Waʼwaajüin Jeʼwaa wanaa sümaa woutkajaain (Sl 22:22). Talatüshii napüshuaʼa na wayuu outkajaakana süpüla aʼwaajaa Jeʼwaa otta wainma kasa anasü neʼraka (Sl 65:4). Akooʼomüinraasü maʼin nanoula na wayuu ekirajaakana sünain tü Bibliakat noʼunapa semaanawai sünain tü outkajawaakat.

¿Kasa eeka süpüla paaʼinrüin süpüla noutkajaain na pikirajüinkana? Puuneja naya waneepia. Piiʼiyata namüin tü videokot ¿Kasache aainjünaka suluʼu tü Piichi Outkajaaleekat? jee püküja namüin kasa anasü neʼreetka noutkajaale (lff ekirajaaya 10). Eesü süpüla püküjain namüin wanee kasa pütüjaka sünainjee tü outkajawaakat jee shiale püküjain namüin tü ekirajünüinjatkalü anain sünain tü wane outkajawaakat. Paapa namüin na pikirajüinkana tü karaloʼuta ekirajünüinjatkalü anain otta eeshii süpüla pümaain naya sünain tü outkajawaakat. Shiale palajatka nukua chi pikirajüinkai sünain tü outkajawaakat, niyaawateerü aaʼu anashaatain maʼin tü paaʼinrakat nüpüleerua (1Co 14:24, 25).

SÜCHIKIJEE JÜNAJÜIN TÜ VIDEOKOT PÜKAALINJA NA PIKIRAJÜINKANA SÜPÜLA NOUTKAJAAINJANAIN, JUSOUTA SHIʼIPAJEE TÜÜ:

• ¿Kasa saaʼinraka Neeta süpüla suunejaain Jade sünain tü outkajawaakat?

• ¿Jamüsü talataka waaʼin nuutkajaale wanee wekirajüin?

• ¿Jamüsüche saaʼin Jade süntapa sünain tü outkajawaakat?