Eeshii na aküjakana anain maʼin naashajeʼerüle wanee wayuu wanee Biblia eere süshajünüin jamaluʼuluin waneʼewai sukua tü pütchikat. Müle sukuwaʼipa tia naashin, niyaawataleejeeria jamaluʼuluin tü pütchi sümaiwajatkat. Nnojotpejeʼe müin sukuwaʼipa tia. Anuu waneirua pütchi wayaawataka akajee jamüin nnojotka müin tia:

• Nnojotsü wanaawain süshajia sünüikipala wayuu, naata tü suchuntiakat jee naata tü sukuwaʼipakat. Chi wayuu kanüliakai Samuel Driver, ekirajüshi hebreo. Naashin niakai, naatayaa müsü sukuwaʼipa sünüikipala wayuu, süshajia tü pütchikat, tü sukuwaʼipakat otta naata sukuwaʼipa shiʼitaaya wanee pütchi. Tü jülüjakat naaʼin wanee wayuu oʼunusü süchiirua tü sukuwaʼipakat nünüikipala. Naashin Samuel Driver, nnojotsü wanaawain tü pütchi nujuʼitirakat wanee wayuu.

• Süshajünüle suluʼu tü Bibliakat jamaluʼuluin sukuwaʼipa waneʼewai sukua tü pütchikat, nnojoleerü pansaain shia jee naateerü neʼe tü aküjüneekalü achiki, jama naatayaa müin sukuwaʼipa süshajia sünüikipala wayuu jee nnojotsü wanaawain  suchuntia sümaa hebreo, arameo otta griego, tü ashajünakalü aluʼu tü Bibliakat sümaiwa paala.

• Eeʼiratüsü sukuwaʼipa wanee pütchi wanaapünaa sümaa tü aashajaanakalü achiki.

Eesü waneirua pütchi suluʼu tü Bibliakat keraaka süpüla wanaawain süshajia sümaa tü anüikii sümaiwajatkat, eejeepejeʼe naaʼin wanee wayuu suulia nuʼwanajüin tia.

Anuu waneirua pütchi wayaawataka akajee nnojoluin anain süshajünüle suluʼu tü Bibliakat jamaluʼuluin sukuwaʼipa waneʼewai sukua tü pütchikat.

• Tü pütchi ashajünakat suluʼu tü Bibliakat süpüla süküjünüin nutunkuin wanee wayuu shiaʼaya neʼe tü ashajünakat süpüla süküjünüin outuin wanee wayuu (Mateo 28:13; Juan 11:11). Shiale aküjüneein achiki outuin wanee wayuu, shia nashajawaika na ashajüshiikana tü Bibliakat tü pütchikat «outaa» süpüla nayaawatüin saaʼu na aashajeʼetshiikana (1 Corinto 7:39; 15:51; 1 Tesalónica 4:13; 2 Pedro 3:4).

• Nüshajüin Pablo suluʼu Éfeso 4:14, tü pütchi makat: «Sukuwaʼipa süshaitia wayuu süka dado». Tü aküjüneekalü achiki shia eepuʼuin wayuu emeejapuʼuka shiʼipolo süka dado. Matüjaajupejeʼe aaʼu tia süshajünapa suluʼu waneirua anüikii. «Suulia wemeejünüin sutuma wayuu eekai kemeejaralüin», müsü süshajia tia süpüla pansaain shia.

• Tü pütchi suluʼukat Roma 12:11, «müshii poolotokoi naaʼin sutuma nüpülain Maleiwa» meerü neʼe süshajia shiale ashatünüin tü pütchikat suluʼu griego. «Juuʼulaa yalayalaiwa jaaʼin sutuma tü nüpülainkat Maleiwa» mapajeʼe süshajia shiiʼiree pansaainjatüin tü aküjüneekalü achiki.

• Soʼu nikirajüin Jesús saaʼu wanee uuchi, nuchuntuin wanee pütchi makat: «Anakuwaʼipalii na maʼletsekana aaʼin» (Mateo 5:3, Biblia de Jerusalén). Suluʼu kojuyasü anüikii nnojotsü pansaain süshajünüle tü pütchikat «na maʼletsekana aaʼin» eesüjaʼa suwataale neʼe shikiiruʼu wayuu nnojoluin pansaain wanee wayuu, nnojoluin katsüin saaʼin otta nnojoluin süchajaain sukuwaʼipa süpüla saaʼinrüin wanee kasa. Nüküjain Jesús nnojoluin talatüin naaʼin wanee wayuu sutuma eein nümaʼana  tü kasa choʼujaakat nümüin, tü talatakalü atuma naaʼin shia niyaawatüle saaʼu choʼujaain nümüin nuʼuninnüin akuwaʼipa nutuma Maleiwa (Lucas 6:20). Shia anaka aluʼu müle süshajia tü pütchikat: «Na ayaawatakana saaʼu choʼujaain chi Maleiwakai namüin» jee shiale «Jia eʼrakana sünain choʼujaain chi Maleiwakai jümüin» (Mateo 5:3; Tü Nüchikimaajatkat Jesucristo).

