Karaloʼuta nümüinjatka Tito 2:1-15
2 Anakajaʼa ayatüle paashajaain süchiki tü kasa pansaakat sümaa tü pütchi anasü ekirajünakalü anain.
2 Na wayuu laülaainnakana nayaawatüinjatü saaʼu tü kasa naaʼinrakat jee neisattüinjatü nakuwaʼipa, laülaainjatü naaʼin, anainjatü nanoula, alinjatü wayuu napüla otta atüjainjana naya achecheraa naaʼin.
3 Akaʼaya na jieyuu eekai laülaayuuinnain kojutuinjachi Maleiwa namüin, nnojoliinjana aküjain alawaa süchiki wayuu, nnojoliinjana epeʼrüliin naya jee ekirajüinjana naya sünain kasa eekai anain.
4 Suluʼujee tia nekirajeena na jieyuu tepichijakana noulia süpüla alinjanain napüla naʼwayuuse jee alinjanain napüla nachonnii,
5 laülaainjatü naaʼin, wuleinjatü nakuwaʼipa, naaʼinmajüinjatü nepia, wayuuinjana anashii naya jee jüüjüüinjana naya nümüin chi naʼwayuusekai, nnojoleetkalaka mojutuin sümüin wayuu tü nünüikikat Maleiwa.
6 Ayataʼaya püchiaain na tepichijayüliikana aaʼin süpüla laülaainjatüin naaʼin.
7 Anainjatü sukuwaʼipa süpüshuaʼa tü kasa paaʼinrakat süpüla süshatünüinjatüin pukuwaʼipa. Laülaainjatü paaʼin pikirajapa sünain kasa eekai anain
8 jee anainjatü pünüiki suulia shiyoujain pia wayuu, japüijeenaka na weʼipolokana süka nnojoleerüin jamüin nanüiki wachiki.
9 Jüüjüüinjana na achepchieekana sünain kasa süpüshuaʼa namüin na nalaamainkana, naaʼinrüinjatü tü namakat, nnojoluinjatü mojuin nanüiki nasoutapa namüin,
10 nnojoluinjatü naʼluwajüin wanee kasa noulia, jaʼyainjatü saaʼu nakuwaʼipa wayuuin loto akuwaʼipachii naya, aneetkalaka pütchi süchiki tü nikirajakalü anain Maleiwa, chi Oʼtteʼerakai waya.
11 Atüjaana aaʼuchi kamaneein maʼin chi Maleiwakai, jama nuʼtteʼerüin wayuu süpüshuaʼa.
12 Sutuma watüjaain saaʼu kamaneein chi Maleiwakai, wayouteerü süpüshuaʼa tü nnojotkat pansaain sümaa tü nüchekakat jee tü kasa mojusü suchuntaakat saaʼin wayuu, laülaajeetkalaka waaʼin, loteerü wakuwaʼipa otta waʼwaajeechi Maleiwakai maaʼulu yaa
13 sümaʼainruʼu waʼatapajüin tü kasa anasü weʼrüinjatkat mapeena otta sümaʼainruʼu sütüjaain saaʼu wayuu pülashin maʼin chi Maleiwakai nümaʼaleeya Jesucristo, chi Oʼtteʼerakai waya.
14 Aapajiraashi nikii waaʼu süpüla niyuʼluinjanain waya saʼakajee kasa mojusü jee wulesü wakuwaʼipa nutuma. Wounteetkalaka waaʼinrüin kasa anasü süka süpüshuaʼa waaʼin.
15 Ayata paashajaain süchiki tia, pükatsüinra saaʼin wayuu jee püchiaa shia, jama saapünüin pümüin laülawaa süpüla paaʼinrüin tia. Nnojo puuʼulaain mojutuin pia sutuma wayuu.
