¿PIʼRÜIN tü naainjakat Abraham? Karüliashi nia, nuʼutee aaʼinchi chi nüchonkai. ¿Jamüsü naainjüinjatka tia? Palajana waashajeʼera süchiki tü alatakat süpüla kachoinjachin Abraham sümüin Sara.

Soto paaʼin kachoinjanain naya naashin Maleiwa. Tia kapüleesü saaʼin namüin süka laülaayuuin naya. Akaisaʼa Abraham nütüjaa aaʼu eein süpüla naainjüin Maleiwa kasa kapüleesü.

Alatüsü wanee juya süchikijee tia. Wanaa sümaa 100 nuuyase Abraham otta 90 suuyase Sara, kachonshii naya wanee joʼuu kanüliashi Isaac. ¡Nikeraajüin Maleiwa tü nünüikikat!

Miyoʼupa Isaac nütüjawee aaʼu Jeʼwaa nunoujule maʼin Abraham. Nuunejaka nia: ‹¡Abraham!› Nusouktaka Abraham: ‹¡Anii taya!› Nümaka Maleiwa: ‹Pümaa chi püchonkai, chi waneeshikai püchon, Isaac, eemüin tü uuchi teeʼiyatüinjatkat pümüin. Yala puʼuta naaʼin chi püchonkai›.

¡Mojusü naaʼin Abraham sutuma tia süka alin maʼin nüpüla chi nüchonkai! ¿Sotusü paaʼin kepiainjanain naashin Maleiwa nüchonnii Abraham suluʼu tü mmakat Canaán? ¿Ekeraajeetche tia ouktule Isaac? Nnojotsü nütüjaain saaʼu Abraham, ayatüshi oonooin nia nümüin Maleiwa.

Nantapa saaʼu tü uuchikat, nijittaaka Abraham Isaac otta niʼitaaka nia eeinjachire nuʼutuin naaʼin. Süchikijee niyuʼlaka tü rüikat süpüla nuʼutuin naaʼin. Wanaa sümaa tia nuunejaka nia wanee aapiee: ‹¡Abraham, Abraham!› Nusouktaka Abraham: ‹¡Anii taya!›

Nümaka Maleiwa: ‹Nnojo puʼutuin naaʼin chi jintüikai, tatüjaaipa aaʼu punoujuin maʼin tanain süka nnojolin paʼlijirüin chi waneeshikai püchon›.

¡Anoujushi maʼin Abraham nünain Maleiwa! Nütüjaa aaʼu mapüleein kasa nümüin Jeʼwaa otta eeshi süpüla nüsoʼireʼerüin naaʼin Isaac. Nnojotsü nücheküin Maleiwa ouktajachin Isaac nutuma Abraham, makalaka nukoʼojeʼerüin wanee anneerü sünain wanee wunuʼu, shiaka nuʼutuin aaʼin.