Wayaawataka saaʼu nnojoluin shiain eʼitaanajatüin jamaluʼuluin waneʼewai sukua tü pütchikat suluʼu tü Bibliakat. Na ashajüshiikana tü Bibliakat nachajaainjatü maʼin sukuwaʼipa süpüla nashajüinjatüin tü aküjüneekalü achiki suluʼu tü anüikii ashajünakalü aluʼu tü Bibliakat sümaiwa. Nashajüinjatü wanee pütchi wanaapünaa sümaa sukuwaʼipa tü nanüikipalakat, suluʼujee tia mapüleejeerü aashajeʼeraa tü Bibliakat.

Nnojotsü naatainjatüin maʼin suchuntia tü pütchikat. Nüshajüle wanee wayuu tü Bibliakat jee niʼitaale neʼe tü anakat saaʼin nümüin, nuʼwanajaajeerü tü ashajuushitüjütkalia suluʼu, niʼitaajeerü neʼe wanee kasa anashiikat saaʼin nümüin jee nüsüʼünneʼereerü süpüshi tü pütchi eetüjütkalia. Mayaainjeʼe mapüleein aashajeʼeraa wanee pütchi eekai sunoutuushin, müle sukuwaʼipa tü Bibliakat, nnojoleerü nütüjaain maʼin aaʼu chi aashajeʼetshikai jamüin maʼin sünüiki.

Wanee wayuu ashajakai tü Bibliakat eesü nüshajüle wanee pütchi wanaawaka sümaa tü nunoujakalü anain. Anuu tü aküjünakat suluʼu Mateo 7:13: «Watta naalii na oʼunakana suluʼupünaa tü wopu jerutsükat, tü kaluʼukalü outaa». Eeshii waneinnua wayuu ashajülii tü Bibliakat eʼitaakana tü pütchikat «siki chuwatüsü», nashajüin tia süka nanoujain sünain, nnojotka nashajüin tü pütchikat «outaa». Shiapejeʼe ashajünatüjülüin sümaiwa suluʼu griego.

Sotuinjatü naaʼin na ashajüshiikana tü Bibliakat süshajünatüjülin suluʼu sünüikipala wayuu maʼleekalia, maʼaka naaʼin na kepiakana wünaʼapü, na arüleejüliikana jee na ejimejüliikana (Aluwataaushikana 4:13). Anale maʼin süshajia tü Bibliakat, ayaawatüneerü aaʼu sutuma wayuu süpüshuaʼa. Pansaainjatü sünüiki tü Bibliakat, ayatajatü sünüikipala wayuu sutuma otta mapüleeinjatü ayaawataa saaʼu, nnojotsü eʼitaanajatüin pütchi eekai nnojoluin suchuntaajüin wayuu.

Wainma Biblia asünneʼennaka aluʼujee tü nünüliakat Jehová, aaʼinnüsü tia mayaainjeʼe eetüjülin tü nünüliakat Jehová suluʼu tü ashajuushi sümaiwajatkat (pünaʼla tü kanüliakat sooʼomüin pütchi A5). Eeʼiratünüsü nünülia Maleiwa suluʼu kojuyasü Biblia, shiʼitaanaka Señotkai süchikumüin otta eesü Biblia eere nnojoluin süpansaajünüin kanüliale chi Maleiwakai. Anuu tü sümakat Juan 17:26 suluʼu waneirua Biblia ashajünaka aluʼu nünüiki Jesús soʼu nuʼuraajüin:  «Shiʼraajüichipa pia wayuu tatuma» otta suluʼu Juan 17:6 müsü tü ashajünakat: «Neʼraajüichipa pia na wayuu piʼitaakana tajapuluʼu». Pansaale tü sümakat tü Bibliakat sümaa tü nümakat Jesús, müinjatü sünüiki: «Teʼraajirüinnapa naya tü pünüliakat» otta müinjatü sünüiki: «Teʼraajirüin pünülia na wayuu piʼitaakana tajapuluʼu».

Suluʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, tü palajatkat ashajünüin suluʼu inglés, eesü wanee pütchi makalü anülia «süchiki tü karaloʼutakat», anuu tü ashajünakat sünain tia pütchikat: «Nnojotsü shiain ashajünüin wanee pütchi eekai sunoutuushin maʼin süchiki tü nünüikikat Maleiwa. Shia waaʼinmaaka süshajünüin tü Bibliakat wanaapünaa sümaa tü anüikii süshajünakalü aluʼu paala, waaʼinrüin tia suʼttianainjee sajaʼttiamüinreʼeya. Pansaasü tia wanaapünaa sümaa tü wayuunaiki saashajaakat wayuu maaʼulu jee wachajaa akuwaʼipat süpüla nnojoluin suʼwanajaanüin tü pütchi aküjüneekat». Suluʼujee tia na wawalayuu aneekünakana süpüla nashajüin tü Biblia kanüliakat Namüinjatü na Wayuu Kepieenakana Suluʼu tü Mma Jeketükat, nachajaain sukuwaʼipa süpüla anainjatüin tü pütchikat jee wanaawainjatüin shia sümaa tü anüikii süshajünakalü aluʼu paala, nnojotsü neʼitaain pütchi eekai matüjaajuin aaʼu jee nnojotsü nounjuluin akuwaʼipa tü pütchi aküjüneekat achiki. Mapüleeka namüin na wayuukana naashajeʼerüin tü Bibliakat jee nanouja anainrü shiain ashajünüin maʼin tü pütchi eetüjütkalia suluʼu tü Bibliakat (1 Tesalónica 2:13).