tia suluʼu tü Karaloʼuta Nüchikimaajatkat Maleiwa, tü makat mayaa: «Taʼwaajeechi pia suʼupala wayuu sainküinpünaa tü mmakat, eeʼirajeechi taya pümüin süpüla taʼwaajüinjachin pia».
10 Anuu tü aküjünakalia suluʼu tü Karaloʼuta Nüchikimaajatkat Maleiwa: «Talata jaaʼin jia wayuu nnojoliikana judíoin, talata jaaʼin wanaa namaa na wayuu nüpüshikana Maleiwa».
11 Jee eesü wanee pütchi suluʼu tü Karaloʼuta Nüchikimaajatkat Maleiwa, müsü mayaa: «Juʼwaaja Jehová* jia wayuu nnojoliikana judíoin. Kasataalejeseʼe suʼwaajüin nia wayuu maʼleekalia».
12 Anuu wanee pütchi nüshajala Isaías müsü mayaa: «Eejeechi wanee nülüin* Jesé, anteechi nia süpüla aluwatawaa saaʼu wayuu maʼleekalia. Anoujeerü wayuu sünain shiʼreerüin kasa anasü nutuma».
13 Achuntushi taya jüpüleerua nümüin chi Maleiwa aküjakai süchiki shiʼrüinjatüin wayuu kasa anasü nutuma. Tachuntuin nümüin talatüinjanain jia jee jimatajatüin jaaʼin nutuma saaʼujee jiʼitaain jaaʼin nünain. Tachuntuinña nümüin junoujainjanain sünain jiʼreenain kasa anasü nutuma saaʼujee naapüin jümüin tü nüpülainkat.
14 Tawalayuwaa, tatüjaa aaʼu wayuuin kamaneeshii maʼin jia otta wattain saalii tü kasa jütüjaakalü aaʼu, eekalaka süpüla jüchiaajiraain.
15 Eepejeʼe waneirua kasa tapansaajeeka jümüin, müshijeseʼe tashajüin tachikuaʼa jümüin süpüla tasoʼirajatüin jaaʼin sünain. Taainjain tia süka kamaneein maʼin chi Maleiwakai tamüin.
16 Aʼyataashi taya nümüin Cristo Jesús sainküinpünaa tü mmakat, shia taʼyataaka maʼin anain eʼikajaa tü pütchi anakat maʼin* nüchiki Maleiwa süpüla müinjatüin wayuu maʼaka saaʼin wanee kasa anasü asülajuushi nümüin, wuleka akuwaʼipa sükajee tü nüpülainkat Maleiwa.
17 Talatüshi maʼin taya süka nikirajanain taya Cristo Jesús jee talatüshi taya sünain aaʼinraa tü nuluwataakalü anain Maleiwa.
18 Nnojoishi taya aashajaainjachin süchiki wanee kasa naata suulia tü kasa naainjakat Cristo takajee süpüla soonooinjatüin wayuu maʼleekalia nümüin. Naainjain tia sükajee tü pütchi tojuʼitirakat jee sükajee tü kasa taainjakat.
19 Oonooshii naya wayuukana süka neʼrüin tü kasa pülasü naainjakat Maleiwa sükajee tü nüpülainkat. Müshijeseʼe taküjain tü pütchi anakat maʼin nüchiki Cristo, taküjain shia Jerusalénjee chamüinreʼeya Ilíricomüin.
20 Tayouta achikit taküjainjachin tü pütchi anakat maʼin nüchiki Cristo sümüin wayuu eekai saapüitpain nüchiki, suulia taʼyataajüin sünain wanee naata kaʼyataainshi.
21 Anuu tü ashajünakat suluʼu tü Karaloʼuta Nüchikimaajatkat Maleiwa, tü makat mayaa: «Na wayuu nnojoliikana aküjünüin amüin nüchiki, neʼreechi nia. Na wayuu nnojoliikana aapüin nüchiki, nayaawateerü aaʼu jamaluʼuluin tü pütchikat».
22 Shiaʼaya kapüleepuʼuka aaʼujee toʼunuin chaa jümaʼanamüin sünain anaʼlawaa jümüin.
23 Kettaaitpa taʼyataain sünain aküjaa pütchi suluʼu mma yaapünaa jee kakaliaichi maʼin taya oʼuneein chaa jümaʼanamüin sünain anaʼlawaa jümüin.
24 Chapünaajeechi taya jümaʼanapünaa toʼunapa Españamüin, cheechikalaka taya jeʼra kaʼi. Shiasaʼa toʼunajachipa Españamüin, jiʼikajaajeechi taya süseʼeruʼu wopukot.
25 Yapajapejeʼe taya müinmaʼa yaa süpüla oʼunaa Jerusalénmüin sünain aʼyatawaa napüleerua na wawalayuukana.
26 Na anoujashii chakana Macedonia jee müshiʼiya na chakana Acaya, anashiisü namüin nasülajüin namüin na anoujashii maʼletsesalii chakana Jerusalén.
27 Talatüshii naya wawalayuukana sünain asülajaa, mapajeʼe kojuyaalakai naaʼin noulia na nasülajakana amüin, jama nayain na chajanakana Jerusalén aküjain namüin tü kasa nümaʼanajeejatkat Maleiwa. Müshiijeseʼe nasülajüinjanain naya wawalayuukana wanee kasa namüin na chajanakana Jerusalén.
28 Mayaasü teitajüin süpüshuaʼa tü asülajuushikat namüin na anoujashiikana, oʼuneechi taya Españamüin. Talatapünaajeechika chaa jümaʼanapünaa.
29 Toʼunapeena chaa jümaʼanamüin, tatüjaa aaʼu meerüin takoloinkai saaʼin jümüin tü kasa anasü nümaʼanajeejatkat Cristo.
30 Tawalayuwaa, tachuntuin maʼin jümüin saaʼu nünülia chi Waseñotsekai Jesucristo otta saaʼu alin jüpüla wayuu sükajee naapüin Maleiwa tü nüpülainkat jümüin, süpüla juʼuraajüinjanain nümüin Maleiwa tapüleerua maʼaka toʼuraajüin nümüin.
31 Juchunta tapüleerua süpüla nnojolinjachin jamajüin taya natuma na manoujainsalii chakana Judea otta süpüla talatüinjanain na anoujashii chakana Jerusalén sümaa tü asülajuushikat namüin.
32 Anashiirejeʼeya nümüin Maleiwa toʼunuin chaa jümaʼanamüin, cheechijaʼaya taya sümaa talatüin maʼin taaʼin, talateetkalaka jaaʼin wanaa tamaa.
33 Kasataalejeseʼe eein jümaa jüpüshuaʼa chi Maleiwa aapakai jimataa aaʼin. Amén.*
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Nuurala» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
