NÜTÜJAWEE aaʼu José ayatüle mojulaain na nuwalayuukana. Nümaka namüin: ‹Ajayajülii jia kasa eeka mojuin suluʼu woumain›.

Namaka nümüin: ‹Nnojo, nnojotsü waainjüin tia, wayuu anamia waya. Pawalaawashii sümaa 12 waya sümaiwa, akaisaʼa wanee wawala amülouichipa otta chi emülieekai ichaa piichipaʼa nümaa chi washikai›.

Nnojoluyaasü nunoujuin José tü nanüikikat. Nüpüreesajitka Simeón otta na wanee nuuʼulaain noʼunuin sümaa eküülü nepialuʼumüin. Nümaka namüin: ‹Jüntirüinjachi tamüin chi jümüliakai jüleʼejapa›.

Naleʼejapa Canaánmüin naküjaka nümüin chi nashikai tü alatakat namüin. Mojuka maʼin naaʼin Jacob, nümaka: ‹Amülouichipa José otta jooluʼu niaichipa Simeón amülouika. Nnojoleechi tajütüin Benjamín›. Sajaʼlajaapa tü eküütkat, nüjütaka Jacob Benjamín namaa na nuwalayuukana süpüla nasaajüin eküülü.

Niʼraka José na nuwalayuukana, talataka maʼin nia süka niʼrüin Benjamín. Nnojotsü natüjaain aaʼu niain José chi wayuukai. Naainjaka José wanee kasa süpüla nuuʼulaküin naaʼin na nuwalayuukana.

Nuluwataaka na aʼyataashiikana nümüin sünain eʼinaaja eküülü suluʼu natoleekase na nuwalayuukana otta niʼiteʼerüin wanee niitain suluʼu nütoleekase Benjamín. Wattapa naya nuluwataaka José na aʼyataashiikana nümüin nachiirua. Nasaʼwajapa naya namaka namüin: ‹¿Jamüsü juʼluwajaka niitain chi walaamainkai?›

Namaka: ‹Nnojotsü waʼluwajüin, juusütule shia nümaʼana wanee wawala, anashi juʼutule naaʼin›.

Makalaka nasaijüin tü natoleekasekat, nousütaka tü iitakat suluʼu nütoleekase Benjamín maʼaka piʼrüin suluʼu tü ayaakuaakat. Namaka na aʼyataaliikana: ‹Eeshii süpüla noʼunuin na waneeinua, niainjachi wamaaka Benjamín›. ¿Kaseetche naainjaka na nuwalayuukana?

Eitaashii naya nümaa Benjamín nipialuʼumüin José. Nümaka José namüin: ‹Eeshii süpüla juʼunuin jipialuʼumüin, niainjachi makataka Benjamín süpüla tachepchiain nia›.

Nümaka Judá: ‹Nnojoire tamaain chi jintüikai, oukteechi chi tashikai süka alin maʼin nia nüpüla, tayeechi püchepchiaka, puuʼulaa nuʼunai chi jintüikai›.

Nütüjaaipa aaʼu José nnojoluin mojulaain na nuwalayuukana, wekirajaa sünain kasa naainjaka José süchikijee tia.